Thenna bl-​Għarfien dwar Jehovah

“Hienja dawk li jisimgħu l-​kelma taʼ Alla u jħarsuha!”—LUQA 11:28.

1. Jehovah meta beda jikkomunika mal-​bnedmin?

JEHOVAH jħobb lill-​bnedmin u huwa interessat ferm fil-​benesseri tagħhom. Għalhekk, hija xi ħaġa naturali li hu jikkomunika magħhom. Din il-​komunikazzjoni bdiet fil-​ġnien taʼ Għeden. Skond Ġenesi 3:​8, darba minnhom, “għa[ll-ħabta ta]ż-żiffa tal-​jum,” Adam u Eva “semgħu ħoss [“leħen,” NW] il-​Mulej Alla.” Xi wħud jissuġġerixxu li dan jindika li Jehovah kellu d-​drawwa li jikkomunika maʼ Adam f’dan il-​ħin, forsi kuljum. Sew jekk dan hu veru u sew jekk le, il-​Bibbja tagħmilha ċara li Jehovah kien sab il-​ħin mhux biss biex jagħti l-​istruzzjonijiet lill-​ewwel bniedem imma wkoll biex jgħallmu dak li kellu bżonn ikun jaf sabiex ikun jistaʼ jieħu ħsieb ir-​responsabbiltajiet tiegħu.—Ġenesi 1:​28-30.

2. L-​ewwel koppja kif qatgħu lilhom infushom mill-​gwida taʼ Jehovah, u b’liema riżultat?

² Lil Adam u ’l Eva, Jehovah tahom il-​ħajja u l-​awtorità fuq l-​annimali u fuq l-​art kollha. Kien hemm ħaġa waħda biss li ma setgħux jagħmlu—li jieklu mis-​siġra taʼ l-​għarfien tat-​tajjeb u tal-​ħażin. Billi kienu influwenzati minn Satana, Adam u Eva m’obdewx il-​kmand t’Alla. (Ġenesi 2:​16, 17; 3:​1-6) Huma għażlu li jaġixxu b’mod indipendenti u ddeċidew għalihom infushom x’kien tajjeb u x’kien ħażin. Billi għamlu hekk, huma qatgħu lilhom infushom mill-​gwida taʼ Jehovah. Xi bluha! Il-​konsegwenzi taʼ dan kienu diżastrużi kemm għalihom u kemm għal nisilhom li kien għad irid jitwieled. Adam u Eva xjaħu u maż-​żmien mietu mingħajr ebda tama li jiġu rxoxtati. Id-​dixxendenti tagħhom wirtu d-​dnub u dak li ġab miegħu, il-​mewt.—Rumani 5:12.

3. Jehovah għala kkomunika maʼ Kajjin, u Kajjin kif irreaġixxa?

³ Minkejja l-​irvell f’Għeden, Jehovah kompla jikkomunika mal-​ħolqien uman tiegħu. Kajjin, l-​ewwel iben taʼ Adam u Eva, kien fil-​periklu li jħalli d-​dnub jirkbu. Jehovah wissieh li kien qed jilgħab man-​nar, u ħeġġu biex ‘jagħmel it-​tajjeb.’ Kajjin warrab dan il-​parir kollu mħabba u qatel lil ħuh. (Ġenesi 4:​3-8) B’hekk, l-​ewwel tliet bnedmin li qatt għexu ddisprezzaw id-​direzzjoni ċara li pprovdielhom dak li tahom il-​ħajja, dak Alla li jgħallem lin-​nies tiegħu għall-​ġid tagħhom. (Isaija 48:17) Żgur li Jehovah ħassu dispjaċut ferm minħabba f’dan!

Jehovah Jikkomunika mal-​Patrijarki tal-​Qedem

4. Jehovah dwar liema ħaġa kien fiduċjuż rigward id-​dixxendenti taʼ Adam u, b’dan f’moħħu, liema messaġġ taʼ tama ħabbar?

⁴ Għalkemm kellu d-​dritt li ma jkomplix jikkomunika mal-​bnedmin, Jehovah m’għamilx hekk. Hu kien fiduċjuż li kien se jkun hemm xi wħud mid-​dixxendenti taʼ Adam li jkunu għaqlin u jobdu d-​direzzjoni Tiegħu. Per eżempju, meta ħabbar il-​ġudizzju fuq Adam u Eva, Jehovah bassar li kellu jiġi ‘nisel’ li kien se jirreżisti lis-​Serp, Satana x-​Xitan. Meta jasal il-​waqt, ras Satana kienet se tiġi misħuqa u b’hekk jingħata d-​daqqa tal-​mewt. (Ġenesi 3:15) Din il-​profezija kienet messaġġ taʼ tama li jġib il-​ferħ lil “dawk li jisimgħu l-​kelma taʼ Alla u jħarsuha.”—Luqa 11:28.

5, 6. Jehovah b’liema modi kkomunika mal-​poplu tiegħu qabel l-​ewwel seklu E.K., u huma kif ibbenefikaw permezz taʼ dan?

⁵ Jehovah kkomunika maʼ patrijarki leali tal-​qedem, bħal Noè, Abraham, Iżakk, Ġakobb, u Ġob u għarrafhom ir-​rieda tiegħu. (Ġenesi 6:​13; Eżodu 33:1; Ġob 38:​1-3) Iktar tard, permezz taʼ Mosè hu ppreżenta kodiċi sħiħa taʼ liġijiet lill-​ġens taʼ Iżrael. Huma bbenefikaw b’ħafna modi permezz tal-​Liġi Mosajka. Billi mexa magħha, il-​ġens taʼ Iżrael kien maqtugħ apparti mill-​ġnus l-​oħrajn kollha bħala l-​poplu speċjali t’Alla. Alla żgura lill-​Iżraelin li jekk jobdu l-​Liġi, hu kien se jberikhom mhux biss materjalment imma spiritwalment ukoll, billi jagħmilhom saltna taʼ qassisin, ġens qaddis. Il-​Liġi pprovdiet saħansitra regolamenti dwar l-​ikel li jieklu u l-​indafa, u dawn kienu jgħinuhom biex jibqgħu f’saħħithom. Madankollu, Jehovah wissiehom ukoll dwar il-​konsegwenzi traġiċi li kienu se jiġu fuqhom jekk ma jobdux.—Eżodu 19:​5, 6; Dewteronomju 28:​1-68.

⁶ Maż-​żmien, ġew miżjuda kotba ispirati oħrajn mal-​lista taʼ kotba ispirati li jifformaw il-​Bibbja. Ir-​rakkonti storiċi rrakkontaw dwar il-​mod kif Jehovah ttratta mal-​ġnus u l-​popli. Il-​kotba poetiċi ddeskrivew il-​kwalitajiet tiegħu b’mod sabiħ ħafna. Il-​kotba profetiċi bassru kif kienet se titwettaq ir-​rieda taʼ Jehovah fil-​futur. Irġiel leali tal-​qedem studjaw dawn il-​kitbiet ispirati bir-​reqqa u applikawhom. Wieħed minnhom kiteb: “Fanal għal riġlejja l-​kelma tiegħek, u dawl fil-​mogħdija tiegħi.” (Salm 119:105) Lil dawk li kienu lesti li jisimgħu, Jehovah pprovdielhom tagħlim u dawl spiritwali.

Id-​Dawl Isir Iktar Ċar

7. Għalkemm Ġesù kien jagħmel il-​mirakli, għal xiex kien magħruf l-​iktar, u għala?

⁷ Sa l-​ewwel seklu, il-​gruppi reliġjużi Lhud kienu żiedu t-​tradizzjonijiet tal-​bniedem mal-​Liġi. Il-​Liġi bdiet tiġi applikata b’mod ħażin, u minflok ma kienet sors taʼ dawl spiritwali, kienet saret taʼ piż minħabba dawk it-​tradizzjonijiet. (Mattew 23:​2-4) Madankollu, fis-​sena 29 E.K., Ġesù deher bħala l-​Messija. Il-​missjoni tiegħu ma kinitx biss li jagħti ħajtu għall-​umanità, imma wkoll li ‘jixhed għall-​verità.’ Għalkemm kien jagħmel il-​mirakli, hu kien magħruf l-​iktar bħala “l-​Għalliem.” It-​tagħlim tiegħu kien bħal dawl jiddi li nifed minn ġod-​dlam spiritwali li kien qed jagħmi lin-​nies. Bir-​raġun, Ġesù stess qal: “Jiena d-​dawl tad-​dinja.”—Ġwann 8:12; 11:​28, NW; 18:37.

8. Liema kotba ispirati nkitbu fl-​ewwel seklu E.K., u l-​Kristjani tal-​bidu kif ibbenefikaw permezz tagħhom?

⁸ Iktar tard żdiedu wkoll l-​Evanġelji, erbaʼ rakkonti bil-​miktub dwar il-​ħajja taʼ Ġesù, u l-​ktieb taʼ l-​Atti, l-​istorja taʼ kif infirxet il-​Kristjanità wara l-​mewt taʼ Ġesù. Kien hemm ukoll l-​ittri ispirati li nkitbu mid-​dixxipli taʼ Ġesù, kif ukoll il-​ktieb profetiku taʼ l-​Apokalissi. B’hekk, biż-​żjieda taʼ dawn il-​kitbiet maʼ l-​Iskrittura Ebrajka, il-​lista taʼ kotba ispirati li jifformaw il-​Bibbja tlestiet. Bl-​għajnuna taʼ din il-​librerija ispirata, il-​Kristjani setgħu ‘jifhmu . . . x’inhu l-​wisaʼ u t-​tul, l-​għoli u l-​fond’ tal-​verità. (Efesin 3:​14-18) Setgħu jkollhom il-​moħħ taʼ Kristu. (1 Korintin 2:16) Minkejja dan, dawk il-​Kristjani tal-​bidu ma fehmux għalkollox kull aspett taʼ l-​iskopijiet taʼ Jehovah. L-​appostlu Pawlu kiteb lil sħabu fit-​twemmin: “Bħalissa naraw bħallikieku f’mera [“tal-​metall,” NW], mċajpar.” (1 Korintin 13:12) Mera bħal din tirrifletti l-​forma taʼ barra imma ma turix id-​dettalji kollha. Għalhekk, kien biss fil-​futur li kien se jkun possibbli li jifhmu iktar bis-​sħiħ dak li tgħid il-​Kelma t’Alla.

9. Liema dawl spiritwali ngħata matul “l-​aħħar jiem”?

⁹ Illum qegħdin ngħixu f’perijodu msejjaħ “l-​aħħar jiem,” perijodu karatterizzat minn żminijiet imwiegħra. (2 Timoteus 3:​1, Saydon) Il-​profeta Danjel bassar li matul dan il-​perijodu taʼ żmien “l-​għarfien veru [kellu] jsir abbundanti.” (Danjel 12:​4, NW) Għaldaqstant, Jehovah, il-​Komunikatur il-​Kbir, għen lil nies taʼ qalb onesta biex jifhmu t-​tifsir tal-​Kelma tiegħu. Miljuni taʼ nies issa jifhmu li Kristu Ġesù ngħata t-​tron fis-​smewwiet inviżibbli fl-​1914. Huma jafu wkoll li hu dalwaqt se jġib it-​tmiem tal-​ħażen kollu u jibdel l-​art f’ġenna globali. Dan l-​aspett importanti taʼ l-​aħbar tajba tas-​Saltna fil-​preżent qed jiġi pridkat maʼ l-​art kollha.—Mattew 24:14.

10. Matul is-​sekli, in-​nies kif irreaġixxew għall-​pariri li tahom Jehovah?

¹⁰ Iva, matul iż-​żminijiet Jehovah kkomunika mal-​bnedmin fuq l-​art u għarrafhom x’inhi r-​rieda tiegħu u x’inhu l-​iskop tiegħu. Il-​Bibbja tiddeskrivi lil ħafna li taw widen, applikaw l-​għerf divin, u ġew imberkin talli għamlu dan. Tgħid dwar oħrajn li warrbu l-​pariri li Alla tahom bl-​imħabba kollha, u mxew fit-​triq li twassal għall-​qerda li mxew fiha Adam u Eva. Ġesù ta tixbiha taʼ din is-​sitwazzjoni meta tkellem dwar żewġ toroq simboliċi. Waħda minnhom twassal għall-​qerda. Din hija wiesgħa u spazjuża, u fiha jimxu dawk il-​ħafna li jwarrbu l-​Kelma t’Alla. It-​triq l-​oħra twassal għall-​ħajja taʼ dejjem. Għalkemm hija dejqa, hi l-​mogħdija li fiha jimxu dawk il-​ftit li jaċċettaw il-​Bibbja għal dak li hi tassew, il-​Kelma t’Alla, u jgħixu fi qbil maʼ dak li tgħid.—Mattew 7:​13, 14.

Nuru Apprezzament għal Dak li Għandna

11. Il-​fatt li ħadna għarfien dwar il-​Bibbja u nemmnu f’dak li tgħid huwa evidenza taʼ xiex?

¹¹ Tinsab int fost dawk li għażlu li jimxu fit-​triq li twassal għall-​ħajja? Jekk iva, bla dubju taʼ xejn tixtieq li tibqaʼ fiha. Kif tistaʼ tagħmel dan? Irrifletti b’mod regulari u b’apprezzament fuq il-​barkiet li ġablek l-​għarfien dwar il-​veritajiet tal-​Bibbja. Is-​sempliċi fatt li int weġibt b’mod favorevoli għall-​aħbar tajba huwa evidenza tal-​barka t’Alla. Ġesù indika dan meta talab lil Missieru b’dan il-​kliem: “Nfaħħrek, Missier, Sid is-​sema u l-​art, għax inti dawn il-​ħwejjeġ ħbejthom lil min għandu l-​għerf u d-​dehen u wrejthom liċ-​ċkejknin.” (Mattew 11:25) Is-​sajjieda u l-​kolletturi tat-​taxxa ħadu s-​sens tat-​tagħlim taʼ Ġesù, waqt li l-​mexxejja reliġjużi, li kienu taʼ skola kbira, ma ħaduhx. Ġesù qal ukoll: “Ħadd ma jistaʼ jiġi għandi jekk il-​Missier li bagħatni ma jiġbdux lejja.” (Ġwann 6:44) Jekk ħadt għarfien dwar il-​Bibbja u temmen it-​tagħlim tagħha u timxi miegħu, din hi evidenza li Jehovah jkun ġibdek. Hija raġuni biex tithenna.

12. Il-​Bibbja b’liema modi tagħti dawl spiritwali?

¹² Il-​Kelma t’Alla fiha veritajiet li jġibu ħelsien, u tagħti dawl spiritwali. Dawk li jgħixu skond l-​għarfien li hemm fil-​Bibbja jinħelsu mis-​superstizzjonijiet, mit-​tagħlim falz, u mill-​injoranza li jiddominaw il-​ħajjiet taʼ miljuni taʼ nies. Per eżempju, minħabba li nafu l-​verità dwar ir-​ruħ, aħna meħlusin minn kwalunkwe biżaʼ li l-​mejtin jistgħu jagħmlulna l-​ħsara jew li l-​maħbubin tagħna li huma mejtin qegħdin isofru. (Eżekjel 18:​4, KŻ) Il-​fatt li nafu l-​verità dwar l-​anġli ħżiena jgħinna nevitaw il-​perikli taʼ l-​ispiritiżmu. It-​tagħlim dwar l-​irxoxt huwa taʼ faraġ għal dawk li mitilhom xi ħadd maħbub. (Ġwann 11:25) Il-​profeziji Bibliċi juruna fejn qegħdin fil-​medda taż-​żmien u jibnulna l-​fiduċja fil-​wegħdi t’Alla għall-​futur. Barra minn hekk, isaħħulna t-​tama li ngħixu għal dejjem.

13. Kif nibbenefikaw fiżikament billi nobdu l-​Kelma t’Alla?

¹³ Il-​prinċipji divini li hemm fil-​Bibbja jgħallmuna ngħixu b’mod li jġib benefiċċji fiżiċi. Per eżempju, nitgħallmu nitbiegħdu minn prattiċi li jħammġu l-​ġisem, bħall-​użu ħażin tat-​tabakk u drogi oħrajn. Nevitaw l-​abbuż taʼ l-​alkoħol. (2 Korintin 7:1) Il-​fatt li nobdu l-​liġijiet morali t’Alla jservi bħala protezzjoni mill-​mard li jiġi trasmess sesswalment. (1 Korintin 6:18) Billi nosservaw il-​parir t’Alla biex nevitaw l-​imħabba għall-​flus, ma neqirdux il-​paċi tal-​moħħ tagħna, bħalma għamlu ħafna, minħabba l-​ġiri wara r-​rikkezzi. (1 Timotju 6:10) B’liema modi bbenefikajt int fiżikament għax applikajt il-​Kelma t’Alla f’ħajtek?

14. L-​ispirtu qaddis x’effett għandu fuq ħajjitna?

¹⁴ Jekk ngħixu fi qbil maʼ dak li tgħid il-​Kelma t’Alla, Jehovah jagħtina l-​ispirtu qaddis tiegħu. Irrawmu personalità bħal dik taʼ Kristu, bi kwalitajiet sbieħ bħall-​ħniena u l-​mogħdrija. (Efesin 4:​24, 32) Iżjed minn hekk, l-​ispirtu t’Alla jipproduċi l-​frott tiegħu ġewwa fina—l-​imħabba, il-​ferħ, is-​sliem, is-​sabar fit-​tul, il-​qalb tajba, it-​tjieba, il-​fidi, il-​ħlewwa, u r-​rażna. (Galatin 5:​22, 23) Dawn il-​kwalitajiet jgħinuna biex ir-​relazzjonijiet li għandna m’oħrajn, inkluż il-​membri tal-​familja, ikunu relazzjonijiet li jġibulna l-​ferħ u jkollhom tifsir. Niksbu saħħa ġewwinija li tgħinna niffaċċjaw żminijiet diffiċli bil-​kuraġġ. Tistaʼ tara kif l-​ispirtu qaddis tejjiblek ħajtek?

15. Hekk kif inġibu ħajjitna fi qbil mar-​rieda t’Alla, kif nibbenefikaw?

¹⁵ Hekk kif inġibu ħajjitna fi qbil mar-​rieda t’Alla, insaħħu r-​relazzjoni li għandna maʼ Jehovah. Il-​konvinzjoni li hu jifhimna u jħobbna tkompli tikber dejjem iktar. Mill-​esperjenza tagħna stess nitgħallmu li hu jappoġġana meta ngħaddu minn żminijiet diffiċli. (Salm 18:19 [18:​18, NW]) Nagħrfu li hu tassew jismaʼ t-​talb tagħna. (Salm 65:3 [65:​2, NW]) Nibdew nistrieħu fuq il-​gwida li jagħtina hu, fiduċjużi li permezz tagħha se nibbenefikaw. U għandna t-​tama meraviljuża li fil-​waqt tiegħu Alla se jagħmel lill-​uħud leali tiegħu perfetti u jagħtihom il-​premju taʼ ħajja taʼ dejjem. (Rumani 6:23) “Ersqu lejn Alla, u hu jersaq lejkom,” kiteb id-​dixxiplu Ġakbu. (Ġakbu 4:8) Ħassejt int li r-​relazzjoni tiegħek maʼ Jehovah ssaħħet hekk kif sirt iktar qrib tiegħu?

Teżor li Ma Jitqabbel maʼ Xejn

16. Liema bidliet għamlu xi Kristjani fl-​ewwel seklu?

¹⁶ Pawlu fakkar lill-​Kristjani midlukin bl-​ispirtu taʼ l-​ewwel seklu li xi wħud minnhom darba kienu żienja, adulteri, omosesswali, ħallelin, rgħiba, skaren, nies insolenti, u ħattafa. (1 Korintin 6:​9-11) Il-​verità tal-​Bibbja qanqlithom biex jagħmlu bidliet kbar, u b’hekk ‘tnaddfu.’ Immaġina kif kienet tkun ħajtek mingħajr il-​veritajiet li jġibu ħelsien li tgħallimt mill-​Bibbja. Żgur li l-​verità hi teżor li ma jistaʼ jitqabbel maʼ ebda ħaġa oħra. Kemm aħna henjin li Jehovah jikkomunika magħna!

17. Ix-​Xhieda taʼ Jehovah kif ġew mitmugħin spiritwalment fil-​laqgħat Kristjani?

¹⁷ Iktar minn hekk, aħseb dwar kemm aħna mberkin permezz tas-​sħubija maʼ ħutna, li ġejjin minn ħafna razez differenti! “L-​ilsir leali u diskret” jipprovdi l-​ikel spiritwali fiż-​żmien xieraq, inkluż Bibbji, rivisti, u pubblikazzjonijiet oħrajn b’ħafna lingwi. (Mattew 24:​45-47, NW) Matul is-​sena 2000, ix-​Xhieda taʼ Jehovah f’ħafna pajjiżi rrevedew il-​punti prinċipali minn tmien kotba ewlenin taʼ l-​Iskrittura Ebrajka fil-​laqgħat tagħhom. Immeditaw fuq il-​ħajjiet taʼ 40 karattru Bibliku li huma kunsidrati fl-​Insight on the Scriptures. Studjaw madwar kwart mill-​ktieb L-​Aqwa Bniedem Li Qatt Għex u kważi l-​ktieb sħiħ Oqgħod Attent għall-​Profezija taʼ Danjel! Ġew kunsidrati sitta u tletin artiklu sekondarju mir-​rivista Torri taʼ l-​Għassa, barra minn 52 artiklu taʼ studju. Iktar minn hekk, in-​nies taʼ Jehovah ġew sostnuti bi 12-il ħarġa taʼ Il-​Ministeru tas-​Saltna u taħditiet pubbliċi kull ġimgħa dwar diversi suġġetti Bibliċi. X’abbundanza t’għarfien spiritwali għandna!

18. B’liema modi ningħataw l-​għajnuna ġewwa l-​kongregazzjoni Kristjana?

¹⁸ Madwar id-​dinja, iktar minn 91,000 kongregazzjoni jipprovdu appoġġ u inkuraġġiment permezz tal-​laqgħat u s-​sħubija flimkien. Ingawdu wkoll l-​appoġġ taʼ Kristjani maturi li huma lesti li jgħinuna spiritwalment. (Efesin 4:​11-13) Iva, ibbenefikajna bil-​kbir permezz taʼ l-​għarfien li ksibna dwar il-​verità. Aħna tassew henjin li għandna għarfien dwar Jehovah u li qed naqduh. Kemm hu veru l-​kliem tas-​salmista li kiteb: “Hieni l-​poplu li Jaħweh hu Alla tiegħu!”—Salm 144:15.

X’Tiftakar?

• Jehovah maʼ min ikkomunika fiż-​żminijiet taʼ qabel il-​Kristjanità?

• Id-dawl spiritwali kif sar iktar ċar fl-​ewwel seklu? fi żminijiet reċenti?

• Liema barkiet ingawdu jekk ngħixu skond l-​għarfien dwar Jehovah?

• Għala nithennew bl-​għarfien li għandna dwar Alla?

[Stampi f’paġna 8, 9]

Jehovah kkomunika maʼ Noè, Abraham, u Mosè u għarrafhom ir-​rieda tiegħu

[Stampa f’paġna 9]

Fi żmienna, Jehovah pprovda dawl spiritwali dwar il-​Kelma tiegħu

[Stampi f’paġna 10]

Aħseb dwar kemm aħna mberkin permezz tas-​sħubija maʼ ħutna, li ġejjin minn ħafna razez differenti!