Tħallix id-​Dubji Jeqirdulek il-​Fidi

Tiġi ġurnata li tħossok veru f’saħħtek. Jisbaħ l-​għada u tħossok ma tiflaħx. F’daqqa waħda tħossok mingħajr saħħa u enerġija. Rasek tibda tuġgħek u tħoss ġismek imfarrak. X’ġara? Mikrobi perikolużi għelbu s-​sistemi taʼ difiża f’ġismek u attakkaw organi vitali. Jekk ma jitwaqqfux, dawn l-​organiżmi li qed jattakkawk jistgħu jeqirdulek saħħtek għal dejjem, u saħansitra joqtluk.

M’GĦANDNIEX xi ngħidu, jekk ma tkunx f’saħħtek meta taqbdek xi infezzjoni, iktar hemm ċans li tibqaʼ taħtha. Per eżempju, jekk ġismek hu dgħajjef minħabba nuqqas taʼ nutriment, ir-​reżistenza tiegħek “tant tkun baxxa li l-​iċken infezzjoni tistaʼ tkun fatali,” jgħid Peter Wingate, kittieb dwar suġġetti mediċi.

Ladarba dan hu l-​każ, min se jagħżel li jgħix fejn hemm il-​ġuħ? X’aktarx li tagħmel kulma tistaʼ biex tiekol tajjeb u tibqaʼ f’saħħtek. U barra minn hekk, int probabbli tagħmel ħiltek kollha biex tevita li tieħu xi infezzjoni jew xi virus. Iżda, qiegħed int taġixxi bl-​istess mod rigward li tibqaʼ ‘sħiħ fil-​fidi’? (Titu 2:2) Per eżempju, toqgħod attent int mill-​periklu taʼ dubji qarrieqa? Dawn jistgħu faċilment jinvadulek moħħok u qalbek, u jħassrulek il-​fidi u r-​relazzjoni tiegħek maʼ Jehovah. Xi nies donnhom jinjorawh dan il-​periklu. Huma jħallu d-​dubji jirkbuhom minħabba li jħallu lilhom infushom bil-​ġuħ spiritwalment. Jistaʼ jagħti l-​każ li qed tagħmel hekk int?

Id-​Dubji—Dejjem Ħżiena?

M’għandniex xi ngħidu, mhux id-​dubji kollha huma ħżiena. Xi drabi, ikun hemm bżonn li taħsibha sew qabel temmen xi ħaġa sakemm tkun ċert mill-​fatti. Hija xi ħaġa perikoluża u qarrieqa, meta min jgħallmek ir-​reliġjon jgħidlek li għandek temmen b’għajnejk magħluqa bla ma taħseb xejn. Veru li l-​Bibbja tgħid li l-​imħabba “kollox temmen.” (1 Korintin 13:7) Kristjan li jħobb żgur li jkun lest li jemmen lil dawk li fil-​passat taw prova taʼ kemm kienu taʼ min jafdahom. Imma l-​Kelma t’Alla twissina wkoll biex ma ‘nemmnux kollox.’ (Proverbji 14:15) Xi drabi forsi jkollok raġun tiddubita lil min fil-​passat wera li ma kienx taʼ min joqgħod fuqu. “Jekk [il-qarrieq] ikellmek bil-​ħlewwa, temmnux.”—Proverbji 26:​24, 25.

Anki l-​appostlu Ġwanni jwissi lill-​Kristjani dwar fidi għamja. “Mhux lil kull xorta taʼ spirti [“espressjonijiet imnebbħa,” NW] għandkom temmnu,” hu jikteb. Minflok, “[l-espressjonijiet imnebbħa] stħarrġuhom, biex taraw ikunux ġejjin minn Alla.” (1 Ġwann 4:1) “Espressjoni,” tagħlim jew opinjoni, tistaʼ tkun tidher li ġejja minn Alla. Imma veru ġejja minnu? Li jkollok ftit tad-​dubju, jew li ma temminx xi ħaġa mill-​ewwel, jistaʼ jkun verament taʼ protezzjoni għaliex, bħalma jgħid l-​appostlu Ġwanni, “ħarġu fid-​dinja ħafna qarrieqa.”—2 Ġwann 7.

Dubji bla Bażi

Iva, taʼ spiss ikun hemm bżonn li teżamina l-​fatti bl-​onestà u bl-​umiltà biex tistabbilixxi l-​verità. Iżda dan m’huwiex l-​istess bħal meta nħallu dubji bla bażi u li jagħmlu ħsara jiżviluppaw f’moħħna u f’qalbna—dubji li jistgħu jġarrfu t-​twemmin u r-​relazzjonijiet li stabbilejna fis-​sod. Dawn id-​dubji huma deskritti bħala inċertezza fit-​twemmin jew fl-​opinjoni li spiss tfixklek milli tieħu deċiżjoni tajba. Tiftakar kif Satana infetta moħħ Eva b’dubji dwar Jehovah? “Tassew li Alla qalilkom: ‘La tiklux mis-​siġar kollha tal-​ġnien’?” hu staqsa. (Ġenesi 3:1) L-​inċertezza li nħolqot permezz taʼ din il-​mistoqsija, li kienet tinstemaʼ innoċenti, fixklet lil Eva milli tieħu deċiżjoni tajba. Dan hu t-​tip taʼ metodi li juża Satana. Bħal dak il-​bniedem li jikteb ittri taʼ malafama, hu sar espert fl-​insinwazzjonijiet, nofs veritajiet, u gideb. Satana qered ħafna relazzjonijiet b’saħħithom mibnija fuq il-​fiduċja permezz taʼ dubji qarrieqa li żeraʼ b’dan il-​mod.—Galatin 5:​7-9.

Id-​dixxiplu Ġakbu fehem sewwa kemm jistaʼ jkun taʼ ħsara dan it-​tip taʼ dubji. Hu jikteb dwar il-​privileġġ taʼ l-​għaġeb li għandna li nistgħu navviċinaw liberament lil Alla għall-​għajnuna meta nkunu għaddejjin mill-​provi. Imma Ġakbu jwissina li meta nitolbu lil Alla, ‘nitolbuh bil-​fidi, bla ma nitħassbu xejn.’ Dubji fir-​relazzjoni tagħna m’Alla jagħmluna qisna “mewġ tal-​baħar imqanqal u mqalleb bir-​riħ.” Insiru bħal “bniedem mifxul fih innifsu, u m’huwiex żgur mit-​triq li jagħżel.” (Ġakbu 1:​6, 8) Insiru inċerti dwar x’għandna nemmnu u ma nemmnux u dan iwassalna biex nibqgħu indeċiżi. Imbagħad, jiġrilna bħal Eva, naqgħu vittmi għal kull xorta taʼ tagħlim u filosofiji tax-​xitan.

Nibqgħu f’Saħħitna Spiritwalment

Mela, kif nistgħu nipproteġu ruħna minn dubji li jagħmlulna l-​ħsara? It-​tweġiba hija sempliċi għall-​aħħar: billi niċħdu bil-​qawwa l-​propaganda taʼ Satana u nieħdu vantaġġ bis-​sħiħ mill-​provvedimenti t’Alla biex jagħmluna “sħaħ fil-​fidi.”—1 Pietru 5:​8-10.

Huwa assolutament essenzjali li nżoqqu lilna nfusna tajjeb spiritwalment. Peter Wingate, l-​awtur li semmejna qabel, jispjega: “Anki meta jkun qed jistrieħ, il-​ġisem ikollu bżonn provvista kontinwa taʼ enerġija għal proċessi kimiċi u għall-​ħidma taʼ l-​organi vitali tiegħu; u l-​materjali taʼ ħafna mit-​tessuti għandhom bżonn jinbidlu kontinwament.” L-​istess jistaʼ jingħad dwar is-​saħħa spiritwali tagħna. Jekk ma nżoqqux lilna nfusna spiritwalment b’mod regulari, il-​fidi tagħna, bħal ġisem imċaħħad mill-​ikel, tibda iktar ma jmur jiġrilha l-​ħsara sakemm fl-​aħħar mill-​aħħar tmut. Ġesù Kristu enfasizza dan meta qal: “Il-​bniedem mhux bil-​ħobż biss jgħix, iżda b’kull kelma li toħroġ minn fomm Alla.”—Mattew 4:4.

Aħseb ftit. Fil-​bidu, kif bnejna fidi qawwija? “Il-​fidi . . . tiġi mis-​smigħ,” jikteb l-​appostlu Pawlu. (Rumani 10:17) Hu jrid ifisser li fil-​bidu aħna bnejna l-​fidi u l-​fiduċja tagħna f’Jehovah, fil-​wegħdi tiegħu, u fl-​organizzazzjoni tiegħu billi mantnejna ruħna bil-​Kelma Tiegħu. M’għandniex xi ngħidu, aħna mhux sempliċement blajna dak kollu li smajna. Għamilna bħalma għamlu n-​nies li kienu jgħixu fil-​belt antika taʼ Berija. ‘Kuljum bdejna nqallbu l-​Iskrittura biex naraw jekk dak li smajna kienx minnu.’ (Atti 17:11) ‘Seħħilna nagħrfu x’inhi r-​rieda taʼ Alla, x’inhu t-​tajjeb li jogħġbu, x’inhu perfett.’ Qgħadna attenti li dak li smajna kien minnu. (Rumani 12:2; 1 Tessalonikin 5:21) Minn dak iż-​żmien ’l hawn, x’aktarx li saħħaħna l-​fidi tagħna hekk kif bdejna naraw dejjem iżjed ċar li l-​Kelma t’Alla u l-​wegħdi tiegħu qatt ma jfallu.—Ġożwè 23:14; Isaija 55:​10, 11.

Attent li Ma Tmutx bil-​Ġuħ Spiritwalment

Issa l-​isfida hi li nżommu l-​fidi tagħna u nevitaw kull xorta taʼ inċertezza fit-​twemmin li tistaʼ ddgħajjef il-​fiduċja tagħna f’Jehovah u fl-​organizzazzjoni tiegħu. Biex nagħmlu dan irridu nkomplu neżaminaw l-​Iskrittura kuljum. L-​appostlu Pawlu jwissina li “fl-​aħħar taż-​żminijiet xi wħud [li fil-​bidu forsi jkunu jidhru li għandhom fidi soda] jitbiegħdu mill-​fidi u jagħtu widen għal spirti [jew, espressjonijiet imnebbħa] qarrieqa u għal tagħlim tax-​xjaten.” (1 Timotju 4:1) Dawn l-​espressjonijiet u tagħlim qarrieq joħolqu dubji fl-​imħuħ taʼ xi wħud u jbegħduhom minn Alla. Xi protezzjoni għandna? Li nibqgħu nkunu ‘mrawmin fil-​kliem tal-​fidi u fit-​tagħlim tajjeb li miegħu mxejna.’—1 Timotju 4:6.

B’sogħba, iżda, xi wħud illum jippreferu li ma jkunux ‘imrawmin fil-​kliem tal-​fidi’—saħansitra meta dan it-​trawwim u n-​nutriment huma disponibbli b’xejn għal kulħadd. Bħalma jindika wieħed mill-​kittieba tal-​Proverbji, huwa possibbli li tkun imdawwar b’ikel spiritwali bnin, u xorta waħda fil-​fatt la tiekol u lanqas tiddiġerixxi l-​ikel.—Proverbji 19:24; 26:15.

Din hi xi ħaġa perikoluża. Peter Wingate jgħid: “Meta l-​ġisem jibda jikkonsma l-​proteini tiegħu stess, saħħtu tibda tmajna.” Meta ma tibdiex tiekol, ġismek jibda juża r-​riżervi taʼ xaħam maħżun mal-​ġisem kollu. Meta dawn jispiċċaw, il-​ġisem jibda jikkonsma l-​proteina li hija essenzjali biex ikompli jikber u jsewwi t-​tessuti. L-​organi vitali jibdew jaħdmu ħażin. Imbagħad saħħtek malajr tibda tmur lura.

Xi wħud fil-​kongregazzjoni Kristjana tal-​bidu hekk ġralhom f’sens spiritwali. Huma pprovaw jgħixu mir-​riżervi spiritwali tagħhom. X’aktarx li ttraskuraw l-​istudju persunali, u saru dgħajfin spiritwalment. (Lhud 5:12) L-​appostlu Pawlu spjega dwar dan il-​periklu meta kiteb lill-​Kristjani Lhud: “Għandna nagħtu ħafna aktar kas taʼ dak li smajna, li ma mmorrux nitbiegħdu ’l barra mit-​triq.” Hu kien jaf kemm hu faċli li naqgħu vittmi taʼ drawwiet ħżiena jekk “inwarrbu salvazzjoni hekk kbira.”—Lhud 2:​1, 3.

Hu taʼ interess li xi ħadd nieqes min-​nutriment mhux bilfors ikun jidher marid jew magħlub. Bl-​istess mod, forsi xi ħadd ma jkunx jidher mill-​ewwel li jkun nieqes min-​nutriment spiritwali. Tistaʼ tkun tidher f’saħħtek spiritwalment saħansitra meta ma tkunx qed tieħu n-​nutriment xieraq—però għal żmien qasir biss! Jekk tkompli hekk, ma jistax jonqos li tiddgħajjef spiritwalment, tintrebaħ faċilment minn dubji bla bażi, u ma tkunx tiflaħ tiġġieled iebes għall-​fidi. (Ġuda 3) Int taf, anki jekk ħadd ma jinduna, sa liema punt qed iżżoqq lilek innifsek spiritwalment.

Għaldaqstant, ħu ħsieb l-​istudju persunali tiegħek. Id-​dubji iġġildilhom iebes. Li tinjora infezzjoni sempliċement għax tidher li mhix xi ħaġa serja, li ma tipprovax issolvi dubji li jibqgħu jinkwetawk, jistaʼ jġib konsegwenzi diżastrużi. (2 Korintin 11:3) ‘Veru li qed ngħixu fl-​aħħar jiem? Nistgħu nemmnu dak kollu li tgħid il-​Bibbja? Hija din verament l-​organizzazzjoni taʼ Jehovah?’ Satana jixtieq ħafna li jħawwel dubji bħal dawn f’moħħok. Tittraskurax l-​ikel spiritwali, għax b’hekk tistaʼ faċilment taqaʼ vittma taʼ tagħlim qarrieq. (Kolossin 2:​4-7) Ħu l-​parir li ngħata lil Timotju. Kun student ħerqan “tal-​Kotba Mqaddsa” sabiex tkun tistaʼ ‘tibqaʼ miexi f’dak li tgħallimt u emmint bis-​sħiħ.’—2 Timotju 3:​13-15.

Forsi jkollok bżonn l-​għajnuna f’dan. Il-​kittieb li kkwotajna qabel ikompli jgħid: “Fejn ikun hemm nuqqas serju taʼ nutriment tistaʼ ssir ħsara kbira lill-​organi diġestivi minħabba nuqqas taʼ vitamini u bżonnijiet oħra, u dawn jaslu fi stat li ma jkunux jistgħu jieħdu ikel sempliċi lanqas jekk jiġi provdut. Nies f’dan l-​istat forsi jkunu jeħtieġu, għal xi żmien, ikel li jiġi diġerit malajr.” Hemm bżonn taʼ attenzjoni speċjali biex il-​ġisem jeħles mill-​effetti taʼ nuqqas taʼ nutriment. Bl-​istess mod, xi ħadd li ttraskura serjament l-​istudju persunali tiegħu mill-​Bibbja forsi jkollu bżonn taʼ ħafna għajnuna u inkuraġġiment biex jikseb lura l-​aptit spiritwali tiegħu. Jekk int tinsab f’din is-​sitwazzjoni, fittex l-​għajnuna u aċċetta bil-​ferħ lil kulmin lest jagħtik daqqa t’id biex tibni mill-​ġdid is-​saħħa spiritwali tiegħek.—Ġakbu 5:​14, 15.

Tkunx Indeċiż ‘jekk Temminx jew Le’

Meta jqisu ċ-​ċirkustanzi tal-​patrijarka Abraham xi wħud forsi jħossu li hu kellu għalxiex jiddubita. Tistaʼ tidher bħala xi ħaġa naturali li tikkonkludi li ma kellux ċans ‘isir missier taʼ kotra kbira taʼ ġnus’—minkejja l-​wegħda t’Alla. Għala? Iva, skond minn kif jara l-​affarijiet il-​bniedem, ma tantx kien jidher li hu possibbli. Hu “ġieb quddiem għajnejh li ġismu kien mejjet għax kien għoddu laħaq il-​mitt sena, u mejjet ukoll kien ġuf Sara,” tgħid il-​Bibbja. Xorta waħda, hu rrifjuta assolutament li jħalli d-​dubji dwar Alla u dwar il-​wegħda tiegħu jinbtu f’moħħu u f’qalbu. L-​appostlu Pawlu jikteb: “Ma naqasx fil-​fidi tiegħu,” jew ‘qagħad itellaʼ u jniżżel jekk jemminx jew le.’ Abraham “żamm bis-​sħiħ li min kien għamillu l-​wegħda kien qawwi biżżejjed biex iżomm kelmtu.” (Rumani 4:​18-21) Hu kien bena relazzjoni persunali qawwija u fiduċjuża maʼ Jehovah tul ħafna snin. Għalhekk hu warrab kull dubju li setaʼ jdgħajjef din ir-​relazzjoni.

Int tistaʼ tagħmel l-​istess jekk ‘iżżomm quddiem għajnejk l-​eżempju tat-​tagħlim sħiħ’—jekk iżżoqq tajjeb lilek innifsek spiritwalment. (2 Timotju 1:13) Iċċekkinx il-​periklu tad-​dubji, imma ħudu bis-​serjetà. Satana qed jiġġieled bil-​bombi tal-​mikrobi spiritwali. Jekk tittraskura li tiekol tajjeb spiritwalment permezz taʼ studju persunali mill-​Bibbja u billi tattendi l-​laqgħat Kristjani, int tkun qed tistieden l-​attakki tiegħu. Agħmel użu tajjeb mill-​provvista abbundanti u f’waqtha taʼ ikel spiritwali provdut mill-​ilsir leali u diskret. (Mattew 24:45) Kompli ‘oqgħod għall-​kliem’ mimli saħħa u ibqaʼ ‘sħiħ fil-​fidi.’ (1 Timotju 6:3; Titu 2:2) Tħallix id-​dubji jeqirdulek il-​fidi.

[Stampi f’paġna 21]

Int kemm iżżoqq tajjeb lilek innifsek spiritwalment?