Għandek Int Spirtu Immortali?

“L-​ISKRITTURA kollha hija mnebbħa minn Alla, u tiswa biex wieħed jgħallem, iċanfar, iwiddeb u jrawwem fis-​sewwa,” kiteb l-​appostlu Pawlu. (2 Timotju 3:16) Iva, il-​Bibbja hija ktieb taʼ verità li ġej minn dak Alla veru, Jehovah.—Salm 83:19 [83:​18, NW].

Ladarba Jehovah hu l-​Ħallieq taʼ l-​affarijiet kollha, inkluż il-​bnedmin, hu jaf eżatt x’jiġrilna meta mmutu. (Lhud 3:4; Apokalissi 4:11) U fil-​Kelma ispirata tiegħu, il-​Bibbja, hu ta tweġibiet veri u sodisfaċenti għall-​mistoqsijiet dwar id-​dinja l-​oħra.

X’Inhu l-​Ispirtu?

Fil-​Bibbja, il-​kliem fil-​lingwa oriġinali tradott bħala “spirtu” bażikament ifisser “nifs.” Imma dan ifisser ferm iktar milli wieħed jieħu n-​nifs. Per eżempju, il-​kittieb tal-​Bibbja Ġakbu jistqarr: “Ġisem bla spirtu hu mejjet.” (Ġakbu 2:​26, KŻ) Għaldaqstant, l-​ispirtu hu dak li jagħti l-​ħajja lill-​ġisem.

Ma jistax ikun li din il-​forza li tagħti l-​ħajja hija biss in-​nifs, jew l-​arja, li jgħaddi mill-​pulmuni. Għala le? Għaliex wara li jieqaf in-​nifs, iċ-​ċelluli tal-​ġisem jibqgħu ħajjin għal perijodu qasir, jew bħalma tgħid The World Book Encyclopedia, “għal diversi minuti.” Għal din ir-​raġuni, l-​isforzi biex il-​ġisem jerġaʼ jingħata l-​ħajja jistgħu jirnexxu. Imma ladarba x-​xrara tal-​ħajja titlaq miċ-​ċelluli tal-​ġisem, kull sforz li jsir biex il-​ġisem jerġaʼ jingħata l-​ħajja jkun għalxejn. In-​nifs kollu, jew l-​arja, tad-​dinja ma jistax jagħti l-​ħajja lil saħansitra ċellula waħda. Mela, l-​ispirtu huwa l-​forza inviżibbli tal-​ħajja—ix-​xrara tal-​ħajja li żżomm iċ-​ċelluli u l-​persuna ħajjin. Din il-​forza tal-​ħajja hija sostnuta bin-​nifs.—Ġob 34:​14, 15.

Dan l-​ispirtu hu attiv biss fil-​bnedmin? Rigward dan, il-​Bibbja tgħinna naslu għal konklużjoni korretta. Is-​sultan għaref Salamun ammetta li l-​bnedmin u l-​annimali għandhom ilkoll l-​istess spirtu, u staqsa: “Min jaf jekk nifs il-​ħajja [“spirtu,” NW] tal-​bniedem jitlax ’il fuq, u nifs il-​ħajja [“spirtu,” NW] tal-​bhima jinżilx ’l isfel lejn l-​art?” (Koħèlet 3:​19-21) B’hekk, nistgħu ngħidu li kemm l-​annimali kif ukoll il-​bnedmin għandhom spirtu. Kif jistaʼ jkun dan?

L-​ispirtu, jew il-​forza tal-​ħajja, jistaʼ jitqabbel mal-​kurrent elettriku li jgħaddi minn ġo magna jew apparat. L-​elettriku inviżibbli jistaʼ jwettaq diversi affarijiet, skond it-​tip t’apparat li jħaddem. Per eżempju, heater tad-​dawl jistaʼ jagħmel is-​sħana, kompjuter jistaʼ jipproċessa l-​informazzjoni, u televixin jistaʼ jipproduċi l-​istampi u s-​sawnd. Madankollu, il-​kurrent elettriku qatt ma jieħu l-​karatteristiċi strutturali taʼ l-​apparat li jħaddem. Jibqaʼ sempliċement forza. Bl-​istess mod, il-​forza tal-​ħajja ma tieħu l-​ebda karatteristika tal-​ħlejjaq li lilhom tagħti l-​ħajja. M’għandha l-​ebda personalità jew abbiltà tal-​ħsieb. Il-​bnedmin u l-​annimali għandhom “l-​istess . . . nifs il-​ħajja [“spirtu,” NW].” (Koħèlet 3:19) Għalhekk, meta wieħed imut, l-​ispirtu tiegħu ma jibqax jeżisti f’xi qasam ieħor bħala ħliqa spirtu.

Allura, x’inhi l-​kundizzjoni tal-​mejtin? U x’jiġrilu l-​ispirtu meta wieħed imut?

“Fit-​Trab Terġaʼ Tmur”

Meta l-​ewwel bniedem, Adam, m’obdiex minn jeddu l-​kmand t’Alla, Hu qallu: “Bl-​għaraq taʼ ġbinek tiekol ħobżok, sakemm terġaʼ lura lejn l-​art, għax minnha int meħud. Għax trab int, u fit-​trab terġaʼ tmur.” (Ġenesi 3:19) Fejn kien Adam qabel ma Jehovah ħalqu mit-​trab? Imkien! Hu lanqas biss kien jeżisti. Għalhekk, meta Alla Jehovah qal li Adam kellu ‘jerġaʼ jmur fit-​trab,’ hu kien qed ifisser li Adam kellu jmut u jerġaʼ jsir parti mill-​elementi taʼ l-​art. Adam ma kienx se jmur f’xi qasam taʼ l-​ispirti. Mal-​mewt Adam kien se jerġaʼ jsir ineżistenti. Il-​kastig tiegħu kien il-​mewt—nuqqas taʼ ħajja—mhux xi trasferiment lejn qasam ieħor.—Rumani 6:23.

Xi ngħidu għall-​mejtin l-​oħrajn? Il-​kundizzjoni tal-​mejtin tintgħamel ċara f’Koħèlet 9:​5, 10, fejn naqraw: “Il-​mejtin ma jafu xejn; . . . għax ma jkunx hemm ħidma jew ħsieb, xjenza jew għerf, f’Art l-​Imwiet [“taħt l-​art,” Saydon] fejn inti sejjer.” Għalhekk, il-​mewt hija stat taʼ ineżistenza. Is-​salmista kiteb li meta wieħed imut, “toħroġ ruħu [“l-​ispirtu,” NW], lejn l-​art jerġaʼ jmur; jintemmu dakinhar ħsibijietu.”—Salm 146:4.

Jidher ċar li l-​mejtin ma jibqgħux jeżistu. Huma ma jistgħu jkunu jafu xejn. Ma jistgħux jarawk, jisimgħuk, jew ikellmuk. Huma la jistgħu jgħinuk u lanqas iweġġgħuk. Żgur li m’għandekx għalfejn tibżaʼ mill-​mejtin. Imma l-​ispirtu kif ‘joħroġ’ mill-​persuna meta tmut?

L-​Ispirtu ‘Jerġaʼ Lejn Alla’

Il-​Bibbja tistqarr li meta wieħed imut, “jerġaʼ nifs il-​ħajja [“l-​ispirtu,” NW] lejn Alla li tah.” (Qohelet 12:​7, Saydon) Ifisser dan li xi entità spirtu se tivvjaġġa letteralment minn ġo l-​ispazju għal quddiem il-​preżenza t’Alla? Xejn minn dan! Il-​mod kif il-​Bibbja tuża l-​kelma ‘jerġaʼ,’ jew ‘jerġaʼ lura,’ ma jirrikjedix moviment letterali minn post għal ieħor. Per eżempju, l-​Iżraelin li ma baqgħux leali ntqalilhom: “‘Erġgħu lura lejja, u jien nerġaʼ lura lejkom,’ jgħid il-​Mulej taʼ l-​eżerċti.” (Malakija 3:7) Li Iżrael ‘jerġaʼ lura’ lejn Jehovah kien ifisser li jdur lura minn kondotta ħażina u jerġaʼ jgħix fi qbil mat-​tjieba t’Alla. U li Jehovah ‘jerġaʼ lura’ lejn l-​Iżraelin kien ifisser li hu jagħti għal darb’oħra l-​attenzjoni favorevoli tiegħu lill-​poplu tiegħu. Fiż-​żewġ każi, li ‘jerġaʼ lura’ kien jinvolvi attitudni, mhux ċaqliq letterali minn post ġeografiku għal ieħor.

Bl-istess mod, meta fil-​mewt l-​ispirtu ‘jerġaʼ lejn’ Alla, ma jsir l-​ebda ċaqliq attwali mid-​dinja għall-​qasam tas-​sema. Ladarba l-​forza tal-​ħajja tkun ħarġet minn persuna, Alla biss jistaʼ jerġaʼ jagħtihielha. B’hekk, l-​ispirtu ‘jerġaʼ lejn Alla’ fis-​sens li kwalunkwe tama taʼ ħajja futura għal dik il-​persuna issa tiddependi totalment minn Alla.

Per eżempju, ikkunsidra dak li tgħid l-​Iskrittura dwar il-​mewt taʼ Ġesù Kristu. Luqa, il-​kittieb taʼ l-​Evanġelju, jirrakkonta: “Ġesù għajjat għajta kbira u qal: ‘Missier, f’idejk jien nerħi ruħi [“l-​ispirtu tiegħi,” KŻ].’ U kif qal hekk, ħarġet ruħu [jew, l-​ispirtu].” (Luqa 23:46) Hekk kif l-​ispirtu taʼ Ġesù ħareġ minnu, hu ma kienx letteralment fi triqtu lejn is-​sema. Ġesù dam tlett ijiem mejjet qabel ma ġie rxoxtat. Imbagħad, wara 40 jum telaʼ s-​sema. (Atti 1:​3, 9) Madankollu, meta kien qed imut, Ġesù fada l-​ispirtu tiegħu f’idejn Missieru, b’fiduċja sħiħa li Jehovah kellu l-​ħila jagħtih lura l-​ħajja.

Iva, Alla jistaʼ jagħti lura l-​ħajja lil dak li jkun. (Salm 104:30) Xi prospett grandjuż huwa dan!

Tama Ċerta

Il-​Bibbja tgħid: “Tiġi siegħa meta dawk kollha li jkunu fl-​oqbra [“tal-​mafkar,” NW] jisimgħu leħnu u joħorġu.” (Ġwann 5:​28, 29) Iva, Ġesù Kristu wiegħed li dawk kollha li qegħdin fil-​memorja taʼ Jehovah se jiġu rxoxtati, jew se jingħataw lura l-​ħajja. Fosthom żgur li se jkun hemm dawk li stinkaw biex jimxu fit-​tjieba bħala l-​qaddejja taʼ Jehovah. Imma miljuni oħrajn mietu mingħajr ma wrew jekk kinux fi qbil mal-​prinċipji taʼ tjieba t’Alla. Forsi ma kinux jafu dwar dak li jistenna minnhom Jehovah jew ma kellhomx ċans biżżejjed biex jagħmlu l-​bidliet meħtieġa. Individwi bħal dawn huma wkoll fil-​memorja t’Alla u se jiġu rxoxtati, għax il-​Bibbja tgħid: “Kemm it-​tajbin u kemm il-​ħżiena [“dawk li m’humiex twajbin,” NW] għad iqumu minn bejn l-​imwiet.”—Atti 24:15.

Illum, l-​art hija mimlija mibegħda u ġlied, vjolenza u tixrid taʼ demm, tniġġis u mard. Kieku l-​mejtin kellhom jerġgħu jgħixu fuq din l-​art, żgur li l-​ferħ li jirriżulta jkun għomru qasir. Imma l-​Ħallieq wegħedna li dalwaqt se jġib it-​tmiem fuq is-​soċjetà dinjija preżenti mmexxija minn Satana x-​Xitan. (Proverbji 2:​21, 22; Danjel 2:​44; 1 Ġwann 5:​19) Imbagħad ir-​realtà meraviljuża se tkun soċjetà umana mimlija tjieba—“art ġdida.”—2 Pietru 3:13.

F’dak iż-​żmien “ħadd minn min jgħammar hemm ma jgħid: ‘Jien marid.’” (Isaija 33:24) Anki l-​uġigħ marbut mal-​mewt se jkun spiċċa, għax Alla ‘se jixxotta kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.’ (Apokalissi 21:4) Xi prospett dan għal dawk li qegħdin fl-​“oqbra tal-​mafkar”!

Meta Jehovah se jneħħi l-​ħażen minn fuq l-​art, hu mhux se jeqred lit-​twajbin mal-​ħżiena. (Salm 37:​10, 11; 145:20) Fil-​fatt, “kotra kbira” taʼ nies “minn kull ġens u tribù, minn kull poplu u lsien” se tgħaddi mit-​tribulazzjoni l-​kbira li se teqred lid-​dinja mill-​agħar preżenti. (Apokalissi 7:​9-14) Għaldaqstant, se jkun hemm folla kbira lesta biex tilqaʼ lura lill-​mejtin.

Tixxennaq int biex tara mill-​ġdid lill-​maħbubin tiegħek? Trid tgħix għal dejjem f’Ġenna fuq l-​art? Allura trid tikseb għarfien eżatt dwar ir-​rieda t’Alla u l-​iskopijiet tiegħu. (Ġwann 17:3) Hija r-​rieda taʼ Jehovah li “l-​bnedmin kollha jsalvaw u jaslu biex jagħrfu l-​verità.”—1 Timotju 2:​3, 4.

[Stampa f’paġna 4]

“Trab int, u fit-​trab terġaʼ tmur”

[Stampa f’paġna 5]

L-​ispirtu jistaʼ jitqabbel maʼ l-​elettriku

[Stampa f’paġna 7]

L-​irxoxt se jġib ferħ dejjiemi