Ikseb Qalb li Togħġob lil Jehovah

“Oħloq fija qalb safja, o Alla, u spirtu qawwi ġedded fija.”—SALM 51:12 (51:10, NW).

1, 2. Għala għandha tinteressana qalbna?

KIEN m’ogħla hawn u kellu apparenza sabiħa. Malli rah, il-​profeta Samwel tant baqaʼ impressjonat li ħaseb li kien dan il-​wieħed, il-​kbir minn ulied Ġesse, li ntgħażel minn Alla biex ikun sultan wara Sawl. Imma Jehovah iddikjara: “Tħarisx lejn is-​sura tiegħu [taʼ dan l-​iben], jew it-​tul taʼ persuntu, għax jien diġà warrabtu. Għax il-​Mulej ma jarax bħalma jara l-​bniedem, dak biss li jidher fl-​għajn, imma l-​qalb.” L-​għażla taʼ Jehovah kienet waqgħet fuq iż-​żgħir taʼ Ġesse, David—“bniedem . . . għal qalbu.”—1 Samwel 13:14; 16:7.

2 Alla jistaʼ jaqra l-​qalb tal-​bniedem, bħalma wera biċ-​ċar iktar tard: “Jien hu l-​Mulej, li nifli l-​qalb u ngħarbel il-​ġewwieni, biex nagħti ’l kull wieħed skond imġibtu, skond ma jkun jistħoqq għemilu.” (Ġeremija 17:10) Iva, Jehovah ‘jifli l-​qlub.’ (Proverbji 17:3, KŻ) Imma x’inhi l-​qalb li jifli Jehovah? U x’nistgħu nagħmlu biex niksbu qalb li togħġbu?

“Il-​Bniedem Moħbi fil-​Qalb”

3 Il-kelma “qalb” tidher maʼ l-​elf darba fl-​Iskrittura Mqaddsa. Fil-​biċċa l-​kbira tal-​każi tintuża f’sens figurattiv. Per eżempju, Jehovah qal lill-​profeta Mosè: “Kellem lil ulied Iżrael, biex iġibuli offerta; int tirċievi din l-​offerta mingħand kull min jagħti minn rajh [“qalbu,” KŻ].” U resqu dawk li għamlu l-​offerti, “kull min ħass f’qalbu.” (Eżodu 25:2; 35:21) Jidher ċar li wieħed mill-​aspetti tal-​qalb figurattiva hu l-​motivazzjoni—il-​forza ġewwinija li tqanqalna biex naġixxu. Il-​qalb figurattiva tagħna tirrifletti wkoll l-​emozzjonijiet u s-​sentimenti, ix-​xewqat u l-​affezzjonijiet tagħna. Il-​qalb tistaʼ tittiekel bir-​rabja jew timtela bil-​biżaʼ, tinfena bin-​niket jew titqanqal bil-​ferħ. (Salm 27:3; 39:4 [39:3, NW]; Ġwann 16:22; Rumani 9:2) Tistaʼ tkun imkabbra jew umli, mimlija mħabba jew mibegħda.—Proverbji 16:5, Saydon; Mattew 11:29; 1 Pietru 1:​22.

4 Fi qbil maʼ dan, il-​“qalb” taʼ spiss tiġi assoċjata mal-​motivazzjoni u l-​emozzjonijiet, mentri l-​“moħħ” jiġi assoċjat partikolarment maʼ l-​intellett. Hekk għandhom jiġu mifhumin dawn it-​termini meta fl-​Iskrittura jidhru fl-​istess kuntest. (Mattew 22:37; Filippin 4:7) Imma l-​qalb u l-​moħħ ma jeskludux lil xulxin. Per eżempju, Mosè ħeġġeġ lill-​Iżraelin: “Kun af illum, u żommha f’moħħok [jew, “f’qalbek,” NW] li l-​Mulej hu tassew Alla.” (Dewteronomju 4:39) Lill-​iskribi li kienu qed jikkonfoffaw kontrih, Ġesù qalilhom: “Għaliex qegħdin taħsbu ħażin f’qalbkom?” (Mattew 9:4) Il-​fehma, l-​għarfien, u r-​raġunar jistgħu wkoll ikunu assoċjati mal-​qalb. (1 Slaten 3:​12, KŻ; Proverbji 15:14, NW; Mark 2:6) Għalhekk, il-​qalb figurattiva tistaʼ tinkludi wkoll l-​intellett—il-​ħsibijiet jew il-​fehma tagħna.

5 Skond xogħol taʼ referenza, il-​qalb figurattiva tirrappreżenta “l-​parti ċentrali in ġenerali, il-​ġewwieni, u għalhekk il-​bniedem minn ġewwa kif juri lilu nnifsu fl-​attivitajiet kollha tiegħu, fix-​xewqat, l-​affezzjonijiet, l-​emozzjonijiet, il-​passjonijiet, l-​iskopijiet tiegħu, il-​ħsibijiet, l-​osservazzjonijiet, l-​immaġinazzjonijiet tiegħu, l-​għerf, l-​għarfien, is-​sengħa tiegħu, it-​twemmin tiegħu u r-​raġunar tiegħu, il-​memorja tiegħu u l-​istat konxju tiegħu.” Tirrappreżenta dak li aħna tassew minn ġewwa, il-​“bniedem moħbi fil-​qalb.” (1 Pietru 3:4, Saydon) Dan hu dak li Jehovah jara u jifli. Għaldaqstant, David setaʼ jitlob: “Oħloq fija qalb safja, o Alla, u spirtu qawwi ġedded fija.” (Salm 51:12 [51:10, NW]) Kif nistgħu niksbu qalb safja?

“Żommu f’Qalbkom” il-​Kelma t’Alla

6 Meta kien qed iwissi lil ulied Iżrael, waqt li dawn kienu miġmugħin fuq il-​Pjanuri taʼ Mowab qabel ma daħlu fl-​Art Imwiegħda, Mosè qal: “Żommu f’qalbkom dan il-​kliem kollu li jien illum qegħedt quddiemkom, biex twissu lil uliedkom li jqisu li jħarsu l-​kliem kollu taʼ din il-​liġi.” (Dewteronomju 32:46) L-​Iżraelin kellhom “jagħtu kas sew.” (Knox) L-​uniku mod li bih setgħu jnaqqxu l-​kmandamenti t’Alla f’uliedhom kien billi jkunu familjari sew magħhom huma stess.​—Dewteronomju 6:​6-8.

7 Ħtieġa essenzjali sabiex niksbu qalb safja hi li nieħdu għarfien eżatt dwar ir-​rieda t’Alla u l-​iskopijiet tiegħu. Hemm sors wieħed biss għal dan l-​għarfien, il-​Kelma ispirata t’Alla. (2 Timotju 3:​16, 17) Madankollu, li jkollna għarfien tal-​moħħ biss m’huwiex se jgħinna biex niksbu qalb li togħġob lil Jehovah. Sabiex l-​għarfien jeffettwa dak li aħna tassew minn ġewwa, irridu nżommu f’qalbna dak li qed nitgħallmu, jew ‘norbtu qalbna’ miegħu. (Dewteronomju 32:46, KŻ) Dan kif nagħmluh? Is-​salmista David jispjega: “Niftakar fiż-​żmien l-​imgħoddi, naħseb [‘nimmedita,’ NW] f’kull ma int għamilt, għemil idejk dejjem fi ħsiebi.”—Salm 143:5.

8 Aħna wkoll għandna nimmeditaw b’apprezzament dwar l-​attività taʼ Jehovah. Meta naqraw il-​Bibbja jew pubblikazzjonijiet ibbażati fuq il-​Bibbja, għandna bżonn nirriflettu fuq mistoqsijiet bħal: ‘Dan x’jgħallimni dwar Jehovah? Liema kwalitajiet taʼ Jehovah qed nara hawnhekk? Dan ir-​rakkont x’jgħallimni dwar x’jogħġob u x’ma jogħġobx lil Jehovah? Xi jkunu l-​konsegwenzi meta ngħixu b’mod li jogħġob lil Jehovah u meta ngħixu b’mod li hu jobgħod? Dan l-​għarfien kif inhu relatat maʼ dak li diġà naf?’

9 Lisaa, li għandha tnejn u tletin sena, tispjega kif saret tapprezza l-​valur taʼ studju u meditazzjoni siewja: “Wara li tgħammidt fl-​1994 għamilt sentejn attiva mhux ħażin fil-​verità. Kont nattendi l-​laqgħat Kristjani kollha, inqattaʼ bejn 30 u 40 siegħa fix-​xahar fil-​ministeru taʼ l-​għalqa, u nassoċja maʼ sħabi l-​Kristjani. Imbagħad bdejt naqtaʼ ftit ftit. Tant mort lura li saħansitra ksirt il-​liġi t’Alla. Imma ġejt f’tiegħi u ddeċidejt li nerġaʼ ngħix fi qbil mal-​Bibbja. Kemm jien ferħana li Jehovah għaraf kemm kont niedma u aċċettani lura! Taʼ spiss ħsibt bejni u bejn ruħi: ‘Għala ċedejt?’ It-​tweġiba li tibqaʼ tiġini f’moħħi hi li kont ittraskurajt l-​istudju u l-​meditazzjoni sinifikanti. Il-​verità Biblika sempliċement ma kinitx messitli qalbi. Minn issa ’l quddiem, l-​istudju persunali u l-​meditazzjoni se jkunu dejjem parti importanti minn ħajti.” Kemm hu vitali li nħallu l-​ħin għal riflessjoni siewja hekk kif nikbru fl-​għarfien tagħna dwar Jehovah, Ibnu, u l-​Kelma tiegħu!

10 F’din id-​dinja mgħaġġla, m’huwiex faċli li ssib il-​ħin għall-​istudju u l-​meditazzjoni. Madankollu, illum il-​Kristjani qegħdin fuq l-​għatba taʼ Art Imwiegħda meraviljuża—id-​dinja l-​ġdida t’Alla mimlija tjieba. (2 Pietru 3:13) Ġrajjiet li jkexkxuk, bħall-​qerda taʼ “Babilonja l-​Kbira” u l-​attakk minn ‘Gog mill-​art taʼ Magog’ fuq in-​nies taʼ Jehovah, huma fil-​qrib. (Apokalissi 17:​1, 2, 5, 15-​17; Eżekjel 38:​1-4, 14-​16; 39:2) Dak li qed jistenniena fil-​futur jistaʼ jġagħalna nagħtu prova taʼ l-​imħabba tagħna għal Jehovah. Huwa urġenti li nixtru l-​ħin issa u nżommu f’qalbna l-​Kelma t’Alla!—Efesin 5:15, 16.

‘Ħejji Qalbek’ Sabiex Taqra l-​Kelma t’Alla

11 Il-qalb figurattiva tistaʼ titqabbel maʼ ħamrija li fiha tinżeraʼ ż-​żerriegħa tal-​verità. (Mattew 13:18-​23) Il-​ħamrija letterali normalment tiġi kultivata biex il-​prodott jitlaʼ iżjed b’saħħtu. Bl-​istess mod, il-​qalb għandha titħejja, jew titlesta, biex b’hekk tkun tistaʼ tilqaʼ iktar il-​Kelma t’Alla. Il-​qassis Esdra kien “ħejja qalbu biex ifittex il-​liġi tal-​Mulej u jagħmilha.” (Esdra 7:10, Saydon) Aħna kif nistgħu nħejju qalbna?

12 Mod eċċellenti kif inħejju qalbna sabiex naqraw il-​Kelma t’Alla hu li nitolbu minn qalbna. Il-​laqgħat Kristjani taʼ l-​adoraturi veri jibdew u jispiċċaw b’talba. Mela kemm hu xieraq li kull darba li nagħmlu studju persunali tal-​Bibbja nibdew b’talba sinċiera u mbagħad inżommu attitudni devota matul l-​istudju tagħna!

13 Il-qalb figurattiva trid titħejja biex twarrab xi opinjonijiet li setaʼ kellha qabel. Il-​mexxejja reliġjużi taʼ żmien Ġesù ma kinux lesti li jagħmlu dan. (Mattew 13:15) Mill-​banda l-​oħra, Marija, omm Ġesù, waslet għal ċerti konklużjonijiet “f’qalbha” li kienu bbażati fuq il-​veritajiet li kienet semgħet. (Luqa 2:19, 51) Hi saret dixxiplu leali taʼ Ġesù. Lidja taʼ Tijatira semgħet lil Pawlu, “u l-​Mulej fetħilha qalbha biex tifhem.” Hi wkoll saret temmen. (Atti 16:14, 15) Jalla qatt ma nżommu b’mod stinat xi idea persunali jew xi duttrina li kienet għal qalbna. Minflok, ejja nkunu lesti biex naraw kif “Alla hu sinċier u kull bniedem giddieb.”—Rumani 3:4.

14 Xi ħaġa importanti ħafna hi li nħejju qalbna biex tismaʼ fil-​laqgħat Kristjani. Faċli naljenaw ruħna u nitilfu l-​attenzjoni għal dak li jkun qed jingħad. Dak li jintqal ftit li xejn jistaʼ jħalli effett fuqna jekk ikun moħħna f’dak li ġara matul il-​ġurnata jew jekk noqogħdu naħsbu x’se nagħmlu l-​għada. Irridu nkunu determinati li nisimgħu u nitgħallmu jekk irridu nibbenefikaw minn dak li jkun qed jingħad. Kemm nistgħu nibbenefikaw jekk inkunu determinati li nifhmu l-​iskritturi li jkunu qed jiġu spjegati fid-​dettall u t-​tifsira li qed tingħata dwarhom!—Neħemija 8:​5-8, 12.

15 Sewwa sew bħalma l-​ħamrija letterali tissaħħaħ jekk nagħtuha s-​sustanzi xierqa, hekk ukoll il-​fatt li nikkultivaw l-​umiltà, ġuħ spiritwali, fiduċja, biżaʼ minn Alla, u mħabba għal Alla, jistaʼ jagħmel il-​qalb figurattiva tagħna iktar b’saħħitha. L-​umiltà trattab il-​qalb, u dan jgħinna nkunu iktar lesti li nitgħallmu. Jehovah qal lil Ġosija, is-​sultan taʼ Ġuda: “Billi trattbet qalbek u umiljajt ruħek quddiem il-​Mulej meta smajt x’għedt . . . u bkejt quddiemi, jien ukoll smajtek.” (2 Slaten 22:19) Qalb Ġosija kienet umli u lesta li tismaʼ. Minħabba l-​umiltà tagħhom, id-​dixxipli taʼ Ġesù setgħu jifhmu u japplikaw il-​veritajiet spiritwali minkejja li kienu “sempliċi u bla tagħlim,” u dan għall-​kuntrarju taʼ dawk li naqsu li jagħmlu dan minkejja li kellhom “l-​għerf u d-​dehen.” (Atti 4:13; Luqa 10:21) Jalla “numiljaw ruħna quddiem Alla” hekk kif nipprovaw niksbu qalb li togħġob lil Jehovah.—Esdra 8:21.

16 Ġesù qal: “Henjin huma dawk konxji tal-​bżonn spiritwali tagħhom.” (Mattew 5:3, NW) Filwaqt li aħna mżejnin b’kapaċità għall-​ispiritwalità, il-​pressjonijiet minn din id-​dinja mill-​agħar jew il-​vizzji bħall-​għażż jistgħu ma jħalluniex nibqgħu konxji tal-​bżonn spiritwali tagħna. (Mattew 4:4) Irridu niżviluppaw aptit bnin għall-​ikel spiritwali. Anki jekk għall-​ewwel ma niħdux pjaċir bil-​qari tal-​Bibbja u l-​istudju persunali, jekk nippersistu, l-​għarfien ‘isir l-​għaxqa taʼ qalbna’ u nibdew inħarsu ’l quddiem għall-​ħin taʼ l-​istudju.—Proverbji 2:10, 11.

17 “Ittama fil-​Mulej b’qalbek kollha, u tafdax fl-​għaqal tiegħek,” wissa s-​Sultan Salamun. (Proverbji 3:5) Qalb li tafda f’Jehovah taf li kulma jitlobha jew jiggwidaha biex tagħmel permezz tal-​Kelma tiegħu hu dejjem tajjeb. (Isaija 48:17) Mingħajr ebda dubju, Jehovah jixraqlu l-​fiduċja sħiħa tagħna. Hu kapaċi jwettaq l-​iskopijiet kollha tiegħu. (Isaija 40:26, 29) Saħansitra ismu stess letteralment ifisser “Hu Jikkaġuna li Jsir.” Dan isaħħilna l-​fiduċja fl-​abbiltà tiegħu li jwettaq dak kollu li wiegħed! “Ġust il-​Mulej fl-​imġiba tiegħu kollha, twajjeb f’dak kollu li għamel.” (Salm 145:17) M’għandniex xi ngħidu, biex nikkultivaw il-​fiduċja tagħna fih irridu ‘nipprovaw u naraw kemm hu tajjeb il-​Mulej’ billi napplikaw dak li nitgħallmu mill-​Bibbja fil-​ħajja persunali tagħna u nirriflettu fuq il-​benefiċċji li niksbu jekk nagħmlu dan.—Salm 34:9 (34:8, NW).

18 Salamun jiġbdilna l-​attenzjoni lejn kwalità oħra li ġġiegħel lil qalbna tilqaʼ l-​gwida divina, billi jistqarr: “Ibżaʼ mill-​Mulej u warrab mill-​ħażen.” (Proverbji 3:7) Jehovah qal hekk dwar Iżrael tal-​qedem: “M’hux li kien ikollhom dan il-​ħsieb [“qalb,” KŻ], li jibżgħu minni, u jħarsu kull ma nordnalhom għal ħajjithom kollha, u jkollhom ir-​riżq, huma u wliedhom, għal dejjem.” (Dewteronomju 5:29) Iva, dawk li jibżgħu minn Alla jobduh. Jehovah għandu l-​abbiltà li “jsaħħaħ lil dawk li qalbhom marbuta fis-​sħiħ miegħu” u li jikkastiga lil dawk li ma jobduhx. (2 Kronaki 16:9) Jalla l-​azzjonijiet, il-​ħsibijiet, u l-​emozzjonijiet kollha tagħna jiġu mmexxijin minn biżaʼ riverenzjali li ma nogħġbux lil Jehovah.

‘Ħobb lil Jehovah b’Qalbek Kollha’

19 L-imħabba, iktar mill-​kwalitajiet l-​oħrajn kollha, tassew iġġiegħel lil qalbna twieġeb għad-​direzzjoni taʼ Jehovah. Qalb mimlija mħabba għal Alla tagħmilna ħerqanin biex nitgħallmu dwar x’jogħġbu u x’ma jogħġbux. (1 Ġwann 5:3) Ġesù qal: “Ħobb lill-​Mulej, Alla tiegħek, b’qalbek kollha, b’ruħek kollha, u b’moħħok kollu.” (Mattew 22:37) Jalla l-​imħabba tagħna għal Alla tikber billi nagħmluha drawwa li nirriflettu fuq it-​tjubija tiegħu, billi nkellmuh regolarment bħal ħabib tal-​qalb, u billi bil-​ħeġġa kollha nitkellmu dwaru m’oħrajn.

20 Bħala reviżjoni: Sabiex niksbu qalb li togħġob lil Jehovah irridu nħallu l-​Kelma t’Alla tinfluwenza dak li aħna minn ġewwa, il-​bniedem moħbi fil-​qalb. Studju persunali effettiv taʼ l-​Iskrittura u meditazzjoni b’apprezzament huma neċessarji. L-​aħjar mod kif nagħmlu dan hu b’qalb imħejjija—qalb ħielsa minn ideat li setaʼ kellha qabel, qalb mimlija kwalitajiet li jġagħluna nkunu lesti li nitgħallmu! Iva, bl-​għajnuna taʼ Jehovah, nistgħu niksbu qalb li togħġbu. Madankollu, x’nistgħu nagħmlu biex inħarsuha?

[Noti taʼ taħt]

Int Kif Twieġeb?

• X’inhi l-​qalb figurattiva li jifli Jehovah?

• Kif nistgħu ‘nżommu f’qalbna’ l-​Kelma t’Alla?

• Kif għandna nħejju qalbna sabiex naqraw il-​Kelma t’Alla?

• Wara li rajna dan il-​materjal, xi tħossok imqanqal biex tagħmel?

3, 4. Il-kelma “qalb” f’liema sens tintuża l-​iktar fil-​Bibbja? Agħti eżempji.

5. X’tirrappreżenta l-​qalb figurattiva?

6. Mosè liema twissija tahom lill-​Iżraelin waqt li dawn kienu kkampjati fil-​Pjanuri taʼ Mowab?

7. X’jinvolvi li ‘nżommu f’qalbna’ l-​Kelma t’Alla?

8. Fuq liema mistoqsijiet tajjeb nirriflettu fl-​istudju tagħna?

9. Kemm huma taʼ valur l-​istudju persunali u l-​meditazzjoni?

10. Għala huwa urġenti li nagħmlu l-​ħin għall-​istudju persunali u l-​meditazzjoni?

11. Qalbna kif tistaʼ titqabbel mal-​ħamrija?

12. X’se jgħinna nħejju qalbna għall-​istudju?

13. Xi rridu nagħmlu biex niksbu qalb li togħġob lil Jehovah?

14. Kif nistgħu nħejju qalbna biex tismaʼ fil-​laqgħat Kristjani?

15. L-​umiltà kif tgħinna nkunu iktar lesti biex nitgħallmu?

16. Għala huwa meħtieġ sforz biex nikkultivaw aptit għall-​ikel spiritwali?

17. (a) Jehovah għala jixraqlu l-​fiduċja sħiħa tagħna? (b) Kif nistgħu nikkultivaw fiduċja f’Alla?

18. Il-​biżaʼ minn Alla kif jgħinna nilqgħu iktar il-​gwida t’Alla?

19. L-​imħabba liema parti għandha f’li ġġiegħel lil qalbna twieġeb għad-​direzzjoni taʼ Jehovah?

20. Kif nistgħu niksbu qalb li togħġob lil Jehovah?

[Stampa f’paġna 17]

David immedita b’apprezzament fuq l-​affarijiet spiritwali. Hekk tagħmel int?

[Stampi f’paġna 18]

Ħejji qalbek qabel ma tistudja l-​Kelma t’Alla