Tgħallem Lezzjoni Minn Nikodemu

“JEKK xi ħadd irid jiġi warajja, għandu jiċħad lilu nnifsu, jerfaʼ salibu kuljum, u jimxi warajja.” (Luqa 9:23) Sajjieda umlin u kollettur tat-​taxxa mistmerr kienu pronti jaċċettaw din l-​istedina. Huma ħallew kollox warajhom biex jimxu wara Ġesù.—Mattew 4:​18-22; Luqa 5:​27, 28.

Is-sejħa taʼ Ġesù għadha tidwi llum, u kien hemm ħafna li wieġbu għaliha. Madankollu, xi wħud li jieħdu pjaċir jistudjaw il-​Bibbja max-​Xhieda taʼ Jehovah jaħsbuha darbtejn qabel ma ‘jiċħdu lilhom infushom u jerfgħu salibhom.’ Huma qed iżommu lura milli jaċċettaw ir-​responsabbiltà u l-​privileġġ li jkunu dixxipli taʼ Ġesù.

Xi wħud għala jżommu lura u ma jaċċettawx l-​istedina taʼ Ġesù u ma jiddedikawx ruħhom lil Alla Jehovah? Huwa minnu li dawk li ma trabbewx bħal-​Lhud u l-​Kristjani bl-​idea taʼ twemmin f’Alla wieħed forsi jkollhom bżonn żmien konsiderevoli qabel ma jibdew japprezzaw bis-​sħiħ il-​fatt li jeżisti Ħallieq li jistaʼ kollox u li hu persuna. Madankollu, saħansitra wara li jsiru konvinti li Alla hu reali, xi wħud xorta jibqgħu jaħsbuha biex jimxu wara l-​passi taʼ Ġesù. Huma forsi jibżgħu minn dak li jaħsbu dwarhom qrabathom u ħbiebhom jekk isiru Xhieda taʼ Jehovah. Oħrajn, li ma jibqgħux jaraw l-​urġenza taż-​żminijiet li qed ngħixu fihom, jibdew ifittxu li jsiru famużi u sinjuri. (Mattew 24:​36-42; 1 Timotju 6:​9, 10) Hu x’inhu l-​każ, għal dawk li jibqgħu ma jiddeċidux li jsiru segwaċi taʼ Ġesù, hemm lezzjoni x’jitgħallmu mir-​rakkont dwar Nikodemu, ħakkiem Lhudi għani fi żmien Ġesù.

Imbierek b’Opportunitajiet Meraviljużi

Wara biss xi sitt xhur li Ġesù beda l-​ministeru tiegħu fuq l-​art, Nikodemu jirrikonoxxi li Ġesù kien “Mgħallem mibgħut minn Alla.” Impressjonat bil-​mirakli li wettaq Ġesù dan l-​aħħar f’Ġerusalemm fil-​festa tal-​Qbiż tas-​sena 30 E.K., Nikodemu jiġi fis-​satra tal-​lejl biex jistqarr il-​fidi tiegħu f’Ġesù u biex jitgħallem iktar dwar dan l-​għalliem. Minħabba f’hekk, Ġesù jgħid lil Nikodemu verità profonda dwar il-​bżonn li wieħed ‘jitwieled mill-​ġdid’ sabiex jidħol fis-​Saltna t’Alla. F’din l-​okkażjoni, Ġesù jgħid ukoll il-​kliem: “Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.”—Ġwann 3:​1-16.

Xi prospett meraviljuż għandu quddiemu Nikodemu! Jistaʼ jsir imsieħeb mill-​qrib taʼ Ġesù, u b’hekk ikun jistaʼ jara b’għajnejh stess diversi aspetti tal-​ħajja taʼ Ġesù fuq l-​art. Bħala ħakkiem tal-​Lhud u għalliem ġewwa Iżrael, Nikodemu għandu ħafna għarfien dwar il-​Kelma t’Alla. Għandu wkoll dehen kbir, bħalma jidher mill-​fatt li identifika lil Ġesù bħala għalliem mibgħut minn Alla. Nikodemu jinteressa ruħu f’affarijiet spiritwali, u jispikka f’dik li hi umiltà. Żgur li hi ħaġa verament diffiċli li membru taʼ l-​ogħla qorti tal-​Lhud jirrikonoxxi lill-​iben umli taʼ mastrudaxxa bħala raġel mibgħut minn Alla! Dawn il-​kwalitajiet kollha huma imprezzabbli biex wieħed isir dixxiplu taʼ Ġesù.

L-interess taʼ Nikodemu f’dan ir-​raġel minn Nazaret ma jidhirx li jbatti. Sentejn u nofs wara, fil-​Festa taʼ l-​Għerejjex, Nikodemu jattendi laqgħa tas-​Sinedriju. F’dan iż-​żmien, Nikodemu għadu “wieħed minnhom.” Il-​qassisin il-​kbar u l-​Fariżej jibagħtu xi uffiċjali biex jarrestaw lil Ġesù. Dawn jiġu lura u jirrapportaw: “Qatt ħadd ma tkellem bħalu, dan il-​bniedem!” Il-​Fariżej jibdew ibaxxuhom: “Intom ukoll tqarraqtu? Hemm xi ħadd mill-​kapijiet u l-​Fariżej li emmen fih? Imma dawn x’qabda nies misħuta, li l-​Liġi ma jafuhiex!” Nikodemu ma jistax jibqaʼ sieket iktar. Hu jiftaħ fommu u jgħid: “Jaqaw il-​Liġi tagħna tikkundanna lil xi ħadd qabel ma tismaʼ lilu stess ħalli tkun taf x’inhu jagħmel?” Imbagħad il-​Fariżej l-​oħrajn iduru kollha fuqu “M’intix int ukoll mill-​Galilija, hux? Fittex fl-​Iskrittura, ħalli tara li ebda profeta ma jqum mill-​Galilija!”—Ġwann 7:​1, 10, 32, 45-52.

Xi sitt xhur wara, nhar Jum il-​Qbiż tas-​sena 33 E.K., Nikodemu jinsab preżenti hekk kif il-​ġisem taʼ Ġesù jitniżżel minn fuq iz-​zokk tat-​tortura. Hu jissieħeb maʼ Ġużeppi minn Arimatija, membru ieħor tas-​Sinedriju, biex iħejju l-​ġisem taʼ Ġesù għad-​difna. Għal dan l-​iskop, Nikodemu jġib “taħlita taʼ morr u sabbara” li tiżen bejn wieħed u ieħor 100 libbra Rumana, ekwivalenti għal xi 33 kilo. Din tiswa ammont konsiderevoli taʼ flus. Irid ikollu wkoll il-​kuraġġ biex jidentifika ruħu maʼ “dan il-​bniedem qarrieq,” bħalma sħabu l-​Fariżej isejħu lil Ġesù. Waqt li jħejju malajr il-​ġisem taʼ Ġesù għad-​difna, it-​tnejn li huma jqiegħdu lil Ġesù f’qabar tal-​mafkar ġdid fil-​viċin. Madankollu, saħansitra f’dan il-​mument Nikodemu għadu mhux identifikat bħala dixxiplu taʼ Ġesù!—Ġwann 19:​38-42; Mattew 27:63; Mark 15:43.

Għala M’Aġixxiex

Fir-​rakkont tiegħu Ġwanni ma weriex għala Nikodemu qagħad jaħsibha biex “jerfaʼ salibu” u jimxi wara Ġesù. Madankollu, hu ħalla xi ħjiel li jistaʼ jispjega għala dan il-​Fariżew baqaʼ ma ħax deċiżjoni.

L-​ewwelnett, Ġwanni indika li l-​ħakkiem Lhudi “ġie għand Ġesù billejl.” (Ġwann 3:2) Studjuż tal-​Bibbja jissuġġerixxi: “Nikodemu ġie bil-​lejl, mhux għax kien jibżaʼ, imma biex jevita l-​folol li setgħu jfixklu l-​intervista li kellu maʼ Ġesù.” Madankollu, Ġwanni rrefera għal Nikodemu bħala “dak li qabel kien mar għand Ġesù billejl” fl-​istess kuntest li fih irrefera għal Ġużeppi minn Arimatija bħala “dixxiplu taʼ Ġesù bil-​moħbi għax kien jibżaʼ mil-​Lhud.” (Ġwann 19:​38, 39) Għalhekk, x’aktarx li Nikodemu mar għand Ġesù fis-​satra tal-​lejl għax “kien jibżaʼ mil-​Lhud,” sewwa sew bħalma oħrajn fi żmienu kienu jibżgħu li jkollhom x’jaqsmu maʼ Ġesù.—Ġwann 7:13.

Qiegħed int iżżomm lura milli ssir dixxiplu taʼ Ġesù għaliex tibżaʼ minn dak li jistgħu jgħidu qrabatek, ħbiebek, jew sħabek fuq ix-​xogħol? “Min jibżaʼ mill-​bniedem jaqaʼ fi xkiel,” jgħid proverbju. Kif tistaʼ tirbħu dan il-​biżaʼ? Il-​proverbju jkompli: “Imma min jittama fil-​Mulej ikun fil-​kenn.” (Proverbji 29:25) Sabiex tibni din il-​fiduċja f’Jehovah, għandek bżonn tibda tara għalik innifsek li Alla se jwieżnek meta tkun f’qagħda mwiegħra. Itlob lil Jehovah biex jagħtik il-​kuraġġ tieħu saħansitra deċiżjonijiet żgħar rigward il-​qima tiegħek. Bil-​mod il-​mod, il-​fidi u l-​fiduċja tiegħek f’Jehovah se jikbru sal-​punt li tkun tistaʼ tieħu deċiżjonijiet kbar fi qbil mar-​rieda t’Alla.

Il-pożizzjoni u l-​prestiġju taʼ Nikodemu bħala membru tal-​klassi li taħkem għandhom mnejn ukoll żammewh lura milli jagħmel il-​pass importanti li jiċħad lilu nnifsu. F’dak iż-​żmien, hu bilfors li kien għadu marbut ħafna mal-​pożizzjoni li kellu bħala membru tas-​Sinedriju. Qiegħed int ittellaʼ u tniżżel jekk issirx segwaċi taʼ Kristu għaliex forsi titlef xi pożizzjoni għolja fis-​soċjetà jew għax ikollok tissagrifika ċerti prospetti li għandek biex tavanza? Xejn minn dawn l-​affarijiet ma jistaʼ jitqabbel mal-​privileġġ li tkun tistaʼ taqdi lill-​Iktar Wieħed Għoli fl-​univers, li hu lest jissodisfa x-​xewqat tiegħek li huma fi qbil mar-​rieda tiegħu.—Salm 10:17; 83:19 [83:​18, NW]; 145:18.

Raġuni oħra għala Nikodemu forsi qagħad iħalli mil-​lum għall-​għada setgħet kienet marbuta maʼ l-​għana tiegħu. Bħala Fariżew, forsi kien influwenzat mill-​oħrajn, “li kellhom ir-​regħba għall-​flus.” (Luqa 16:14) Il-​fatt li setaʼ jaffordja taħlita taʼ ħwawar li tiswa ħafna flus jixhed li kien għani. Xi wħud illum jibqgħu jħallu mil-​lum għall-​għada biex jieħdu d-​deċiżjoni li jerfgħu r-​responsabbiltajiet taʼ Kristjan għaliex huma ansjużi dwar il-​ġid materjali li għandhom. Madankollu, Ġesù wissa lis-​segwaċi tiegħu: “Tinkwetawx ruħkom għal ħajjitkom, x’se tieklu jew x’tixorbu, anqas għal ġisimkom x’se tilbsu. . . . Missierkom li hu fis-​smewwiet jaf li dan kollu teħtiġuh. Mela fittxu l-​ewwel is-​Saltna u l-​ġustizzja taʼ Alla, u dan kollu jingħatalkom ukoll.”—Mattew 6:​25-33.

Kellu Ħafna X’Jitlef

Taʼ interess, ir-​rakkont dwar Nikodemu, li jidher biss fl-​Evanġelju taʼ Ġwanni, ma jgħidilniex jekk Nikodemu qattx sar segwaċi taʼ Ġesù jew le. Skond waħda mit-​tradizzjonijiet, hu sar dixxiplu taʼ Ġesù, tgħammed, beda jiġi persegwitat mil-​Lhud, tilef il-​pożizzjoni li kellu, u fl-​aħħarnett ġie turufnat minn Ġerusalemm. Kien x’kien il-​każ, ħaġa waħda hi ċerta: Hu kellu ħafna x’jitlef minħabba li qagħad jaħsibha waqt li Ġesù kien hawnhekk fuq l-​art.

Kieku Nikodemu beda jimxi wara Ġesù minnufih malli ltaqaʼ mal-​Mulej l-​ewwel darba, kien ikun jistaʼ jsir dixxiplu qrib taʼ Ġesù. Bl-​għarfien, id-​dehen, u l-​umiltà li kellu u peress li kien konxju tal-​ħtiġijiet spiritwali, Nikodemu setaʼ sar dixxiplu li jispikka. Iva, kien ikun jistaʼ jismaʼ d-​diskorsi taʼ l-​għaġeb taʼ l-​Għalliem Prim, jitgħallem lezzjonijiet vitali mill-​parabboli taʼ Ġesù, jara b’għajnejh il-​mirakli meraviljużi li wettaq Ġesù, u jikseb is-​saħħa mit-​twissijiet li Ġesù ta lill-​appostli tiegħu qabel ma telaqhom. Imma dan kollu tilfu.

Il-fatt li Nikodemu kien indeċiż kien ifisser telfa kbira għalih. Tilef ukoll l-​istedina mill-​qalb taʼ Ġesù: “Ejjew għandi, intom ilkoll li tinsabu mħabbtin u mtaqqlin, u jiena nserraħkom. Ħudu fuqkom il-​madmad tiegħi u tgħallmu minni, għaliex jiena taʼ qalb ħelwa u umli, u intom issibu l-​mistrieħ għal ruħkom. Għax il-​madmad tiegħi ħelu u t-​toqol tiegħi ħafif.” (Mattew 11:​28-30) Nikodemu tilef l-​opportunità li jesperjenza dan il-​mistrieħ letteralment mingħand Ġesù nnifsu!

Xi Ngħidu Għalik?

Mill-​1914 ’l hawn, Ġesù Kristu huwa preżenti bħala s-​Sultan tas-​Saltna t’Alla fis-​sema. Waqt li bassar dak li kellu jseħħ matul il-​preżenza tiegħu, hu qal fost affarijiet oħrajn: “Dan l-​Evanġelju tas-​Saltna jixxandar fid-​dinja kollha, biex il-​ġnus kollha jkollhom xhieda. Mbagħad jiġi t-​tmiem.” (Mattew 24:14) Qabel ma jiġi t-​tmiem, dan ix-​xogħol taʼ l-​ippridkar irid jitwettaq fid-​dinja kollha. Hija l-​għaxqa taʼ Ġesù Kristu li jkollu bnedmin imperfetti jieħdu sehem fih. Int ukoll tistaʼ tieħu sehem f’dan ix-​xogħol.

Nikodemu rrikonoxxa li Ġesù kien mibgħut minn Alla. (Ġwann 3:2) Mill-​istudju li għamilt dwar il-​Bibbja, int forsi wasalt għall-​istess konklużjoni. Forsi għamilt bidliet fil-​mod kif tgħix ħajtek biex tkun fi qbil mal-​livelli tal-​Bibbja. Għandek mnejn anki qed tattendi l-​laqgħat tax-​Xhieda taʼ Jehovah biex tieħu iktar għarfien dwar il-​Bibbja. Prosit tassew għal dawn l-​isforzi. Madankollu, ma kienx biżżejjed li Nikodemu juri apprezzament lejn Ġesù bħala l-​wieħed mibgħut minn Alla. Kellu bżonn ‘jiċħad lilu nnifsu, jerfaʼ salibu kuljum, u jimxi wara’ Ġesù kontinwament.—Luqa 9:23.

Daħħal f’qalbek dak li jgħidilna l-​appostlu Pawlu. Hu kiteb: “Ladarba qegħdin naħdmu flimkien maʼ Alla, aħna mela nħeġġukom biex ma tirċevux il-​grazzja tiegħu għal xejn. Għax hu jgħid: ‘Fiż-​żmien it-​tajjeb smajtek, f’jum is-​salvazzjoni għentek.’ Araw, issa hu ż-​żmien tajjeb, araw, issa hu jum is-​salvazzjoni!”—2 Korintin 6:​1, 2.

Issa huwa ż-​żmien biex tiżviluppa l-​fidi li tqanqlek ħalli taġixxi. Għal dan l-​għan, immedita fuq l-​affarijiet li qed tistudja fil-​Bibbja. Itlob lil Jehovah għall-​għajnuna biex turi dan it-​tip taʼ fidi. Hekk kif tesperjenza l-​għajnuna tiegħu, l-​apprezzament tiegħek u l-​imħabba għalih se jqanqluk biex tkun trid ‘tiċħad lilek innifsek u terfaʼ salibek kuljum u timxi wara Ġesù Kristu kontinwament.’ Se taġixxi issa int?

[Stampa f’paġna 9]

Għall-​ewwel, Nikodemu b’kuraġġ wera li kien favur Ġesù

[Stampa f’paġna 9]

Minkejja l-​oppożizzjoni, Nikodemu għen biex il-​ġisem taʼ Ġesù jitħejja għad-​difna

[Stampa f’paġna 10]

L-​istudju persunali u t-​talb jistgħu jsaħħuk biex taġixxi

[Stampa f’paġna 10]

Se taċċettah int il-​privileġġ li taħdem taħt it-​tmexxija taʼ Ġesù Kristu?