Irċivejtu Int “l-​Ispirtu tal-​Verità”?

‘Il-​Missier jagħtikom Difensur ieħor biex jibqaʼ magħkom għal dejjem, l-​Ispirtu tal-​verità.’—ĠWANN 14:​16, 17.

1. Ġesù liema informazzjoni importanti ta lid-​dixxipli tiegħu fil-​kamra taʼ fuq matul l-​aħħar sigħat li qattaʼ magħhom?

“FEJN sejjer, Mulej?” Din kienet waħda mill-​mistoqsijiet li l-​appostli taʼ Ġesù staqsewh matul l-​aħħar sigħat li qattaʼ magħhom fil-​kamra taʼ fuq f’Ġerusalemm. (Ġwann 13:36) Hekk kif beda għaddej il-​ħin f’dik il-​laqgħa, Ġesù informahom li issa kien wasallu ż-​żmien biex iħallihom u jmur lura għand Missieru. (Ġwann 14:28; 16:28) Ma kienx se jkun iżjed magħhom fil-​ġisem biex jistruwihom u jwieġeb il-​mistoqsijiet tagħhom. Madankollu, hu assigurahom billi qalilhom: “Jiena nitlob lill-​Missier, u hu jagħtikom Difensur ieħor [jew, wieħed li jfarraġkom] biex jibqaʼ magħkom għal dejjem.”—Ġwann 14:16.

2. Ġesù x’wiegħed li se jibagħtilhom lid-​dixxipli wara t-​tluq tiegħu?

² Ġesù identifika lil dan id-​difensur u spjega kif kellu jgħin lid-​dixxipli tiegħu. Qalilhom: “Dan ma għedtulkomx mill-​bidu, għaliex kont għadni magħkom. Issa sejjer għand dak li bagħatni . . . Jaqblilkom li jiena mmur; għaliex, jekk ma mmurx, id-​Difensur ma jiġix għandkom; imma jekk immur, nibgħathulkom. Meta jiġi hu, l-​Ispirtu tal-​verità, iwassalkom għall-​verità kollha.”—Ġwann 16:​4, 5, 7, 13.

3. (a) Meta ntbagħat “l-​Ispirtu tal-​verità” lill-​Kristjani tal-​bidu? (b) B’liema mod importanti kien l-​ispirtu taʼ għajnuna għalihom?

³ Din il-​wegħda twettqet f’Pentekoste tas-​sena 33 E.K., kif wera l-​appostlu Pietru: “Lil dan Ġesù, Alla qajjmu mill-​imwiet, u taʼ dan aħna lkoll xhieda. Għalhekk, issa li Alla għollieh bil-​leminija tiegħu, huwa rċieva mingħand il-​Missier l-​Ispirtu s-​Santu li kien imwiegħed, u sawwbu fuqna, kif qegħdin taraw u tisimgħu.” (Atti 2:​32, 33) Kif se naraw iktar tard, l-​ispirtu qaddis li tferraʼ f’Pentekoste wettaq ħafna affarijiet għall-​Kristjani tal-​bidu. Imma Ġesù wiegħed li “l-​ispirtu tal-​verità” kellu ‘jfakkarhom dak kollu li kien qalilhom.’ (Ġwann 14:26) Kien se jgħinhom jiftakru l-​ministeru u t-​tagħlim taʼ Ġesù, saħansitra l-​kliem eżatt li qal biex ikunu jistgħu jiktbuh. Dan kellu jkun taʼ għajnuna b’mod speċjali għax-​xwejjaħ appostlu Ġwanni fit-​tmiem taʼ l-​ewwel seklu E.K. meta beda jikteb l-​Evanġelju tiegħu. Dan ir-​rakkont jinkludi l-​pariri prezzjużi li ta Ġesù meta stabbilixxa l-​Mafkar taʼ mewtu.—Ġwann, kapitli 13-17.

4. “L-​Ispirtu tal-​verità” kif għen lill-​Kristjani midlukin tal-​bidu?

⁴ Ġesù wiegħed ukoll lil dawk id-​dixxipli tal-​bidu li l-​ispirtu kien se ‘jgħallimhom kollox’ u ‘jwassalhom għall-​verità kollha.’ L-​ispirtu kien se jgħinhom jifhmu l-​affarijiet iktar profondi taʼ l-​Iskrittura u jħares l-​unità tagħhom biex jibqgħu ħaġa waħda fil-​ħsieb, fil-​fehma, u fl-​għan. (1 Korintin 2:10; Efesin 4:3) B’hekk, l-​ispirtu qaddis ta l-​qawwa lil dawk il-​Kristjani tal-​bidu biex jaġixxu bħala “lsir leali u diskret” kollettiv, u biex jipprovdu l-​‘ikel spiritwali f’waqtu’ lill-​individwi li huma Kristjani midlukin.—Mattew 24:​45, NW.

L-​Ispirtu Jixhed

5. (a) Ġesù liema prospett ġdid poġġa quddiem id-​dixxipli tiegħu fil-​lejla taʼ l-​14 taʼ Nisan, tas-​sena 33 E.K.? (b) L-​ispirtu qaddis liema rwol kellu fit-​twettiq tal-​wegħda taʼ Ġesù?

⁵ Fil-​lejla taʼ l-​14 taʼ Nisan, tas-​sena 33 E.K., Ġesù ta ħjiel lid-​dixxipli tiegħu li huma kienu se jintlaqgħu minnu sabiex jgħixu miegħu u maʼ Missieru fis-​sema. Qalilhom: “Fid-​dar taʼ Missieri hemm ħafna postijiet; li ma kienx hekk, kont ngħidilkom. Sejjer inħejjilkom fejn toqogħdu. U meta mmur u nħejjilkom post, nerġaʼ niġi biex neħodkom miegħi biex, fejn inkun jien, tkunu intom ukoll.” (Ġwann 13:36; 14:​2, 3) Huma kienu se jsaltnu miegħu f’Saltnatu. (Luqa 22:​28-30) Biex ikollhom din it-​tama taʼ ħajja fis-​sema, huma riedu jkunu ‘mweldin mill-​ispirtu’ bħala wlied spiritwali t’Alla u jiġu midlukin biex jaqdu bħala slaten u qassisin maʼ Kristu fis-​sema.—Ġwann 3:​5-8; 2 Korintin 1:​21, 22; Titu 3:​5-7; 1 Pietru 1:​3, 4; Apokalissi 20:6.

6. (a) Meta bdiet is-​sejħa tas-​sema, u kemm huma dawk li jirċievu din is-​sejħa? (b) F’liema ħaġa tgħammdu dawk li ssejħu?

⁶ Din “is-​sejħa tas-​sema” bdiet f’Pentekoste tas-​sena 33 E.K. u, fil-​parti l-​kbira, tidher li ntemmet f’nofs is-​snin tletin tas-​seklu l-​ieħor. (Lhud 3:1) L-​għadd taʼ dawk li huma siġillati bl-​ispirtu qaddis biex jifformaw parti minn Iżrael spiritwali huwa 144,000, “mifdija minn fost il-​bnedmin.” (Apokalissi 7:4; 14:​1-4) Dawn ġew mgħammdin fil-​ġisem spiritwali taʼ Kristu, fil-​kongregazzjoni tiegħu, u f’mewtu. (Rumani 6:3; 1 Korintin 12:​12, 13, 27; Efesin 1:​22, 23) Wara li tgħammdu bl-​ilma u ġew midlukin bl-​ispirtu qaddis, huma qabdu triq taʼ sagrifiċċju, ħajja taʼ integrità sal-​mewt.—Rumani 6:​4, 5.

7. Għala l-​Kristjani midlukin biss bix-​xieraq jieħdu mill-​emblemi fil-​Mafkar?

⁷ Bħala Iżraelin spiritwali, dawn il-​Kristjani midlukin kienu fil-​patt ġdid li sar bejn Jehovah u l-​“Iżrael taʼ Alla.” (Galatin 6:16; Ġeremija 31:​31-34) Il-​patt ġdid sar validu permezz tad-​demm li xerred Kristu. Ġesù semma dan meta stabbilixxa l-​Mafkar taʼ mewtu. Luqa kiteb: “Ħa l-​ħobż, radd il-​ħajr, qasmu, newwilhulhom u qal: ‘Dan hu ġismi li jingħata għalikom; agħmlu dan b’tifkira tiegħi.’ Hekk ukoll wara l-​ikla ħa l-​kalċi u qal: ‘Dan il-​kalċi huwa l-​Patt il-​Ġdid b’demmi, id-​demm li jixxerred għalikom.’” (Luqa 22:​19, 20) Il-​fdal, jew il-​membri li fadal fuq l-​art mill-​144,000, huma dawk li fil-​Mafkar tal-​mewt taʼ Kristu bix-​xieraq jieħdu mill-​ħobż u l-​inbid li għandhom tifsira simbolika.

8. Il-​midlukin kif ikunu jafu li rċivew is-​sejħa tas-​sema?

⁸ Il-​midlukin kif ikunu jafu li rċivew is-​sejħa tas-​sema? Huma jirċievu b’mod ċar ix-​xiehda taʼ l-​ispirtu qaddis. L-​appostlu Pawlu kitbilhom hekk lil dawn: “Dawk kollha li jmexxihom l-​Ispirtu taʼ Alla huma wlied Alla. . . . Dan l-​Ispirtu jixhed flimkien maʼ l-​ispirtu tagħna li aħna wlied Alla. Jekk aħna wlied, aħna wkoll werrieta, werrieta taʼ Alla, werrieta maʼ Kristu: ladarba aħna nbatu miegħu, biex miegħu nkunu gglorifikati.” (Rumani 8:​14-17) Din ix-​xiehda taʼ l-​ispirtu tant hija qawwija li dawk li jkollhom l-​iċken dubju dwar jekk irċivewx is-​sejħa tas-​sema jistgħu jikkonkludu b’mod raġunevoli li ma rċivewhiex, u għalhekk ma jiħdux mill-​emblemi fil-​Mafkar.

L-​Ispirtu u n-​Nagħaġ Oħra

9. Liema żewġ gruppi distinti jissemmew fl-​Evanġelji u fil-​ktieb taʼ l-​Apokalissi?

⁹ Peress li kien jaf li l-​għadd taʼ Kristjani msejħin biex jifformaw l-​Iżrael spiritwali kien limitat, Ġesù rrefera għalihom bħala l-​“merħla ċkejkna.” Huma jiddaħħlu fil-​“maqjel” tal-​patt il-​ġdid, b’kuntrast man-​“nagħaġ oħra” li huma bla għadd u li lilhom Ġesù qal li jrid jiġbor ukoll. (Luqa 12:32; Ġwann 10:16) Dawk min-​nagħaġ oħra li jinġabru fiż-​żmien tat-​tmiem se jifformaw il-​“kotra kbira” li se tiġi salvata mit-​tribulazzjoni l-​kbira bil-​prospett li tgħix għal dejjem fuq l-​art magħmula ġenna. Huwa taʼ interess li l-​viżjoni li rċieva Ġwanni fi tmiem l-​ewwel seklu E.K. turi d-​differenza li hemm bejn din il-​kotra kbira u l-​144,000 membru taʼ Iżrael spiritwali. (Apokalissi 7:​4, 9, 14) Jirċievu n-​nagħaġ oħra l-​ispirtu qaddis? Jekk jirċivuh, kif jeffettwalhom ħajjithom?

10. In-​nagħaġ oħra kif jitgħammdu “fl-​isem tal-​Missier u taʼ l-​Iben u taʼ l-​Ispirtu s-​Santu”?

¹⁰ L-​ispirtu qaddis tabilħaqq għandu parti importanti fil-​ħajja tan-​nagħaġ oħra. Huma jissimbolizzaw id-​dedikazzjoni tagħhom lil Jehovah billi jitgħammdu “fl-​isem tal-​Missier u taʼ l-​Iben u taʼ l-​Ispirtu s-​Santu.” (Mattew 28:19) Huma jirrikonoxxu s-​sovranità taʼ Jehovah, jissottomettu ruħhom lejn Kristu bħala s-​Sultan u l-​Feddej tagħhom, u jħallu l-​ispirtu, jew il-​forza attiva t’Alla, jaħdem f’ħajjithom. Jum wara l-​ieħor, huma jipprovaw jikkultivaw “il-​frott taʼ l-​Ispirtu,” jiġifieri, “l-​imħabba, l-​hena, is-​sliem, is-​sabar, il-​ħniena, it-​tjieba, il-​fidi, il-​ħlewwa, ir-​rażan.”—Galatin 5:​22, 23.

11, 12. (a) Il-midlukin kif inhuma mqaddsin b’mod speċjali ferm? (b) In-​nagħaġ oħra b’liema mod huma mqaddsin u mnaddfin?

¹¹ In-​nagħaġ oħra jridu wkoll iħallu l-​Kelma t’Alla u l-​ispirtu qaddis isaffuhom, jew iqaddsuhom. Il-​midlukin diġà tqaddsu b’mod speċjali ferm, billi ġew dikjarati twajbin u ndaf bħala l-​għarusa taʼ Kristu. (Ġwann 17:17; 1 Korintin 6:11; Efesin 5:​23-27) Il-​profeta Danjel jitkellem dwarhom bħala “l-​qaddisin taʼ Alla l-​Għoli,” li jirċievu s-​Saltna taħt ‘bin il-​bniedem,’ Kristu Ġesù. (Danjel 7:​13, 14, 18, 27) Iktar kmieni, permezz taʼ Mosè u Aron, Jehovah iddikjara lill-​ġens taʼ Iżrael: “Jiena l-​Mulej Alla tagħkom, għalhekk għandkom titqaddsu, u tkunu qaddisin, għax jien qaddis.”—Levitiku 11:44.

¹² Il-​kelma “taqdis” tfisser bażikament “l-​att jew il-​proċess li bih titqaddes, tissepara ruħek, jew titwarrab apparti biex taqdi lil Alla Jehovah jew tintuża minnu; l-​istat taʼ li tkun qaddis, imnaddaf, jew imsoffi.” Fl-​1938, It-​Torri taʼ l-​Għassa kien diġà qal li l-​Ġonadabijiet, jew nagħaġ oħra, “iridu jitgħallmu li l-​konsagrazzjoni [dedikazzjoni] u t-​taqdis huma meħtieġa minn kulmin se jsir parti mill-​kotra kbira li se tgħix fuq l-​art.” Fil-​viżjoni tal-​kotra kbira, li nsibu fil-​ktieb taʼ l-​Apokalissi, dawn jissemmew bħala li ‘ħaslu lbieshom u bajduhom fid-​demm tal-​Ħaruf’ u bħala li qed ‘jaqdu lil Jehovah lejl u nhar fit-​tempju tiegħu.’ (Apokalissi 7:​9, 14, 15) Bl-​għajnuna taʼ l-​ispirtu qaddis, in-​nagħaġ oħra jagħmlu l-​almu tagħhom biex jissodisfaw il-​ħtiġijiet taʼ qdusija li Jehovah jitlob minnhom.—2 Korintin 7:1.

Jagħmlu l-​Ġid lil Ħut Kristu

13, 14. (a) Skond il-​parabbola taʼ Ġesù tan-​nagħaġ u l-​mogħoż, minn xiex tiddependi s-​salvazzjoni tan-​nagħaġ? (b) F’dan iż-​żmien taʼ l-​aħħar, in-​nagħaġ oħra kif appoġġaw lil ħut Kristu?

¹³ Ġesù enfasizza r-​rabta mill-​qrib li hemm bejn in-​nagħaġ oħra u l-​merħla ċkejkna fil-​parabbola tiegħu tan-​nagħaġ u l-​mogħoż, li hija inkluża fil-​profezija tiegħu dwar “tmiem id-​dinja.” F’din il-​parabbola, Kristu wera ċar li s-​salvazzjoni tan-​nagħaġ l-​oħra hija marbuta mill-​qrib maʼ l-​imġiba tagħhom lejn il-​midlukin, li hu sejħilhom “ħuti.” Hu qal: “Is-​Sultan jgħid lil dawk taʼ fuq il-​lemin tiegħu, ‘Ejjew, mberkin minn Missieri, ħudu b’wirt tagħkom is-​Saltna li tħejjiet għalikom sa mill-​ħolqien tad-​dinja. . . . Tassew, ngħidilkom, kull ma għamiltu maʼ wieħed mill-​iżgħar fost dawn ħuti, għamiltuh miegħi.’”—Mattew 24:3; 25:​31-34, 40.

¹⁴ L-​espressjoni “kull ma għamiltu” tirreferi għal atti taʼ appoġġ b’imħabba murijin lil ħut Kristu li huma mnisslin mill-​ispirtu. Id-​dinja taʼ Satana stmat lil dawn bħala stranġieri, u saħansitra tefgħet lil xi wħud minnhom il-​ħabs. Huma kienu fil-​bżonn taʼ ikel, ilbies xieraq, u assistenza fil-​mard. (Mattew 25:​35, 36) F’dan iż-​żmien taʼ l-​aħħar, mill-​1914 ’l hawn, ħafna mill-​midlukin sabu ruħhom f’sitwazzjonijiet bħal dawn. L-​istorja moderna tax-​Xhieda taʼ Jehovah tagħti prova li huma sabu l-​appoġġ leali taʼ sħabhom, in-​nagħaġ oħra, hekk kif dawn tqanqlu mill-​ispirtu.

15, 16. (a) In-nagħaġ oħra f’liema attività għenu b’mod partikulari lill-​aħwa midlukin taʼ Kristu fuq l-​art? (b) Il-​midlukin kif urew l-​apprezzament tagħhom lejn in-​nagħaġ oħra?

¹⁵ F’dan iż-​żmien taʼ l-​aħħar, ħut Kristu fuq l-​art, il-​midlukin, irċivew l-​appoġġ attiv tan-​nagħaġ oħra partikolarment biex iwettqu l-​inkarigu li tahom Alla biex ixandru ‘dan l-​Evanġelju tas-​Saltna fid-​dinja kollha, biex il-​ġnus kollha jkollhom xhieda.’ (Mattew 24:14; Ġwann 14:12) Waqt li l-​għadd tal-​midlukin fuq l-​art dejjem qed jonqos matul is-​snin, l-​għadd taʼ nagħaġ oħra żdied ħafna u laħaq il-​miljuni. Eluf minnhom qed jaqdu bħala evanġelizzaturi full-time—pijunieri u missjunarji—u b’hekk ixerrdu l-​aħbar tajba tas-​Saltna “sa truf l-​art.” (Atti 1:8) Oħrajn jieħdu sehem billi jagħtu xiehda kemm jistgħu, u bil-​ferħ jappoġġaw finanzjarjament dan ix-​xogħol importanti.

¹⁶ Kemm japprezzawh ħut Kristu, il-​midlukin, dan l-​appoġġ leali minn sħabhom in-​nagħaġ oħra! Is-​sentimenti tagħhom huma spjegati tajjeb fil-​ktieb Worldwide Security Under the “Prince of Peace,” provdut mill-​klassi taʼ l-​ilsir fl-​1986. Dan jgħid: “Mit-​Tieni Gwerra Dinjija ’l hawn, it-​twettiq tal-​profezija taʼ Ġesù dwar ‘il-​konklużjoni tas-​sistema t’affarijiet’ huwa fil-​parti l-​kbira dovut għall-​ħidma li qed twettaq il-​‘kotra kbira’ taʼ ‘nagħaġ oħra.’ . . . Għalhekk, niżżu ħajr minn qalbna lill-​‘kotra kbira’ internazzjonali li titkellem b’ħafna ilsna differenti tas-​sehem kbir li kellha fit-​twettiq tal-​profezija [taʼ Ġesù] f’Mattew 24:14!”

“Ma Jaslux għall-​Perfezzjoni Mingħajrna”

17. Nies leali tal-​qedem li se jiġu rxoxtati fuq l-​art b’liema mod “ma jaslux għall-​perfezzjoni” mingħajr il-​midlukin?

¹⁷ Waqt li rrefera għal irġiel u nisa leali li għexu qabel Kristu, l-​appostlu Pawlu, bħala wieħed mill-​midlukin, setaʼ jikteb u jgħid: “Dawn kollha, għad li qalgħu xhieda tajba bis-​saħħa tal-​fidi tagħhom, ma kisbux dak li kien imwiegħed, billi Alla rafaʼ xi ħaġa aħjar għalina, bil-​ħsieb li huma ma jaslux għall-​perfezzjoni mingħajrna.” (Lhud 11:​35, 39, 40) Matul il-​Millennju, Kristu u ħutu l-​midlukin, il-​144,000, se jaqdu bħala slaten u qassisin fis-​sema u se jxerrdu fuq l-​art il-​benefiċċji li jirriżultaw mis-​sagrifiċċju li Kristu ħallas bħala fidwa. In-​nagħaġ oħra b’hekk se ‘jaslu għall-​perfezzjoni’ fil-​ġisem u fil-​moħħ.—Apokalissi 22:​1, 2.

18. (a) Il-fatti mill-​Bibbja x’għandhom jgħinu lin-​nagħaġ oħra japprezzaw? (b) In-​nagħaġ oħra f’liema tama jistennew “ir-​rivelazzjoni taʼ wlied Alla”?

¹⁸ Dan kollu għandu jġiegħel lin-​nagħaġ oħra jifhmu ċar għala l-​Iskrittura Griega Kristjana titfaʼ tant attenzjoni fuq Kristu u ħutu l-​midlukin u l-​parti ċentrali li għandhom fit-​twettiq taʼ l-​iskopijiet taʼ Jehovah. Għalhekk, in-​nagħaġ oħra jqisuh bħala privileġġ li jappoġġaw b’kull mod possibbli lill-​klassi taʼ l-​ilsir midluk waqt li jistennew “ir-​rivelazzjoni taʼ wlied Alla” f’Armageddon u matul il-​Millennju. Huma jistgħu jħarsu ’l quddiem lejn iż-​żmien meta jkunu “meħlusa mill-​jasar tat-​taħsir u jiksbu l-​ħelsien tal-​glorja taʼ wlied Alla.”—Rumani 8:​19-21.

Magħqudin fl-​Ispirtu fil-​Mafkar

19. “L-​ispirtu tal-​verità” x’għamel għall-​midlukin u għal sħabhom, u dawn kif se jkunu magħqudin b’mod speċjali fil-​lejla tat-​28 taʼ Marzu?

¹⁹ Fit-​talba li spiċċa biha fil-​lejla taʼ l-​14 taʼ Nisan tas-​sena 33 E.K., Ġesù qal: “Nitolbok li jkunu lkoll ħaġa waħda. Kif inti fija, Missier, u jiena fik, ħa jkunu huma wkoll ħaġa waħda fina, biex hekk id-​dinja temmen li inti bgħattni.” (Ġwann 17:​20, 21) Sforz l-​imħabba li għandu, Alla bagħat lil Ibnu biex jagħti ħajtu għas-​salvazzjoni tal-​midlukin u tad-​dinja taʼ bnedmin ubbidjenti. (1 Ġwann 2:2) “L-​ispirtu tal-​verità” għaqqad lil ħut Kristu u lil sħabhom. Fil-​lejla tat-​28 taʼ Marzu, wara nżul ix-​xemx, iż-​żewġ gruppi se jiltaqgħu flimkien biex jikkommemoraw il-​mewt taʼ Kristu u jiftakru f’dak kollu li Jehovah għamel għalihom permezz tas-​sagrifiċċju taʼ l-​għażiż Ibnu, Kristu Ġesù. Jalla l-​preżenza tagħhom f’din l-​okkażjoni importanti ssaħħaħ l-​unità taʼ bejniethom u ġġedded id-​determinazzjoni tagħhom li jkomplu jagħmlu r-​rieda t’Alla, u b’hekk jagħtu prova li huma ferħanin li jinsabu fost dawk maħbubin minn Jehovah.

Bħala Reviżjoni

• “L-​ispirtu tal-​verità” meta ntbagħat lill-​Kristjani tal-​bidu, u kif wera li kien taʼ għajnuna għalihom?

• Il-midlukin kif ikunu jafu li rċivew is-​sejħa tas-​sema?

• L-ispirtu t’Alla b’liema modi jopera fuq in-​nagħaġ oħra?

• In-nagħaġ oħra kif għamlu l-​ġid lil ħut Kristu, u għala ‘ma jaslux għall-​perfezzjoni mingħajr’ il-​midlukin?

[Stampa f’paġna 21]

“L-​ispirtu tal-​verità” tferraʼ fuq id-​dixxipli f’Pentekoste tas-​sena 33 E.K.

[Stampi f’paġna 23]

In-​nagħaġ oħra għamlu l-​ġid lil ħut Kristu billi appoġġawhom biex iwettqu l-​inkarigu divin li jippridkaw