Mistoqsijiet mill-​Qarrejja

Meta Ġwanni ra lil dawk tal-​“kotra kbira” jagħtu servizz sagru fit-​tempju taʼ Jehovah, f’liema parti tat-​tempju kienu qegħdin jagħmlu dan?​—Apokalissi 7:​9-​15.

Huwa raġunevoli li ngħidu li l-​kotra kbira tqim lil Jehovah f’waħda mill-​btieħi tat-​tempju spiritwali kbir tiegħu hawn fuq l-​art, speċifikament fil-​bitħa li taqbel mal-​bitħa taʼ barra tat-​tempju taʼ Salamun.

Qabel kien intqal li l-​kotra kbira qiegħda f’ekwivalenza spiritwali, jew antitip, tal-​Bitħa tal-​Ġentili li kienet teżisti fi żmien Ġesù. Madankollu, iktar riċerka wriet minn taʼ l-​inqas ħames raġunijiet għala dan mhux hekk. L-​ewwel, mhux il-​fatturi kollha tat-​tempju t’Erodi għandhom antitip fit-​tempju spiritwali kbir taʼ Jehovah. Per eżempju, fit-​tempju t’Erodi kien hemm il-​Bitħa tan-​Nisa u l-​Bitħa taʼ Iżrael. Kemm l-​irġiel kif ukoll in-​nisa setgħu jidħlu fil-​Bitħa tan-​Nisa, filwaqt li fil-​Bitħa taʼ Iżrael setgħu jidħlu biss l-​irġiel. Fil-​btieħi tat-​tempju spiritwali kbir taʼ Jehovah hawn fuq l-​art, l-​irġiel u n-​nisa m’humiex separati fil-​qima tagħhom. (Galatin 3:​28, 29) Għalhekk, m’hemmx ekwivalenza għall-​Bitħa tan-​Nisa u l-​Bitħa taʼ Iżrael fit-​tempju spiritwali.

It-tieni, ma kien hemm l-​ebda Bitħa tal-​Ġentili fil-​pjanti tal-​bini tat-​tempju taʼ Salamun mogħtijin minn Alla u lanqas fil-​viżjoni tat-​tempju li kellu Eżekjel; lanqas ma kien hemm waħda fit-​tempju li reġaʼ nbena minn Żerubbabel. Għalhekk, m’hemmx raġuni biex nikkonkludu li l-​Bitħa tal-​Ġentili għandha xi rwol fl-​arranġament għall-​qima fit-​tempju spiritwali kbir taʼ Jehovah, speċjalment meta nikkunsidraw il-​punt li jmiss.

It-tielet, il-​Bitħa tal-​Ġentili nbniet mis-​Sultan Erodi minn Edom biex jigglorifika lilu nnifsu u biex jaqlaʼ l-​favur taʼ Ruma. Erodi beda jirrestawra t-​tempju taʼ Żerubbabel fis-​sena 18 jew 17 Q.E.K. The Anchor Bible Dictionary jispjega: “Il-​gosti klassiċi tal-​poter imperjali lejn il-​Punent [Ruma] . . . kienu jitolbu tempju akbar minn dawk taʼ bliet komparabbli oħrajn tal-​Lvant.” Madankollu, il-​qisien tat-​tempju kienu diġà stabbiliti. Id-​dizzjunarju jispjega: “Waqt li t-​Tempju ried ikollu l-​istess qisien bħal dawk taʼ qablu [taʼ Salamun u taʼ Żerubbabel], il-​Muntanja tat-​Tempju ma kinitx ristretta fid-​daqs potenzjali tagħha.” Għalhekk, Erodi kabbar it-​tempju billi żied dik li llum il-​ġurnata tissejjaħ il-​Bitħa tal-​Ġentili. Għalfejn bini bi storja bħal din għandu jkollu antitip fl-​arranġament tat-​tempju spiritwali taʼ Jehovah?

Ir-rabaʼ, kważi kulħadd​—l-​għomja, iz-​zopop, u l-​Ġentili mhux ċirkonċiżi​—setaʼ jidħol fil-​Bitħa tal-​Ġentili. (Mattew 21:​14, 15) Veru, il-​bitħa kellha skop għal ħafna Ġentili mhux ċirkonċiżi li xtaqu jagħmlu xi offerti lil Alla. U kien hemmhekk li Ġesù kien ikellem lill-​folol u darbtejn keċċa lis-​sarrafa tal-​flus u lill-​bejjiegħa, billi qalilhom li kienu ddiżonoraw id-​dar taʼ Missieru. (Mattew 21:​12, 13; Ġwann 2:​14-​16) Xorta waħda, The Jewish Encyclopedia tgħid: “Din il-​bitħa taʼ barra, biex ngħidu hekk, ma kinitx parti mit-​Tempju. L-​art tagħha ma kinitx qaddisa, u kulħadd setaʼ jidħol fiha.”

Il-​ħames, il-​kelma Griega (hi·e·ron’) tradotta “tempju” li hi użata bħala referenza għall-​Bitħa tal-​Ġentili “tirreferi għall-​bini kollu, iktar milli speċifikament għall-​bini tat-​Tempju nnifsu,” jgħid A Handbook on the Gospel of Matthew, minn Barclay M. Newman u Philip C. Stine. B’kuntrast, il-​kelma Griega (na·os’) tradotta “tempju” fil-​viżjoni li kellu Ġwanni dwar il-​kotra kbira hija iktar speċifika. Meta tintuża f’konnessjoni mat-​tempju taʼ Ġerusalemm, din kważi dejjem tirreferi għall-​Qaddis tal-​Qaddisin jew għat-​tempju nnifsu. Xi drabi tiġi tradotta wkoll “santwarju.”—Mattew 27:​5, 51; Luqa 1:​9, 21.

Membri tal-​kotra kbira jeżerċitaw fidi fis-​sagrifiċċju li Ġesù offra bħala fidwa. Huma nodfa spiritwalment, billi “l-​ilbiesi tagħhom ħasluhom u bajjduhom fid-​demm tal-​Ħaruf.” Għalhekk, huma dikjarati twajbin bil-​prospett li jsiru ħbieb t’Alla u li jibqgħu ħajjin fit-​tribulazzjoni l-​kbira. (Ġakbu 2:​23, 25) F’ħafna modi, huma bħall-​proseliti f’Iżrael li qagħdu għall-​patt tal-​Liġi u taw qima flimkien maʼ l-​Iżraelin.

Bla dubju, dawk il-​proseliti ma kinux jaqdu fil-​bitħa taʼ ġewwa, fejn il-​qassisin kienu jwettqu dmirijiethom. U l-​membri tal-​kotra kbira m’humiex qegħdin fil-​bitħa taʼ ġewwa tat-​tempju spiritwali kbir taʼ Jehovah, il-​bitħa li tirrappreżenta l-​kundizzjoni taʼ dlik bl-​ispirtu tal-​membri tas-​“saċerdozju qaddis” taʼ Jehovah waqt li dawn għadhom fuq l-​art. (1 Pietru 2:5) Imma, bħalma qal wieħed mix-​xjuħ li qegħdin fis-​sema lil Ġwanni, il-​kotra kbira qiegħda sewwasew ġot-​tempju, mhux f’xi post barra mit-​tempju f’xi tip taʼ Bitħa spiritwali tal-​Ġentili. Huma qegħdin fl-​istat spiritwali nadif u qaddis iffigurat bil-​quddiem mill-​bitħa taʼ barra tat-​tempju taʼ Salamun. Xi privileġġ hu dan! U kemm jenfasizza l-​bżonn li kulħadd iżomm safa spiritwali u morali l-​ħin kollu!

[Dijagramma/Stampa f’paġna 31]

(Għall-formazzjoni sħiħa tat-test, ara pubblikazzjoni)

It-​Tempju taʼ Salamun

1. Il-Qaddis tal-​Qaddisin

2. Il-Bitħa taʼ Ġewwa

3. Il-Bitħa taʼ Barra

4. It-Taraġ li Jagħti għall-​Bitħa tat-​Tempju