Ħarsa mill-​Qrib Lejn Xi Ħrejjef dwar il-​Mewt

MATUL l-​istorja, il-​bniedem baqaʼ mħawwad u mbeżżaʼ quddiem il-​prospett mudlam tal-​mewt. Iktar minn hekk, il-​biżaʼ mill-​mewt kompla jissaħħaħ b’taħlita taʼ ideat reliġjużi foloz, drawwiet popolari, u twemmin persunali b’għeruq ħoxnin. Il-​biżaʼ mill-​mewt jistaʼ jipparalizza l-​abbiltà taʼ persuna li titgħaxxaq bil-​ħajja u tmermer il-​fidi qawwija li fil-​ħajja hemm skop.

Ir-reliġjonijiet popolari jagħmlu ħafna ħsara f’li jippromwovu numru taʼ ħrejjef komuni dwar il-​mewt. Billi neżaminaw xi ftit minn dawn fid-​dawl tal-​verità tal-​Bibbja, ara jekk il-​ħarsa persunali tiegħek dwar il-​mewt tistax tiġi ċċarata.

Ħrafa Nru. 1: Il-​mewt hija t-​tmiem naturali tal-​ħajja.

“Il-​mewt . . . hija parti integrali minn ħajjitna,” jgħid il-​ktieb Death—The Final Stage of Growth (Il-Mewt—L-​Aħħar Stadju taʼ l-​Iżvilupp). Kummenti bħal dan jirriflettu t-​twemmin li l-​mewt hija normali—it-​tmiem naturali taʼ l-​organiżmi ħajjin kollha. Minħabba f’hekk, twemmin bħal dan ħoloq f’ħafna nies filosofija nikilistika, li tinkludi ċ-​ċaħda taʼ kull twemmin, u mġiba opportunistika.

Imma hija l-​mewt verament it-​tmiem naturali tal-​ħajja? Mhux ir-​riċerkaturi kollha jaqblu maʼ dan. Per eżempju, Calvin Harley, bijologu li jistudja x-​xjuħija tal-​bniedem, f’intervista qal li hu ma jemminx li l-​bnedmin “huma programmati biex imutu.” L-​immunologu William Clark, studjuż taʼ l-​immunità tal-​bniedem, osserva li l-​mewt m’għandhiex tkun parti mid-​definizzjoni tal-​ħajja. Ukoll, Seymour Benzer, mill-​Istitut tat-​Teknoloġija taʼ Kalifornja rrifletta u qal li “x-​xjuħija tistaʼ tiġi deskritta l-​aħjar mhux bħal arloġġ, imma bħala xenarju, li aħna nisperaw li nistgħu nbiddlu.”

Meta x-​xjenzati jistudjaw kif inhu magħmul il-​bniedem, jitħawdu. Huma jaraw kemm aħna ġejna mżejnin b’doni taʼ riżorsi u abbiltajiet li huma ħafna iktar milli nistgħu niġu bżonn f’ħajja taʼ 70 jew 80 sena. Per eżempju, ix-​xjenzati sabu li moħħ il-​bniedem jiflaħ iżomm memorja immensa. Riċerkatur wieħed ikkalkula li moħħna jistaʼ jżomm informazzjoni li “tistaʼ timla xi għoxrin miljun volum, daqskemm ikun hemm fl-​akbar libreriji tad-​dinja.” Xi newroxjenzati jgħidu li matul ħajja medja, bniedem juża biss 1/100 taʼ wieħed fil-​mija (.0001) taʼ l-​abbiltà potenzjali taʼ moħħu. Huwa xieraq li nistaqsu, ‘Għalfejn għandna moħħ li jiflaħ daqstant meta aħna nużaw biss frazzjoni ċkejkna minnu matul ħajja medja?’

Ikkunsidra wkoll kemm il-​bniedem jirreaġixxi b’mod li xejn m’hu naturali għall-​mewt! Għall-​maġġuranza, il-​mewt tal-​mara jew tar-​raġel, jew taʼ xi tifel jew tifla tistaʼ tkun l-​akbar trawma taʼ ħajjithom. L-​emozzjonijiet jibqgħu mdamdma għal żmien twil wara l-​mewt taʼ xi ħadd maħbub ħafna. Anki dawk li jgħidu li l-​mewt hija naturali għall-​bniedem isibuha iebsa biex jaċċettaw l-​idea li l-​mewt tagħhom stess se tfisser it-​tmiem taʼ kollox. Il-​British Medical Journal tkellem dwar “[ħsieb] komuni fost l-​esperti li kulħadd jixtieq idum jgħix kemm jistaʼ jkun.”

Meta nqisu r-​reazzjoni ġenerali tal-​bniedem lejn il-​mewt, il-​potenzjal taʼ l-​għaġeb li għandu biex jiftakar u jitgħallem, u x-​xewqa ġewwinija tiegħu għall-​eternità, m’huwiex ċar li l-​bniedem inħoloq biex jgħix? Ċertament, Alla ma ħalaqx lill-​bnedmin bil-​mewt bħala konsegwenza naturali, imma bil-​prospett li jibqgħu jgħixu għal dejjem. Innota x’futur poġġa Alla quddiem l-​ewwel żewġ bnedmin: “Nisslu u oktru, u imlew l-​art, u aħkmuha; u saltnu fuq il-​ħut tal-​baħar u t-​tajr taʼ l-​ajru u l-​ħlejjaq kollha li jitkaxkru fuq l-​art.” (Ġenesi 1:28) X’futur mill-​isbaħ u dejjiemi!

Ħrafa Nru. 2: Alla jieħu n-​nies fil-​mewt biex ikunu ħdejh.

Mara taʼ 27 sena li kienet se tmut u tħalli warajha tlett itfal qalet hekk lil waħda soru Kattolika: “Tiġix hawn u tgħidli li din hija r-​rieda t’Alla għalija. . . . Nobgħod nismaʼ lil xi ħaddieħor jgħidli hekk.” Minkejja dan, ħafna reliġjonijiet hekk jgħallmu dwar il-​mewt—li Alla jieħu lin-​nies biex ikunu ħdejh.

Huwa l-​Ħallieq daqshekk kiefer li bla sentimenti taʼ xejn jaqbad u jġib il-​mewt fuqna, meta jaf li dan se jaqsmilna qalbna? Le, mhux Alla tal-​Bibbja. Bħal ma jgħid l-​1 Ġwann 4:​8, “Alla hu mħabba.” Innota li hawn ma jgħidx li Alla għandu l-​imħabba jew li Alla jħobb, imma jgħid li Alla hu mħabba. Tant hi intensa, tant hi pura, tant perfetta hija l-​imħabba t’Alla, tant hija minsuġa fil-​personalità u fl-​azzjonijiet tiegħu li bir-​raġun kollu jistaʼ jintqal li hu il-​personifikazzjoni stess taʼ l-​imħabba. Dan m’huwiex Alla li jieħu n-​nies fil-​mewt biex ikunu ħdejh.

Ir-reliġjon falza ħalliet ħafna nies imħawdin dwar fejn qegħdin il-​mejtin u dwar il-​kundizzjoni tagħhom. Fost id-​destinazzjonijiet li n-​nies jemmnu bihom hemm is-​sema, l-​infern, il-​purgatorju, u l-​Limbu. Hemm minnhom li ħadd ma jifhem x’inhuma u oħrajn li huma verament tal-​waħx. Il-​Bibbja, min-​naħa l-​oħra, turina li l-​mejtin m’huma konxji taʼ xejn; huma jinsabu fi stat li jistaʼ jixxebbah l-​aħjar maʼ l-​irqad. (Koħèlet 9:​5, 10; Ġwann 11:​11-14) Għalhekk, m’għandniex ninkwetaw fuq x’se jiġrilna wara l-​mewt, daqskemm kieku ninkwetaw meta naraw lil xi ħadd rieqed fil-​fond. Ġesù tkellem dwar żmien meta “dawk kollha li jkunu fl-​oqbra” se “joħorġu” għall-​ħajja mill-​ġdid f’art magħmula ġenna.​—Ġwann 5:​28, 29; Luqa 23:43.

Ħrafa Nru. 3: Alla jieħu lit-​tfal ċkejknin biex isiru anġli.

Elisabeth Kübler-Ross, li studjat lil individwi morda b’mard terminali semmiet ħsieb komuni ieħor fost nies reliġjużi. Billi rrakkontat ġrajja li seħħet fir-​realtà, hi qalet li “m’huwiex għaqli li tgħid lil tifla żgħira li tilfet lil ħuha, li Alla tant iħobb lis-​subien ċkejknin li ħa liċ-​ċkejken Johnny fis-​sema.” Stqarrija bħal din titfaʼ dell ikrah fuq Alla u ma tirriflettix il-​personalità u l-​imġiba tiegħu. It-​Tabiba Kübler-Ross tkompli tgħid: “Meta din it-​tifla żgħira kibret u saret mara, hi qatt ma taffiet ir-​rabja li kellha għal Alla, li rriżultat f’dipressjoni psikotika meta hi stess tilfet lit-​tifel żgħir tagħha tletin sena wara.”

Għalfejn għandu Alla jaħtaf tifel żgħir biex ikollu anġlu ieħor—bħallikieku Alla għandu bżonn lit-​tifel iktar milli għandhom bżonnu l-​ġenituri? Li kieku kien veru li Alla jieħu t-​tfal, ma kinitx din il-​ħaġa tagħmlu Ħallieq bla mħabba u egoist? Kuntrarju għal dan il-​ħsieb, il-​Bibbja tgħid: “L-​imħabba ġejja minn Alla.” (1 Ġwann 4:7) Sejjer Alla taʼ mħabba jikkawża telfa li lanqas bnedmin bl-​iċken livell taʼ deċenza ma jittolleraw?

Allura għalfejn imutu t-​tfal? Parti mit-​tweġiba tal-​Bibbja hija dokumentata f’Koħèlet 9:11: “F’kollox jidħol iż-​żmien u ċ-​ċirkustanzi.” Ukoll, Salm 51:7 (51:​5, NW) jgħidilna li aħna lkoll nitnisslu imperfetti, jew midinbin, u li dak li jiġri lil kull bniedem issa huwa li fl-​aħħar imut minħabba diversi raġunijiet. Xi kultant il-​mewt tasal qabel it-​twelid, u b’hekk jirriżulta f’li titwieled tarbija mejta. F’każijiet oħra, tfal jiffaċċjaw ċirkustanzi traġiċi jew aċċidenti u jmutu. Alla m’huwiex responsabbli għal affarijiet bħal dawn.

Ħrafa Nru. 4: Xi nies jiġu turmentati wara l-​mewt.

Ħafna reliġjonijiet jgħallmu li l-​ħżiena se jmorru f’infern tan-​nar u jibqgħu jiġu turmentati għal dejjem. Huwa dan it-​tagħlim loġiku u Skritturali? Il-​ħajja tal-​bniedem hija limitata għal 70 jew 80 sena. Anki jekk xi ħadd huwa ħati li tul ħajtu kollha wettaq ħażen mill-​agħar, tistaʼ t-​tbatija eterna tkun il-​kastig xieraq? Le. Tkun xi ħaġa kompletament inġusta li taħqar lil xi ħadd għal dejjem minħabba d-​dnubiet li wettaq fiż-​żmien qasir taʼ ħajtu.

Alla biss jistaʼ jgħarraf x’jiġri lin-​nies wara li jmutu, u hu għamel dan fil-​Kelma miktuba tiegħu, il-​Bibbja. Dan huwa dak li tgħid il-​Bibbja: “Bħalma tmut il-​bhima jmut ukoll il-​bniedem, għax l-​istess hu nifs il-​ħajja li hemm fihom ilkoll . . . Lejn l-​istess post imorru t-​tnejn; lkoll mit-​trab saru, u lkoll lejn it-​trab jerġgħu jmorru.” (Koħèlet 3:​19, 20) Hawnhekk m’hawn l-​ebda infern tan-​nar imsemmi. Il-​bnedmin jerġgħu lura fit-​trab—ma jibqgħux jeżistu—meta jmutu.

Biex xi ħadd ibati jrid ikun jaf x’inhu jiġri. Jafu l-​mejtin x’inhu jiġri? Għal darb’oħra, il-​Bibbja tagħtina t-​tweġiba: “Il-​ħajjin, għallinqas, jafu li għad imutu, iżda l-​mejtin ma jafu xejn; lanqas ħlas ma baqaʼ għalihom għax imqar it-​tifkira tagħhom intesiet.” (Koħèlet 9:5) La l-​mejtin “ma jafu xejn,” huwa impossibbli li jiġu turmentati f’xi post.

Ħrafa Nru. 5: Il-​mewt tfisser it-​tmiem taʼ l-​eżistenza tagħna għal dejjem.

Aħna ma nibqgħux neżistu meta mmutu, imma dan mhux bilfors ifisser li jkun spiċċa kollox. Ir-​raġel leali Ġob kien jaf li kien se jmur fil-​qabar, Xeol jew Art l-​Imwiet, meta jmut. Imma ismaʼ t-​talba tiegħu lil Alla: “M’hux li kont taħbini f’Art l-​Imwiet fejn nistkenn sa ma tibred il-​korla tiegħek u tiffissali żmien li tiftakar fija. Li kien jistaʼ bniedem imut u jerġaʼ għal ħajja . . . Kont tgħajjatli u jiena nwieġbek.”—Ġob 14:​13-15.

Ġob kien jemmen li jekk jibqaʼ leali sal-​mewt, Alla kien se jiftakru u fiż-​żmien xieraq jirxoxtah. Dan kien it-​twemmin tal-​qaddejja kollha t’Alla fi żmien il-​qedem. Ġesù nnifsu kkonferma din it-​tama u wera li Alla kien se jużah biex iqajjem lill-​mejtin. Il-​kliem taʼ Kristu stess jiżgurana: “Tiġi siegħa meta dawk kollha li jkunu fl-​oqbra jisimgħu leħnu [taʼ Ġesù] u joħorġu; dawk li jkunu għamlu t-​tajjeb iqumu għall-​ħajja, imma dawk li jkunu għamlu l-​ħażin iqumu għall-​kundanna.”​—Ġwann 5:​28, 29.

F’qasir żmien ħafna, Alla se jneħħi l-​ħażen kollu u jwaqqaf dinja ġdida taħt ħakma mis-​sema. (Salm 37:​10, 11; Danjel 2:44; Apokalissi 16:​14, 16) Ir-​riżultat se jkun ġenna taʼ l-​art mal-​globu kollu, mimlija b’nies li jaqdu ’l Alla. Fil-​Bibbja naqraw: “Smajt leħen qawwi ġej mit-​tron jgħid: ‘Din hi l-​għamara taʼ Alla mal-​bnedmin; u hu jgħammar magħhom, u huma jkunu l-​poplu tiegħu, u Alla nnifsu jkun magħhom, Alla tagħhom. Hu jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.’”—Apokalissi 21:​3, 4.

Meħlusin mill-​Biżaʼ

Għarfien dwar it-​tama taʼ l-​irxoxt flimkien m’għarfien dwar il-​Wieħed li huwa s-​sors taʼ dan il-​provvediment jistaʼ jfarrġek. Ġesù wiegħed: “Tagħrfu l-​verità u l-​verità teħliskom” (Ġwann 8:​32) Dan jinkludi li ninħelsu mill-​biżaʼ mill-​mewt. Jehovah huwa l-​uniku wieħed li fil-​fatt jistaʼ jibdel il-​proċess tax-​xjuħija u l-​mewt u jagħtina l-​ħajja taʼ dejjem. Tistaʼ sserraħ fuqhom il-​wegħdi t’Alla? Iva tistaʼ, għaliex il-​Kelma t’Alla dejjem isseħħ. (Isaija 55:11) Aħna nħeġġuk titgħallem iktar dwar l-​iskopijiet t’Alla għall-​umanità. Ix-​Xhieda taʼ Jehovah se jkunu ferħanin ħafna li jgħinuk.

[Kumment f’paġna 6]

Il-​biżaʼ mill-​mewt jistaʼ jipparalizza l-​abbiltà taʼ persuna li titgħaxxaq bil-​ħajja

[Tabella f’paġna 7]

XI ĦREJJEF MAGĦRUFA DWAR IL-​MEWT L-​ISKRITTURI XI JGĦIDU?

● Il-​mewt hija t-​tmiem naturali tal-​ħajja Ġenesi 1:28; 2:17; Rumani 5:12

● Alla jieħu n-​nies fil-​mewt biex ikunu ħdejh Ġob 34:15; Salm 37:​11, 29; 115:16

● Alla jieħu lit-​tfal ċkejknin biex isiru anġli Salm 51:7 (51:​5, NW); 104:​1, 4, NW; Lhud 1:​7, 14

● Xi nies jiġu turmentati wara l-​mewt Salm 146:4; Koħèlet 9:​5, 10; Rumani 6:23

[Stampa f’paġna 8]

Li nsiru nafu l-​verità dwar il-​mewt jeħlisna mill-​biżaʼ

[Sors tal-​Istampa f’paġna 5]

Barrators​—Giampolo/The Doré Illustrations For Dante’s Divine Comedy/Dover Publications Inc.