Tagħti Iktar Milli Tiflaħ

“TISTAʼ tgħajjarni li jien tallab; ma niddejjaq xejn. Qed nittallab għal Ġesù.” Dan il-​kliem li wera kif ħassu qassis Protestant jenfasizza l-​kontroversja li teżisti dwar il-​ġbir reliġjuż tal-​fondi. Ir-​reliġjonijiet stabbiliti jidhru li jibqgħu jeżistu biss jekk ikollhom ammont sostanzjali t’appoġġ finanzjarju. Is-​salarji jridu jitħallsu, it-​tempji jridu jinbnew u jinżammu fi stat tajjeb, u jridu jiġu finanzjati kampanji t’evanġelizzar. Minfejn se jġibu dawn il-​flus kollha?

Għal ħafna knejjes, is-​soluzzjoni tinsab fil-​ħlas tad-​dieċmi.a “Il-​ħlas tad-​dieċmi huwa l-​mod li bih Alla jiffinanzja s-​saltna Tiegħu fuq l-​art,” isostni l-​evanġelista Norman Robertson. “Dan huwa l-​metodu t’ekonomija Tiegħu li jagħmilha possibbli li jixxandar l-​Evanġelju.” B’wiċċu minn quddiem, waqt li jfakkar lis-​segwaċi tiegħu dwar ir-​responsabbiltà tagħhom li jagħtu, b’enfasi hu jistqarr: ‘Il-​ħlas tad-​dieċmi m’huwiex xi ħaġa li tagħmilha għax tkun tiflaħ tħallas. Hu att taʼ ubbidjenza. Jekk ma tħallasx id-​dieċmi, tkun bla dubju qed tikser il-​kmandamenti t’Alla. Tkun qed tisraq flus ħaddieħor bil-​qerq.’​—Tithing​—God’s Financial Plan.

X’aktarx li taqbel li l-​għoti għandu jkun parti mill-​qima Kristjana. Madankollu, tħoss int li l-​appelli persistenti għall-​flus idejquk, jew saħansitra ssibhom offensivi? It-​teologu Brażiljan Inácio Strieder jakkuża l-​knejjes li qed jitolbu d-​dieċmi biex “isolvu l-​problemi istituzzjonali tagħhom” u dawn il-​prattiċi jsejħulhom “illeġittimi, abbużivi, u devjazzjoni teoloġika.” Hu josserva li r-​riżultat hu li “nies bla xogħol, nisa romol, nies li joqogħdu fil-​kerrejjiet, u dawk li m’humiex kapaċi jużaw il-​loġika jaslu għall-​konklużjoni li Alla abbandunahom u li tant huma obbligati jagħtu lill-​‘qassis’ li l-​familji tagħhom stess jispiċċaw bil-​ġuħ.”

Forsi tistaʼ taħseb: ‘Qegħdin il-​knejjes li jitolbu d-​dieċmi japplikaw l-​Iskrittura sew? Jew forsi xi reliġjonijiet qed jinqdew bil-​biżaʼ t’Alla biex lill-​merħla jqaxxruha ħajja? Tassew li Alla jistenna li aħna nagħtu iktar milli nifilħu?’

[Nota taʼ taħt]