Mal-​Mejda tal-​Kaptan

WIEĦED jitgħaxxaq jiekol mal-​mejda tal-​kaptan fuq vapur meta jkun hemm nies interessanti, ikel tajjeb, u konversazzjoni pjaċevoli. Imma diskussjoni mal-​mejda tal-​Kaptan Robert G. Smith, tal-​White Star Line, tefgħet id-​dawl fuq mejda taʼ ikel spiritwali.—Isaija 25:6.

Fl-1894, fl-​età taʼ 24 sena, Robert sar kaptan tal-​bastiment bil-​qlugħ Kinclune of Dundee biex jagħmel l-​ewwel vjaġġ tiegħu madwar id-​dinja. Iktar tard, sar il-​kaptan tal-​vapuri tal-​White Star, bħas-​Cedric, is-​Cevic, u r-​Runic.a Waqt li kien qed jaqsam l-​Atlantiku minn New York sa Liverpool, l-​Ingilterra, fuq wieħed minn dawn il-​vapuri, Robert stieden lil Charles Taze Russell biex imur jiekol mal-​mejda tal-​kaptan. Il-​konversazzjoni maʼ Russell qanqlet l-​interess taʼ Robert fil-​messaġġ tal-​Bibbja, u sabiex jitgħallem iktar aċċetta li jikseb kopji taʼ Studies in the Scriptures mingħand Russell.

Russell żamm kuntatt miegħu bl-​ittri, u bħala riżultat, l-​interess taʼ Robert fil-​messaġġ tal-​Bibbja żdied. Robert qasam l-​għarfien li kien għadu kif tgħallem mal-​mara tiegħu. It-​tnejn li huma ma damux wisq ma saru attivi bħala Studenti tal-​Bibbja, bħalma kienu magħrufin dak iż-​żmien ix-​Xhieda taʼ Jehovah. Iktar tard, Robert kellu l-​privileġġ li jagħti taħditiet mill-​Bibbja. Per eżempju, fi Brisbane, l-​Awstralja, hu tkellem dwar “Il-​Balzmu taʼ Gilgħad” u wera kif il-​Kelma t’Alla fiha messaġġ li huwa “rimedju għall-​gwajijiet kollha taʼ l-​art.” Lura fl-​Ingilterra, martu u wliedu ż-​żgħar għenuh biex jippreżenta l-​“Photo-Drama of Creation,” billi kienu jsemmgħu l-​kummentarji taʼ Russell fuq fonografu waqt li kienu jintwerew is-​slajds.

Robert għadda lil uliedu l-​wirt tal-​verità tas-​Saltna li kien irċieva. Illum, ħames ġenerazzjonijiet wara, 18-il membru tal-​familja jinsabu beżlin jaqsmu l-​aħbar tajba m’oħrajn, u huma grati għal dak li ġie servut mal-​mejda tal-​kaptan.

Permezz tal-​pubblikazzjonijiet tagħhom u x-​xogħol edukattiv tagħhom mill-​Bibbja, ix-​Xhieda taʼ Jehovah qegħdin jgħinu lin-​nies madwar id-​dinja biex jitgħallmu l-​messaġġ tal-​Bibbja li qanqal l-​interess tal-​Kaptan Smith. Int ukoll tistaʼ ssir taf x’kien hemm daqshekk interessanti mal-​mejda tal-​kaptan.

[Nota taʼ taħt]

[Stampa f’paġna 8]

Robert G. Smith

[Stampa f’paġna 8]

Charles T. Russell