Persekuzzjoni Reliġjuża—Għala?

TAĦSEB int li n-​nies għandhom jiġu persegwitati minħabba r-​reliġjon tagħhom? X’aktarx li le​—għallinqas mhux sakemm ma jindaħlux fid-​drittijiet taʼ l-​oħrajn. Madankollu, il-​persekuzzjoni reliġjuża ilha teżisti għal ħafna snin u għadha teżisti. Per eżempju, ħafna mix-​Xhieda taʼ Jehovah fl-​Ewropa u f’partijiet oħra tad-​dinja spiss ġew imċaħħdin mid-​drittijiet tagħhom u trattati ħażin b’kefrija matul is-​seklu għoxrin.

Matul dak iż-​żmien, ix-​Xhieda taʼ Jehovah sofrew minn persekuzzjoni kiefra, organizzata, u għal perijodu twil taħt iż-​żewġ reġimi totalitarji fl-​Ewropa. X’nitgħallmu mill-​esperjenza tagħhom dwar il-​persekuzzjoni reliġjuża? U x’nistgħu nitgħallmu mill-​mod kif huma rreaġixxew għas-​sofferenzi?

“M’Humiex tad-​Dinja”

Ix-​Xhieda taʼ Jehovah jagħmlu ħilithom kollha biex jobdu l-​liġi, iżommu l-​paċi, u jkunu nodfa moralment. Ma jopponux lill-​gvernijiet u ma jisfidawhomx, u lanqas ma jqanqlu l-​persekuzzjoni għaliex iridu jkunu martri. Dawn il-​Kristjani jżommu n-​newtralità fil-​politika. Dan hu fi qbil mal-​kliem taʼ Ġesù: “[Is-segwaċi tiegħi] m’humiex tad-​dinja bħalma jiena m’iniex tad-​dinja.” (Ġwann 17:16) Ħafna mill-​gvernijiet jirrikonoxxu l-​waqfa newtrali tax-​Xhieda. Imma l-​ħakkiema totalitarji ftit li xejn għandhom rispett għall-​ħtieġa Biblika li l-​Kristjani m’għandhom ikunu l-​ebda parti mid-​dinja.

Ir-raġuni għal dan ġiet spjegata waqt konferenza li saret fl-​Università taʼ Heidelberg, fil-​Ġermanja, f’Novembru tas-​sena 2000. Il-​konferenza kellha t-​tema “Repressjoni u Rikonoxximent tad-​Drittijiet: Ix-​Xhieda taʼ Jehovah taħt id-​Dittatorjat Soċjalista Nazzjonali u Dak Komunist.” It-​tabib Clemens Vollnhals taʼ l-​Istitut Hannah-Arendt għar-​Riċerka dwar it-​Totalitarjaniżmu għamel din l-​osservazzjoni: “Ir-​reġimi totalitarji ma jagħmlux limitazzjonijiet fuq l-​attivitajiet politiċi tagħhom biss. Huma jesiġu s-​sottomissjoni assoluta tal-​persuna.”

Il-Kristjani veri ma jistgħux jissottomettu b’mod assolut il-​“persuna” tagħhom lejn il-​gvernijiet umani, ladarba huma diġà wiegħdu l-​lealtà assoluta tagħhom lil Alla Jehovah waħdu. Xhieda li jgħixu taħt dittatorjati totalitarji sabu li dak li jesiġi minnhom l-​istat u dak li jirrikjedi minnhom it-​twemmin tagħhom xi drabi jkunu f’konflitt. X’għamlu meta ħabbtu wiċċhom maʼ konflitti bħal dawn? L-​istorja turi li x-​Xhieda taʼ Jehovah applikaw f’ħajjithom il-​prinċipju li esprimew id-​dixxipli taʼ Ġesù Kristu: “Jeħtieġ nobdu aktar lil Alla milli l-​bnedmin.”—Atti 5:29.

Eluf taʼ Xhieda żammew il-​lealtà lejn it-​twemmin tagħhom u baqgħu newtrali fi kwistjonijiet politiċi, minkejja l-​iktar persekuzzjoni ħarxa li kellhom. Kif setgħu jissaportu? Minfejn ġabu s-​saħħa biex jagħmlu dan? Ejja naraw huma stess x’jgħidu. U ejja naraw x’jistgħu jitgħallmu mill-​esperjenzi tagħhom kemm dawk li huma Xhieda u kemm dawk li m’humiex.

[Kumment f’paġna 4]

Ix-​Xhieda taʼ Jehovah fil-​Ġermanja sofrew persekuzzjoni ħarxa u għal perijodu twil taħt iż-​żewġ reġimi totalitarji tas-​seklu 20

[Kumment f’paġna 4]

“Ir-​reġimi totalitarji ma jagħmlux limitazzjonijiet fuq l-​attivitajiet politiċi tagħhom biss. Huma jesiġu s-​sottomissjoni assoluta tal-​persuna.”—It-​tabib Clemens Vollnhals

[Stampa f’paġna 4]

Il-​membri tal-​familja Kusserow ġew imċaħħdin mil-​libertà tagħhom għaliex ma ridux jikkompromettu l-​fidi tagħhom

[Stampa f’paġna 4]

Johannes Harms inqatel f’kamp tal-​konċentrament tan-​Nazi minħabba t-​twemmin tiegħu