Mistoqsijiet mill-​Qarrejja

Huwa ħażin li toqtol annimal domestiku li jkun marid jew xiħ?

Ħafna wħud iħarsu lejn l-​annimali bħala li huma interessanti u taʼ gost. Xi annimali domestiċi jsiru kumpanija tajba għal sidhom. Per eżempju, il-​klieb huma magħrufin għall-​mod komplet kif iħobbu u jobdu lil sidhom. Għalhekk, nistgħu nifhmu għala ħafna jkollhom rabta speċjali maʼ dawn l-​annimali, speċjalment jekk ikunu ilhom għandhom għal snin sħaħ.

Madankollu, ħafna minn dawn l-​annimali ma tantx għandhom ħajja twila. Il-​klieb, kif ukoll il-​qtates, għandhom mnejn jgħixu bejn 10 sa 15-il sena, jiddependi taʼ liema razza jkunu. Meta jixjieħu, l-​annimali domestiċi għandhom mnejn jibdew ibatu minn mard u diżabilità u b’hekk ikunu taʼ niket għal sidhom li jiftakar lill-​annimal meta kien għadu żgħir u iktar fuq tiegħu. Huwa ħażin li ma tħallix lill-​annimal ibati iktar u traqqdu?

Il-Kristjan irid jaġixxi fi qbil mar-​rieda t’Alla meta jittratta maʼ l-​annimali. Żgur li Alla ma jridx li dawn jinħaqru, għax il-​kelma tiegħu tistqarr: “Il-​ġust jieħu ħsieb sa l-​bhima [“l-​annimal domestiku,” NW] tiegħu.” (Proverbji 12:10) Madankollu, dan ma jfissirx li Alla jħares lejn l-​annimali bl-​istess mod kif iħares lejn il-​bnedmin. Meta Alla ħalaq lill-​bnedmin, hu wera li kien hemm differenza kbira bejnhom u bejn l-​annimali. Per eżempju, lill-​bnedmin hu tahom it-​tama taʼ ħajja taʼ dejjem, iżda hu qatt ma ta din it-​tama lill-​annimali. (Rumani 6:23; 2 Pietru 2:12) Peress li hu l-​Ħallieq, għandu kull dritt jagħżel x’tip taʼ relazzjoni għandu jkun hemm bejn il-​bnedmin u l-​annimali.

Ġenesi 1:28 jgħidilna x’inhi din ir-​relazzjoni. Alla qal lill-​ewwel bnedmin: “Saltnu fuq il-​ħut tal-​baħar u t-​tajr taʼ l-​ajru u l-​ħlejjaq kollha li jitkaxkru fuq l-​art.” Bl-​istess mod, Salm 8:7-9 (8:6-8, NW) jgħid: “Qegħedtu [lill-bniedem] fuq l-​għemejjel kollha taʼ jdejk [taʼ Alla]! Kollox taħt riġlejh qegħedtlu: in-​nagħaġ u l-​baqar kollha, sa l-​bhejjem tax-​xagħri; l-​għasafar taʼ l-​ajru u l-​ħut tal-​baħar.”

Alla għamilha ċara li l-​annimali setgħu jintużaw kif suppost u jinqatlu mill-​bniedem. Per eżempju, il-​ġilda tagħhom setgħet tintuża għall-​ħwejjeġ. Wara d-​Dilluvju taʼ żmien Noè, Alla ta wkoll il-​permess lill-​bnedmin biex jieklu l-​laħam taʼ l-​annimali flimkien mal-​ħaxix li ngħataw biex jieklu fil-​bidu.—Ġenesi 3:​21; 4:4; 9:3.

Dan ma jippermettix li l-​annimali jinqatlu għal xejn b’xejn bħala passatemp. F’Ġenesi 10:9, il-​Bibbja tiddeskrivi lil Nimrod bħala “kaċċatur qalbieni.” Iżda l-​istess vers jgħid li dan il-​fatt ġabu “f’oppożizzjoni lejn Jehovah” (NW).

Għalhekk, waqt li l-​bniedem jiddomina l-​annimali, hu m’għandux jabbuża minn din l-​awtorità iżda minflok jużaha fi qbil mal-​prinċipji tal-​Kelma t’Alla. Dan għandu mnejn jinkludi li ma jħallix l-​annimal domestiku jbati għalxejn minħabba x-​xjuħija, xi ġerħa gravi, jew marda fatali. F’sitwazzjoni bħal din, il-​Kristjan għandu r-​responsabbiltà li jiddeċiedi x’għandu jagħmel. Jekk jiddeċiedi li ma jkunx qed iħenn jekk iħalli lill-​annimal ikompli jbati meta ma jkunx hemm tama li xi darba għad ifiq, allura jistaʼ jagħżel li jraqqdu.