Imita lill-​Alla tal-​Verità

“Kunu, mela, tixbhu lil Alla, bħala wlied maħbuba.”—EFESIN 5:1.

1. Xi wħud x’jemmnu dwar il-​verità, u r-​raġunar tagħhom għala huwa difettuż?

“IL-​VERITÀ x’inhi?” (Ġwanni 18:38) Din il-​mistoqsija li staqsa b’mod sarkastiku Ponzju Pilatu madwar 2,000 sena ilu, tissuġġerixxi li l-​verità hija diffiċli wisq biex tkun tistaʼ ssegwiha. Ħafna llum jaqblu maʼ dan. L-​istess essenza tal-​verità qed tiġi attakkata. Għandek mnejn smajt lil min jgħid li kulħadd jagħżel hu x’inhi l-​verità, jew li l-​verità m’hijiex assoluta, jew li l-​verità dejjem tinbidel. Dan ir-​raġunar huwa difettuż. L-​għan prinċipali għar-​riċerka u l-​edukazzjoni hu biex nitgħallmu l-​fatti, il-​verità, dwar id-​dinja li ngħixu fiha. Il-​verità m’hijiex kwistjoni t’opinjoni persunali. Per eżempju, jew ir-​ruħ umana hija immortali jew m’hijiex. Jew Satana jeżisti jew ma jeżistix. Jew hemm skop fil-​ħajja jew m’hemmx. F’kull każ, jistaʼ jkun hemm biss tweġiba waħda li hi tajba. Waħda hi tajba u l-​oħra ħażina; ma jistgħux ikunu t-​tnejn tajbin.

2. Jehovah b’liema modi huwa l-​Alla tal-​verità, u liema mistoqsijiet se niddiskutu issa?

² Fl-​artiklu taʼ qabel ikkunsidrajna li Jehovah hu l-​Alla tal-​verità. Hu jaf il-​verità dwar kollox. F’kuntrast li jispikka maʼ l-​avversarju qarrieqi tiegħu, Satana x-​Xitan, Jehovah dejjem jgħid il-​verità. Iktar minn hekk, Jehovah b’mod ġeneruż jikxef il-​verità lil oħrajn. L-​appostlu Pawlu ħeġġeġ lil sħabu l-​Kristjani: “Kunu, mela, tixbhu lil Alla, bħala wlied maħbuba.” (Efesin 5:1) Bħala Xhieda taʼ Jehovah, kif nistgħu nimitawh fil-​mod kif nitkellmu u kif ngħixu l-​verità? Għala huwa importanti li nagħmluh dan? U liema assiguranza għandna li Jehovah japprova lil dawk li jfittxu li jgħixu l-​verità? Ejja naraw.

3, 4. L-​appostlu Pawlu u Pietru kif iddeskrivew dak li kellu jseħħ fl-​“aħħar jiem”?

³ Qed ngħixu fi żmien meta hawn ħafna qerq reliġjuż. Bħalma bassar l-​appostlu Pawlu f’ispirazzjoni divina, ħafna nies f’dan iż-​żmien taʼ l-​“aħħar tad-​dinja” għandhom forma taʼ devozzjoni lejn Alla iżda jiċħdu l-​qawwa tagħha. Xi wħud jirreżistu l-​verità, għaliex huma “taʼ moħħ mgħawweġ.” Barra minn hekk, “in-​nies il-​ħżiena u l-​uċuħ b’oħra jmorru mill-​ħażin għall-​agħar, iqarrqu u jitqarrqu.” Għalkemm dawn in-​nies dejjem jitgħallmu, qatt ma se “jaslu biex jagħrfu l-​verità.”—2 Timotju 3:​1, 5, 7, 8, 13.

⁴ L-​appostlu Pietru wkoll ġie ispirat biex jikteb dwar l-​aħħar tad-​dinja. Sewwasew bħalma pprofetizza hu, in-​nies mhux biss jiċħdu l-​verità imma wkoll jirridikolaw il-​Kelma t’Alla u lil dawk li jipproklamaw il-​verità tagħha. “Għax iridu,” dawn l-​uħud li jirridikolaw jinjoraw il-​fatt li d-​dinja taʼ żmien Noè ġiet mgħarrqa bl-​ilma, u li dan stabbilixxa eżempju għal jum il-​ġudizzju li ġej. Minħabba li jemmnu dak li jogħġobhom, huma se jiffaċċjaw diżastru meta jasal iż-​żmien li fih Alla se jeqred lil dawk li ma jaqduhx.—2 Pietru 3:​3-7.

Il-​Qaddejja taʼ Jehovah Jafu l-​Verità

5. Skond il-​profeta Danjel, x’kellu jseħħ fiż-​“żmien taʼ l-​aħħar,” u din il-​profezija kif twettqet?

⁵ Meta kien qed jiddeskrivi ż-​“żmien taʼ l-​aħħar,” il-​profeta Danjel bassar żvilupp tassew differenti fost in-​nies t’Alla—qawmien mill-​ġdid tal-​verità reliġjuża. Hu kiteb: “Ħafna jistudjawh bir-​reqqa, u l-​għerf jiżdied.” (Danjel 12:​4, KŻ) In-​nies taʼ Jehovah m’humiex imħawdin jew mogħmijin mill-​Qarrieq il-​kbir. Waqt li fittxew fil-​paġni tal-​Bibbja, huma kisbu għarfien veru. Fl-​ewwel seklu, Ġesù wera l-​verità lid-​dixxipli tiegħu. Hu “fetħilhom moħħhom biex jifhmu l-​Iskrittura.” (Luqa 24:45) Jehovah aġixxa b’mod simili fi żmienna. Permezz tal-​Kelma, l-​ispirtu, u l-​organizzazzjoni tiegħu, hu għen lil miljuni madwar id-​dinja biex jifhmu dak li hu diġà jaf—il-​verità.

6. Liema veritajiet Bibliċi jifhmu n-​nies t’Alla llum?

⁶ Bħala n-​nies t’Alla, sirna nifhmu ħafna affarijiet li qatt ma konna se nsiru nafuhom. Nafu t-​tweġibiet għall-​mistoqsijiet li l-​għorrief tad-​dinja ilhom jissieltu magħhom għal eluf taʼ snin. Per eżempju, nafu għala teżisti s-​sofferenza, għala n-​nies imutu, u għala l-​bnedmin ma jistgħux jiksbu l-​paċi u l-​għaqda globali. Ġejna mberkin ukoll b’viżjoni taʼ dak li hemm lest għalina fil-​futur—is-​Saltna t’Alla, ġenna taʼ l-​art, u ħajja perfetta bla tmiem. Sirna nafu lil Jehovah, il-​Wieħed Suprem. Tgħallimna dwar il-​personalità tiegħu li tant tiġbdek lejh u dwar x’għandna nagħmlu biex ingawdu l-​barka tiegħu. Minħabba li nafu l-​verità nistgħu nagħrfu dak li m’huwiex veru. Meta napplikaw il-​verità niġu protetti milli ninħlew wara affarijiet bla siwi, niġu megħjunin biex ngħixu ħajjitna bl-​aħjar mod, u ningħataw tama mill-​isbaħ għall-​futur.

7. Il-​veritajiet tal-​Bibbja min jistaʼ jirnexxilu jifhimhom, u min ma jistax?

⁷ Int tifhimha l-​verità tal-​Bibbja? Jekk iva, int ġejt imbierek bil-​kbir. Meta awtur jikteb ktieb, ġeneralment jiktbu b’tali mod li jolqot lil xi grupp speċifiku taʼ nies. Xi kotba jinkitbu għal dawk li għandhom edukazzjoni għolja, oħrajn għat-​tfal, u jerġaʼ oħrajn għal uħud li jispeċjalizzaw f’ċerti oqsma. Waqt li l-​Bibbja hija disponibbli faċilment għal kulħadd, din qiegħda biex tinftiehem u tiġi apprezzata minn grupp partikulari taʼ nies. Jehovah fassalha għall-​umlin, il-​ġwejdin taʼ l-​art. Dawn l-​uħud jistgħu jifhmu l-​Bibbja, tkun xi tkun l-​edukazzjoni, il-​kultura, il-​pożizzjoni, jew il-​grupp etniku tagħhom. (1 Timotju 2:​3, 4) Mill-​banda l-​oħra, dawk li m’għandhomx attitudni tajba ma jirnexxilhomx jifhmu l-​verità tal-​Bibbja, minkejja kemm ikunu intelliġenti jew t’edukazzjoni għolja. Dawk li huma minfuħin bihom infushom, jew kburin, ma jistgħux jifhmu l-​veritajiet prezzjużi tal-​Kelma t’Alla. (Mattew 13:​11-15; Luqa 10:21; Atti 13:48) Alla biss jistaʼ jipproduċi ktieb bħal dan.

Il-​Qaddejja taʼ Jehovah Jgħidu l-​Verità

8. Ġesù għala kien il-​personifikazzjoni tal-​verità?

⁸ Bħal Jehovah, il-​qaddejja leali tiegħu jgħidu l-​verità. Ġesù Kristu, l-​aqwa Xhud taʼ Jehovah, iddikjara l-​verità bl-​affarijiet li għallem u bil-​mod kif għex u miet. Hu żamm mal-​verità tal-​kliem u l-​wegħdi taʼ Jehovah. Minħabba f’hekk, Ġesù kien il-​personifikazzjoni tal-​verità, kif stqarr hu nnifsu.—Ġwanni 14:6; Apokalissi 3:14; 19:10.

9. L-​Iskrittura xi tgħid dwar li ngħidu l-​verità?

⁹ Ġesù kien “mimli bil-​grazzja u l-​verità” u “minn fommu ma ħareġ ebda qerq.” (Ġwanni 1:14; Isaija 53:9) Il-​Kristjani veri jsegwu l-​eżempju li ħalla Ġesù billi jgħidu l-​verità lil oħrajn. Pawlu ta l-​parir lil sħabu fit-​twemmin: “Għidu l-​verità wieħed lill-​ieħor, għax aħna membri taʼ xulxin.” (Efesin 4:25) Iktar kmieni, il-​profeta Żakkarija kiteb: “Għidu s-​sewwa [“il-​verità,” NW] lil xulxin.” (Żakkarija 8:16) Il-​Kristjani jgħidu l-​verità għax iridu jogħġbu ’l Alla. Jehovah jgħid il-​verità u jaf kemm deni jiġi mill-​qerq. Għalhekk, hu għandu d-​dritt jistenna li l-​qaddejja tiegħu jgħidu l-​verità.

10. In-​nies għala jigdbu, u b’liema riżultati negattivi?

¹⁰ Ħafna wħud jinqdew bil-​gideb biex jiksbu ċerti vantaġġi. In-​nies jigdbu biex jiffrankaw xi kastig, biex jipprofittaw ruħhom, jew biex jiksbu t-​tifħir mingħand ħaddieħor. Biss, il-​gideb huwa vizzju. Iktar minn hekk, min jigdeb ma jistax jikseb l-​approvazzjoni t’Alla. (Apokalissi 21:​8, 27; 22:15) Meta nkunu magħrufa bħala wħud li jgħidu l-​verità, oħrajn jemmnu dak li ngħidu; huma jafdawna. Madankollu, jekk ninqabdu ngħidu saħansitra gidba waħda biss, l-​oħrajn għandhom mnejn jiddubitaw kulma ngħidu fil-​futur. Proverbju Afrikan jgħid: “Gidba waħda tħassar elf verità.” Proverbju ieħor jgħid: “Il-​giddieb ħadd ma jemmnu, anki meta jgħid il-​verità.”

11. B’liema mod hija l-​verità iktar milli sempliċement il-​fatt li ngħidu l-​verità?

¹¹ Il-​verità tinvolvi iktar milli sempliċement ngħidu l-​verità. Hija l-​mod kif ngħixu ħajjitna. Turi min aħna. Aħna nwasslu l-​verità lil oħrajn mhux biss b’dak li ngħidu iżda wkoll b’dak li nagħmlu. “Int li tgħallem lil ħaddieħor, ma tgħallimx lilek innifsek?” staqsa l-​appostlu Pawlu. “Int tippriedka: La tisraqx, u tisraq? Tgħid: La tiżnix, u tiżni?” (Rumani 2:​21, 22) Jekk irridu nagħtu l-​verità lil ħaddieħor, irridu nkunu bla qerq fil-​mogħdijiet kollha tagħna. Ir-​reputazzjoni tagħna għall-​verità u l-​onestà se jkollhom effett qawwi fuq kif in-​nies iwieġbu għal dak li ngħallmu.

12, 13. Naqra taʼ tfajla x’kitbet dwar il-​verità, u għala kellha livelli morali daqshekk għoljin?

¹² Iż-​żgħar fost il-​qaddejja taʼ Jehovah ukoll jifhmu l-​importanza taʼ li jgħidu l-​verità. F’komponiment li kellha l-​iskola, Jenny, li dak iż-​żmien kellha 13-il sena, kitbet: “L-​onestà hija xi ħaġa li verament ngħożż. Sfortunatament, ftit huma dawk l-​uħud li huma onesti llum. Nagħmel wegħda miegħi nnifsi li dejjem inkun onesta f’ħajti. Se nkun onesta anki meta l-​fatt li ngħid il-​verità ma jkunx mill-​ewwel taʼ benefiċċju għalija jew għal sħabi. Jien noqgħod attenta li l-​ħbieb li nagħżel ikunu wħud li jgħidu l-​verità u li huma onesti.”

¹³ L-​għalliema taʼ Jenny ikkummentat dwar dan il-​komponiment billi qaltilha: “Int għadek verament żgħira biex diġà rnexxielek tikkultiva etika u morali daqshekk b’saħħithom. Naf li kapaċi żżommhom għaliex għandek karattru sod.” X’kien li għen biex din it-​tifla taʼ l-​iskola jkollha din is-​saħħa morali? Fil-​bidu tal-​komponiment, Jenny stqarret li r-​reliġjon tagħha “tagħmlilha l-​livelli għal [ħajjitha].” Għaddew sebaʼ snin mindu Jenny kitbet dan il-​komponiment. Kif issopponiet l-​għalliema tagħha, Jenny għad għandha livelli morali għoljin f’ħajjitha bħala waħda mix-​Xhieda taʼ Jehovah.

Il-​Qaddejja taʼ Jehovah Jikxfu l-​Verità

14. Il-​qaddejja t’Alla għala għandhom responsabbiltà speċjali biex iżommu mal-​verità?

¹⁴ M’għandniex xi ngħidu, hemm oħrajn minbarra x-​Xhieda taʼ Jehovah li għandhom mnejn jgħidu l-​verità u jipprovaw ikunu onesti. Però, bħala l-​qaddejja t’Alla, aħna għandna responsabbiltà akbar li nżommu mal-​verità. Ġejna fdati bil-​veritajiet tal-​Bibbja—veritajiet li jistgħu jwasslu lil dak li jkun għall-​ħajja taʼ dejjem. Għalhekk, għandna l-​obbligu li naqsmu dan l-​għarfien m’oħrajn. “Għax lil min tawh ħafna,” qal Ġesù, “ifittxu li jieħdu ħafna mingħandu.” (Luqa 12:48) Żgur li “jfittxu li jieħdu ħafna” mingħand dawk li tbierku bl-​għarfien prezzjuż t’Alla.

15. X’ferħ tħoss meta taqsam il-​verità tal-​Bibbja m’oħrajn?

¹⁵ Tħoss ferħ kbir meta taqsam il-​verità tal-​Bibbja m’oħrajn. Bħad-​dixxipli taʼ Ġesù taʼ l-​ewwel seklu, aħna niddikjaraw l-​aħbar tajba—messaġġ taʼ tama li jqawwi l-​qalb—lil dawk li huma “mdejjqa u mitluqa bħal nagħaġ bla ragħaj” u lil dawk mogħmijin u mħawdin mit-​“tagħlim tax-​xjaten.” (Mattew 9:36; 1 Timotju 4:1) L-​appostlu Ġwanni kiteb: “Ngħid għalija, ma nafx b’ferħ akbar minn dak li nħoss meta nismaʼ li wliedi mexjin fil-​verità.” (3 Ġwanni 4) Il-​fedeltà taʼ ‘wlied’ Ġwanni—probabbilment dawk li hu kien wasslilhom il-​verità—ġabitlu ferħ kbir. Anki aħna jkollna l-​ferħ meta naraw lin-​nies iwieġbu bi gratitudni għall-​Kelma t’Alla.

16, 17. (a) Għala mhux kulħadd jaċċetta l-​verità? (b) Liema ferħ tistaʼ tħoss meta tipproklama l-​verità tal-​Bibbja?

¹⁶ Huwa minnu li mhux kulħadd se jaċċetta l-​verità. Ġesù tkellem il-​verità dwar Alla, anki meta l-​oħrajn ma ħadux pjaċir bih. Lil-​Lhud li opponewh hu qalilhom: “L-​għala ma temmnunix? Min hu minn Alla jismaʼ dak li jgħid Alla. Hu għalhekk li intom ma tisimgħux, għax m’intomx minn Alla.”—Ġwanni 8:​46, 47.

¹⁷ Aħna, bħal Ġesù, ma noqogħdux lura milli ngħidu l-​verità prezzjuża dwar Jehovah. Ma nistennewx li kulħadd se jaċċetta dak li ngħidulu, għax mhux kulħadd aċċetta dak li qal Ġesù. Minkejja dan, għandna l-​ferħ minħabba li nafu li qed nagħmlu dak li hu ġust. Jehovah, sforz il-​qalb tajba bl-​imħabba tiegħu, irid li l-​bnedmin isiru jafu l-​verità. Bħala dawk li għandhom il-​verità, il-​Kristjani jsiru wħud li jġorru d-​dawl f’dinja mudlama. Meta nħallu d-​dawl tal-​verità jiddi permezz taʼ kliemna u għemilna, inkunu nistgħu ngħinu lil oħrajn jagħtu glorja lil Missierna tas-​sema. (Mattew 5:​14, 16) Aħna nuru lil kulħadd li niċħdu l-​verżjoni falza tal-​verità li ħareġ biha Satana u li nżommu mal-​Kelma t’Alla li hi pura u bla ebda falzità. Il-​verità li aħna nafu u naqsmu m’oħrajn tistaʼ tagħti ħelsien veru lil dawk li jaċċettawha.—Ġwanni 8:32.

Kompli Fittex it-​Triq tal-​Verità

18. Ġesù għala u kif wera favur maʼ Natanjel?

¹⁸ Ġesù kien iħobb u jgħid il-​verità. Matul il-​ministeru tiegħu fuq l-​art, hu wera favur maʼ dawk li kienu jgħidu l-​verità. Dwar Natanjel, Ġesù qal: “Ara, dan tassew wieħed minn Iżrael li jixraqlu dan l-​isem; ma hemm ebda qerq fih.” (Ġwanni 1:47) Imbagħad, Natanjel, li x’aktarx kien imsejjaħ ukoll Bartilmew, intgħażel biex ikun wieħed mit-​12-il appostlu. (Mattew 10:​2-4) X’unur dak!

19-21. Raġel li darba kien agħma kif ġie mbierek talli bil-​kuraġġ kollu qal il-​verità?

¹⁹ Hemm kapitlu sħiħ fil-​ktieb Bibliku taʼ Ġwanni li jitkellem dwar ir-​rakkont taʼ raġel onest ieħor li tbierek minn Ġesù. Ma nafux x’jismu. Dak li nafu hu li dan ir-​raġel kien tallab, agħma mit-​twelid. In-​nies baqgħu skantati meta Ġesù fejqu u dan reġaʼ ġie jara. L-​aħbar taʼ dan il-​fejqan mirakoluż waslet s’għand il-​Fariżej, uħud li jobogħdu l-​verità u li kienu qablu bejniethom li kulmin jeżerċita fidi f’Ġesù kellu jitkeċċa mis-​sinagoga. Peress li kienu jafu bil-​pjan tagħhom, il-​ġenituri beżgħanin taʼ dak ir-​raġel li darba kien agħma gidbu lill-​Fariżej, billi qalulhom li ma kinux jafu kif binhom issa setaʼ jara jew min kien fejqu.—Ġwanni 9:​1-23.

²⁰ Il-​Fariżej reġgħu sejħu quddiemhom lir-​raġel li ġie mfejjaq. Hu injora l-​konsegwenzi, u bil-​kuraġġ kollu qal il-​verità. Spjegalhom kif ġie mfejjaq u li kien Ġesù li fejqu. Mgħaġġeb kif dawn l-​irġiel prominenti u taʼ skola kbira m’emmnux li Ġesù kien ġej minn Alla, ir-​raġel imfejjaq ħeġġiġhom bla biżaʼ taʼ xejn biex jaċċettaw dak li kien ovvju: “Li kieku dan ma kienx ġej mingħand Alla, xejn ma kien ikollu ħila jagħmel.” Peress li ma setgħux jirribattu kliemu, il-​Fariżej akkużaw lir-​raġel li kien qed ikun insolenti u tefgħuh ’il barra.—Ġwanni 9:​24-34.

²¹ Meta Ġesù sar jaf b’dan, bl-​imħabba kollha hu ħa l-​ħin biex isib lir-​raġel. Wara li sabu, hu kompla jibni l-​fidi li kien wera dak ir-​raġel li darba kien agħma. Ġesù wera bil-​miftuħ li hu kien il-​Messija. Kemm ġie mbierek dan ir-​raġel talli qal il-​verità! M’għandna ebda dubju li l-​favur t’Alla jissawwab fuq dawk li jgħidu l-​verità.—Ġwanni 9:​35-37.

22. Għala għandna nfittxu t-​triq tal-​verità?

²² Għandna nfittxu li nipprattikaw il-​verità bis-​serjetà. Huwa fundamentali li noħolqu u nżommu relazzjonijiet tajbin man-​nies u m’Alla. Min jgħid il-​verità jkun onest, ġenwin, dħuli, u taʼ min jafdah, u dan jagħmlu approvat minn Jehovah. (Salm 15:​1, 2) Min iqarraq, ikun giddieb, mhux taʼ min jafdah, u falz, u dan iġib id-​diżapprovazzjoni taʼ Jehovah. (Proverbji 6:​16-19) Għalhekk, kun determinat li tfittex li timxi fit-​triq tal-​verità. Tabilħaqq, biex nimitaw l-​Alla tal-​verità, irridu nkunu nafu l-​verità, ngħidu l-​verità, u ngħixu l-​verità.

Kif Twieġeb?

• Għala nistgħu nkunu grati li nafu l-​verità?

• Kif nistgħu nimitaw lil Jehovah meta ngħidu l-​verità?

• X’benefiċċji niksbu meta nagħtu l-​verità tal-​Bibbja lil oħrajn?

• Għala huwa importanti li nfittxu t-​triq tal-​verità?

[Stampi f’paġna 17]

Waqt li huma fdati bil-​verità tal-​Bibbja, il-​Kristjani b’mod żeluż jaqsmuha m’oħrajn

[Stampi f’paġna 18]

Ir-​raġel agħma li fejjaq Ġesù tbierek bil-​kbir talli qal il-​verità