Tgħożżhom Int lil Sħabek fit-​Twemmin li Huma Mdaħħlin fiż-​Żmien?

META l-​poplu taʼ Iżrael tal-​qedem kien f’relazzjoni taʼ patt m’Alla, dan ġie kkmandat: “Qum quddiem ix-​xiħ, b’xagħru abjad, u agħtih [‘ġieħ,’ Saydon] u ibżaʼ minn Alla tiegħek.” (Levitiku 19:32) Għalhekk, ir-​rispett għal dawk imdaħħlin fiż-​żmien kien dmir sagru, u kien marbut maʼ li wieħed ikun sottomess lejn Alla. Għalkemm il-​Kristjani llum m’għadhomx taħt il-​Liġi Mosajka, dan ifakkarna li Jehovah iħares lejn il-​qaddejja tiegħu li huma mdaħħlin fiż-​żmien bħala taʼ valur u prezzjużi. (Proverbji 16:31; Lhud 7:18) Għandna aħna l-​istess ħarsa taʼ Jehovah? Ngħożżuhom aħna lil ħutna rġiel u nisa Kristjani mdaħħlin fiż-​żmien?

Hu Kien Jgħożż lil Sieħbu li Kien Akbar Minnu

Wieħed mir-​rakkonti tal-​Bibbja li juri limportanza taʼ li nuru rispett lejn uħud ixjeħ jinsab fil-​ktieb tat-​Tieni Slaten. Dan fih deskrizzjoni taʼ kif, minflok il-​profeta Elija, laħaq il-​profeta Eliżew li kien iżgħar minnu. Ikkunsidra x’ġara fl-​aħħar ġurnata taʼ Elija bħala profeta fis-​saltna b’għaxar tribujiet taʼ Iżrael.

Dak in-​nhar, il-​profeta xwejjaħ ġie gwidat minn Jehovah biex jivvjaġġa minn Gilgal sa Betel, minn Betel sa Ġeriko, u minn Ġeriko sax-​Xmara Ġordan. (2 Slaten 2:​1, 2, 4, 6) Matul dak il-​vjaġġ taʼ madwar 50 kilometru, Elija talab tliet darbiet lil Eliżew biex ma jibqax isegwih. Madankollu, bħalma sekli qabel iż-​żagħżugħa Rut kienet irrifjutat b’mod sod li titlaq lil Nagħomi, bl-​istess mod Eliżew irrifjuta li jitlaq lill-​profeta xwejjaħ. (Rut 1:​16, 17) Eliżew tliet darbiet stqarr: “Daqs kemm hu ħaj il-​Mulej u daqs kemm int ħaj int, ma nħallikx.” (2 Slaten 2:​2, 4, 6) Sa dak iż-​żmien, Eliżew kien diġà għen lil Elija għal xi sitt snin. Madankollu, hu xtaq idum jaqdi lil Elija kemm jistaʼ jkun possibbli. Fil-​fatt, ir-​rakkont ikompli: “U ġara li huma u sejrin, jimxu u jitkellmu, . . . Elija talaʼ s-​sema.” (Vers 11) Elija u Eliżew baqgħu jitkellmu sa l-​aħħar mument tal-​ministeru taʼ Elija f’Iżrael. Milli jidher, il-​profeta iżgħar kien ħerqan li jieħu kemm jistaʼ jkun kliem taʼ istruzzjoni u inkuraġġiment mingħand il-​profeta akbar u taʼ iktar esperjenza. Bla dubju, hu kien jgħożż lil sieħbu li kien akbar minnu.

‘Bħallikieku Missirijiet u Ommijiet’

M’huwiex diffiċli li tara għaliex Eliżew tant kien iħobb lill-​profeta akbar minnu bħala ħabib—saħansitra bħala missier spiritwali. (2 Slaten 2:12) Eżatt qabel ma Elija spiċċa l-​inkarigu li kellu f’Iżrael, hu qal lil Eliżew: “Itlobni x’għandi nagħmillek qabel ma nittieħed minn ħdejk.” (Vers 9) Għalhekk, sa l-​aħħarnett, Elija wera interess fil-​ġid spiritwali tas-​suċċessur tiegħu u fil-​kontinwazzjoni tax-​xogħol t’Alla.

Illum, hija xi ħaġa verament taʼ ferħ meta ħutna Kristjani mdaħħlin fiż-​żmien, bħallikieku ommijiet u missirijiet, juru l-​istess interess hekk kif jaqsmu l-​għarfien u l-​għaqal li għandhom maʼ wħud iżgħar. Per eżempju, il-​volontieri li ilhom jaqdu fl-​uffiċċji tal-​fergħa tax-​Xhieda taʼ Jehovah għal żmien twil, minn qalbhom jgħinu lill-​membri ġodda tal-​familja Betel biex jiksbu l-​abbiltajiet li għandhom bżonn sabiex iwettqu l-​inkarigu tagħhom. Bl-​istess mod, l-​indokraturi li jivvjaġġaw u n-​nisa tagħhom li jkunu ilhom iżuru l-​kongregazzjonijiet għal bosta snin, bil-​ferħ jaqsmu l-​għana taʼ l-​esperjenza tagħhom maʼ dawk li qed jitħarrġu biex jaqdu bħala ministri li jivvjaġġaw. Iktar minn hekk, fil-​kongregazzjonijiet tax-​Xhieda taʼ Jehovah madwar id-​dinja, hemm aħwa rġiel u nisa akbar fl-​età li ilhom jaqdu lil Jehovah lealment għal għaxriet taʼ snin u li b’qalbhom kollha jaqsmu l-​għaqal prattiku u l-​esperjenza tagħhom maʼ membri ġodda tal-​kongregazzjoni.—Proverbji 2:7; Filippin 3:17; Titu 2:​3-5.

L-interess sinċier muri minn dawn il-​Kristjani għeżież imdaħħlin fiż-​żmien jagħmilha xi ħaġa verament taʼ pjaċir li lil dawn l-​uħud akbar nuruhom rispett. Għalhekk, irridu nimitaw l-​eżempju taʼ Eliżew billi b’mod profond napprezzaw lil sħabna fit-​twemmin li qed javanzaw fl-​età. Bħalma jfakkarna l-​appostlu Pawlu, ejja nkomplu nittrattaw ‘lil min hu mdaħħal fiż-​żmien . . . qisu missier’ u lin-​“nisa mdaħħlin fiż-​żmien bħallikieku ommijiet.” (1 Timotju 5:​1, 2) Billi nagħmlu hekk, se nikkontribwixxu bil-​kbir biex il-​kongregazzjoni Kristjana madwar id-​dinja tkompli taħdem b’mod xieraq u tkompli tagħmel progress.

[Stampa f’paġna 30]

Eliżew xtaq jaqdi maʼ Elija kemm jistaʼ jkun possibbli

[Stampi f’paġna 31]

Iż-​żgħażagħ jibbenefikaw bil-​kbir minn Kristjani mdaħħlin fiż-​żmien