Bijografija

Jehovah Wera Qalb Tajba bl-​Imħabba Miegħi u Ħa Ħsiebi

KIF RAKKONTATA MINN FAY KING

Il-​ġenituri tiegħi kienu nies qalbhom tajba, imma bħal ħafna oħrajn, ir-​reliġjon ma kinitx tinteressahom. Ommi kienet tgħid: “Bilfors li hemm Alla, għax kieku min ħalaq il-​fjuri, u min għamel is-​siġar?” Imma daqshekk kienet issemmi fuq ir-​reliġjon.

MISSIERI miet fl-​1939 meta jien kelli 11-il sena u kont ngħix m’ommi fi Stockport, lejn in-​nofsinhar taʼ Manchester, fl-​Ingilterra. Jien minn dejjem ridt inkun naf iktar dwar il-​Ħallieq tiegħi u kelli rispett kbir lejn il-​Bibbja, għalkemm ma kont naf xejn dwarha. Għalhekk, iddeċidejt li nara x’kienet tgħallem il-​Knisja taʼ l-​Ingilterra.

Il-funzjonijiet tagħha ma kienu jfissru xejn għalija, imma meta kienu jinqraw l-​Evanġelji, il-​kliem taʼ Ġesù b’xi mod ikkonvinċieni li l-​Bibbja bilfors li hija vera. Meta nħares lura, ma nafx għalfejn ma qrajtx il-​Bibbja jien stess. Anki wara, meta ħabiba tal-​familja tatni traduzzjoni moderna tat-​“Testment il-​Ġdid,” qatt ma ħadt il-​ħin biex naqrah.

Il-bidu tal-​Gwerra fil-​Korea fl-​1950 verament ġagħalni naħseb. Tgħid din il-​gwerra se tinfirex bħalma kien ġara fit-​Tieni Gwerra Dinjija? Jekk iva, kif stajt nobdi l-​kmand taʼ Ġesù biex inħobb lill-​għedewwa tiegħi? Imma mill-​banda l-​oħra, nistaʼ jien noqgħod ma nagħmel xejn u nara n-​nies jinvadu lil pajjiżi u ma nagħmel xejn biex inwaqqafhom? Kieku nagħmel hekk, inkun qed naħrab mir-​responsabbiltà tiegħi. Għalkemm kont imħawda, jien bqajt konvinta li t-​tweġibiet għall-​mistoqsijiet kollha tiegħi kienu jinsabu fil-​Bibbja, però ma kelli ebda idea kif jew fejn se nsibhom.

Infittex il-​Verità fl-​Awstralja

Fl-​1954 jien u ommi ddeċidejna li mmorru ngħixu l-​Awstralja, fejn kienet diġà qed tgħix oħti, Jean. Ftit tas-​snin wara, Jean qaltli li hi kienet talbet lix-​Xhieda taʼ Jehovah biex iżuruni għaliex kienet taf li jien kont interessata fil-​Bibbja u li kont immur il-​knisja. Hi riedet tkun taf x’naħseb dwarhom. “Jien ma nafx jekk l-​ispjegazzjonijiet tagħhom humiex sewwa jew le,” hi stqarret miegħi, “imma għall-​inqas għandhom spjegazzjonijiet, filwaqt li r-​reliġjonijiet l-​oħra m’għandhomx.”

Bill u Linda Schneider, il-​koppja li żaruni, kienu koppja mill-​aħjar. Huma kellhom fuq is-​60 sena sew u kienu ilhom ħafna snin jaqdu bħala Xhieda. Għamlu żmien jaħdmu fl-​istazzjon tar-​radju tax-​Xhieda taʼ Jehovah f’Adelaide, u meta x-​xogħol taʼ l-​ippridkar ġie projbit fl-​Awstralja matul it-​Tieni Gwerra Dinjija, huma bdew jaqdu bħala evanġelizzaturi full-time. Madankollu, għalkemm Bill u Linda kienu t’għajnuna kbira għalija jien kont għadni qed neżamina reliġjonijiet oħrajn.

Waħda li kont naħdem magħha ħaditni f’laqgħa taʼ l-​evanġelista Billy Graham, u kif spiċċat xi wħud minna morna niltaqgħu maʼ membru tal-​kleru li staqsiena jekk kellniex xi mistoqsijiet. Jien staqsejt il-​mistoqsija li kienet għadha qed tinkwetani: “Kif tistaʼ tkun Kristjan u tħobb lill-​għedewwa tiegħek meta tmur toqtolhom fil-​gwerra?” F’daqqa waħda kien hemm geġwiġija sħiħa għax milli jidher din il-​mistoqsija kienet tinkwieta lil grupp kollu! Wara ftit, il-​membru tal-​kleru qal: “Ma nafx it-​tweġiba għal din il-​mistoqsija. Għadni qed naħseb dwarha.”

Sadanittant, l-​istudju tal-​Bibbja li kont qed nagħmel maʼ Bill u Linda kien miexi ’l quddiem, u f’Settembru taʼ l-​1958, tgħammidt. Iddeċidejt li nsegwi l-​eżempju taʼ dawk li studjaw miegħi, u għalhekk, sa Awissu tas-​sena taʼ wara, jien bdejt naqdi bħala pijuniera regulari, evanġelizzatriċi full-time. Tmien xhur wara ġejt mistiedna biex naqdi bħala pijuniera speċjali. Kemm kont ferħana meta sirt naf li oħti, Jean, kienet għamlet progress fl-​istudju tagħha u kienet tgħammdet!

Infetaħ Bieb t’Opportunità

Jien kont qed naqdi f’waħda mill-​kongregazzjonijiet ġo Sydney u kont qed nikkonduċi numru taʼ studji tal-​Bibbja fid-​djar. Ġurnata minnhom iltqajt maʼ qassis irtirat, membru tal-​Knisja taʼ l-​Ingilterra, u staqsejtu x’kienet tgħid il-​knisja dwar it-​tmiem tad-​dinja. Għalkemm qalli li kien għallem id-​duttrina tal-​knisja għal 50 sena, it-​tweġiba tiegħu ħasditni: “Ikolli noqgħod nieħu l-​ħin biex infittex dwar dak li staqsejtni għax ma nafx il-​Bibbja daqskemm jafuha x-​Xhieda taʼ Jehovah.”

Ftit wara dan, kien hemm sejħa għall-​volontieri biex jaqdu fil-​Pakistan. Jien applikajt mingħajr ma rrealizzajt li ma kinux qed jintbagħtu nisa waħedhom, imma rġiel mhux miżżewġin jew koppji miżżewġin biss. Milli jidher, l-​applikazzjoni tiegħi ntbagħtet lill-​kwartieri ġenerali fi Brooklyn għax jien ma domtx ma rċivejt ittra li qaltli li kien hemm bżonn taʼ xi ħadd biex jaqdi f’Bombay (issa msejjaħ Mumbai), l-​Indja, jekk jien xtaqt naċċetta. Dan kien fl-​1962. Jien mort u bqajt f’Bombay għal 18-il xahar qabel ma mort noqgħod Allahabad.

Jien malajr bdejt nipprova nitgħallem il-​Ħindi. Din il-​lingwa Indjana ġeneralment hija konsistenti kemm fil-​mod kif tinkiteb u kemm fil-​pronunzja, u għalhekk mhix diffiċli biex titgħallimha. Iżda, kemm kont inħossni frustrata meta l-​inkwilini kienu jgħiduli biex nitkellem bl-​Ingliż minflok ma noqgħod nissielet biex nitkellem bil-​lingwa tagħhom! Imma dan il-​pajjiż ġdid ippreżenta sfidi interessanti u stimulanti, u jien kont inħobb nassoċja maʼ Xhieda oħra mill-​Awstralja.

Meta kont żgħira, kont naħseb dwar iż-​żwieġ, imma sakemm tgħammidt, kelli wisq x’nagħmel fix-​xogħol taʼ Jehovah biex noqgħod naħseb dwaru. Madankollu, issa erġajt bdejt inħoss il-​bżonn għal sieħeb f’ħajti. M’għandniex xi ngħidu, jien ma ridtx nitlaq l-​inkarigu tiegħi, u għalhekk tlabt lil Jehovah u ħallejt f’idejh u ma qgħadtx naħseb iktar dwar dan.

Barka Mhix Mistennija

Edwin Skinner kien qed jieħu ħsieb ix-​xogħol fil-​fergħa taʼ l-​Indja f’dak iż-​żmien. Hu kien attenda t-​tmien klassi taʼ Gilgħad (Watchtower Bible School of Gilead) fl-​1946 maʼ ħafna aħwa leali oħrajn, inkluż Harold King u Stanley Jones, li ntbagħtu jaqdu fiċ-​Ċina.a Fl-​1958, Harold u Stanley intefgħu kull wieħed f’ċella waħdu minħabba l-​ippridkar tagħhom f’Shanghai. Meta Harold inħeles fl-​1963, Edwin kitiblu ittra. Harold wieġbu meta rritorna Ħong Kong wara li ġie lura mill-​Istati Uniti u l-​Britannja u semma li xtaq jiżżewweġ. Hu qal lil Edwin li kien talab dwar il-​kwistjoni waqt li kien il-​ħabs, u staqsa lil Edwin jekk kienx jaf b’xi oħt li kienet addattata għalih.

Fl-Indja ħafna miż-​żwiġijiet ikunu rranġati, u Edwin spiss kien jiġi mitlub biex jagħmel arranġamenti bħal dawn, imma hu qatt ma ried jagħmilhom. Għalhekk, hu ta l-​ittra taʼ Harold lil Ruth McKay, li r-​raġel tagħha, Homer, kien indokratur li jivvjaġġa. Eventwalment, Ruth kitbitli biex tgħidli li missjunarju li kien ilu fil-​verità għal bosta snin kien qed ifittex mara, u hi staqsiet jekk jien kontx interessata li niktiblu. Hi la qaltli min kien il-​ħu u lanqas xejn iktar dwaru.

M’għandniex xi ngħidu, ħadd ma kien jaf dwar it-​talba tiegħi għal sieħeb, ħlief Jehovah, u r-​reazzjoni tiegħi għall-​ewwel kienet li nwarrab din l-​idea minn moħħi. Però, iktar ma ħsibt dwarha, iktar wasalt għall-​konklużjoni li spiss Jehovah ma jwiġibx it-​talb tagħna b’mod li naħsbu aħna. Għalhekk, jien erġajt ktibt lil Ruth u għedt li sakemm ma kien hemm ebda obbligazzjoni, hi setgħet tgħid lil ħu biex jerġaʼ jikteb. It-​tieni ittra mingħand Harold King intbagħtet lili.

Ritratti taʼ Harold u l-​istorja tiegħu kienu dehru f’diversi gazzetti u rivisti wara li nħeles mill-​ħabs fiċ-​Ċina. Sadanittant, hu kien magħruf sew madwar id-​dinja, imma dak li impressjonani kien ir-​rekord tiegħu taʼ servizz teokratiku leali. Għalhekk, domna niktbu lil xulxin ħames xhur, u mbagħad jien mort Ħong Kong. Aħna żżewwiġna fil-​5 t’Ottubru, 1965.

It-tnejn li aħna ridna niżżewġu u nibqgħu fis-​servizz full-time, u minħabba li konna qed nikbru, aħna ħassejna l-​bżonn tal-​kumpanija iktar minn kwalunkwe ħaġa oħra. Jien sirt inħobb lil Harold, u meta rajt il-​mod kif kien jittratta n-​nies u l-​problemi li kienu jinqalgħu fis-​servizz tagħna b’qalb tajba u b’konsiderazzjoni, jien sirt nirrispettah ħafna. Għal 27 sena aħna gawdejna żwieġ hieni ħafna u kellna ħafna barkiet mingħand Jehovah.

Iċ-Ċiniżi huma nies li jaħdmu iebes, u jien kont inħobbhom ħafna. Il-​lingwa taʼ Ħong Kong hija l-​Cantonese, djalett Ċiniż li għandu ħafna iktar tonijiet mill-​Mandarin, u għalhekk huwa daqsxejn diffiċli biex titgħallmu. Fil-​bidu taż-​żwieġ tagħna, jien u Harold konna noqogħdu fid-​dar missjunarja fl-​uffiċċju tal-​fergħa tax-​Xhieda taʼ Jehovah, u mbagħad qdejna f’inkarigi f’diversi postijiet fit-​territorju. Iva, konna ferħanin ħafna, imma fl-​1976 kelli problema serja taʼ saħħa.

Inkampa maʼ Problemi taʼ Saħħa

Jien kont ili nitlef id-​demm għal ftit xhur, u d-​demm tiegħi kien tbaxxa ħafna. Kelli bżonn t’operazzjoni, imma t-​tobba fl-​isptar qaluli li ma kinux se jagħmluli l-​operazzjoni mingħajr demm għax jekk jagħmluhieli, x’aktarx li kont immut mix-​xokk. Ġurnata minnhom meta t-​tobba kienu qed jiddiskutu l-​każ tiegħi, xi infermieri pprovaw iġagħluni nbiddel fehemti, billi qalu li mhux sewwa naħli ħajti hekk. Kien hemm 12-il operazzjoni dakinhar, 10 minnhom kienu aborti, imma jien innotajt li ħadd ma qal xejn lin-​nisa tqal dwar li huma kienu se joqtlu lit-​tarbija tagħhom.

Fl-aħħar, Harold kiteb ittra li kienet teħles lill-​isptar minn kwalunkwe responsabbiltà kieku jien mitt, u t-​tobba qablu li jagħmlu l-​operazzjoni li kelli bżonn. Ħaduni fil-​kamra taʼ l-​operazzjonijiet u ppreparaw l-​anestetiku. Madankollu, fl-​aħħar mument l-​anestetista rrifjuta li jkompli, u t-​tobba kellhom jibagħtuni d-​dar.

Imbagħad tkellimna maʼ ġinekologu privat. Meta rrealizza kemm kienet serja l-​kundizzjoni tiegħi, hu offra li jagħmel l-​operazzjoni bi prezz baxx—basta ma ngħidu lil ħadd kemm żammilna. Hu opera b’suċċess—u mingħajr l-​użu t’ebda demm. Il-​qalb tajba bl-​imħabba taʼ Jehovah u l-​mod kif ħa ħsiebi kienu tant evidenti għal Harold u għalija f’dan iż-​żmien partikulari.

Fl-1992, Harold marad serjament. Aħna morna ngħixu fl-​uffiċċju tal-​fergħa u hemmhekk ħadu ħsiebna bi mħabba kbira. L-​għażiż raġel tiegħi spiċċa l-​ħajja tiegħu fuq l-​art fl-​1993 fl-​età taʼ 81 sena.

Nerġaʼ Lura Lejn l-​Ingilterra

Jien kont ferħana bħala membru tal-​familja Betel taʼ Ħong Kong, imma iktar m’għadda ż-​żmien iktar kont qed insibha diffiċli biex inkampa mas-​sħana u l-​umdità. Imbagħad waslet ittra mhux mistennija mill-​kwartieri ġenerali taʼ Brooklyn, li fiha staqsewni jekk, minħabba saħħti kienx aħjar għalija li mmur ngħix ġo fergħa b’iktar faċilitajiet. Għalhekk fis-​sena 2000, jien erġajt mort ngħix l-​Ingilterra u ngħaqadt mal-​familja Betel f’Londra. Xi provvediment taʼ mħabba kien dan! Jien ġejt milqugħa bi mħabba kbira u veru nieħu pjaċir bl-​inkarigi differenti li għandi, li jinkludu li ngħin fil-​librerija tal-​familja Betel bl-​2,000 volum li fiha.

Jien nassoċja mal-​kongregazzjoni Ċiniża li tiltaqaʼ f’Londra, però hawnhekk l-​affarijiet inbidlu. Illum il-​ġurnata, ftit li xejn hemm nies minn Ħong Kong imma, minflok, iktar hemm nies mill-​art prinċipali taċ-​Ċina. Dawn jitkellmu bil-​Mandarin, u dan iġib sfidi ġodda fix-​xogħol taʼ l-​ippridkar. Madwar il-​pajjiż hemm rapporti taʼ ħafna studji tal-​Bibbja interessanti li qed jiġu kondotti maʼ studenti li ggradwaw miċ-​Ċina. Huma jaħdmu iebes u japprezzaw il-​verità tal-​Bibbja li qed jitgħallmu. Huwa taʼ ferħ li ngħinuhom.

Fil-kwiet tad-​dar il-​ġdida tiegħi, spiss noqgħod naħseb dwar il-​ħajja ferħana tiegħi u nkompli naħseb dwar il-​qalb tajba bl-​imħabba taʼ Jehovah. Din tidħol fl-​affarijiet kollha li għandhom x’jaqsmu maʼ l-​iskop tiegħu, u l-​mod kif jieħu ħsieb il-​qaddejja bħala individwi tant huwa evidenti. Verament għandi għalfejn inkun grata talli Hu tant ħa ħsiebi kif ukoll taʼ l-​imħabba li wera miegħi.—1 Pietru 5:6, 7.

[Nota taʼ taħt]

[Stampa f’paġna 24]

Naqdu fl-​Indja

[Stampi f’paġna 25]

Harold King fl-​1963 u jaqdi fiċ-​Ċina fis-​snin 50

[Stampi f’paġna 26]

It-​tieġ tagħna f’Ħong Kong fil-​5 t’Ottubru, 1965

[Stampa f’paġna 26]

Maʼ membri tal-​Betel taʼ Ħong Kong, fin-​nofs hemm il-​koppja Liangs, u fuq il-​lemin il-​koppja Gannaways