Għasses Kontra l-​Qerq

‘Qisu li ħadd ma ijassarkom bi kliem qarrieq u fieragħ.’—KOLOSSIN 2:8.

1-3. (a) Liema eżempji juru li l-​qerq daħal kważi f’kull aspett tal-​ħajja taʼ kuljum? (b) Għala m’għandniex niskantaw bil-​qerq li hawn fid-​dinja?

“KEMM hawn minnkom li qatt ma kellu xi klijent li gidiblu?” Ftit tas-​snin ilu, professur tal-​liġi għamel stħarriġ billi staqsa din il-​mistoqsija. It-​tweġiba? Hu jispjega: “Minn eluf t’avukati, wieħed biss qatt ma kellu klijent li gidiblu.” Ir-​raġuni? “L-​avukat kien għadu kif beda jaħdem maʼ kumpanija kbira u kien għadu ma tkellimx maʼ klijent.” Din l-​esperjenza turi verità tal-​biki—il-​gideb u l-​qerq huma komuni fid-​dinja taʼ llum.

² Il-​qerq isir b’diversi modi u daħal fi kważi kull qasam tal-​ħajja moderna taʼ llum. Rapporti taʼ l-​aħbarijiet huma mimlijin b’eżempji—politikanti jigdbu dwar l-​azzjonijiet tagħhom, accountants u avukati jesaġeraw il-​qligħ taʼ kumpaniji, dawk li jirreklamaw iqarrqu bix-​xerrejja, nies li jittellgħu l-​qorti minħabba li jqarrqu b’kumpaniji taʼ l-​assigurazzjoni, biex insemmu biss ftit. Imbagħad hemm il-​qerq reliġjuż. Il-​kleru jqarraq bil-​folol billi jgħallem duttrini foloz, bħall-​immortalità tar-​ruħ, in-​nar taʼ l-​infern, u t-​trinità.—2 Timotju 4:3, 4.

³ Għandna niskantaw b’dan il-​qerq kollu? Le. Rigward “l-​aħħar tad-​dinja,” ilBibbja twissi: “In-​nies il-​ħżiena u l-​uċuħ b’oħra jmorru mill-​ħażin għall-​agħar, iqarrqu u jitqarrqu.” (2 Timotju 3:1, 13) Bħala Kristjani, aħna għandna bżonn noqogħdu għassa għall-​ideat qarrieqa li jistgħu jġagħluna nitilqu mill-​verità. Naturalment iqumu żewġ mistoqsijiet: Il-​qerq għala huwa daqshekk komuni llum, u kif nistgħu ngħassu kontra li niġu mqarrqin?

Għala Hawn Daqstant Qerq Illum?

4. Il-​Bibbja kif tispjega għala l-​qerq hu daqstant mifrux fid-​dinja?

⁴ Il-​Bibbja tispjega b’mod ċar ir-​raġuni għala l-​qerq huwa daqstant mifrux f’din id-​dinja. L-​appostlu Ġwanni kiteb li “d-​dinja kollha qiegħda taħt idejn il-​Ħażin.” (1 Ġwanni 5:19) “Il-​Ħażin” huwa Satana x-​Xitan. Ġesù qal dwaru: “Qatt ma żamm mal-​verità, għax il-​verità ma tinsabx fih. Meta jigdeb, ikun qiegħed jitkellem taʼ li hu, għax dak giddieb u missier il-​gideb.” Għalhekk, għandna għalfejn nistagħġbu li d-​dinja tirrifletti l-​ispirtu, il-​valuri, u l-​kwalitajiet qarrieqa tal-​ħakkiem tagħha?—Ġwanni 8:44; 14:30; Efesin 2:1-3.

5. Satana kif żied l-​isforzi qarrieqa tiegħu f’dan iż-​żmien tat-​tmiem, u lil min irid jolqot partikolarment?

⁵ F’dan iż-​żmien tat-​tmiem, Satana żied lisforzi tiegħu. Hu ġie mwaddab hawn fuq l-​art. Hu jaf li ż-​żmien li fadallu hu qasir, u għandu “korla kbira fuqu.” Peress li hu determinat li jeqred kemm jistaʼ jkun bnedmin, hu “qiegħed jiżvija lill-​art abitata kollha kemm hi.” (Apokalissi 12:9, 12, NW) Satana ma jqarraqx darba kultant. Anzi, hu qatt ma jnaqqas l-​isforzi tiegħu biex iqarraq bl-​umanità.a Hu juża kull metodu qarrieq li għandu disponibbli—inkluż l-​ingann u t-​tradiment—biex idallam il-​moħħ taʼ dawk li ma jemmnux u jżommhom ’il bogħod minn Alla. (2 Korintin 4: 4) Dan l-​espert tal-​qerq hu determinat speċjalment li jiblaʼ lil dawk li qed jaqdu lil Alla “fl-​ispirtu u l-​verità.” (Ġwanni 4:24; 1 Pietru 5:8) Qatt tinsa li Satana, attwalment, stqarr: ‘Jien nistaʼ ndawwar lil min irrid kontra Alla.’ (Ġob 1:9-12) Ejja nikkunsidraw xi ftit mit-​“tattiċi qarrieqa” taʼ Satana u kif nistgħu ngħassu kontrihom.—Efesin 6:11, Jewish New Testament.

Għasses Kontra li Tiġi Mqarraq mill-​Apostati

6, 7. (a) Liema stqarrija jistgħu jagħmlu l-​apostati? (b) L-​Iskrittura kif turi biċ-​ċar dak li jridu l-​apostati?

⁶ Satana ilu juża l-​apostati fl-​isforzi tiegħu biex iħajjar lill-​qaddejja t’Alla. (Mattew 13:36-39) L-​apostati għandhom mnejn jistqarru li jaqdu lil Jehovah u li jemmnu l-​Bibbja, imma huma jiċħdu l-​qasam viżibbli taʼ l-​organizzazzjoni tiegħu. Xi wħud saħansitra jerġgħu lura għad-​duttrini taʼ “Babilonja l-​Kbira,” l-​imperu dinji taʼ reliġjon falza, li jġibu diżunur lil Alla. (Apokalissi 17:5; 2 Pietru 2:19-22) Taħt ispirazzjoni divina, il-​kittieba tal-​Bibbja użaw kliem qawwi biex jikxfu l-​motivi u l-​metodi taʼ l-​apostati.

⁷ X’inhu l-​objettiv taʼ l-​apostati? Il-​maġġuranza minnhom m’humiex kuntenti li jitilqu l-​fidi li darba kienu jqisuha bħala verità. Spiss, iridu jkaxkru lil oħrajn magħhom. Minflok ma joħorġu u jagħmlu d-​dixxipli tagħhom stess, ħafna apostati jipprovaw “idawwru d-​dixxipli [jiġifieri, id-​dixxipli taʼ Kristu] għal warajhom.” (Atti 20:29, 30) Rigward għalliema foloz, l-​appostlu Pawlu ta din it-​twissija urġenti: “Qisu li ħadd ma ijassarkom.” (Kolossin 2:8) Ma jiddeskrivix dan x’qed jipprovaw jagħmlu ħafna apostati? Bħal wieħed li jaħtaf lil xi vittma bla ma din tissuspetta xejn u jġorrha miegħu ’l bogħod mill-​familja tagħha, dawn l-​apostati jaħtfu lil dawk il-​membri tal-​kongregazzjoni li jafdaw fis-​sinċerità taʼ l-​apostati, li jipprovaw iġorruhom ’il bogħod mill-​merħla.

8. Liema metodi jużaw l-​apostati biex jilħqu l-​mira tagħhom?

⁸ Liema metodi jużaw l-​apostati biex jilħqu l-​mira tagħhom? Spiss jużaw il-​qerq, nofs veritajiet, u gideb sfaċċat. Ġesù kien jaf li s-​segwaċi tiegħu kienu se jaqgħu vittmi taʼ dawk li kienu se ‘jaqilgħu kull xorta taʼ ħażen u gideb kontrihom.’ (Mattew 5:11) Dawn l-​opponenti malizzjużi jgħidu dak li mhux minnu bl-​iskop li jqarrqu b’oħrajn. L-​appostlu Pietru wissa kontra apostati li kienu se jużaw “kliem qarrieq,” ixerrdu tagħlim “qarrieq,” u ‘jfissru ħażin l-​Iskrittura’ biex jilħqu l-​iskop tagħhom. (2 Pietru 2:3, 13; 3:16) B’sogħba, l-​apostati jirnexxilhom “iħawwdu l-​fidi f’xi wħud.”—2 Timotju 2:18.

9, 10. (a) Kif nistgħu ngħassu kontra li niġu mqarrqin mill-​apostati? (b) Għala ma ninkwetawx jekk ikollna bżonn naġġustaw il-​fehma tagħna taʼ l-​iskop t’Alla?

⁹ Kif nistgħu ngħassu kontra li niġu mqarrqin mill-​apostati? Billi nagħtu kas il-​parir mill-​Kelma t’Alla, li jgħid: ‘Oqogħdu attenti minn dawk li jġibu l-​firda u t-​tfixkil kontra t-​tagħlim li intom tgħallimtu, u żommu ’l bogħod minnhom.’ (Rumani 16:17) Aħna ‘nżommu ’l bogħod minnhom’ billi naħarbu r-​raġunamenti tagħhom—kemm mingħandhom persunali, kemm bil-​kitba, u kemm permezz taʼ l-​Internet. Għala nieħdu waqfa bħal din? L-​ewwelnett, għaliex il-​Kelma t’Alla tgħidilna biex nagħmlu hekk, u aħna ninsabu fiduċjużi li Jehovah dejjem irid dak li hu l-​aħjar għalina.—Isaija 48:17, 18.

¹⁰ It-​tieni, aħna nħobbu l-​organizzazzjoni li għallmitna l-​veritajiet prezzjużi li b’mod ċar jifirduna minn Babilonja l-​Kbira. Fl-​istess waqt, aħna nirrikonoxxu li m’għandniex għarfien perfett taʼ l-​iskopijiet t’Alla; kellna wkoll naġġustaw il-​fehma tagħna matul is-​snin. Kristjani leali huma kuntenti li jistennew lil Jehovah għal dan l-​irfinar. (Proverbji 4:18) Sadanittant, aħna m’aħniex se nabbandunaw l-​organizzazzjoni li Alla jogħġbu juża, għax aħna naraw l-​evidenza ċara tal-​barka tiegħu fuqha.—Atti 6:7; 1 Korintin 3:6.

Għasses Kontra li Tqarraq Bik Innifsek

11. Bnedmin imperfetti għala għandhom tendenza li jqarrqu bihom infushom?

¹¹ Bnedmin imperfetti għandhom tendenza li Satana hu ħafif biex jipprofitta ruħu minnha—dik li jqarrqu bihom infushom. Ġeremija 17:9 jgħid: “Fuq kollox qalb il-​bniedem kollha qerq u mħassra.” U Ġakbu kiteb: “Kull bniedem imġarrab jinġibed u jitħajjar mill-​passjoni tiegħu stess.” (Ġakbu 1:14) Fil-​fatt, jekk qalbna tiġi mħajra, din għandha mnejn iġġagħalna naraw xewqa midinba tidher attraenti u bla perikli. Ħarsa bħal din hi qarrieqa, għax id-​dnub li nkunu waqajna fih, fl-​aħħar se jwassal għall-​qerda.—Rumani 8:6.

12. B’liema modi nistgħu nidħlu fin-​nassa li nqarrqu bina nfusna?

¹² It-​tendenza li nqarrqu bina nfusna tistaʼ faċilment iddaħħalna f’nassa. Il-​qalb qarrieqa tistaʼ tiġġustifika xi difett serju li jistaʼ jkollna fil-​personalità jew tiskuża xi dnub gravi. (1 Samwel 15:13-15, 20, 21) Il-​qalb iddisprata tagħna tistaʼ wkoll tfittex għal modi biex tiġġustifika kondotta dubjuża. Per eżempju, ejja nikkunsidraw id-​divertiment. Xi divertiment huwa bnin u pjaċevoli. Madankollu, ħafna minn dak li toffri d-​dinja—fil-​films u l-​programmi tat-​televixin u fuq il-​websites taʼ l-​Internet—huwa oxxen u immorali. Huwa faċli li nikkonvinċu lilna nfusna li nistgħu naraw divertiment baxx mingħajr ma jagħmlilna l-​ħsara. Xi wħud saħansitra jirraġunaw, “Jien ma tniggiżnix il-​kuxjenza, allura x’inhi l-​problema?” Imma dawn l-​individwi qed ‘iqarrqu bihom infushom’ b’raġunar falz.—Ġakbu 1:22.

13, 14. (a) Liema eżempju Skritturali juri li lkuxjenza tagħna mhux dejjem hi taʼ min joqgħod fuqha? (b) Kif nistgħu ngħassu kontra li nqarrqu bina nfusna?

¹³ Kif nistgħu noqogħdu għassa kontra li nqarrqu bina nfusna? L-​ewwel ħaġa, irridu niftakru li l-​kuxjenza tal-​bniedem mhux dejjem hi taʼ min joqgħod fuqha. Ikkunsidra l-​każ taʼ l-​appostlu Pawlu. Qabel ma sar Kristjan, hu ppersegwita lis-​segwaċi taʼ Kristu. (Atti 9:1, 2) Il-​kuxjenza tiegħu forsi ma niggżitux dak iż-​żmien. Iżda, ovvjament kienet ġiet diretta b’mod żbaljat. Pawlu qal: “Għamiltu bla ma kont naf, billi kont għadni bla fidi.” (1 Timotju 1:13) Għalhekk, is-​sempliċi fatt li ċertu divertiment ma jġagħalx il-​kuxjenza tagħna tniggiżna fih innifsu m’huwiex garanzija li dak li nkunu qed nagħmlu hu tajjeb. Kuxjenza b’saħħitha u mħarrġa sew mill-​Kelma t’Alla biss tistaʼ tkun gwida taʼ min joqgħod fuqha.

¹⁴ Jekk aħna rridu nevitaw li nqarrqu bina nfusna, hemm xi suġġerimenti ferm t’għajnuna li għandna bżonn inżommu f’moħħna. Analizza lilek innifsek bit-​talb. (Salm 26:2; 2 Korintin 13:5) Eżami onest tiegħek innifsek jistaʼ jiftaħlek għajnejk u tara l-​bżonn li tagħmel xi bidliet fil-​mod kif tħares lejn l-​affarijiet jew fil-​mod kif taġixxi. Ismaʼ lil oħrajn. (Ġakbu 1:​19) Ladarba meta teżamina lilek innifsek x’aktarx li tkun influwenzat mill-​opinjoni persunali tiegħek, ikun għaqli li tismaʼ l-​kliem imparzjali t’aħwa Kristjani maturi. Jekk tara li int qed tieħu deċiżjonijiet jew qed taġixxi b’modi li huma dubjużi f’għajnejn xi wħud minn sħabek Kristjani li huma bilanċjati u t’esperjenza, tistaʼ forsi tistaqsi lilek innifsek, ‘Jistaʼ jkun li l-​kuxjenza tiegħi ma ġietx imħarrġa tajjeb jew li qalbi qed tqarraq bija?’ Itma’ regolarment lilek innifsek mill-​Bibbja u l-​pubblikazzjonijiet ibbażati fuq il-​Bibbja. (Salm 1:2) Jekk tagħmel hekk, se tkun tistaʼ żżomm il-​ħsibijiet, l-​attitudnijiet, u s-​sentimenti tiegħek fi qbil mal-​prinċipji t’Alla.

Għasses Kontra l-​Gideb taʼ Satana

15, 16. (a) Fl-​isforzi tiegħu biex iqarraq bina, liema gideb juża Satana? (b) Kif nistgħu nevitaw li niġu mqarrqin minn dan il-​gideb?

¹⁵ Satana juża varjetà sħiħa taʼ gideb fl-​isforzi tiegħu biex iqarraq bina. Hu jipprova jikkonvinċina li l-​affarijiet materjali jġibu ferħ u sodisfazzjon, madankollu spiss ikun l-​oppost. (Koħèlet 5:9-11 [5:10-12, NW]) Hu kieku jridna nemmnu li din id-​dinja mill-​agħar se tibqaʼ għal dejjem, għalkemm hemm evidenza ċara li aħna qed ngħixu fl-​“aħħar tad-​dinja.” (2 Timotju 3:1-5) Satana jippromwovi l-​idea li stil taʼ ħajja immorali ma jagħmel ebda ħsara, avolja dawk li jfittxu l-​pjaċiri spiss jaħsdu konsegwenzi koroh. (Galatin 6:7) Kif nistgħu nevitaw li niġu mqarrqin minn gideb bħal dan?

¹⁶ Ibbenefika minn eżempji Bibliċi. Il-​Bibbja fiha eżempji taʼ twissija taʼ individwi li ġew imqarrqin mill-​gideb taʼ Satana. Huma kienu jħobbu affarijiet materjali, ma tawx kas iż-​żminijiet li kienu qed jgħixu fihom, jew ċedew għall-​immoralità—kollha b’riżultati ħżiena. (Mattew 19:16-22; 24:36-42; Luqa 16:14; 1 Korintin 10:8-11) Tgħallem minn eżempji taʼ żmienna. B’dispjaċir ngħidu, kultant xi Kristjani jitilfu s-​sens t’urġenza u jibdew jemmnu li minħabba li qed jaqdu lil Alla qed jitilfu xi ħaġa tajba. Huma forsi jitilqu mill-​verità biex jgħixu ħajja li suppost hi taʼ pjaċir. Madankollu, dawn l-​individwi qegħdin “fuq art tiżloq,” għax xi darba jew oħra minħabba l-​kondotta ħażina tagħhom se jkollhom jiffaċċjaw il-​konsegwenzi. (Salm 73:18, 19) Aħna nagħmlu tajjeb jekk nitgħallmu mill-​iżbalji t’oħrajn.—Proverbji 22:3.

17. Satana għala jippromwovi l-​gidba li Jehovah la jħobbna u lanqas ma jqisna prezzjużi għalih?

¹⁷ Hemm gidba oħra li Satana uża b’suċċess—il-​gidba li Jehovah la jħobbna u lanqas ma jqisna prezzjużi għalih. Satana kellu eluf taʼ snin biex jistudja lill-​bnedmin imperfetti. Hu jaf tajjeb li l-​iskuraġġiment jistaʼ jdgħajjef l-​ispiritwalità tagħna. (Proverbji 24:10) B’hekk, hu jippromwovi l-​gidba li aħna m’aħna xejn f’għajnejn Alla. Jekk aħna “mixħutin maʼ l-​art” u nsiru konvinti li Jehovah ma jimpurtahx minna, forsi nitħajru naqtgħu qalbna. (2 Korintin 4:9) Dan hu eżatt dak li jrid il-​Qarrieq il-​kbir! Mela, kif nistgħu ngħassu kontra li niġu mqarrqin minn din il-​gidba satanika?

18. Il-​Bibbja kif tassigurana mill-​imħabba taʼ Jehovah?

¹⁸ Immedita personalment fuq dak li tgħid il-​Bibbja dwar l-​imħabba t’Alla għalina. Il-​Kelma t’Alla tuża tixbihat vivaċi li jmissulek qalbek biex tassigurana li Jehovah jinnotana u jħobbna individwalment. Hu jitfaʼ d-​dmugħ tiegħek fi “flixkun,” jiġifieri li jara u jiftakar id-​dmugħ li int ixxerred fit-​taqbida tiegħek biex tibqaʼ leali. (Salm 56:9 [56:8, NW]) Hu jaf meta jkollok ‘qalbek maqsuma’ u jkun viċin tiegħek f’dak iż-​żmien. (Salm 34:19 [34:18, NW]) Hu jaf kull dettall dwarek, inkluż kemm għandek ‘xagħar f’rasek.’ (Mattew 10:29-31) Fuq dan kollu, Alla “ta lil Ibnu l-​waħdieni” għalik. (Ġwanni 3:16; Galatin 2:20) Xi drabi, forsi ssibha diffiċli biex temmen li dawn l-​iskritturi japplikaw għalik personalment. Madankollu, għandna nemmnu l-​kelma taʼ Jehovah. Hu jridna nemmnu li hu jħobbna mhux biss bħala grupp imma bħala individwi.

19, 20. (a) Għala huwa importanti li tagħraf u tiċħad il-​gidba satanika li Jehovah ma jħobbokx? (b) Wieħed indokratur li jivvjaġġa kif għen lil uħud li kienu skuraġġiti?

¹⁹ Agħraf u iċħad il-​gidba. Jekk taf li xi ħadd qed jigdeb, int tistaʼ tipproteġi lilek innifsek milli tiġi mqarraq. Għalhekk, anki s-​sempliċi fatt li tkun taf li Satana jridek temmen il-​gidba li Jehovah ma jħobbokx jistaʼ fih innifsu jkun t’għajnuna kbira. Bi tweġiba għall-​artiklu li deher fit-​Torri taʼ l-​Għassa li wissa dwar it-​tattiċi taʼ Satana, waħda Kristjana qalet: “Qatt ma rrealizzajt li Satana jipprova juża s-​sentimenti tiegħi biex jiskuraġġini. Issa li naf dan jagħtini l-​motivazzjoni li niġġieled dawn is-​sentimenti.”

²⁰ Ikkunsidra l-​esperjenza taʼ indokratur li jivvjaġġa f’pajjiż fl-​Amerika t’Isfel. Meta jagħmel żjajjar pastorali lil uħud li jħossuhom skuraġġiti, hu spiss jistaqsihom, ‘Temmen fit-​Trinità?’ Il-​persuna skuraġġita ġeneralment twieġeb, ‘Dażgur li le,’ għax taf li din hija gidba taʼ Satana. L-​indokratur li jivvjaġġa mbagħad jistaqsi, ‘Temmen fin-​nar taʼ l-​infern?’ It-​tweġiba terġaʼ tkun, ‘Dażgur li le!’ L-​anzjan li jivvjaġġa mbagħad jgħidilhom li hemm gidba oħra satanika li ġeneralment ma tantx jindunaw li hi gidba. Hu jidderieġi l-​attenzjoni tagħhom lejn paġna 249, paragrafu 21, tal-​ktieb Draw Close to Jehovah (Ersaq Qrib Lejn Jehovah),b li juri kemm hi verament gidba li Jehovah ma jħobbniex bħala individwi. L-​indokratur li jivvjaġġa jirrapporta riżultati pożittivi meta jgħin lil uħud skuraġġiti biex jagħrfu u jiċħdu din il-​gidba satanika.

Għasses Lilek Innifsek mill-​Qerq

21, 22. Għala m’aħniex fi dlam rigward it-​tattiċi qarrieqa taʼ Satana, u x’għandha tkun id-​determinazzjoni tagħna?

²¹ Matul il-​parti finali taʼ dawn l-​aħħar jiem, nistgħu nistennew li Satana se jkompli jivvinta ammont kbir taʼ gideb u qerq. Aħna grati li Jehovah ma ħalliniex fid-​dlam rigward it-​tattiċi qarrieqa taʼ Satana. Il-​Bibbja u l-​pubblikazzjonijiet ibbażati fuq il-​Bibbja li jagħtina l-​“ilsir leali u diskret” jikxfu l-​metodi mill-​agħar li juża x-​Xitan. (Mattew 24:45, NW) Peress li aħna avżati minn qabel, aħna ninsabu armati għal li jistaʼ jinqalaʼ.—2 Korintin 2:11.

²² Għalhekk, ejja nkomplu ngħassu kontra r-​raġunar taʼ l-​apostati. Jalla nkunu determinati li nevitaw in-​nassa sottili li nqarrqu bina nfusna. U ejja nirrikonoxxu u niċħdu l-​gideb kollu taʼ Satana. Jekk nagħmlu dan, aħna se nħarsu r-​relazzjoni tagħna maʼ l-​“Alla tas-​sewwa,” li jobgħod il-​qerq.—Salm 31:6 (31:5, NW); Proverbji 3:32.

[Noti taʼ taħt]

Tiftakar Int?

• Għala hawn daqstant qerq fid-​dinja llum?

• Kif nistgħu ngħassu kontra li niġu mqarrqin mill-​apostati?

• Kif nistgħu ngħassu kontra kwalunkwe tendenza lejn li nqarrqu bina nfusna?

• Kif nistgħu ngħassu kontra li niġu mqarrqin minn gideb sataniku?

[Stampa f’paġna 17]

Tqarraqx bik innifsek rigward id-​divertiment

[Stampi f’paġna 18]

Biex tgħasses kontra li tqarraq bik innifsek, analizza lilek innifsek bit-​talb, ismaʼ lil oħrajn, u itma’ regolarment lilek innifsek mill-​Kelma t’Alla