Jistgħu l-Knejjes Jiġu Salvati?
“IN-NIES fil-Britannja għadhom jemmnu f’Alla imma ma jridux jikkommettu ruħhom maʼ Kristu,” jgħid Stephen Tirwomwe, membru tal-kleru Ugandiż. Madwar 20 sena qabel, hu kien irnexxielu jibqaʼ ħaj wara l-massakri vjolenti li saru fuq ir-reliġjon tiegħu fl-Uganda. Illum il-ġurnata, hu jippriedka fil-każini taʼ l-irġiel f’Leeds, l-Ingilterra, fejn jagħmel priedka t’għaxar minuti qabel ma n-nies jibdew jilagħbu t-tombla.
Fuq in-naħa l-oħra taʼ l-Atlantiku, il-Missjoni Anglikana fl-Amerika li għadha kif ġiet organizzata qed tissielet maʼ kriżi spiritwali simili. “Fl-Istati Uniti issa hemm l-akbar numru taʼ nies fid-dinja li jitkellmu bl-Ingliż u li ma jagħmlu parti mill-ebda knisja u huma indifferenti spiritwalment,” tgħid il-Web site uffiċjali taʼ din il-missjoni. “Aħna qed insiru t-territorju tal-missjunarji.” Diżappuntata bin-nuqqas taʼ suċċess li kellha biex tagħmel bidliet fil-knisja tagħha, il-missjoni l-ġdida ma baqgħetx timxi skond it-tradizzjoni u minflok ngħaqdet maʼ mexxejja Asjatiċi u Afrikani biex tibda “attivitajiet missjunarji fl-Istati Uniti.”
Madankollu, il-missjunarji Afrikani, Asjatiċi, u Amerikani Latini għala qed ‘isalvaw l-erwieħ’ fl-hekk imsejħa pajjiżi Kristjani taʼ l-Ewropa u l-Amerika taʼ Fuq?
Min Qed Isalva lil Min?
Għal iktar minn erbaʼ mitt sena, għadd ġmielu taʼ missjunarji Ewropej devoti kienu kontinwament imorru fir-reġjuni li dejjem jikbru taʼ kolonji Ewropej, bħal dawk fl-Afrika, l-Asja, il-Paċifiku, u l-Amerika t’Isfel. L-għan tagħhom kien li jwasslu r-reliġjon tagħhom għand l-hekk imsejħa pagani taʼ dawn il-pajjiżi. Maż-żmien, il-kolonji Amerikani, li suppost huma msejsa fuq prinċipji Kristjani, għamlu bħal sħabhom il-missjunarji Ewropej. Huma stabbilew il-missjonijiet evanġeliċi tagħhom stess madwar id-dinja kollha u saħansitra għaddew lill-Ewropej. Issa l-folja nqalbet.
“Iċ-ċentru [taʼ l-hekk imsejħa Kristjanità] inbidel,” jgħid Andrew Walls, fundatur u direttur taċ-Ċentru għall-Istudju fuq il-Kristjanità fid-Dinja li mhix tal-Punent. Fl-1900, 80 fil-mija minn dawk li kienu jsostnu li huma Kristjani kienu nies mill-Ewropa jew inkella mill-Amerika taʼ Fuq. Madankollu, illum 60 fil-mija minn dawk kollha li jgħidu li huma Kristjani jgħixu fl-Afrika, fl-Asja, u fl-Amerika Latina. Rapport reċenti f’gazzetta jgħid: “Il-knejjes Kattoliċi fl-Ewropa jiddependu minn qassisin mill-Filippini u l-Indja,” u “qassis minn kull sitta li jaqdu f’parroċċi Kattoliċi fl-Amerika qed jiġi importat minn barra.” Evanġeliċi Afrikani fl-Olanda, li ħafna minnhom huma mill-Gana, iqisu lilhom infushom bħala “knisja missjunarja f’kontinent mhux reliġjuż.” U evanġelisti mill-Brażil issa qed jorganizzaw kruċjati f’partijiet differenti tal-Britannja. Wieħed kittieb josserva: “It-traffiku missjunarju Kristjan miexi bil-kontra.”
Riesaq il-Maltemp
Il-missjunarji wisq probabbli huma meħtieġa fil-kontinenti taʼ l-Ewropa u taʼ l-Amerika taʼ Fuq, li iktar ma jgħaddi żmien iktar qed isiru ma jimpurtahomx mir-reliġjon. “Fl-Iskozja inqas minn 10 fil-mija mill-Kristjani jmorru l-knisja regolarment,” tinnota rivista waħda. Fi Franza u l-Ġermanja jmorru saħansitra inqas nies minn hekk. Skond stħarriġ li sar, “madwar 40 fil-mija mill-Amerikani u 20 fil-mija mill-Kanadiżi qalu li jmorru l-knisja regolarment,” jgħid rapport ieħor fil-ġurnali. B’kuntrast, l-attendenza fil-Filippini jintqal li kważi laħqet is-70 fil-mija, u l-istess ħaġa tistaʼ tingħad għal pajjiżi oħra li qed jiżviluppaw.
Xi ħaġa iktar sinifikanti hija l-fatt li l-uħud li jattendu l-knisja fl-Emisferu t’Isfel għandhom it-tendenza li jkunu ħafna iktar tradizzjonali minn dawk li jgħixu fl-Emisferu taʼ Fuq. Per eżempju, meta jiġu intervistati l-Kattoliċi fl-Istati Uniti u fl-Ewropa, huma b’mod konsistenti jesprimu nuqqas taʼ fiduċja li dejjem jiżdied fl-awtorità tal-kleru u jinsistu li l-lajċi jkollhom sehem akbar u li n-nisa jkollhom l-ugwaljanza. Mill-banda l-oħra, il-Kattoliċi fl-Emisferu t’Isfel iħaddnu bil-kbir il-ħarsa tradizzjonali tal-knisja fuq dawn il-kwistjonijiet. Hekk kif din it-tendenza taʼ l-appoġġ tan-nies lejn il-knisja tkompli tgħaddi min-naħa taʼ fuq għan-naħa t’isfel, diġà qed tifforma l-bażi għal konflitti fil-futur. Philip Jenkins, studjuż taʼ l-istorja u r-reliġjon, bassar li hemm ċans kbir li sa għaxra jew għoxrin sena oħra l-Kristjani f’kull naħa m’humiex se jirrikonoxxu lil xulxin bħala li jagħmlu parti mill-Kristjanità sħiħa jew awtentika.
Minħabba dawn it-tendenzi, Walls jgħid li l-mistoqsija urġenti li tqum hija “kif il-Kristjani Afrikani, Asjatiċi, Ewropej, taʼ l-Amerika Latina, u taʼ l-Amerika taʼ Fuq jistgħu jgħixu flimkien fl-istess knisja, u b’mod awtentiku jesprimu l-istess fidi.” Int x’taħseb? Jistgħu l-knejjes jibqgħu jeżistu f’dinja mifruda? X’inhi l-bażi għall-għaqda Kristjana vera? L-artiklu li jmiss se jagħti t-tweġibiet Skritturali, flimkien m’evidenza ċara li komunità Kristjana magħquda diġà qed tiffjorixxi mad-dinja kollha.
[Stampa f’paġna 4]
Dan il-post li qabel kien knisja sar restorant fejn tindaqq il-mużika
[Sors]
AP Ritratt/Nancy Palmieri