Il-​Meravilja tal-​Ħolqien Taʼ Jehovah

‘Int Aktar Maestuż mill-​Muntanji’

JEKK tinzerta tkun fuq il-​Muntanja Fuji meta jkun qed jisbaħ, ikollok esperjenza li ma tinsieha qatt. Xemx ħamra lewn in-​nar tfeġġ fuq ix-​xefaq, iddawwal is-​silġ abjad u l-​ġebel griż tal-​lava. Hekk kif jibda jum ieħor, id-​dell tal-​muntanja, li juri sa l-​inqas dettall, jinfirex f’ħakka t’għajn fuq l-​għoljiet u l-​widien għal mili sħaħ.

Bħall-Muntanja Fuji—li darba kienet miktuba b’ittri li jfissru “m’hawnx bħalha”—il-​muntanji maestużi qatt ma jonqsu li jaffaxxinawna. Fil-​fatt, għandu mnejn inħossuna verament żgħar ħdejn il-​kobor immens tagħhom! Il-​muntanji tant huma mżejnin b’kobor u ġmiel li ħafna nies kienu jemmnu li l-​ogħla qċaċet, li ħafna drabi jkunu misturin fiċ-​ċpar u s-​sħab, kienu l-​għamajjar taʼ l-​allat.

L-uniku Alla li jiġi verament imfaħħar mill-​muntanji huwa l-​Ħallieq eċċellenti tagħhom, Jehovah. Hu biss huwa “Dak li sawwar il-​muntanji.” (Għamos 4:13) Kważi kwart mid-​dinja huwa art muntanjuża, u meta Alla ħalaq il-​pjaneta tagħna, hu stabbilixxa forzi li fl-​aħħar mill-​aħħar ipproduċew qċaċet u gruppi taʼ muntanji spettakolari. (Salm 95:4) Per eżempju, huwa maħsub li l-​grupp taʼ muntanji tal-​Ħimalaja u l-​Andes kienu fformati minn taqlib enormi fil-​qalba tad-​dinja u miċ-​ċaqliq taʼ sezzjonijiet tal-​qoxra tad-​dinja.

Aħna l-​bnedmin ma nifhmux għalkollox kif u għala l-​muntanji bdew jeżistu. Tabilħaqq, aħna m’aħniex kapaċi nwieġbu l-​mistoqsijiet li ġie mistoqsi r-​raġel ġust Ġob: “Fejn kont int jien [Jehovah] u nqiegħed sisien l-​art? . . . Fuqiex qed iżommu l-​kolonni tagħha?”—Ġob 38:4-6.

Madankollu, li nafu hu, li ħajjitna tiddependi mill-​muntanji. Dawn ġew imsejħin l-​imħażen taʼ l-​ilma tan-​natura, ladarba l-​ilma tax-​xmajjar prinċipali kollha jiġi minn għejun fuq il-​muntanji u nofs il-​popolazzjoni tad-​dinja tiddependi mill-​ilma li jiġi mill-​muntanji. (Salm 104:13) Skond ir-​rivista New Scientist, sitta mill-​20 pjanta taʼ l-​ikel prinċipali tad-​dinja joriġinaw mill-​muntanji. Fid-​dinja l-​ġdida li wegħedna Alla, li fiha l-​kundizzjonijiet se jkunu bilanċjati ekoloġikament, se “jkun kotran il-​qamħ fuq l-​art, jogħla sal-​qċaċet taʼ l-​għoljiet . . . iħaddru l-​uċuħ bħall-​ħaxix tar-​rabaʼ.”—Salm 72:16; 2 Pietru 3:13.

Ħafna nies meta jisimgħu bil-​kelma muntanji jiftakru fl-​Alpi Ewropej. Dawn il-​qċaċet, li jinkludu l-​Muntanja Civetta li tidher hawnhekk, huma xiehda li tpaxxik tal-​Ħallieq tagħhom. (Salm 98:8) Huma jfaħħru lil Jehovah, il-​wieħed li ‘waqqaf fis-​sod il-​muntanji b’qawwietu.’—Salm 65:7 (65:6, NW).a

Kemm tqanqal biżaʼ u rispett profond il-​meravilja taʼ l-​Alpi, bil-​qċaċet tawwalin u ttrufijiet miksijin bis-​silġ, bil-​ġnub imżerżqin tagħhom mgħottijin bil-​borra, bil-​widien u l-​għadajjar, u bil-​mergħat! Is-​Sultan David identifika lil Jehovah bħala l-​Wieħed li “jnibbet il-​ħaxix fuq l-​għoljiet.”—Salm 147:8.

Serbut taʼ għoljiet—bħal dawn l-​għoljiet f’Guilin, iċ-​Ċina—għandhom mnejn jidhru inqas spettakolari mill-​Alpi, imma s-​sbuħija tagħhom hija waħda unika. Tul ix-​Xmara Li, ringiela fuq ringiela taʼ qċaċet li jispontaw ’il barra jimpressjonaw lill-​viżitaturi bis-​sbuħija tagħhom. X’ħin tara dawk l-​ilmijiet ċari li jgħaddu minn dawn l-​għoljiet imdawrin biċ-​ċpar għandu mnejn tiftakar fil-​kliem tas-​salmista: “L-​għejun [Jehovah, int] tiftħilhom għal ġol-​widien, u huma jiġru qalb l-​għoljiet.”—Salm 104:10.

Mhux taʼ b’xejn li lmuntanji tant jimpressjonawna! Dan hu għaliex aħna nirrikonoxxu li huma parti maestuża mill-​provvediment taʼ mħabba li l-​Ħallieq għamel għall-​ġid u ttgawdija taʼ l-​umanità. Għalkemm iqanqlu biżaʼ u rispett profond, il-​muntanji ma jistgħux jitqabblu mal-​maestà taʼ Jehovah. Hu tabilħaqq ‘aktar maestuż mill-​muntanji.’—Salm 76:4, KŻ.

[Nota taʼ taħt]

[Kaxxa/Stampa f’paġna 9]

Għaxra fil-​mija mill-​popolazzjoni tad-​dinja jgħixu fi nħawi muntanjużi. Imma dan m’huwiex xi ostaklu li ma jistax jiġi megħlub għal dawk li jħabbru l-​aħbar tajba tas-​Saltna t’Alla. Dawn il-​ministri Kristjani huma verament imħabbtin f’dawn il-​ħafna reġjuni għoljin. U “kemm huma sbieħ fuq il-​muntanji r-​riġlejn taʼ min iħabbar il-​bxara, taʼ min ixandar is-​sliem, taʼ min iħabbar ir-​riżq, taʼ min ixandar is-​salvazzjoni”!—Isaija 527.

“L-​għoljiet huma l-​kenn għall-​mogħoż salvaġġi,” kanta s-​salmista. (Salm 104:18, Karm Żammit) Il-​mogħoż salvaġġi tal-​muntanji, bħalma hi l-​Capra ibex nubiana li għandha qrun sbieħ, huma fost l-​iktar annimali li jgħixu fuq il-​muntanji u li huma sodi fuq saqajhom. Dawn il-​mogħoż jimxu f’xifer taʼ blat li tant hu dejjaq li jidher impossibbli li jgħaddu minnu. L-​ibex hija mgħammra tajjeb biex tgħix f’postijiet li ma jistgħux jintlaħqu. Waħda mir-​raġunijiet hija l-​mod kif huma magħmulin difrejha. Il-​qasma li għandha fid-​dwiefer tistaʼ tinfetaħ minħabba t-​toqol tal-​mogħża, u b’hekk l-​annimal ikollu qabda iktar soda meta jkun bil-​wieqfa jew meta jkun għaddej minn xi passaġġ dejjaq fil-​blat. Verament, l-​ibex hija kapulavur fil-​mod kif inhi magħmula.

[Stampa f’paġna 9]

Il-​Muntanja Fuji, Honshu, il-​Ġappun