Min Illum Qed Jagħti Glorja lil Alla?

“Jistħoqqlok, Mulej Alla tagħna, li tilqaʼ l-​glorja u l-​ġieħ u s-​setgħa.”—APOKALISSI 4:11.

1, 2. (a) X’inhuma xi eżempji tal-​qasam li jissejjaħ bijomimetika? (b) Liema mistoqsija tqum, u x’inhi t-​tweġiba?

JUM wieħed fis-​snin 40, l-​inġinier Svizzeru George de Mestral ħareġ idawwar il-​kelb tiegħu. Meta wasal id-​dar, hu nnota li ħwejġu u l-​pil tal-​kelb kienu miksijin b’ħaxixa li kellha xewk żgħir. Mimli kurżità, hu eżamina din il-​ħaxixa bil-​mikroskopju, u baqaʼ meraviljat x’ħin ra li kellha bħal krieket żgħar li kienu jaqbdu maʼ kwalunkwe ħaġa li kienet forma taʼ ħolqa. Maż-​żmien, hu vvinta xi ħaġa sintetika li tixbahha—il-​Velkro. De Mestral ma kienx l-​uniku wieħed li kkopja n-​natura. Fl-​Istati Uniti, l-​aħwa Wright iddisinjaw ajruplan wara li studjaw kif itiru l-​għasafar kbar. L-​inġinier Franċiż Alexandre-Gustave Eiffel iddisinja t-​torri f’Pariġi msemmi għalih, billi uża l-​istess prinċipji bażiċi li permezz tagħhom l-​għadma tal-​koxxa tal-​bniedem tiflaħ it-​toqol tal-​ġisem kollu.

² Dawn huma eżempji ċari taʼ dik li tissejjaħ bijomimetika, il-​qasam tax-​xjenza li jipprova jimita l-​mod kif inhuma disinjati xi affarijiet fin-​natura.a Iżda tqum mistoqsija f’lokha: Dawk li jivvintaw dawn l-​affarijiet kemm-il darba jagħtu l-​kredtu lil Dak li ddisinja l-​ħxejjex daqs naqra, l-​għasafar il-​kbar, l-​għadma tal-​koxxa tal-​bniedem, u l-​affarijiet meraviljużi l-​oħra kollha li fuqhom huma bbażati ħafna mill-​invenzjonijiet tal-​bniedem? B’sogħba, ir-​realtà hi li fid-​dinja taʼ llum, Alla rari jingħata l-​kredtu jew il-​glorja li tistħoqqlu.

3, 4. Xi tfisser il-​kelma Ebrajka tradotta “glorja,” u għalxiex għandha tirreferi meta tintuża għal Jehovah?

³ Xi wħud għandhom mnejn jistaqsu, ‘Għala huwa neċessarju li nagħtu glorja lil Alla? Alla mhux diġà glorjuż?’ Veru, Jehovah hu l-​iktar Persunaġġ glorjuż fl-​univers, imma dan ma jfissirx li hu glorjuż f’għajnejn il-​bnedmin kollha. Fil-​Bibbja, il-​kelma Ebrajka tradotta “glorja” għandha s-​sens bażiku taʼ “toqol.” Tirreferi għal kwalunkwe ħaġa li ġġiegħel lil dak li jkun jidher impressjonanti jew importanti f’għajnejn l-​oħrajn. Meta tintuża għal Alla, din tirreferi għal dak li jġiegħel lil Alla jidher impressjonanti f’għajnejn il-​bniedem.

⁴ Ftit illum jinnotaw dak li jagħmel lil Alla impressjonanti. (Salm 10:4; 14:1) Fil-​fatt, in-​nies spiss ġew influwenzati biex ma jurux rispett lejn il-​Ħallieq glorjuż taʼ l-​univers minn uħud prominenti fis-​soċjetà, li fuq kollox għandhom mnejn lanqas biss ikunu jemmnu b’Alla. B’liema modi għamluh dan?

“Ma Għandhom Ebda Skuża”

5. Bosta xjenzati kif jipprovaw jispjegaw l-​għeġubijiet tal-​ħolqien?

⁵ Bosta xjenzati jgħidu li Alla ma jeżistix. Allura, dawn kif jispjegaw l-​għeġubijiet tal-​ħolqien, inkluż il-​bniedem? Huma jgħidu li dawn il-​meravilji ġew permezz taʼ l-​evoluzzjoni, forza bla direzzjoni bbażata fuq il-​kumbinazzjoni. Per eżempju, l-​evoluzzjonista Stephen Jay Gould kiteb: “Ninsabu hawn għax xi grupp stramb taʼ ħut kellu ġwienaħ partikulari li setgħu jinbidlu f’saqajn addattati għal ħlejjaq li jgħixu fuq l-​art . . . Forsi nixtiequ li għandna tweġiba ‘superjuri’—imma ma teżisti l-​ebda waħda.” B’mod simili, Richard E. Leakey u Roger Lewin kitbu: “Jistaʼ jkun li l-​ispeċi umana hija biss żball bijoloġiku terribbli.” Anki ċerti xjenzati li jfaħħru l-​ġmiel u d-​disinn fin-​natura jonqsu li jagħtu l-​kredtu lil Alla.

6. X’jiskuraġġixxi lil ħafna milli jagħtu lil Alla l-​kredtu li jistħoqqlu bħala l-​Ħallieq?

⁶ Meta nies taʼ skola kbira jiddikjaraw b’ċertezza li l-​evoluzzjoni hija fatt, huma jimplikaw li l-​injoranti biss jirrifjutaw li jemmnuha. Ħafna nies kif jirreaġixxu għal dikjarazzjoni bħal din? Xi snin ilu, raġel li kien intiż ħafna fl-​evoluzzjoni intervista lil uħud li kienu aċċettaw din it-​teorija. Hu qal: “Skoprejt li ħafna minn dawk li jemmnu bl-​evoluzzjoni jemmnu biha għax intqalilhom li n-​nies intelliġenti kollha jemmnuha.” Iva, meta individwi taʼ skola kbira jesprimu l-​opinjonijiet ateistiċi tagħhom, oħrajn jiġu skuraġġiti milli jagħtu lil Alla l-​kredtu li jistħoqqlu bħala l-​Ħallieq.—Proverbji 14:15, 18.

7. Skond Rumani 1:20, x’jistaʼ jidher ċar permezz tal-​ħolqien viżibbli, u għala?

⁷ Waslu x-​xjenzati għal dawn il-​konklużjonijiet għax il-​fatti u l-​evidenza jagħtu prova taʼ l-​evoluzzjoni? Dażgur li le! Aħna mdawrin b’evidenza li jeżisti Ħallieq. Dwaru l-​appostlu Pawlu kiteb: “Il-​kobor tiegħu li ma jidhirx, jiġifieri s-​setgħa tiegħu taʼ dejjem, u d-​divinità tiegħu, huma setgħu jagħrfuh sa mill-​ħolqien tad-​dinja [tal-bnedmin], permezz tal-​ħlejjaq, u għalhekk [dawk li ma jemmnux] ma għandhom ebda skuża.” (Rumani 1:20) L-​evidenza li jeżisti Ħallieq tidher ċar mill-​affarijiet li ħalaq. Pawlu b’hekk qed jgħid li mill-​bidu taʼ l-​eżistenza tagħhom, il-​bnedmin setgħu ‘jagħrfu’ l-​evidenza taʼ l-​eżistenza t’Alla mill-​ħolqien viżibbli. Fejn hi din l-​evidenza?

8. (a) Is-​smewwiet fiżiċi kif jixhdu għall-​qawwa u l-​għerf t’Alla? (b) Liema indikazzjoni hemm li l-​univers kellu l-​Ewwel Kawża?

⁸ Naraw evidenza t’Alla fis-​smewwiet mimlijin kwiekeb. “Is-​smewwiet ixandru l-​glorja taʼ Alla,” jgħid Salm 19:2 (19:1, NW). “Is-​smewwiet”—ix-​xemx, il-​qamar, u l-​kwiekeb—jagħtu xiehda tal-​qawwa u l-​għerf t’Alla. In-​numru bla għadd taʼ kwiekeb inissel fina sens taʼ biżaʼ u stagħġib kbir. U dawn l-​oġġetti ċelestjali kollha li jiċċaqalqu fl-​ispazju, ma jiċċaqalqux bl-​amment, imma fi qbil maʼ liġijiet fiżiċi preċiżi.b (Isaija 40:26) Huwa raġunevoli li tgħid li din l-​ordni ġiet b’kumbinazzjoni? Xi ħaġa sinifikanti hi li ħafna xjenzati jgħidu li l-​univers beda jeżisti f’daqqa waħda. Biex jispjega dan xi jfisser, wieħed professur kiteb: “Għal xi ħadd ateu jew anjostiku hu ferm iktar faċli li jaċċetta li l-​univers eżista minn dejjem. Bl-​istess argument, min jemmen li l-​univers kellu bidu jrid bilfors jemmen li kien hemm l-​ewwel kawża [sors li kkaġuna l-​eżistenza taʼ kollox]; għax kif jistaʼ jkun hemm effett bħal dan mingħajr kawża suffiċjenti?”

9. Kif nistgħu naraw l-​għerf taʼ Jehovah mill-​annimali?

⁹ L-​evidenza li jeżisti Alla nistgħu wkoll narawha fuq l-​art. Is-​salmista esklama: “Kemm huma kotrana l-​għemejjel tiegħek, Mulej! Kollha bl-​għerf għamilthom; mimlija l-​art bil-​ħlejjaq tiegħek.” (Salm 104:24) Il-​“ħlejjaq” taʼ Jehovah, inkluż l-​annimali, huma evidenza taʼ l-​għerf tiegħu. Bħalma nnotajna fil-​bidu taʼ l-​artiklu, id-​disinn taʼ l-​affarijiet ħajjin tant hu taʼ kwalità għolja li x-​xjenzati spiss jipprovaw jimitawh. Ikkunsidra xi eżempji oħra. Xi riċerkaturi qed jistudjaw il-​qrun taċ-​ċriev sabiex ikunu jistgħu joħolqu helmets iktar b’saħħithom; qed jeżaminaw speċi waħda taʼ dubbiena li tismaʼ ħafna sabiex ikunu jistgħu jtejbu l-​apparat tas-​smigħ; u qed jeżaminaw ir-​rix tal-​ġwienaħ tal-​kokka bl-​intenzjoni li jtejbu l-​ajruplani silenzjużi li diffiċli jinqabdu mir-​radar. Imma jipprova kemm jipprova, il-​bniedem ma jistax verament jagħmel kopja vera tad-​disinji oriġinali perfetti li nsibu fin-​natura. Il-​ktieb Biomimicry—Innovation Inspired by Nature jgħid: “L-​affarijiet ħajjin għamlu dak kollu li rridu nagħmlu aħna, mingħajr ma ħlew il-​fuel mill-​fossili, u mingħajr ma niġġsu l-​pjaneta, jew ipperikolaw il-​futur tagħhom.” Dak hu l-​għerf veru!

10. Għala m’huwiex loġiku li tiċħad l-​eżistenza taʼ Disinjatur Kbir? Agħti eżempju.

¹⁰ Sew jekk tħares ’il fuq lejn is-​smewwiet u sew jekk tħares lejn il-​ħolqien hawn stess fuq l-​art, l-​evidenza li jeżisti Ħallieq hija ċara daqs il-​kristall. (Ġeremija 10:12) Għandna naqblu b’qalbna kollha mal-​ħlejjaq tas-​sema li jgħidu: “Jistħoqqlok, Mulej Alla tagħna, li tilqaʼ l-​glorja u l-​ġieħ u s-​setgħa, għax int ħlaqt il-​ħlejjaq kollha, u huma kienu u nħolqu bir-​rieda tiegħek.” (Apokalissi 4:11) Madankollu, ħafna xjenzati jonqsu li jaraw l-​evidenza bl-​‘għajnejn taʼ qalbhom,’ avolja għandhom mnejn jibqgħu miblugħin bid-​disinn li jeżisti fl-​affarijiet li jaraw bl-​għajnejn letterali tagħhom. (Efesin 1:18) Imma, bħalma m’huwiex loġiku li tgħid li tammira pittura sabiħa u fl-​istess ħin tiċħad l-​eżistenza taʼ l-​artist li biddel it-​tila vojta f’kapulavur, daqshekk ieħor m’huwiex loġiku li tgħid li tammira l-​ġmiel u d-​disinn fin-​natura u tiċħad l-​eżistenza taʼ Disinjatur Kbir. Mhux taʼ b’xejn li dawk li jirrifjutaw l-​eżistenza t’Alla jingħad li “ma għandhom ebda skuża”!

‘Mexxejja Għomja’ Jqarrqu b’Ħafna

11, 12. Fuq liema idea hi bbażata d-​duttrina tal-​predestinazzjoni, u x’juri li din id-​duttrina ma ġġibx glorja lil Alla?

¹¹ Ħafna nies reliġjużi jemmnu sinċerament li qed jagħtu glorja lil Alla bil-​mod kif iqimuh. (Rumani 10:2, 3) Madankollu, ir-​reliġjon b’mod ġenerali hija settur ieħor tas-​soċjetà umana li attwalment żamm lil miljuni taʼ nies milli jagħtu glorja lil Alla. Dan kif? Ejja nikkunsidraw żewġ modi.

¹² L-​ewwel, ir-​reliġjonijiet ma jħallux li tingħata glorja lil Alla minħabba t-​tagħlim falz tagħhom. Per eżempju, ejja nieħdu d-​duttrina tal-​predestinazzjoni. Din id-​duttrina hija bbażata fuq l-​idea li ladarba Alla għandu l-​qawwa li jkun jaf il-​futur, hu bilfors jaf minn qabel ir-​riżultat taʼ kollox. Il-​predestinazzjoni tissuġġerixxi li żmien twil ilu Alla ddetermina minn qabel il-​futur—tajjeb jew ħażin—taʼ kull individwu. Skond dan l-​irraġunar, Alla jaħti għat-​tbatija u l-​ħażen kollu li hawn fid-​dinja llum. Żgur li Alla ma jiġix glorifikat meta jwaħħlu fih minflok ma jwaħħlu kif jixraq fl-​Avversarju ewlieni tiegħu, Satana, dak li l-​Bibbja ssejjaħlu “l-​Prinċep tad-​dinja”!—Ġwanni 14:30; 1 Ġwanni 5:19.

13. Għala m’huwiex loġiku li taħseb li Alla ma jistax jikkontrolla l-​abbiltà tiegħu li jkun jaf il-​futur? Agħti eżempju.

¹³ It-​tagħlim tal-​predestinazzjoni m’huwiex Skritturali u jimmalafama lil Alla. Din tħawwad dak li jistaʼ jagħmel maʼ dak li fil-​fatt jagħmel. Il-​Bibbja tgħid b’mod ċar li Alla jistaʼ jkun jaf minn qabel x’se jiġri. (Isaija 46:9, 10) Madankollu, m’huwiex loġiku li taħseb li hu ma jistax jikkontrolla l-​abbiltà tiegħu li jkun jaf il-​futur jew li hu responsabbli għal kulma jiġri. Biex nagħtu eżempju: Immaġina li kont b’saħħtek ħafna. Kont int se tħoss li trid terfaʼ kull ħaġa tqila li tara? Dażgur li le! Bl-​istess mod, l-​abbiltà li Alla għandu li jkun jaf il-​futur ma ġġagħlux bilfors ikun jaf minn qabel jew jippredestina kull ħaġa. L-​abbiltà tiegħu li jkun jaf minn qabel x’se jiġri jużaha b’mod selettiv u bil-​għaqal.c Jidher ċar li t-​tagħlim falz, inkluż il-​predestinazzjoni, ma jigglorifikax lil Alla.

14. Ir-​reliġjon organizzata b’liema mod tiddiżonora lil Alla?

¹⁴ It-​tieni mod kif ir-​reliġjon organizzata tiddiżonora lil Alla hu bil-​kondotta tal-​membri tagħha. Il-​Kristjani huma mistennijin li jsegwu t-​tagħlim taʼ Ġesù. Fost affarijiet oħra, Ġesù għallem lis-​segwaċi tiegħu biex ‘iħobbu lil xulxin’ u biex jibqgħu ‘mhux tad-​dinja.’ (Ġwanni 15:12; 17:14-16) Xi ngħidu dwar il-​membri tal-​kleru tal-​Kristjaneżmu? Segwewh verament dan it-​tagħlim?

15. (a) Kif kienet il-​kondotta tal-​kleru fejn jidħlu l-​gwerer tal-​ġnus? (b) Il-​kondotta tal-​kleru x’effett kellha fuq miljuni taʼ nies?

¹⁵ Ikkunsidra l-​kondotta tal-​kleru fejn tidħol il-​gwerra. Huma appoġġaw il-​gwerer tal-​ġnus, għalqu għajnejhom għalihom, u kienu minn taʼ quddiem fihom. Bierku t-​truppi u ġġustifikaw il-​qtil. Ma nistgħux ma nistaqsux, ‘Possibbli dawn il-​membri tal-​kleru qatt m’għaddielhom minn moħħhom li fuq in-​naħa taʼ l-​għadu hemm nies taʼ l-​istess reliġjon tagħhom li qed jagħmlu l-​istess ħaġa?’ (Ara l-​kaxxa “Alla maʼ Min Iżomm?”) Il-​membri tal-​kleru ma jigglorifikawx lil Alla meta jsostnu li għandhom l-​appoġġ tiegħu fil-​gwerer imdemmin; lanqas ma jigglorifikawh meta jgħidu li l-​livelli tal-​Bibbja huma antikwati u jagħlqu għajnejhom għal kull xorta taʼ immoralità sesswali. Kemm ifakkruna fil-​mexxejja reliġjużi li Ġesù sejħilhom ‘dawk li jagħmlu l-​ħażen’ u ‘mexxejja għomja’! (Mattew 7:15-23; 15:14) Il-​kondotta tal-​kleru kienet il-​kaġun li birdet l-​imħabba taʼ miljuni taʼ nies lejn Alla.—Mattew 24:12.

Min Qiegħed Verament Jagħti Glorja lil Alla?

16. Biex inwieġbu l-​mistoqsija dwar min qiegħed verament jagħti glorja lil Alla, għala rridu naraw x’tgħid il-​Bibbja?

¹⁶ Ladarba n-​nies prominenti u influwenti tad-​dinja b’mod ġenerali naqsu li jigglorifikaw lil Alla, allura, min qiegħed verament jagħmel dan? Biex inwieġbu din il-​mistoqsija rridu naraw x’tgħid il-​Bibbja. Wara kollox, Alla għandu d-​dritt li jgħid kif jixtieq jiġi glorifikat, u hu jistabbilixxi l-​livelli fil-​Kelma tiegħu, il-​Bibbja. (Isaija 42:8) Ejja nikkunsidraw tliet modi kif wieħed għandu jigglorifika lil Alla, u f’kull każ inqisu l-​mistoqsija dwar min illum qiegħed verament jagħmel dan.

17. Jehovah innifsu kif indika li l-​igglorifikar taʼ ismu hu aspett vitali tar-​rieda tiegħu, u min illum qed ifaħħar ismu maʼ l-​art kollha?

¹⁷ L-​ewwel, aħna nistgħu nigglorifikaw lil Alla billi nfaħħru ismu. Dak li Jehovah qal lil Ġesù juri ċar kemm dan hu aspett vitali tar-​rieda t’Alla. Ftit jiem qabel ma miet, Ġesù talab: “Missier, agħti glorja lil ismek.” Imbagħad, leħen wieġeb: “Jiena diġà gglorifikajtu, u nerġaʼ nigglorifikah.” (Ġwanni 12:28) Dak li tkellem bla dubju kien Jehovah innifsu. Mill-​mod kif wieġeb, jidher ċar li hu importanti għalih li ismu jiġi glorifikat. Min illum qed jigglorifika lil Jehovah billi jgħarraf ismu u jfaħħru maʼ l-​art kollha? Ix-​Xhieda taʼ Jehovah, u dan qed jagħmluh f’iktar minn 235 pajjiż!—Salm 86:11, 12.

18. Kif nistgħu nagħrfu lil dawk li qed jaduraw lil Alla bil-​“verità,” u liema grupp ilu jgħallem il-​verità tal-​Bibbja għal iktar minn seklu?

¹⁸ It-​tieni, nistgħu nigglorifikaw lil Alla billi ngħallmu l-​verità dwaru. Ġesù qal li l-​aduraturi veri kellhom jaduraw lil Alla bil-​verità. (Ġwanni 4:24) Kif nistgħu nagħrfu lil dawk li qed jaduraw lil Alla bil-​“verità”? Dawn għandhom jiċħdu duttrini li m’humiex ibbażati fuq il-​Bibbja u li jirrappreżentaw ħażin ’l Alla u r-​rieda tiegħu. Minflok, għandhom jgħallmu l-​veritajiet puri tal-​Kelma t’Alla, inkluż dan li ġej: Jehovah hu Alla l-​Iktar Għoli u hu biss jistħoqqlu l-​glorja taʼ din il-​pożizzjoni (Salm 83:19 [83:18, NW]); Ġesù hu l-​Iben t’Alla u l-​Ħakkiem maħtur tas-​Saltna Messjanika t’Alla (1 Korintin 15: 27, 28, NW); is-​Saltna t’Alla se tqaddes isem Jehovah u twettaq l-​iskop tiegħu għall-​art u għall-​bnedmin fuqha (Mattew 6:9, 10); l-​aħbar tajba taʼ din is-​Saltna trid tiġi pridkata maʼ l-​art kollha. (Mattew 24:14) Grupp wieħed biss ilu jgħallem fedelment dawn il-​veritajiet prezzjużi għal iktar minn seklu—ix-​Xhieda taʼ Jehovah!

19, 20. (a) Il-​kondotta tajba taʼ Kristjan għala tistaʼ ġġib glorja lil Alla? (b) Liema mistoqsijiet jistgħu jgħinuna niddeterminaw min illum qed jigglorifika lil Alla bil-​kondotta tajba tiegħu?

¹⁹ It-​tielet, nistgħu nigglorifikaw lil Jehovah billi ngħixu fi qbil mal-​livelli tiegħu. L-​appostlu Pietru kiteb: “Ġibu rwieħkom sewwa qalb il-​pagani biex, jekk huma jgħidu fuqkom bħallikieku kontu nies ħżiena, jaraw sewwa l-​għemil tajjeb tagħkom u jsebbħu ’l Alla meta jasal jum iż-​żjara tiegħu.” (1 Pietru 2:12) Il-​kondotta taʼ Kristjan tirrifletti l-​fidi tiegħu. Meta dawk li josservawh jaraw din il-​konnessjoni—jiġifieri, meta jaraw li l-​kondotta tajba tal-​Kristjan hija r-​riżultat taʼ dak li jemmen—dan iġib glorja lil Alla.

²⁰ Min illum qed jagħti glorja lil Alla billi jżomm kondotta tajba? Liema grupp reliġjuż ġie mfaħħar minn ħafna gvernijiet bħala li hu paċifiku, magħmul minn ċittadini li jobdu l-​liġijiet u jħallsu t-​taxxi? (Rumani 13:1, 3, 6, 7) Liema nies huma magħrufin mad-​dinja kollha għall-​unità maʼ sħabhom taʼ l-​istess twemmin—unità li tegħleb id-​differenzi razzjali, nazzjonali, u etniċi? (Salm 133:1; Atti 10:34, 35) Liema nies huma magħrufin mad-​dinja kollha għax-​xogħol tagħhom taʼ tagħlim mill-​Bibbja li jinkuraġġixxi r-​rispett lejn il-​liġi, il-​valuri tal-​familja, u l-​moralità tal-​Bibbja? Hemm biss grupp wieħed taʼ nies li l-​kondotta tajba tagħhom f’dawn l-​aspetti u f’aspetti oħra turi x’inhuma—ix-​Xhieda taʼ Jehovah!

Qiegħed Int Tagħti Glorja lil Alla?

21. Għala għandna nqisu jekk aħniex personalment nagħtu glorja lil Jehovah?

²¹ Kull wieħed minna jagħmel tajjeb li jistaqsi, ‘Qiegħed jien personalment nagħti glorja lil Jehovah?’ Skond Salm 148, il-​biċċa l-​kbira mill-​ħolqien jagħti glorja lil Alla. L-​anġli, is-​smewwiet fiżiċi, l-​art u l-​annimali li jgħixu fuqha—ilkoll kemm huma jfaħħru lil Jehovah. (Versi 1-10) X’ħasra li ħafna mill-​bnedmin illum ma jfaħħruhx! Meta tgħix b’mod li jġib glorja lil Alla, int tkun qiegħed f’armonija mal-​bqija tal-​ħolqien li qed ifaħħar lil Jehovah. (Versi 11-13) M’hemmx mod aħjar kif tuża ħajtek.

22. Meta tagħti glorja lil Jehovah, b’liema modi tiġi mbierek, u x’għandek tkun determinat li tagħmel?

²² Meta tagħti glorja lil Jehovah tiġi mbierek b’ħafna modi. Hekk kif teżerċita fidi fis-​sagrifiċċju taʼ fidwa taʼ Kristu, int titħabbeb mill-​ġdid m’Alla u tgawdi relazzjoni paċifika u premjanti maʼ Missierek tas-​sema. (Rumani 5:10) Hekk kif tfittex raġunijiet biex tagħti glorja lil Alla ssir iktar pożittiv u grat. (Ġeremija 31:12) Imbagħad tkun f’qagħda li tistaʼ tgħin lil oħrajn jgħixu ħajja hienja u bi skop, u b’hekk int innifsek tkun iktar hieni. (Atti 20:35) Jalla tkun fost dawk li huma determinati li jagħtu glorja lil Alla—issa u għal dejjem!

[Noti taʼ taħt]

Tiftakar Int?

• Għala nistgħu ngħidu li x-​xjenzati b’mod ġenerali m’għenux lin-​nies jigglorifikaw lil Alla?

• Ir-​reliġjon organizzata b’liema żewġ modi ma ħallietx lin-​nies jagħtu glorja lil Alla?

• B’liema modi nistgħu aħna nigglorifikaw lil Alla?

• Għala għandek tikkunsidra jekk intix personalment tagħti glorja lil Jehovah?

[Kaxxa f’paġna 12]

“Alla maʼ Min Iżomm?”

Raġel li kien fil-​Forza taʼ l-​Ajru Ġermaniża matul it-​Tieni Gwerra Dinjija u li iktar tard sar wieħed mix-​Xhieda taʼ Jehovah jiftakar:

“Dak li kien jagħtini fastidju matul dawk is-​snin tal-​gwerra . . . kien li nara lill-​membri tal-​kleru tistaʼ tgħid taʼ kull reliġjon—Kattoliċi, Luterani, Episkopali, u oħrajn—ibierku l-​ajruplani u l-​ekwipaġġi tagħhom qabel ma dawn kienu jitilqu fuq missjonijiet biex jitfgħu t-​tagħbija qerridija tagħhom. Spiss kont naħseb, ‘Alla maʼ min iżomm?’

“Is-​suldati Ġermaniżi kienu jilbsu ċinturin b’bokkla li fuqha kien hemm imnaqqax il-​kliem Gott mit uns (Alla hu magħna). Imma jien kont ngħid, ‘Alla għala m’huwiex mas-​suldati taʼ l-​għadu li huma taʼ l-​istess reliġjon u li qed jitolbu lill-​istess Alla?’”

[Stampa f’paġna 10]

Maʼ l-​art kollha, ix-​Xhieda taʼ Jehovah qegħdin verament jagħtu glorja lil Alla