Jum il-Gradwazzjoni—Jum mill-Isbaħ
“AĦNA ġejna mberkin b’jum mill-isbaħ. Ix-xemx qed tiddi. Is-sema ikħal. Il-ħaxix aħdar. L-għasafar qed jgħannu. Kollox juri li se jkun jum sabiħ, u m’aħniex se noħorġu diżappuntati. Ġeħova m’huwiex Alla li jiddiżappuntana. Hu Alla taʼ barkiet.”
B’dawn ir-rimarki, Ħuna Samuel Herd, membru tal-Ġemgħa li Tiggverna tax-Xhieda taʼ Ġeħova, beda l-programm tal-gradwazzjoni tal-117-il klassi taʼ l-Iskola taʼ Gilgħad (Watchtower Bible School of Gilead). Dan ġara fil-11 taʼ Settembru, 2004. Il-programm mill-aqwa kien jinkludi pariri li jibnu bbażati fuq il-Bibbja kif ukoll esperjenzi lokali u oħrajn minn diversi missjunarji taʼ l-esperjenza. Iva, kien jum mill-isbaħ għas-6,974 ruħ preżenti fiċ-Ċentru Edukattiv tal-Watchtower f’Patterson, New York, u fi blokkijiet fi Brooklyn u Walkill, li kienu kollegati maʼ xulxin permezz taʼ l-awdjo u l-vidjo.
Kliem Inkuraġġanti għall-Istudenti
John Kikot, li hu membru tal-Kumitat tal-Fergħa fl-Istati Uniti, offra kliem inkuraġġanti fuq it-tema “Żomm il-Ferħ Bħala Missjunarju.” Hu wera li l-istudenti taʼ Gilgħad huma magħrufin għall-ferħ tagħhom, kif kien jidher sew f’din il-gradwazzjoni. L-istruzzjoni mill-Iskrittura matul il-perijodu taʼ l-iskola ġabet ferħ lill-istudenti, u huma issa kienu mħarrġin biex jgħinu lil oħrajn jesperjenzaw ferħ simili. Kif? Billi jagħtu minnhom infushom fil-ministeru tagħhom bħala missjunarji. Ġesù qal: “Hemm iktar hena meta tagħti milli meta tirċievi.” (Atti 20:35) Hekk kif il-missjunarji l-ġodda jimitaw lil Alla Ġeħova, “l-Alla l-hieni” u ġeneruż li jipprovdi l-verità lil oħrajn, huma se jkunu kapaċi jżommu l-ferħ tagħhom stess.—1 Timotju 1:11.
Imbagħad kien imiss lil membru ieħor tal-Ġemgħa li Tiggverna, David Splane, li kellu t-tema “Kif Se Tmur fl-Inkarigu Ġdid Tiegħek?” M’hemm ebda dubju li hu tajjeb u pjaċevoli li tgħix f’unità, għalkemm dan għandu mnejn jirrikjedi li ssir “kollox għal nies taʼ kull xorta.” (1 Korintin 9:22; Salm 133:1) Ħuna Splane semma li l-istudenti li ggradwaw kienu se jiltaqgħu maʼ ħafna wħud oħra fix-xogħol missjunarju—nies fit-territorju, missjunarji sħabhom, aħwa rġiel u nisa fil-kongregazzjoni l-ġdida tagħhom, u l-aħwa fl-uffiċċju tal-fergħa li jkunu qed jidderieġu x-xogħol taʼ l-ippridkar u tat-tagħlim. Hu pprovda suġġerimenti prattiċi dwar kif jagħmlu r-relazzjonijiet tagħhom man-nies kemm jistaʼ jkun pjaċevoli: Tgħallmu l-lingwa tal-post, agħtu kas id-drawwiet lokali, irrispettaw il-privatezza tal-missjunarji sħabkom, u kunu ubbidjenti lejn dawk li jmexxu.—Ebrej 13:17.
Imbagħad kien imiss lill-għalliem taʼ Gilgħad, Lawrence Bowen li staqsa, “Intom X’Taħsbu?” Hu fakkar lill-istudenti li dawk li ‘ġġudikaw fuq dak li kien jidher minn barra’ m’aċċettawx lil Ġesù bħala l-Messija. (Ġwanni 7:24) Bħala bnedmin imperfetti, ilkoll għandna bżonn noqogħdu għassa li ma ‘naħsbux il-ħsibijiet tal-bnedmin’ minflok “il-ħsibijiet t’Alla.” (Mattew 16:22, 23) Anki nies spiritwali jeħtieġ li jkomplu jaġġustaw il-ħsibijiet tagħhom. Bħal vapur li qed ibaħħar, l-aġġustamenti li nagħmlu issa jistgħu jew jgħinuna nilħqu l-mira jew inkella jkollna nawfraġju spiritwali. Studju kontinwu tal-Bibbja fil-kuntest tagħha jgħinna naħsbu “l-ħsibijiet t’Alla.”
Wallace Liverance, għalliem ieħor fl-Iskola taʼ Gilgħad, ikkonkluda din il-parti tal-programm. It-tema tiegħu, ibbażata fuq Isaija 55:1, kienet “Int X’Se Tixtri?” Hu inkuraġġixxa lill-istudenti biex ‘jixtru’ s-serħan, il-ferħ, u n-nutriment li jiġu mill-messaġġ profetiku li Alla għandu għal żmienna. Il-profezija taʼ Isaija xebbhet din il-kelma t’Alla maʼ ilma, inbid, u ħalib. Kif setgħet tinxtara ‘b’xejn u bla ħlas’? Ħuna Liverance spjega li wieħed jistaʼ jagħmel dan billi joqgħod attent għall-profezija tal-Bibbja u jibdel il-ħsibijiet u mogħdijiet li m’humiex spiritwali mal-ħsibijiet u l-mogħdijiet t’Alla. (Isaija 55:2, 3, 6, 7) Billi jagħmlu dan, il-missjunarji l-ġodda jistgħu jsostnu ruħhom fl-inkarigi barranin tagħhom. Bnedmin imperfetti spiss jaħsbu li l-hena jiddependi milli jistinkaw għall-kumdità materjali. “Tiblax kulma jgħidu,” ħeġġeġ il-kelliemi. “Taqbilx maʼ dak il-mod taʼ ħsieb. Kun ċert li twarrab il-ħin għal studju profond tal-Kelma profetika t’Alla. Dan jistaʼ jserrħek, isaħħek, u jferrħek fl-inkarigu missjunarju tiegħek.”
Esperjenzi u Intervisti Sbieħ mill-Istudenti
L-istudenti kellhom sehem regulari fl-attività taʼ l-ippridkar. Mark Noumair, għalliem ieħor taʼ Gilgħad, mexxa diskussjoni li matulha diversi membri taʼ din il-klassi rrakkontaw esperjenzi li enfasizzaw it-tema “Ma Nistħix Minħabba l-Aħbar Tajba.” (Rumani 1:16) Dawk fl-udjenza ħadu gost jisimgħu kif dawn il-ministri taʼ l-esperjenza taw xiehda minn dar għal dar, fit-toroq, u f’ċentri fejn hemm ħafna ħwienet. Studenti li kienu jafu lingwi oħra ħadu l-inizjattiva fit-territorju tal-kongregazzjoni tagħhom biex jilħqu lin-nies li kienu jitkellmu b’lingwi barranin. Oħrajn għamlu użu tajjeb mill-pubblikazzjonijiet ibbażati fuq il-Bibbja provduti mix-Xhieda taʼ Ġeħova, u dawn użawhom fi żjajjar lura u meta bdew studji tal-Bibbja fid-djar. Ma ‘stħawx’ jippridkaw l-aħbar tajba.
Ħuna William Nonkes, li hu inkarigat mid-Dipartiment tas-Servizz, intervista lil xi missjunarji taʼ l-esperjenza minn Burkina Faso, il-Latvja, u r-Russja. Huma taw pariri prattiċi li kienu jiffokaw fuq it-tema “Ġeħova Jippremja lil Uħud Leali.” Wieħed mill-aħwa li ġie intervistat inkuraġġixxa lill-istudenti biex jiftakru fl-armata taʼ Gidgħon taʼ 300 suldat. Kull suldat kellu inkarigu li kkontribwixxa għas-suċċess tal-kampanja taʼ Gidgħon. (Mħallfin 7:19-21) Bl-istess mod, il-missjunarji li jibqgħu fl-inkarigi tagħhom jiġu premjati.
“Siru Kollox għal Nies taʼ Kull Xorta” kienet it-tema li ġiet enfasizzata fl-intervisti li għamel Samuel Roberson, li hu wieħed mill-għalliema f’Patterson. Hu intervista erbaʼ membri tal-Kumitat tal-Fergħa mis-Senegal, il-Gwam, il-Liberja, u l-Madagaskar. Hemm total taʼ 170 missjunarju jaqdu f’dawn il-pajjiżi. Mill-kummenti, l-istudenti li ggradwaw tgħallmu kif il-Kumitati tal-Fergħat jgħinu lill-missjunarji l-ġodda jaddattaw ruħhom għall-inkarigi tagħhom. Dan spiss ikun ifisser li jitgħallmu drawwiet li għandhom mnejn jidhru strambi għal dawk li jkunu ġejjin mill-pajjiżi tal-Punent. Per eżempju, f’xi pajjiżi hu komuni ħafna li tara xi rġiel li jkunu ħbieb, inkluż dawk fil-kongregazzjoni Kristjana, jimxu id f’id. F’xi postijiet li jaqgħu taħt il-fergħa tal-Gwam, jiġi servut ikel stramb. Imma oħrajn irnexxielhom jaddattaw ruħhom, u anki l-missjunarji l-ġodda jistgħu jagħmlu hekk.
Guy Pierce, membru tal-Ġemgħa li Tiggverna, żviluppa s-suġġett “Ibqgħu Leali Lejn ‘is-Saltna tal-Mulej Tagħna.’” Hu fakkar lil dawk fl-udjenza: “Ġeħova ħalaq bi skop. Hu kellu xi ħaġa f’moħħu għall-ħolqien tiegħu. L-iskop tiegħu għal dan il-globu ma tbiddilx. Miexi b’suċċess lejn it-twettiq tiegħu. Xejn ma jistaʼ jbiddel dan.” (Ġenesi 1:28) Ħuna Pierce inkuraġġixxa lil kulħadd biex jissottometti ruħu lealment lejn is-sovranità t’Alla minkejja d-diffikultajiet li qamu minħabba d-dnub taʼ l-ewwel bniedem, Adam. “Qed ngħixu fis-siegħa tal-ġudizzju. Ftit li xejn baqaʼ żmien biex nilħqu lil dawk taʼ qalb onesta u ngħinuhom isiru jafu l-verità. Użaw il-ħin tajjeb biex tilħqu lil oħrajn bl-aħbar tajba tas-Saltna,” ħeġġeġ Ħuna Pierce. Dawk li lealment jappoġġaw is-Saltna t’Alla jistgħu jistrieħu fuqu għall-għajnuna.—Salm 18:26 (18:25, NW).
Fil-parti taʼ l-għeluq, iċ-chairman qara t-tislijiet u x-xewqat sbieħ li kienu waslu mill-fergħat taʼ madwar id-dinja. Imbagħad hu ppreżenta d-diplomi lill-istudenti li ggradwaw, u wara, wieħed mill-istudenti qara ittra għan-nom tal-klassi kollha li esprimiet l-apprezzament mill-qalb għat-taħriġ li ngħataw. Kienet konklużjoni xierqa għal jum mill-isbaħ li dawk kollha li attendew żgur se jibqgħu jiftakruh.
[Kaxxa f’paġna 23]
STATISTIKI TAL-KLASSI
Numru taʼ pajjiżi rappreżentati: 11
Numru taʼ pajjiżi li ġew assenjati fihom: 22
Numru taʼ studenti: 48
Età medja: 34.8
Medja taʼ snin fil-verità: 18.3
Medja taʼ snin fil-ministeru full-time: 13.4
[Stampa f’paġna 24]
Il-117-il Klassi li Gradwat mill-Iskola taʼ Gilgħad
Fil-lista t’hawn taħt, ir-ringieli huma nnumerati minn quddiem għal wara, u l-ismijiet f’kull ringiela huma mniżżlin mix-xellug għal-lemin.
(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R .(5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.