L-​Ippridkar taʼ Sawl Iqajjem l-​Oppożizzjoni

IL-​LHUD f’Damasku ma setgħux jifhmu. Kif setaʼ difensur ferventi tat-​twemmin tradizzjonali jsir apostat? Sawl kien magħruf bħala raġel li kien jifni lil dawk li kienu jsejħu isem Ġesù f’Ġerusalemm. Hu ġie Damasku biex jippersegwita lid-​dixxipli f’dan il-​post. Imma issa hu stess kien qed jippriedka li dak l-​istess kriminal mibgħud li ssammar fuq zokk bħala wieħed dagħaj kien il-​Messija! Mela Sawl iġġennen?—Atti 9:​1, 2, 20-22.

Forsi kien hemm spjegazzjoni. Oħrajn li vvjaġġaw fl-​istess grupp taʼ Sawl minn Ġerusalemm setgħu tkellmu dwar dak li kien seħħ fi triqithom. Hekk kif qorbu lejn Damasku, f’daqqa waħda dawl qawwi xegħel madwarhom, u lkoll waqgħu maʼ l-​art. Kien hemm ukoll il-​ħoss taʼ leħen. Ħadd ma weġġaʼ ħlief Sawl. Hu kien mixħut fit-​triq. Meta finalment qam bil-​wieqfa, oħrajn li kienu qed jivvjaġġaw miegħu kellhom imexxuh lejn Damasku, għax ma setaʼ jara xejn.—Atti 9:​3-8; 26:​13, 14.

Għadu taʼ Ġesù Jibda Jippriedka Dwaru

Xi ġralu Sawl fi triqtu lejn Damasku? Jistaʼ jkun li l-​vjaġġ twil jew is-​sħana taʼ nofsinhar kiddewh u għamewh? Peress li x-​xettiċi moderni huma determinati li jsibu spjegazzjoni naturali, dawn jimmaġinaw xenarji taʼ delirju, alluċinazzjonijiet, u kriżi psikoloġika drastika li kienet imqanqla mill-​kuxjenza ħatja taʼ Sawl, xi eżawriment nervuż, u jaħsbu li probabbilment kien ibati mill-​epilessija.

Fir-realtà, Ġesù Kristu deher lil Sawl f’dan id-​dawl qawwi li għamieh, u kkonvinċieh li Hu kien il-​Messija. Xi tpinġijiet artistiċi taʼ dan l-​episodju juru lil Sawl jaqaʼ minn fuq żiemel. Għalkemm dan jistaʼ jkun, il-​Bibbja sempliċement tgħid li hu ‘waqgħa fl-​art.’ (Atti 22:​6-11) Kienet kif kienet il-​waqgħa li esperjenza Sawl ma kinitx tabilħaqq kbira daqs il-​waqgħa mill-​pożizzjoni kburija li kellu. Issa hu kellu jagħraf li dak li kienu qed jippridkaw is-​segwaċi taʼ Ġesù kien minnu. L-​unika għażla li kellu Sawl kienet li jingħaqad magħhom. Minn għadu ġelliedi kontra l-​messaġġ taʼ Ġesù, Sawl sar wieħed mill-​iktar predikaturi żelużi dwaru. Wara li reġaʼ kiseb id-​dawl u tgħammed, “Sawl baqaʼ jiżdied fil-​qawwa u, bil-​loġika li kien juża biex juri li dan hu l-​Kristu, kien ibellah lil-​Lhud li kienu joqogħdu Damasku.”—Atti 9:22.

Il-​Pjan biex Joqtluh Ifalli

Fejn mar Sawl, li iktar tard issejjaħ Pawlu, wara l-​konverżjoni tiegħu? Meta kien qed jikteb lill-​Galatin, hu qal: “Tlaqt lejn l-​Għarabja, u rġajt lura lejn Damasku.” (Galatin 1:17) It-​terminu “Għarabja” jistaʼ jfisser vjaġġ fi kwalunkwe parti tal-​Peniżola Għarbija. Xi studjużi jissuġġerixxu li Pawlu għandu mnejn mar fid-​Deżert Sirjan jew xi mkien ieħor fis-​Saltna taʼ Nabatin tas-​sultan Areta IV. X’aktarx li Sawl wara l-​magħmudija tiegħu mar f’post għall-​kwiet biex jimmedita, l-​istess bħalma Ġesù mar fid-​deżert wara li tgħammed.—Luqa 4:1.

Meta Sawl irritorna lejn Damasku, “il-​Lhud ftiehmu bejniethom biex jeħilsu minnu.” (Atti 9:23) Il-​gvernatur li kien jaqdi bħala r-​rappreżentant tas-​Sultan Areta f’Damasku kien qed jgħasses il-​belt sabiex jaqbad lil Sawl. (2 Korintin 11:32) Imma waqt li l-​għedewwa ppjanaw li joqtlu lil Sawl, id-​dixxipli taʼ Ġesù ppjanaw kif se jħarrbuh.

Fost dawk li għenu lil Sawl biex jaħrab kien hemm Ananija u d-​dixxipli li l-​appostlu kien gawda l-​kumpanija tagħhom eżatt wara li kkonverta.a (Atti 9:​17-​19) Jistaʼ jkun ukoll li Sawl ngħata l-​għajnuna mingħand dawk li saru jemmnu minħabba l-​ippridkar tiegħu f’Damasku, għaliex Atti 9:25 jgħid: “Id-​dixxipli tiegħu ħaduh u bil-​lejl niżżluh f’qoffa minn ġo fetħa fis-​sur.” L-​espressjoni “d-​dixxipli tiegħu” tistaʼ tfisser dawk li għallimhom Sawl. Hu x’inhu l-​każ, is-​suċċess li kellu fil-​ministeru probabbilment qanqal iżjed il-​mibegħda li kien hemm diġà għalih.

Tagħlima Għalina

Meta neżaminaw ftit mill-​ġrajjiet li seħħew fiż-​żmien tal-​konverżjoni u lmagħmudija taʼ Sawl, naraw ċar li hu ma kienx jinkwieta żżejjed dwar kif kien jiġġudikah ħaddieħor; lanqas ma qataʼ qalbu minħabba l-​oppożizzjoni ħarxa. L-​iktar ħaġa importanti għal Sawl kienet l-​inkarigu taʼ l-​ippridkar li ngħata.—Atti 22:​14, 15.

Int wieħed minn dawk li dan l-​aħħar sirt konvint dwar l-​importanza taʼ lippridkar taʼ l-​aħbar tajba? Jekk inhu hekk, żgur li taf li l-​Kristjani veri kollha jridu jkunu predikaturi tas-​Saltna. M’għandikx tissorprendi ruħek jekk il-​ministeru tiegħek kultant iqanqal reazzjoni taʼ mibegħda. (Mattew 24:9; Luqa 21:12; 1 Pietru 2:​20) Sawl kien eżemplari fil-​mod kif wieġeb għall-​oppożizzjoni. Il-​Kristjani li jissaportu fil-​provi mingħajr ma jaqtgħu qalbhom se jkollhom il-​favur t’Alla. Ġesù qal lid-​dixxipli tiegħu: “Tkunu mibgħudin minn kulħadd minħabba ismi.” Madankollu, hu żgurahom: “Bis-​sabar tagħkom tiksbu ruħkom.”—Luqa 21:​17-19.

[Nota taʼ taħt]

[Stampa f’paġna 28]

Sawl ‘waqgħa fl-​art’ meta deherlu Ġesù

[Stampa f’paġna 29]

Sawl ħarab minn Damasku fejn kien tħejja pjan biex joqtluh