It-​Tama taʼ l-​Irxoxt​—Xi Tfisser Għalik?

“Int tiftaħ idek, u taqtaʼ x-​xewqa taʼ kull maħluq.”—SALM 145:​16, KŻ.

1-3. X’tama għandhom xi wħud għall-​futur? Agħti eżempju.

CHRISTOPHER, li kellu disaʼ snin, u ħuh kienu qattgħu n-​nofs taʼ nhar taʼ fil-​għodu maʼ zijuhom, zithom, u ż-​żewġ kuġini tagħhom fil-​ministeru Kristjan, iżuru n-​nies minn dar għal dar viċin Manchester, l-​Ingilterra. Ir-​rivista Awake! spjegat x’ġara. “Wara nofsinhar irħewlha flimkien lejn Blackpool, post ħdejn il-​baħar, sabiex iżuru xi postijiet taʼ interess hemmhekk. Huma s-​6 kienu fost it-​12-il persuna li tilfu ħajjithom ħesrem f’ħabta li seħħet fi triq prinċipali u li l-​pulizija ddeskrivewha bħala straġi sħiħa.”

² Fil-​lejl taʼ qabel it-​traġedja, il-​familja kienet attendiet l-​Istudju tal-​Ktieb tal-​Kongregazzjoni, fejn kien ġie diskuss is-​suġġett tal-​mewt. “Christopher minn dejjem kien tifel li jaħseb ħafna,” irrakkonta missieru. “Dak il-​lejl, hu tkellem ċar dwar dinja ġdida u t-​tama tiegħu għall-​futur. Imbagħad, hekk kif komplejna nitkellmu, Christopher f’daqqa waħda qal: ‘Il-​benefiċċju taʼ li tkun wieħed mix-​Xhieda taʼ Ġeħova hu li għalkemm il-​mewt hija taʼ wġigħ, nafu li xi darba għad nerġgħu naraw lil xulxin fuq l-​art.’ Ħadd minna li konna hemmhekk ma qatt basar kemm konna se nibqgħu niftakruh dak il-​kliem.”a

³ Snin qabel, fl-​1940, Xhud mill-​Awstrija jismu Franz kien jaf li kien se jiġi maqtul bil-​giljottina minħabba l-​lealtà tiegħu lejn Ġeħova. Franz kiteb lil ommu mill-​post fejn kien miżmum f’Berlin: “Skond kif naf jien, kieku ħadt il-​ġurament [militari], kont inkun għamilt dnub li jistħoqqlu l-​mewt. Din kienet tkun xi ħaġa mill-​agħar għalija. Ma kien ikolli ebda rxoxt. . . . U issa, għeżież ommi u ħuti, illum qaluli s-​sentenza tiegħi, u tiħdux qatgħa, hija għall-​mewt, u se joqtluni għada fil-​għodu. Inħoss li Alla se jsaħħaħni, bħalma għamel mal-​Kristjani veri kollha fil-​passat. . . . Jekk iżżommu sodi sal-​mewt, nerġgħu niltaqgħu fl-​irxoxt. . . . Sakemm nerġgħu niltaqgħu.”b

4. Liema effett għandhom fuqek l-​esperjenzi rakkontati hawnhekk, u x’se nikkunsidraw issa?

⁴ It-​tama taʼ l-​irxoxt kienet tfisser ħafna kemm għal Christopher kif ukoll għal Franz. Kienet reali għalihom. Ċertament li dawn ir-​rakkonti jmissulna qalbna! Sabiex napprezzaw iktar lil Ġeħova u nsaħħu t-​tama tagħna fl-​irxoxt, ejja nikkunsidraw għala se jkun hemm l-​irxoxt u kif dan għandu jeffettwana personalment.

Viżjoni Kif Se Jkun l-​Irxoxt fuq l-​Art

5, 6. X’tirrivelalna l-​viżjoni miktuba mill-​appostlu Ġwanni f’Rivelazzjoni 20:​12, 13?

⁵ F’viżjoni dwar il-​ġrajjiet li se jseħħu matul ir-​Renju Millennjali taʼ Kristu Ġesù, l-​appostlu Ġwanni ra l-​irxoxt iseħħ fuq l-​art. “Rajt il-​mejtin, il-​kbar u ż-​żgħar,” kiteb hu. “U l-​baħar radd il-​mejtin li kienu fih, u lmewt u Ħades raddew il-​mejtin li kienu fihom, u ġew ġudikati individwalment skond l-​għemejjel tagħhom.” (Rivelazzjoni 20:12, 13) Huma taʼ liema klassi jew pożizzjoni huma—sew jekk “kbar” u sew jekk “żgħar”—kulmin hu miżmum f’Ħades (Xeol), il-​qabar komuni taʼ l-​umanità, se jiġi meħlus. Dawk li tilfu ħajjithom fuq il-​baħar ukoll se jerġgħu lura għall-​ħajja f’dak iż-​żmien. Din il-​ġrajja meraviljuża hija parti mill-​iskop taʼ Ġeħova.

⁶ Ir-​renju t’elf sena taʼ Kristu jibda bl-​irbit taʼ Satana u t-​tfigħ tiegħu fl-​abbiss. Matul dan ir-​renju, Satana se jkun inattiv u mhux se jkun jistaʼ jqarraq b’dawk li jiġu rxoxtati jew b’dawk li jibqgħu ħajjin fit-​tribulazzjoni l-​kbira. (Rivelazzjoni 20:​1-​3) Forsi għalik elf sena jidhru żmien twil, imma fil-​fatt għal Ġeħova huma “jum wieħed.”​—2 Pietru 3:​8.

7. X’se tkun il-​bażi għall-​ġudizzju matul ir-​Renju Millennjali taʼ Kristu?

⁷ Skond il-​viżjoni, ir-​Renju Millennjali taʼ Kristu se jkun żmien taʼ ġudizzju. L-​appostlu Ġwanni kiteb: “Rajt il-​mejtin, il-​kbar u ż-​żgħar, weqfin quddiem it-​tron, u nfetħu r-​rombli. U nfetaħ romblu ieħor, ir-​romblu tal-​ħajja. U l-​mejtin ġew ġudikati fuq dak li kien miktub fir-​rombli skond l-​għemejjel tagħhom. . . . U ġew ġudikati individwalment skond l-​għemejjel tagħhom.” (Rivelazzjoni 20:​12, 13) Innota li l-​bażi għal dan l-​iġġudikar m’hijiex x’għamel jew x’m’għamilx l-​individwu qabel ma miet. (Rumani 6:​7) Minflok, għandha x’taqsam maʼ “rombli” li għad iridu jinfetħu. L-​għemejjel li jagħmel l-​individwu wara li jsir jaf x’hemm fir-​rombli se jifformaw il-​bażi biex jiġi determinat jekk ismu jkunx miktub fir-​“romblu tal-​ħajja.”

“Irxoxt taʼ Ħajja” jew “Irxoxt taʼ Ġudizzju”

8. Liema żewġ possibbiltajiet għandhom dawk li jiġu rxoxtati?

⁸ Ftit qabel, fil-​viżjoni taʼ Ġwanni, Ġesù ġie deskritt bħala li għandu “l-​imfietaħ tal-​mewt u taʼ Ħades.” (Rivelazzjoni 1:​18) Hu jaqdi bħala l-​“Aġent Ewlieni tal-​ħajja” taʼ Ġeħova u ngħata l-​qawwa biex jiġġudika “l-​ħajjin u l-​mejtin.” (Atti 3:​15; 2 Timotju 4:​1) Kif se jagħmlu dan? Billi jirxoxta lil dawk li huma reqdin fil-​mewt. “Tistagħġbux b’dan,” qal Ġesù lill-​folol li kien qed jippridkalhom, “għax ġejja s-​siegħa li fiha dawk kollha li qegħdin fl-​oqbra tat-​tifkira jisimgħu leħnu u joħorġu.” Imbagħad żied: “Dawk li għamlu t-​tajjeb għal irxoxt taʼ ħajja, dawk li pprattikaw affarijiet vili għal irxoxt taʼ ġudizzju.” (Ġwanni 5:​28-​30) Għaldaqstant, x’futur hemm jistenniehom lill-​irġiel u n-​nisa leali tal-​passat?

9. (a) Meta jiġu lura fl-​irxoxt, ħafna x’se jsiru jafu bla dubju? (b) Liema xogħol vast u edukattiv se jsir?

⁹ Meta dawn l-​uħud leali tal-​passat jerġgħu lura fl-​irxoxt, huma ma jdumux ma jiskopru li l-​wegħdi li kienu poġġew il-​fiduċja tagħhom fihom issa huma realtà. Kemm se jkunu interessati li jitgħallmu dwar l-​identità tan-​Nisel tal-​mara t’Alla, li ssemma fl-​ewwel profezija tal-​Bibbja, f’Ġenesi 3:​15! Kemm se jithennew meta jisimgħu li dan il-​Messija mwiegħed, Ġesù, wera l-​fedeltà tiegħu sal-​mewt, u b’hekk ta ħajtu bħala sagrifiċċju taʼ fidwa! (Mattew 20:​28) Dawk li jilqgħuhom lura għall-​ħajja se jkunu ferħanin ħafna li jgħinuhom jifhmu li dan il-​provvediment tal-​fidwa huwa espressjoni tal-​ħniena u lqalb tajba mhix mistħoqqa taʼ Ġeħova. Meta l-​irxoxtati jiskopru x’inhi tagħmel is-​Saltna t’Alla biex twettaq l-​iskop taʼ Ġeħova għall-​art, bla dubju qalbhom se tfur b’espressjonijiet taʼ tifħir lil Ġeħova. Se jkollhom ħafna opportunitajiet biex juru l-​lealtà tagħhom lejn Missierhom tas-​sema kollu mħabba u lejn Ibnu. Kulmin ikun qed jgħix f’dak iż-​żmien se jieħu gost jipparteċipa fix-​xogħol vast u edukattiv li hu meħtieġ biex jiġu mgħallmin il-​biljuni li jerġgħu lura mill-​qabar u li jkollhom bżonn ukoll li jaċċettaw il-​provvediment t’Alla għall-​fidwa.

10, 11. (a) Il-Millennju liema opportunitajiet se joffri lin-​nies kollha taʼ l-​art? (b) Dan kif għandu jeffettwana?

¹⁰ Meta jiġi rxoxtat, Abraham se jsib faraġ kbir meta jesperjenza r-​realtà tal-​ħajja taħt il-​ħakma taʼ dik il-​“belt” li tant ħares ’il quddiem għaliha. (Ebrej 11:​10) Kemm se jifraħ il-​leali Ġob meta jsir jaf li l-​mod kif għex ħajtu saħħaħ lil qaddejja oħrajn taʼ Ġeħova li l-​integrità tagħhom għaddiet minn provi! U kemm se jkun ħerqan Danjel biex ikun jaf dwar it-​twettiq tal-​profeziji li ġie mnebbaħ biex jikteb!

¹¹ Tabilħaqq, kulmin se jikseb il-​ħajja fid-​dinja ġdida u ġusta, kemm jekk bl-​irxoxt u kemm jekk għax jibqaʼ ħaj fit-​tribulazzjoni l-​kbira, se jkollu ħafna x’jitgħallem dwar l-​iskop taʼ Ġeħova għall-​art u għall-​abitanti tagħha. Il-​prospett li ngħixu għal dejjem u nfaħħru lil Ġeħova għall-​eternità kollha żgur li se jagħmel il-​programm edukattiv tal-​Millennju għaxqa taʼ veru. Madankollu, l-​iktar li jgħodd se jkun dak li nagħmlu individwalment hekk kif nitgħallmu x’hemm fir-​rombli. Se napplikaw dak li nitgħallmu? Se ndaħħlu f’qalbna u nimmeditaw fuq l-​informazzjoni vitali li se ssaħħaħna biex nirreżistu l-​attentat finali taʼ Satana biex idawwarna ’l hemm mill-​verità?

12. X’se jgħin lil kull individwu biex jieħu sehem bis-​sħiħ fix-​xogħol edukattiv kif ukoll fit-​trasformazzjoni taʼ l-​art f’ġenna?

¹² Ma rridux ninsew il-​barkiet meraviljużi li se jiġu meta nkunu nistgħu ngawdu l-​benefiċċji tas-​sagrifiċċju taʼ fidwa li għamel Kristu. Dawk li jerġgħu jingħataw il-​ħajja fl-​irxoxt mhux se jkollhom id-​dgħjufijiet u d-​diżabilitajiet li qed jesperjenzaw bħalissa. (Isaija 33:24) Ġisem f’saħħtu u l-​prospett taʼ saħħa perfetta se jippermettu lill-​abitanti kollha tad-​dinja l-​ġdida biex jieħdu sehem bis-​sħiħ fix-​xogħol edukattiv taʼ li jgħallmu t-​triq għall-​ħajja lill-​biljuni li jiġu rxoxtati. Dawn l-​abitanti se jieħdu sehem ukoll fl-​akbar xogħol li qatt kien hawn fuq l-​art​—dak li jittrasformaw il-​pjaneta kollha f’ġenna taʼ l-​art għat-​tifħir taʼ Ġeħova.

13, 14. X’inhu l-​iskop li Satana jinħeles għall-​aħħar test, u liema riżultat jistaʼ jkollna individwalment?

¹³ Meta Satana jiġi meħlus mill-​abbiss għall-​aħħar test, hu se jipprova jqarraq bil-​bnedmin għal darb’oħra. Skond Rivelazzjoni 20:​7-9, ‘il-​ġnus imqarrqin’ jew il-​gruppi taʼ nies kollha li jaqgħu taħt l-​influwenza mill-​agħar taʼ Satana se jiġu kundannati għall-​qerda: ‘Jinżel nar mis-​sema u jiblagħhom.’ Għal dawk fosthom li jkunu diġà ġew irxoxtati fil-​Millennju, din il-​qerda tagħmel l-​irxoxt tagħhom wieħed taʼ kundanna. B’kuntrast, dawk l-​uħud irxoxtati li jżommu l-​integrità tagħhom jirċievu r-​rigal taʼ ħajja taʼ dejjem. L-​irxoxt tagħhom ikun verament “irxoxt taʼ ħajja.”​—Ġwanni 5:​29.

¹⁴ It-​tama taʼ l-​irxoxt kif tistaʼ tfarraġna saħansitra issa? U iktar importanti, xi rridu nagħmlu biex inkunu żguri li fil-​futur nirċievu l-​benefiċċji li joffri?

Lezzjonijiet X’Nitgħallmu Issa

15. It-​twemmin fl-​irxoxt kif jistaʼ jgħinna issa stess?

¹⁵ Għandu mnejn li dan l-​aħħar tlift lil xi ħadd li tħobb fil-​mewt u forsi qed tipprova tkampa mal-​bidla kbira li ġġib magħha din it-​telfa kbira. It-​tama taʼ l-​irxoxt tgħinek tikseb saħħa u kalma ġewwinija li oħrajn li ma jafux il-​verità jonqsu li jiksbu. “Ma rridukomx ma tkunux tafu dwar dawk li huma reqdin fil-​mewt,” ikkonsla Pawlu lit-​Tessalonikin, “biex ma ssewdux qalbkom bħall-​oħrajn li m’għandhomx tama.” (1 Tessalonikin 4:​13) Timmaġinak li qiegħed fid-​dinja l-​ġdida u li qed tara l-​irxoxt b’għajnejk stess? Jekk inhu hekk, farraġ lilek innifsek issa stess billi timmedita fuq il-​prospett li se terġaʼ tiltaqaʼ mal-​maħbubin tiegħek.

16. X’se jkunu probabbilment is-​sentimenti tiegħek meta jseħħ l-​irxoxt?

¹⁶ Bħalissa għandek mnejn qed tbati minħabba l-​konsegwenzi fiżiċi tar-​ribelljoni taʼ Adam, forsi fil-​forma taʼ xi marda. Tħallix id-​dwejjaq li jistaʼ jkollok minħabba dan iġagħluk tinsa l-​prospett taʼ ferħ li tesperjenza l-​irxoxt personalment u tiġi lura għall-​ħajja f’saħħtek u mimli enerġija mill-​ġdid fid-​dinja l-​ġdida. Imbagħad meta jinfetħu għajnejk u tara l-​uċuħ ferħanin mimlijin ħerqa biex jaqsmu miegħek il-​ferħ tagħhom għall-​irxoxt tiegħek, żgur li ma tistax ma tirringrazzjax lil Alla għall-​qalb tajba bl-​imħabba tiegħu.

17, 18. Liema żewġ lezzjonijiet importanti għandna nżommu f’moħħna?

¹⁷ Sadattant, ikkunsidra żewġ lezzjonijiet li għandna nżommuhom f’moħħna. Waħda hi l-​importanza taʼ li naqdu lil Ġeħova b’ruħna kollha issa stess. Bħal Sidna, Kristu Ġesù, il-​ħajja li ngħixu mimlija sagrifiċċji persunali turi l-​imħabba li għandna għal Ġeħova u għall-​ġirien tagħna. F’każ li l-​oppożizzjoni jew il-​persekuzzjoni jisirqulna l-​għajxien jew il-​libertà tagħna, aħna determinati li nibqgħu sodi fil-​fidi jkunu xi jkunu l-​provi li niffaċċjaw. Jekk dawk li jopponuna jhedduna bil-​mewt, it-​tama taʼ l-​irxoxt tfarraġna u ssaħħaħna biex nibqgħu leali lejn Ġeħova u s-​Saltna tiegħu. Iva, iż-​żelu tagħna għax-​xogħol taʼ l-​ippridkar dwar is-​Saltna u taʼ li nagħmlu dixxipli jagħtina l-​prospett li ngawdu l-​barkiet eterni li Ġeħova għandu maħżunin għan-​nies sewwa.

¹⁸ It-​tieni lezzjoni għandha x’taqsam maʼ kif niffaċċjaw it-​tentazzjonijiet li jiġu bl-​imperfezzjoni tagħna. L-​għarfien li għandna dwar it-​tama taʼ l-​irxoxt u l-​apprezzament tagħna għall-​qalb tajba mhix mistħoqqa taʼ Ġeħova jsaħħulna d-​determinazzjoni tagħna biex nibqgħu sodi fil-​fidi. “Tħobbux id-​dinja u lanqas dak li hemm fid-​dinja,” wissa l-​appostlu Ġwanni. “Jekk xi ħadd iħobb id-​dinja, l-​imħabba tal-​Missier mhix fih; għax kulma hemm fid-​dinja​—ix-​xewqa tal-​laħam u x-​xewqa taʼ l-​għajnejn u l-​iffanfrar bil-​mezzi tal-​ħajja—ma joriġinax mill-​Missier, imma mid-​dinja. Iktar minn hekk, id-​dinja tgħaddi u x-​xewqa tagħha wkoll, imma min jagħmel ir-​rieda t’Alla jibqaʼ għal dejjem.” (1 Ġwanni 2:​15-​17) Il-​ġibda tad-​dinja fil-​forma tal-​materjaliżmu ftit li xejn se tħajjarna meta nqabbluha “mal-​ħajja vera.” (1 Timotju 6:​17-​19) Jekk niġu mħajrin biex nagħmlu xi att immorali, aħna nirreżistu b’mod sod. Nirrealizzaw li f’każ li mmutu qabel Armageddon, il-​fatt li nibqgħu f’kondotta li ma togħġobx lil Ġeħova jistaʼ jtellfilna l-​prospett li niġu rxoxtati.

19. Liema privileġġ imprezzabbli m’għandniex ninsew?

¹⁹ Fuq kollox, qatt m’għandna ninsew il-​privileġġ imprezzabbli li għandna li nferrħu qalb Ġeħova issa u għal dejjem. (Proverbji 27:​11) Il-​fedeltà tagħna sal-​mewt jew il-​fatt li nżommu l-​integrità tagħna sa tmiem din is-​sistema mill-​agħar juri lil Ġeħova fuq liema naħa qegħdin fil-​kwistjoni tas-​sovranità universali. Imbagħad x’ferħ se jkun li ngħixu f’Ġenna taʼ l-​art billi nibqgħu ħajjin fit-​tribulazzjoni l-​kbira inkella billi nesperjenzaw irxoxt mirakoluż!

Jaqtgħalna Xewqatna

20, 21. X’se jgħinna nibqgħu leali anki jekk m’għandniex it-​tweġiba għal xi mistoqsijiet dwar l-​irxoxt? Spjega.

²⁰ Id-​diskussjoni tagħna dwar l-​irxoxt tħalli xi mistoqsijiet mhux imweġbin. Ġeħova kif se jirranġa l-​affarijiet għal dawk li kienu miżżewġin meta mietu? (Luqa 20:​34, 35) L-​irxoxt tan-​nies se jseħħ fl-​istess post fejn mietu? L-​uħud irxoxtati se jerġgħu lura għall-​ħajja viċin il-​familji tagħhom? Hemm bosta mistoqsijiet oħra dwar l-​arranġamenti għall-​irxoxt. Minkejja dan, irridu niftakru fil-​kliem taʼ Ġeremija: “Tajjeb il-​Mulej maʼ min jistennieh, mar-​ruħ li tfittxu. Tajjeb min jistenna fis-​skiet, is-​salvazzjoni tal-​Mulej.” (Lamentazzjonijiet 3:​25, 26) Fiż-​żmien stabbilit taʼ Ġeħova, il-​mistoqsijiet kollha tagħna se jiġu mweġbin għas-​sodisfazzjon sħiħ tagħna. Għala nistgħu nkunu ċerti minn dan?

²¹ Immedita fuq il-​kliem ispirat tas-​salmista meta kanta lil Ġeħova: “Int tiftaħ idek, u taqtaʼ x-​xewqa taʼ kull maħluq.” (Salm 145:​16, KŻ) Hekk kif nikbru fl-​età, ma nibqgħux nixtiequ l-​istess affarijiet. Dak li konna nittamaw għalih meta konna tfal m’għadniex nixtiquh illum. Il-​mod kif inħarsu lejn il-​ħajja huwa effettwat minn dak li nesperjenzaw kif ukoll mit-​tamiet tagħna. Minkejja dan, ikunu xi jkunu x-​xewqat xierqa tagħna fid-​dinja l-​ġdida, Ġeħova żgur li se jaqtagħhom.

22. Għala għandna raġuni tajba biex infaħħru lil Ġeħova?

²² L-​iktar ħaġa importanti għal kull wieħed u waħda minna bħalissa hija li nkunu leali. “Dak li hu mistenni mill-​prokuraturi hu li jkunu leali.” (1 Korintin 4:​2) Aħna prokuraturi taʼ l-​aħbar tajba glorjuża tas-​Saltna t’Alla. Il-​fatt li nħabirku biex inxandru din l-​aħbar tajba lil kulmin niltaqgħu miegħu jgħinna nibqgħu fit-​triq li tagħti għall-​ħajja. Qatt tinjora l-​fatt li ż-​żmien u l-​affarijiet mhux mistennijin jiġu fuqna lkoll. (Koħèlet 9:​11) Sabiex tnaqqas kwalunkwe ansjetà mhux neċessarja li tinħoloq mill-​inċertezzi tal-​ħajja, żomm sod mat-​tama glorjuża taʼ l-​irxoxt. Kun konvint li jekk hemm l-​indikazzjoni li se tesperjenza l-​mewt qabel ma jibda r-​Renju Millennjali taʼ Kristu, int tistaʼ titfarraġ biċ-​ċertezza li se jiġi s-​serħan. Fiż-​żmien taʼ Ġeħova se tkun tistaʼ ttenni l-​kliem li Ġob qal lill-​Ħallieq: “Inti ssejjaħli, u jien inwieġbek.” It-​tifħir kollu jmur lil Ġeħova, li jixxennaq biex iġib lura għall-​ħajja lil dawk kollha li huma fil-​memorja tiegħu!​—Ġob 14:​15, KŻ.

[Noti taʼ taħt]

Tiftakar Int?

• Fuq liema bażi se jiġu ġudikati n-​nies matul il-​Millennju?

• Xi wħud għala se jkollhom “irxoxt taʼ ħajja” u oħrajn “irxoxt taʼ ġudizzju”?

• It-​tama taʼ l-​irxoxt kif tfarraġna issa?

• Il-​kliem taʼ Salm 145:​16 (KŻ ) kif jgħinna nittrattaw il-​mistoqsijiet dwar l-​irxoxt li m’għandniex tweġiba għalihom?

[Stampi f’paġna 21]

It-​twemmin fl-​irxoxt kif jistaʼ jgħinna issa?