Mistoqsijiet mill-Qarrejja
F’Iżrael tal-qedem, x’kien jissinifika d-dawl mirakoluż li kultant jissejjaħ Shechinah li kien jidher fl-Iktar Qaddis tat-tabernaklu u fit-tempju?
Ġeħova, li hu l-Missier u l-Wieħed li jipproteġi l-poplu tiegħu, kien juri biċ-ċar li kien hemm il-preżenza tiegħu f’Iżrael. Mod wieħed kif kien jagħmel dan kien permezz taʼ sħaba li kienet relatata mal-post tiegħu taʼ qima.
Dak id-dawl li kien jidher tant ċar kien jirrappreżenta l-preżenza inviżibbli taʼ Ġeħova. Kien jidher fl-Iktar Qaddis kemm fit-tabernaklu u kemm fit-tempju li kien bena Salamun. Dak id-dawl mirakoluż ma kienx jissinifika li Ġeħova kien preżenti hemmhekk fiżikament. Alla ma jistax jinżamm f’xi bini magħmul mill-bniedem. (2 Kronaki 6:18; Atti 17:24) Dan id-dawl li kien jiddi b’mod sopranaturali fis-santwarju t’Alla setaʼ jagħti fiduċja lill-qassis il-kbir u permezz tiegħu lill-Iżraelin kollha li l-preżenza protettiva taʼ Ġeħova kienet qed tieħu ħsiebhom u tal-bżonnijiet tagħhom.
Bl-Aramajk li kien jintuża wara li nkitbet il-Bibbja, dan id-dawl kien jissejjaħ Shechinah, kelma li tfisser “dak li jgħammar” jew “il-post fejn tgħammar.” Dan it-terminu ma jidhirx fil-Bibbja imma jinsab fit-traduzzjonijiet bl-Aramajk taʼ l-Iskrittura Ebrajka, li hi magħrufa bħala Targumi.
Meta ngħataw istruzzjonijiet għall-bini tat-tabernaklu, Ġeħova qal lil Mosè: “U tqiegħed l-għatu fuq wiċċ l-arka, u fl-arka tqiegħed ix-xhieda miktuba li se nagħtik. Hemm jien niltaqaʼ miegħek, u nkellmek minn fuq l-għatu, minn bejn żewġ kerubini, li jkunu fuq l-għatu taʼ l-arka.” (Eżodu 25:21, 22) L-Arka li hija msemmija kienet senduq miksi bid-deheb li kien impoġġi fl-Iktar Qaddis. Fuq l-għatu taʼ l-Arka kien hemm żewġ kerubini tad-deheb.
Ġeħova minfejn kien se jitkellem? Hu ta t-tweġiba meta qal lil Mosè: “Nidher fi sħaba fuq l-għatu.” (Levitiku 16:2) Din is-sħaba strieħet fuq l-Arka sagra bejn iż-żewġ kerubini tad-deheb. Il-Bibbja ma tgħidx kemm kienet għolja s-sħaba jew kemm kienet ’il fuq mill-kerubini.
Din is-sħaba li kienet tiddi kienet iddawwal l-Iktar Qaddis. Fil-fatt, kien l-uniku sors taʼ dawl f’dak il-kumpartiment. Il-qassis il-kbir setaʼ jibbenefika minn dan id-dawl meta kien jidħol f’din il-kamra taʼ ġewwanett f’Jum l-Espjazzjoni. Hu kien wieqaf quddiem il-preżenza taʼ Ġeħova.
Għandu dan id-dawl mirakoluż xi sinifikat għall-Kristjani? L-appostlu Ġwanni ra belt f’viżjoni li fiha “l-lejl ma jkunx jeżisti hemmhekk.” Din il-belt kienet Ġerusalemm il-Ġdida, li hi magħmula minn Kristjani midlukin li huma rxoxtati sabiex ikunu jistgħu jaħkmu maʼ Ġesù. Id-dawl taʼ din il-belt simbolika ma jiġix mix-xemx jew mill-qamar. Il-glorja t’Alla Ġeħova ddawwal direttament din l-organizzazzjoni, bħalma s-sħaba Shechinah dawlet l-Iktar Qaddis. Ukoll, il-Ħaruf, Ġesù Kristu, huwa “l-musbieħ” tal-belt. Min-naħa l-oħra, din “il-belt” titfaʼ dawl spiritwali u favur fuq dawk in-nies li huma mifdijin mill-ġnus kollha sabiex ikunu bħala gwida għalihom.—Rivelazzjoni 21:22-25.
Minħabba li huma rċivew tant barkiet mingħand Alla, l-aduraturi taʼ Ġeħova jistgħu jkunu ċerti li Ġeħova hu r-Ragħaj protettiv u l-Missier mimli affezzjoni tagħhom.