Jaqbillek Tkun Leali?
“INT qed tħallas iżżejjed għall-assigurazzjoni taʼ saħħtek,” qal Karl, rappreżentant taʼ kumpanija taʼ l-assigurazzjoni.a “Jekk taqleb mal-kumpanija tiegħi se tiffranka Lm5 fix-xahar, li hija somma ġmielha.”
“Jistaʼ jkun,” wieġeb Jens. “Imma jien ilni bl-assigurazzjoni taʼ saħħti maʼ l-istess kumpanija għal ħafna snin. Sibthom t’għajnuna fil-passat, u nixtieq nibqaʼ leali lejhom.”
“Il-lealtà hija kwalità mill-aħjar,” wieġeb Karl. “Imma qed jiswielek il-flus biex tkun leali!”
Karl kellu raġun. Ħafna drabi, li tkun leali lejn xi ħaddieħor jistaʼ jiswa l-flus. Dan jistaʼ jitlob ukoll ħin, enerġija, u rabta emozzjonali. Jaqbillek tkun leali?
Iktar Imfaħħra Milli Prattikata
Fi stħarriġ li sar fil-Ġermanja mill-Istitut t’Allensbach għar-Riċerka taʼ l-Opinjoni, 96 fil-mija minn dawk li wieġbu qiesu l-lealtà bħala kwalità taʼ min jixtieqha. Stħarriġ ieħor minn dan l-istitut li sar fuq żgħażagħ taʼ bejn it-18 u l-24 sena wera li 2 minn kull 3 minn dawk li wieġbu kellhom ħarsa pożittiva lejn il-lealtà.
Għalkemm il-lealtà ħafna drabi tiġi mfaħħra, l-affarijiet huma differenti meta niġu għal li wieħed fil-fatt ikun leali. Per eżempju, f’diversi pajjiżi fl-Ewropa l-koppji miżżewġin u l-membri tal-familja ftit li xejn juru lealtà lejn xulxin. Il-ħbieb ħafna drabi huma żleali lejn xulxin. U l-lealtà li fil-passat kienet tgħaqqad lill-imgħallem maʼ l-impjegat, jew lil negozju mal-klijent tistaʼ tgħid li sparixxiet. Għala?
Kultant, il-pass mgħaġġel tal-ħajja ma tantx iħalli ħin jew saħħa emozzjonali għal rabtiet li jeħtieġu l-lealtà. Nies li sfaw diżappuntati f’relazzjonijiet maʼ nies oħrajn forsi issa jaħsbuha darbtejn biex juru lealtà lejn ħaddieħor. Oħrajn jippreferu stil taʼ ħajja taʼ llum hawn u għada le, li ma jeħtieġx lealtà.
Hi x’inhi r-raġuni, il-lealtà hija virtù li iktar tiġi mfaħħra milli prattikata. Għalhekk tqum il-mistoqsija: Jaqbillek tkun leali? Jekk iva, lejn min obbligat turiha, u kif? X’benefiċċji jinkisbu meta wieħed ikun leali?
[Noti taʼ taħt]
a Xi ismijiet ġew mibdulin f’dan l-artiklu u taʼ warajh.
[Kumment f’paġna 3]
Il-lealtà hija virtù li iktar tiġi mfaħħra milli prattikata