L-​Anġli—Min Huma

IL-​MONARKA taʼ imperu setgħan ma jistax jemmen lil għajnejh. Tlett irġiel li ngħataw is-​sentenza tal-​mewt f’nar iħeġġeġ jiġu salvati minn ħalq il-​mewt! Min salvahom? Lit-​tlett irġiel li ġew salvati b’dan il-​mod, is-​sultan innifsu jgħidilhom: “Mbierek Alla [tagħkom], li bagħat l-​anġlu tiegħu u ħeles lill-​qaddejja tiegħu li ttamaw fih.” (Danjel 3:95 [3:​28, NW]) Dan il-​mexxej Babiloniż li għex xi żewġ millennji ilu ra b’għajnejh stess ħelsien anġeliku. Fil-​passat, miljuni taʼ nies kienu jemmnu li l-​anġli kienu jeżistu. Ħafna llum mhux talli jemmnu li l-​anġli jeżistu imma jħossu wkoll li b’xi mod ħajjithom stess hi effettwata minnhom. Min huma l-​anġli, u minn fejn oriġinaw?

Skond il-​Bibbja, l-​anġli huma spirti, bħalma Alla stess hu Spirtu. (Ebrej 1:7; Ġwanni 4:24) Il-​familja anġelika hija kbira, tgħodd bil-​miljuni. (Rivelazzjoni 5:11) U lkoll huma “setgħana u qawwija.” (Salm 103:20) Għalkemm l-​anġli huma bħal bnedmin fis-​sens li għandhom personalitajiet u ngħataw il-​libertà taʼ l-​għażla, dawn ma bdewx ħajjithom bħala bnedmin. Fil-​fatt, Alla ħalaq l-​anġli ħafna qabel il-​bnedmin​—saħansitra qabel ma nħolqot il-​pjaneta Art. Meta Alla ‘qiegħed sisien l-​art,’ tgħid il-​Bibbja, ‘għanniet il-​ġemgħa tal-​kwiekeb [l-anġli] taʼ filgħodu, u għajtet bil-​ferħ ix-​xirka taʼ wlied Alla.’ (Ġob 38:​4, 7) Ladarba l-​anġli huma l-​ħolqien t’Alla, huma msejħin l-​ulied t’Alla.

Alla għal liema skop ħalaq l-​anġli? Liema rwol kellhom l-​anġli fl-​istorja tal-​bnedmin, jekk kellhom? Qegħdin huma jeffettwaw il-​ħajjiet tagħna llum? Ladarba l-​anġli huma spirti bl-​abbiltà li jieħdu d-​deċiżjonijiet tagħhom stess ibbażati fuq gwida morali, jistaʼ jkun li kien hemm xi wħud minnhom li segwew lil Satana x-​Xitan, u b’hekk saru għedewwa t’Alla? Il-​Bibbja tipprovdi tweġibiet li huma minnhom għal dawn il-​mistoqsijiet.