Mistoqsijiet mill-​Qarrejja

L-​arka tal-​patt kien fiha biss iż-​żewġ twavel tal-​ġebel, jew kien fiha wkoll oġġetti oħra?

Fi żmien id-​dedikazzjoni tat-​tempju taʼ Salamun fis-​sena 1026 Q.E.K., “xejn ma kien hemm ġo l-​arka ħlief iż-​żewġ twavel li kien qiegħed hemm Mosè meta kien Ħoreb; dawn kienu t-​twavel tal-​patt li bih il-​Mulej intrabat maʼ wlied Iżrael meta ħarġu mill-​Eġittu.” (2 Kronaki 5:10) Madankollu, dan ma kienx dejjem il-​każ.

“Fit-​tielet xahar mill-​ħruġ taʼ wlied Iżrael mill-​art taʼ l-​Eġittu,” huma daħlu fid-​deżert tas-​Sinaj. (Eżodu 19:​1, 2) Imbagħad, Mosè telaʼ fuq il-​Muntanja Sinaj u ngħatawlu ż-​żewġ twavel tal-​ġebel bil-​Liġi fuqhom. Hu jirrakkonta: “U dort u nżilt minn fuq il-​muntanja, u qegħedt it-​twavel fl-​arka li kont għamilt fejn baqgħu hemm sa llum, skond ma ordna l-​Mulej.” (Dewteronomju 10:5) Din kienet arka temporanja, jew reċipjent, li Ġeħova qal lil Mosè biex jibniha sabiex iżomm it-​twavel tal-​Liġi fiha. (Dewteronomju 10:1) L-​arka tal-​patt tlestiet, bejn wieħed u ieħor, lejn l-​aħħar tas-​sena 1513 Q.E.K.

Ftit wara li nħelsu mill-​Eġittu, l-​Iżraelin bdew igergru dwar l-​ikel. Għalhekk, Ġeħova pprovdielhom il-​manna. (Eżodu 12:​17, 18; 16:​1-5) F’dak il-​perijodu, Mosè ta din l-​istruzzjoni lil Aron: “Ħu ġarra u qiegħed fiha daqs siegħ manna, u qegħedha quddiem il-​Mulej biex iżżommha għall-​ġenerazzjonijiet taʼ warajkom.” Ir-​rakkont jgħid: “U skond ma ordna l-​Mulej lil Mosè, hekk Aron qegħedha [“quddiem ix-​Xiehda,” NW] [arkivju fejn jiġu mħarsin dokumenti importanti] biex tintrefaʼ hemm.” (Eżodu 16:​33, 34) Filwaqt li f’dak iż-​żmien Aron żgur li ġabar il-​manna fil-​ġarra, din ma setgħetx titpoġġa quddiem ix-​Xiehda sakemm Mosè għamel l-​Arka u poġġa t-​twavel fiha.

Kif ġie notat diġà, l-​arka tal-​patt inbniet fl-​aħħar tas-​sena 1513 Q.E.K. Il-​bastun t’Aron tpoġġa f’din l-​Arka ħafna iktar tard, wara r-​ribelljoni taʼ Koraħ u oħrajn. L-​appostlu Pawlu jsemmi ‘l-​arka tal-​patt [li fiha] kien hemm il-​bieqja tad-​deheb bil-​manna u l-​bastun t’Aron li warrad u t-​twavel tal-​patt.’ Dawn kienu “l-​bieqja tad-​deheb bil-​manna u l-​bastun t’Aron li warrad u t-​twavel tal-​patt.”​—Ebrej 9:4.

Il-manna kienet provduta minn Alla matul l-​40 sena li l-​Iżraelin qattgħu fid-​deżert. Din ma ġietx iktar provduta meta ‘bdew jieklu mill-​frott taʼ l-​art’ imwiegħda. (Ġożwè 5:​11, 12) Il-​bastun t’Aron tpoġġa fl-​arka tal-​patt għal skop​—bħala sinjal, jew evidenza, kontra l-​ġenerazzjoni ribelluża. Dan jissuġġerixxi li l-​bastun baqaʼ hemm kważi matul il-​vjaġġ kollu fid-​deżert. Allura, jistaʼ jidher loġiku li tikkonkludi li xi ftit żmien wara li Iżrael daħal fl-​Art Imwiegħda u qabel id-​dedikazzjoni tat-​tempju taʼ Salamun, il-​bastun t’Aron u l-​bieqja tad-​deheb bil-​manna tneħħew mill-​arka tal-​patt.