L-​Onestà Ssarraf f’Ġid

ID-​DIŻONESTÀ ilha teżisti sa mill-​ġnien taʼ l-​Għeden. Madankollu, ħafna kulturi u soċjetajiet iqisu l-​onestà bħala li hi taʼ valur u l-​gideb u l-​qerq bħala li huma kwalitajiet mhux taʼ min jixtieqhom u taʼ tmaqdir. Meta ħaddieħor jafdak għandek għalxiex tħossok kburi. Però, fis-​soċjetà taʼ llum qed tinfirex l-​idea li biex tkampa hemm bżonn id-​diżonestà. Int kif tħossok dwar dan? Hemm bżonn li tikkultiva l-​onestà? X’inhu l-​livell tiegħek biex tiddeċiedi x’inhi mġiba onesta u dik li m’hijiex?

Sabiex nogħġbu lil Alla, għandna nkunu onesti fi kliemna u fil-​mod kif ngħixu ħajjitna. L-​appostlu Pawlu ħeġġeġ lill-​Kristjani sħabu: “Għidu l-​verità, kull wieħed minnkom lill-​proxxmu tiegħu.” (Efesin 4:​25) Pawlu kiteb ukoll: “Nixtiequ nġibu ruħna bl-​onestà f’kollox.” (Ebrej 13:18) Aħna ma rridux inkunu onesti biex nirċievu t-​tifħir minn ħaddieħor. Aħna onesti għaliex nirrispettaw lill-​Ħallieq tagħna u rridu nogħġbuh.

Taħbix Min Int

F’ħafna pajjiżi, xi nies jgħidu li huma xi ħaġa li m’humiex biex jiksbu ċerti vantaġġi fil-​ħajja. Huma jiksbu dokumenti, diplomi, u karti taʼ l-​identità foloz biex jidħlu f’pajjiż b’mod illegali jew biex jiksbu impjieg jew pożizzjoni li m’humiex kwalifikati għaliha. Xi ġenituri jiffalsifikaw iċ-​ċertifikati tat-​twelid taʼ wliedhom biex itawlu l-​edukazzjoni tagħhom.

Madankollu, biex nogħġbu lil Alla ma nistgħux inqarrqu. Il-​Bibbja tgħid li Ġeħova hu “Alla tas-​sewwa” u li hu jistenna li dawk li għandhom relazzjoni miegħu jkunu nies li jgħidu s-​sewwa wkoll. (Salm 31:6 [31:​5, NW]) Jekk irridu nżommu relazzjoni mill-​qrib maʼ Ġeħova, ma nistgħux nimitaw “nies giddieba,” dawk li ‘jqarrqu.’​—Salm 26:4.

Huwa komuni wkoll li n-​nies jaħbu l-​verità meta jiffaċċjaw il-​possibbiltà li jiġu dixxiplinati għal xi għemil ħażin. Anki fil-​kongregazzjoni Kristjana, individwu jistaʼ jiġi mħajjar biex jagħmel hekk. Per eżempju, f’kongregazzjoni minnhom, raġel żagħżugħ stqarr maʼ l-​anzjani li kien ikkommetta ċerti dnubiet. Madankollu, m’ammettiex li kien seraq, avolja kien hemm evidenza kontrih. Eventwalment inkixef u kellu jiġi maqtugħ mis-​sħubija tal-​kongregazzjoni. Ma kienx ikun iktar għaqli kieku kien onest totalment u rċieva l-​għajnuna biex jirrestawra r-​relazzjoni prezzjuża tiegħu maʼ Ġeħova? Wara kollox, il-​Bibbja tgħid: “Iċċekkinx id-​dixxiplina mingħand Ġeħova, u taqtax qalbek meta jikkoreġik; għax Ġeħova jiddixxiplina lil min iħobb.”​—Ebrej 12:​5, 6.

Xi drabi, ħu li jkun qed jistinka għal responsabbiltajiet fil-​kongregazzjoni forsi jaħbi problemi persunali jew kondotta ħażina mill-​passat. Per eżempju, meta jimla applikazzjoni għal privileġġ taʼ servizz speċjali forsi ma jagħtix tweġibiet sħaħ għal mistoqsijiet dwar is-​saħħa u l-​morali, għax jaħseb li l-​verità dwar kwistjonijiet bħal dawn tistaʼ ttelliflu l-​privileġġ. Forsi jirraġuna, ‘Mhux veru gdibt,’ imma kien tassew qed ikun sinċier u onest m’oħrajn? Ikkunsidra l-​punt fi Proverbji 3:​32: “Min jimxi bl-​imgħawweġ jistkerrhu l-​Mulej, imma f’idejh huma dawk li jimxu bis-​sewwa.”

L-ewwelnett, li tkun onest ifisser li nkunu onesti magħna nfusna. Spiss nemmnu dak li rridu nemmnu minflok dak li hu sew jew veru. Kemm hu faċli għalina biex nagħtu t-​tort lil ħaddieħor milli lilna nfusna! Per eżempju, is-​Sultan Sawl ipprova jiġġustifika d-​diżubbidjenza tiegħu billi waħħal f’oħrajn. B’riżultat taʼ dan, Ġeħova ċaħħdu milli jkun is-​sultan. (1 Samwel 15:​20-​23) X’kuntrast mas-​Sultan David, li talab lil Ġeħova: “Id-​dnub tiegħi jien stqarrejtlek, u l-​ħażen tiegħi ma ħbejthulekx. Jien għedt: ‘Quddiem il-​Mulej nistqarr ħtijieti.’ U int ħfirtli l-​ħażen tad-​dnub tiegħi.”​—Salm 32:5.

L-​Onestà Ġġib il-​Barkiet

L-​onestà, jew in-​nuqqas tagħha, tinfluwenza l-​mod kif oħrajn iħarsu lejk. Jekk in-​nies isiru jafu li tkun qarraqt bihom anki darba biss, se titlef il-​fiduċja tagħhom, u din mhix faċli biex terġaʼ tiksibha. Jekk, mill-​banda l-​oħra, tgħid il-​verità u tkun onest, se tibni reputazzjoni bħala individwu taʼ integrità, li jistħoqqlok tiġi fdat. Ix-​Xhieda taʼ Ġeħova kisbu reputazzjoni bħal din. Ikkunsidra xi eżempji.

Direttur taʼ kumpanija rrealizza li ħafna mill-​impjegati tiegħu kienu qed jisirqu lill-​kumpanija, u għalhekk talab l-​għajnuna tal-​pulizija. Meta sar jaf li fost l-​impjegati li kienu ġew arrestati kien hemm wieħed mix-​Xhieda taʼ Ġeħova, hu mar għand il-​pulizija sabiex ix-​Xhud jiġi meħlus immedjatament. Għala? Għaliex id-​direttur kien jaf li dan l-​individwu kien ħaddiem onest u li kien innoċenti. Ix-​Xhud żamm l-​impjieg tiegħu, filwaqt li xi oħrajn tkeċċew. Sħabu li kienu Xhieda ferħu għaliex kienu jafu li l-​kondotta tiegħu kienet ġabet unur lill-​isem taʼ Ġeħova.

Kondotta tajba tiġi notata. F’komunità Afrikana, pont kbir li kien jgħaddi minn fuq kanal kbir tad-​dranaġġ kellu bżonn xi tiswijiet għaliex xi fallakki taʼ l-​injam kienu nsterqu. Ir-​residenti lokali ddeċidew li jiġbru l-​flus biex jerġgħu jqiegħdu l-​fallakki, imma lil min kienu se jafdaw biex jieħu ħsieb il-​flus? Kollha qablu li kellu jkun wieħed mix-​Xhieda taʼ Ġeħova.

Meta pajjiż Afrikan esperjenza taqlib politiku u etniku, Xhud li kien jaħdem bħala accountant għal kumpanija internazzjonali ntbagħat pajjiż ieħor mill-​kumpanija tiegħu, għaliex ħajtu kienet fil-​periklu. Il-​kumpanija ħallsitlu biex għal diversi xhur jaħdem f’pajjiż ieħor sakemm is-​sitwazzjoni tikkalma. Għala? Għaliex qabel kien irrifjuta li jidħol f’komplott maʼ dawk li kienu qed jippjanaw biex jisirqu lill-​kumpanija. L-​imgħallmin tiegħu kienu konxji tar-​reputazzjoni onesta għall-​aħħar li kellu. Kienu huma se jkunu lesti biex jgħinu lil dan il-​ħaddiem kieku kien magħruf għal xi għemil diżonest?

Proverbji 20:7 (Karm Żammit) jgħid: “Ir-​raġel ġust jimxi fis-​sewwa tiegħu.” Bniedem onest hu bniedem taʼ integrità. Hu qatt ma jimbrolja jew iqarraq b’ħaddieħor. M’huwiex dan kif tixtieq li oħrajn jittrattaw lilek? L-​onestà hija parti essenzjali mill-​qima vera. Hija espressjoni taʼ mħabbitna għal Alla u għal ġârna. Billi nkunu onesti, aħna nuru x-​xewqa tagħna li nsegwu l-​prinċipju taʼ kondotta li esprima Ġesù: “Għalhekk, kulma tridu li l-​bnedmin jagħmlulkom, intom tridu tagħmluh lilhom ukoll.”​—Mattew 7:​12; 22:​36-​39.

Xi drabi, meta tkun onest tispiċċa tmur minn taħt, imma l-​kuxjenza nadifa li tirriżulta tiswa ħafna iktar minn dawn ir-​riżultati. Fl-​aħħar mill-​aħħar, li tkun onest u rett iġib l-​aqwa benefiċċji. Il-​verità hi li relazzjoni tajba maʼ Ġeħova m’għandhiex prezz. Għala tagħmlilha l-​ħsara billi tagħmel xi ħaġa diżonesta sabiex iżżomm ir-​rispett tan-​nies jew tikseb xi vantaġġ illegali? Ikunu xi jkunu l-​isfidi li niffaċċjaw, jistaʼ jkollna fiduċja fil-​kliem tas-​salmista: “Hieni l-​bniedem li jqiegħed fil-​Mulej it-​tama tiegħu, u ma jmurx mal-​kburin, mogħtija għall-​gideb.”​—Salm 40:5 (40:​4, NW).

[Stampi f’paġna 18]

Il-​Kristjani veri ma jixtrux u ma jużawx dokumenti foloz