Ġeħova Huwa Alla li Japprezza

“Alla mhux inġust biex jinsa għemilkom u l-​imħabba li wrejtu għal ismu.”—EBREJ 6:​10.

1. Ġeħova kif wera l-​apprezzament tiegħu għal Rut il-​Mowabija?

ĠEĦOVA verament japprezza l-​isforzi taʼ dawk li sinċerament ifittxu li jagħmlu r-​rieda tiegħu, u hu jippremjahom bil-​kbir. (Ebrej 11:6) Ir-​raġel leali Bogħaż kien familjari maʼ din il-​karatteristika sabiħa fil-​personalità t’Alla, għax hu qal lil Rut il-​Mowabija, li bi mħabba kienet tieħu ħsieb il-​kunjata armla tagħha: “Il-​Mulej iħallsek taʼ għemilek. Ħlasek ikun sħiħ mingħand il-​Mulej, Alla taʼ Iżrael, li int ġejt tistkenn taħt ġwenħajh.” (Rut 2:​12) Berikha Alla lil Rut? Dażgur! Fil-​fatt, l-​istorja tagħha ġiet imniżżla fil-​Bibbja! Iktar minn hekk, hi żżewġet lil Bogħaż u saret l-​antenata kemm tas-​Sultan David u kemm taʼ Ġesù Kristu. (Rut 4:​13, 17; Mattew 1:​5, 6, 16) Dan l-​eżempju huwa biss wieħed mill-​ħafna eżempji fil-​Bibbja li juru l-​apprezzament li Ġeħova għandu għall-​qaddejja tiegħu.

2, 3. (a) X’jagħmel l-​espressjonijiet t’apprezzament taʼ Ġeħova rimarkevoli? (b) Ġeħova għala jistaʼ jesprimi apprezzament veru? Agħti eżempju.

² Ġeħova jqisha bħala inġustizzja min-​naħa tiegħu li kieku kellu juri nuqqas t’apprezzament. Ebrej 6:​10 jgħid: “Alla m’hux se jkun hekk inġust li jinsa dak li intom għamiltu u l-​imħabba li wrejtu lejn ismu meta qdejtu u għadkom taqdu lill-​qaddisin.” Dak li jagħmel lil din l-​istqarrija rimarkevoli hu li Alla juri l-​apprezzament għan-​nies devoti avolja huma midinbin u jonqsu mill-​glorja t’Alla.​—Rumani 3:​23.

³ Minħabba l-​imperfezzjoni tagħna, aħna għandna mnejn inħossu li l-​għemejjel tagħna taʼ devozzjoni lejn Alla huma insinifikanti u li ma jistħoqqilniex il-​barka t’Alla. Madankollu, Ġeħova jifhem eżattament il-​motivi u ċ-​ċirkustanzi tagħna, u hu jqis verament is-​servizz tagħna li nagħtu minn qalbna. (Mattew 22:37) Sabiex nagħtu eżempju: Omm issib rigal​—ġiżirana li ma tantx tiswa​—fuq il-​mejda. Hi tistaʼ tqis ir-​rigal bħala li hu taʼ ftit valur u twarrbu fil-​ġenb. Madankollu, il-​kartolina li hemm mar-​rigal turi li dan hu rigal mit-​tifla ċkejkna tagħha, li nefqet dak kollu li kienet ġemmgħet biex tixtrihielha. Issa l-​omm tibda tqis ir-​rigal minn lenti differenti. Forsi bid-​dmugħ f’għajnejha, hi tgħannaq lit-​tifla u tesprimi l-​apprezzament tagħha mill-​qalb.

4, 5. Ġesù kif imita lil Ġeħova f’li juri apprezzament?

⁴ Peress li hu konxju sew tal-​motivi u l-​limitazzjonijiet tagħna, Ġeħova japprezza ferm meta aħna nagħtuh l-​aħjar tagħna, kemm jekk ikun ftit u kemm jekk ikun ħafna. F’dan ir-​rigward, Ġesù kien riflessjoni perfetta taʼ Missieru. Ftakar fir-​rakkont Bibliku taʼ l-​armla li tefgħet żewġ muniti. “Issa hekk kif [Ġesù] ħares ’il fuq, ra lill-​għonja jitfgħu l-​għotjiet tagħhom fil-​kaxxi tat-​teżor. Imbagħad ra waħda armla fil-​bżonn titfaʼ hemmhekk żewġ muniti żgħar taʼ valur żgħir ferm u qal: ‘Ngħidilkom il-​verità, Din l-​armla, għalkemm fqira, tefgħet iktar minnhom ilkoll. Għax dawn kollha tefgħu għotjiet miż-​żejjed tagħhom, imma din il-​mara, min-​nieqes tagħha, tefgħet il-​mezz t’għajxien kollu li kellha.’”​—Luqa 21:​1-4.

⁵ Iva, peress li kien jaf dwar iċ-​ċirkustanzi tal-​mara​—li kienet armla u fqira​—Ġesù fehem il-​valur veru taʼ l-​għotja tagħha, u hu apprezzaha ferm. L-​istess nistgħu ngħidu dwar Ġeħova. (Ġwanni 14:9) M’huwiex inkuraġġanti li tkun taf li huma x’inhuma ċ-​ċirkustanzi tiegħek, int tistaʼ ssib favur f’għajnejn l-​Alla mimli apprezzament tagħna u f’għajnejn Ibnu?

Ġeħova Jippremja lil Etjopjan li Jibżaʼ minn Alla

6, 7. Ġeħova għala u b’liema mod wera l-​apprezzament tiegħu għal Għebed-melek?

⁶ Il-​fatt li Ġeħova juri l-​apprezzament tiegħu għal dawk li jagħmlu r-​rieda tiegħu jidher darba wara l-​oħra fl-​Iskrittura. Ikkunsidra kif hu ttratta maʼ l-​Etjopjan Għebed-melek li kien jibżaʼ minn Alla, kontemporanju taʼ Ġeremija u li kien qaddej fid-​dar tas-​Sultan Sedekija, is-​sultan żleali taʼ Ġuda. Għebed-melek sar jaf li l-​prinċpijiet taʼ Ġuda kienu akkużaw b’mod falz lill-​profeta Ġeremija b’sedizzjoni u kienu tefgħuh f’bir biex imut mingħajr ikel. (Ġeremija 38:​1-7) Peress li kien jaf li Ġeremija kien mibgħud għall-​aħħar minħabba l-​messaġġ li kien jippriedka, Għebed-melek irriskja ħajtu stess u appella quddiem is-​sultan. B’kuraġġ, l-​Etjopjan qal: “Sidi s-​sultan, dawn in-​nies ġiebu ruħhom ħażin f’kull ma għamlu lil Ġeremija, il-​profeta, li xeħtuh fil-​bir, u dalwaqt imut bil-​ġuħ, għax ma baqax ħobż fil-​belt.” Malli kkmandah is-​sultan, Għebed-melek ħa 30 raġel u salva l-​profeta t’Alla.​—Ġeremija 38:​8-​13.

⁷ Ġeħova ra li Għebed-melek aġixxa bil-​fidi li għenitu jegħleb kwalunkwe biżaʼ li setaʼ kellu. Għalhekk, Ġeħova wera l-​apprezzament tiegħu u qal lil Għebed-melek permezz taʼ Ġeremija: “Arani, sa ntemm kliemi fuq din il-​belt għall-​ħsara tagħha u mhux għar-​riżq . . . Imma dak inhar neħilsek, . . . u ma tingħatax f’idejn dawk in-​nies li minnhom qiegħed tibżaʼ. Għax insalvak żgur, . . . tkun għalik ħajtek bi priża, talli int ittamajt fija.” (Ġeremija 39:​16-​18) Iva, Ġeħova ħeles lil Għebed-melek, kif ukoll lil Ġeremija, mill-​prinċpijiet mill-​agħar taʼ Ġuda u iktar tard minn Babiloniżi li qerdu lil Ġerusalemm. “[Ġeħova] iħares il-​ħajja taʼ ħbiebu, jeħlishom minn idejn il-​ħżiena,” jgħid Salm 97:10.

“Missierek li Jara Dak li Hu Moħbi Se Jroddlok Lura”

8, 9. Bħalma wera Ġesù, Ġeħova liema tip taʼ talb japprezza?

⁸ Evidenza oħra li Ġeħova japprezza u jqis l-​espressjonijiet tagħna taʼ devozzjoni lejh nistgħu narawha minn dak li tgħid il-​Bibbja dwar it-​talb. “[Alla] jitgħaxxaq bit-​talba tat-​tajbin,” qal ir-​raġel għaref. (Proverbji 15:8) Fi żmien Ġesù ħafna mexxejja reliġjużi kienu jitolbu pubblikament, u huma kienu jagħmlu dan mhux minħabba l-​qima ġenwina tagħhom, imma għax riedu jimpressjonaw lin-​nies. “Dawn qed jieħdu l-​premju tagħhom bis-​sħiħ,” qal Ġesù. “Iżda int, meta titlob,” qal hu lis-​segwaċi tiegħu, “idħol f’kamartek, agħlaq il-​bieb, u itlob lil Missierek li qiegħed fil-​moħbi; imbagħad Missierek li jara dak li hu moħbi se jroddlok lura.”—Mattew 6:​5, 6.

⁹ M’għandniex xi ngħidu, Ġesù ma kienx qed jikkundanna t-​talb pubbliku, għax hu stess talab pubblikament f’ċerti okkażjonijiet. (Luqa 9:​16) Ġeħova japprezza profondament meta nitolbuh b’qalb sinċiera, mingħajr l-​intenzjoni li nimpressjonaw lil oħrajn. Fil-​fatt, it-​talb privat tagħna huwa indikazzjoni tajba taʼ l-​imħabba li għandna għal Alla u l-​fiduċja tagħna fih. Għalhekk, mhux taʼ b’xejn li Ġesù spiss fittex postijiet privati biex jitlob. Darba, hu għamel dan “kmieni fil-​għodu, waqt li kien għadu d-​dlam.” Darba oħra, “telaʼ waħdu fuq il-​muntanja biex jitlob.” U qabel m’għażel it-​12-il appostlu tiegħu, Ġesù qattaʼ l-​lejl kollu waħdu jitlob.​—Marku 1:​35; Mattew 14:23; Luqa 6:​12, 13.

10. Meta t-​talb tagħna jkun sinċier u jirrifletti sentimenti profondi, minn xiex nistgħu nkunu żguri?

¹⁰ Immaġina kemm semaʼ b’attenzjoni Ġeħova l-​espressjonijiet mill-​qalb taʼ Ibnu! Tabilħaqq, Ġesù kultant talab “b’għajat qawwi u dmugħ, u t-​talb tiegħu ntlaqaʼ minħabba li kellu l-​biżaʼ t’Alla.” (Ebrej 5:7; Luqa 22:​41-​44) Meta t-​talb tagħna jirrifletti sinċerità u sentimenti profondi bħal dawn, nistgħu nibqgħu ċerti li Missierna tas-​sema jismaʼ b’attenzjoni u b’apprezzament. Iva, “qrib il-​Mulej lejn kull min . . . isejjaħlu fis-​sewwa.”​—Salm 145:18.

11. Ġeħova kif iħossu dwar dak li nagħmlu fil-​privat?

¹¹ Jekk Ġeħova japprezza meta nitolbu lilu fis-​sigriet, min jaf kemm japprezza wkoll meta nobduh fis-​sigriet! Iva, Ġeħova huwa konxju taʼ dak li nagħmlu meta nkunu fil-​privat. (1 Pietru 3:​12) Tabilħaqq, il-​fatt li nkunu leali u ubbidjenti meta nkunu waħedna huwa indikazzjoni tajba li naqdu lil Ġeħova b’‘qalb sħiħa,’ waħda li għandha motivi puri u li hi soda għal dak li hu tajjeb. (1 Kronaki 28:9) Min jaf kemm tferrħu lil Ġeħova kondotta bħal din!​—Proverbji 27:11; 1 Ġwanni 3:​22.

12, 13. Kif nistgħu ngħassu lil moħħna u qalbna u nkunu bħad-​dixxiplu leali Natanjel?

¹² Għaldaqstant, il-​Kristjani leali jgħassu kontra d-​dnubiet sigrieti li jħassru l-​moħħ u l-​qalb, bħal li naraw il-​pornografija u l-​vjolenza. Filwaqt li xi dnubiet jistgħu jinħbew mill-​bnedmin, aħna nirrealizzaw li “kollox hu għeri u mikxuf beraħ quddiem dak li rridu nagħtuh kont.” (Ebrej 4:​13; Luqa 8:​17) Billi nistinkaw biex nevitaw affarijiet li jweġġgħu lil Ġeħova, aħna nżommu kuxjenza nadifa u nieħdu pjaċir bil-​fatt li nafu li għandna l-​approvazzjoni t’Alla. Iva, m’hemm l-​ebda dubju li Ġeħova verament japprezza lil “min jgħix bla ħtija u jagħmel it-​tajjeb, min jgħid is-​sewwa f’qalbu.”​—Salm 15:​1, 2.

¹³ Madankollu, kif nistgħu ngħassu lil moħħna u qalbna f’dinja miżgħuda bil-​ħażen? (Proverbji 4:​23; Efesin 2:2) Minbarra li nieħdu vantaġġ sħiħ mill-​provvedimenti spiritwali kollha, aħna għandna nagħmlu kull sforz biex nirrifjutaw dak li hu ħażin u nagħmlu dak li hu tajjeb, billi naġixxu malajr ħalli x-​xewqat ħżiena ma jsirux fertili u jildu d-​dnub. (Ġakbu 1:​14, 15) Immaġina kemm kont tkun ferħan li kieku Ġesù jgħid dwarek dak li qal fuq Natanjel: “Ara, [raġel] fil-​veru sens tal-​kelma, li fih m’hemm ebda qerq.” (Ġwanni 1:​47) Natanjel, li kien imsejjaħ ukoll Bartilmew, iktar tard kellu l-​privileġġ li jsir wieħed mit-​12-il appostlu taʼ Ġesù.​—Marku 3:​16-​19.

“Qassis il-​Kbir Ħanin u Leali”

14. Il-​mod kif Ġesù rreaġixxa għall-​ġest taʼ Marija kif kien differenti minn dak t’oħrajn?

¹⁴ Peress li Ġesù “hu x-​xbieha t’Alla [Ġeħova] li ma jidhirx,” hu dejjem jimita perfettament lil Missieru billi juri apprezzament għal dawk li jaqdu lil Alla b’qalb nadifa. (Kolossin 1:​15) Per eżempju, ħamest ijiem qabel ma ta ħajtu, Ġesù u xi wħud mid-​dixxipli tiegħu kienu mistidnin fid-​dar taʼ Xmun minn Betanja. Matul dik il-​lejla, Marija, oħt Lazzru u Marta, “ħadet libbra żejt ifuħ, nard pur, jiswa ħafna flus” (li kien jiswa madwar paga taʼ sena), u ferrgħetu fuq ras u saqajn Ġesù. (Ġwanni 12:3) Xi wħud qalu: “Għala dan il-​ħela kollu?” Madankollu, Ġesù qies il-​ġest taʼ Marija b’mod tassew differenti. Hu kien iqisu bħala att taʼ ġenerożità kbira u li jfisser ħafna meta qies li l-​mewt u d-​difna tiegħu kienu imminenti. Għalhekk, minflok ma kkritikaha lil Marija, Ġesù onoraha. Hu qal: “Kulfejn tixxandar din l-​aħbar tajba fid-​dinja kollha, dak li għamlet din il-​mara jissemma wkoll b’tifkira tagħha.”​—Mattew 26:​6-​13.

15, 16. Kif nistgħu nibbenefikaw mill-​fatt li Ġesù għex u qeda lil Alla bħala bniedem?

¹⁵ Kemm aħna privileġġati li għandna lil Ġesù, xi ħadd li tant japprezza, bħala l-​Mexxej tagħna! Fil-​fatt, il-​ħajja taʼ Ġesù ppreparatu għax-​xogħol li Ġeħova kellu merfugħ għalih​—li jaqdi bħala Qassis il-​Kbir u Sultan, l-​ewwel tal-​kongregazzjoni taʼ wħud midlukin u mbagħad tad-​dinja.​—Kolossin 1:​13; Ebrej 7:​26; Rivelazzjoni 11:15.

¹⁶ Qabel ma ġie fuq l-​art, Ġesù diġà kellu interess profond fl-​umanità u affezzjoni speċjali għaliha. (Proverbji 8:31) Billi għex bħala bniedem, hu sar jifhem iktar il-​provi li nesperjenzaw fis-​servizz tagħna lil Alla. “[Ġesù] kellu jsir bħal ħutu f’kollox,” kiteb l-​appostlu Pawlu, “biex isir qassis il-​kbir ħanin u leali . . . Għax billi hu stess sofra meta kien imġarrab, jistaʼ jidħol għal dawk li qed jiġu mġarrbin.” Ġesù jistaʼ “jagħder id-​dgħjufijiet tagħna” minħabba li hu “ġie mġarrab fl-​aspetti kollha bħalna, iżda baqaʼ mingħajr dnub.”​—Ebrej 2:​17, 18; 4:​15, 16.

17, 18. (a) L-ittri lis-​sebaʼ kongregazzjonijiet fl-​Asja Minuri x’jirrivelaw dwar l-​apprezzament profond taʼ Ġesù? (b) Dawk il-​Kristjani midlukin għal xiex kienu qed jiġu preparati?

¹⁷ Il-​fatt li Ġesù sar jifhem iktar il-​provi tas-​segwaċi tiegħu sar evidenti wara l-​irxoxt tiegħu. Ikkunsidra l-​ittri lis-​sebaʼ kongregazzjonijiet fl-​Asja Minuri, li kiteb l-​appostlu Ġwanni. Lill-​kongregazzjoni fi Żmirna, Ġesù kitbilha: “Naf it-​tribulazzjoni u l-​faqar tiegħek.” Hawnhekk Ġesù fil-​fatt kien qed jgħid, ‘Nifhem eżattament il-​problemi tiegħek; veru naf dak li int għaddej minnu.’ Imbagħad, bil-​mogħdrija u bl-​awtorità li kiseb minħabba t-​tbatija tiegħu stess li bata saħansitra sal-​mewt, Ġesù żied: “Agħti prova tal-​fedeltà tiegħek sal-​mewt, u nagħtik il-​kuruna tal-​ħajja.”​—Rivelazzjoni 2:​8-​10.

¹⁸ L-​ittri lis-​sebaʼ kongregazzjonijiet huma mimlijin espressjonijiet li jirriflettu l-​fatt li Ġesù jifhem tassew l-​isfidi tad-​dixxipli tiegħu u li ġenwinament japprezza l-​ħajja tagħhom taʼ integrità. (Rivelazzjoni 2:​1–​3:​22) Żomm f’moħħok li dawk li lilhom indirizza Ġesù kienu Kristjani midlukin bit-​tama li jaħkmu maġenbu fis-​sema. Bħal Sidhom, huma kienu qed jiġu preparati għall-​irwol importanti tagħhom sabiex ikunu jistgħu jgħinu biex jamministraw bl-​akbar mogħdrija l-​benefiċċji tal-​fidwa tas-​sagrifiċċju taʼ Kristu lill-​umanità li qiegħda fi stat ħażin.—Rivelazzjoni 5:​9, 10; 22:​1-5.

19, 20. Dawk li jifformaw il-​“folla kbira” kif juru l-​apprezzament tagħhom għal Ġeħova u għal Ibnu?

¹⁹ M’għandniex xi ngħidu, l-​imħabba li għandu Ġesù għas-​segwaċi midlukin tiegħu juriha wkoll lin-​“nagħaġ oħrajn” leali tiegħu, li miljuni minnhom jifformaw il-​“folla kbira [prospettiva] . . . minn kull ġens” li se ssalva mit-​“tribulazzjoni l-​kbira” li ġejja. (Ġwanni 10:16; Rivelazzjoni 7:​9, 14) Dawn l-​uħud qed jinġabru man-​naħa taʼ Ġesù minħabba li japprezzaw is-​sagrifiċċju tiegħu taʼ fidwa u t-​tama tagħhom taʼ ħajja taʼ dejjem. Kif juruh l-​apprezzament tagħhom? Huma jagħmlu dan billi jagħtu lil Alla “servizz sagru lejl u nhar.”​—Rivelazzjoni 7:​15-​17.

²⁰ Ir-​rapport minn madwar id-​dinja għas-​sena taʼ servizz 2006, li jidher f’paġni 27 sa 30, jagħti evidenza ċara li dawn il-​ministri leali tassew qed jagħtu “servizz sagru lejl u nhar” lil Ġeħova. Fil-​fatt, matul dik is-​sena biss, huma flimkien mal-​fdal relattivament żgħir tal-​Kristjani midlukin iddedikaw total taʼ 1,333,966,199 siegħa fil-​ministeru pubbliku—li hu ekwivalenti għal iktar minn 150,000 sena!

Kompli Uri Apprezzament!

21, 22. (a) Rigward it-​turija t’apprezzament, il-​Kristjani għala għandhom joqogħdu attenti b’mod speċjali llum? (b) X’se jiġi kunsidrat fl-​artiklu li jmiss?

²¹ Meta jittrattaw mal-​bnedmin imperfetti, Ġeħova u Ibnu juru apprezzament profond li tassew jispikka. Madankollu, b’dispjaċir il-​maġġuranza mill-​umanità ftit jaħsbu f’Alla u minflok, jiffokaw fuq dak li jikkonċernahom. Filwaqt li ddeskriva lin-​nies li kienu se jkunu ħajjin “fl-​aħħar jiem,” Pawlu kiteb: “Il-​bnedmin jingħataw għall-​imħabba tagħhom infushom u tal-​flus . . . [“assolutament,” Phillips] bla gratitudni.” (2 Timotju 3:​1-5, Għaqda Biblika Maltija) Dawn l-​uħud kemm huma f’kuntrast mal-​Kristjani veri, li permezz taʼ talb u ubbidjenza mill-​qalb kif ukoll b’servizz b’ruħhom kollha juru apprezzament għal dak kollu li Alla għamel magħhom!—Salm 62:9 (62:​8, NW); Marku 12:30; 1 Ġwanni 5:3.

²² Fl-​artiklu li jmiss, se nikkunsidraw xi wħud mill-​ħafna provvedimenti spiritwali li Ġeħova tana bi mħabba. Hekk kif nirriflettu dwar dawn l-​‘għotjiet tajbin,’ jalla l-​apprezzament tagħna jikber saħansitra iktar.​—Ġakbu 1:​17.

Int Kif Twieġeb?

• Ġeħova kif wera li hu Alla li japprezza?

• Kif nistgħu nferrħu qalb Ġeħova meta nkunu waħedna?

• Ġesù b’liema modi wera l-​apprezzament?

• Il-​fatt li Ġesù għex bħala bniedem kif għenu jkun ħakkiem li juri mogħdrija u apprezzament?

[Stampa f’paġna 17]

L-​istess bħalma omm titgħaxxaq minħabba xi azzjoni sempliċi taʼ wliedha, Ġeħova japprezza meta nagħtuh l-​aħjar tagħna