Ġeħova Jħobb il-​Ġustizzja

“Jien hu l-​Mulej, li nħobb [“il-​ġustizzja,” “NW”].”—ISAIJA 61:8.

1, 2. (a) Xi jfissru l-​kliem “ġustizzja” u “inġustizzja”? (b) Il-Bibbja x’tgħid dwar Ġeħova u l-​kwalità tiegħu tal-​ġustizzja?

IL-​ĠUSTIZZJA hija spjegata bħala ‘l-​kwalità li wieħed ikun imparzjali, ġust, jaġixxi fi qbil maʼ dak li hu moralment dritt u tajjeb.’ L-​inġustizzja tinvolvi li wieħed ma jimxix sew, ikun preġudikat, ħażin, iweġġaʼ lil oħrajn mingħajr ma jistħoqqilhom.

² Kważi 3,500 sena ilu, Mosè kiteb dwar is-​Sovran Universali, Ġeħova: “Ilkoll ġusti t-​triqat tiegħu. Alla taʼ kelmtu u ma jqarraqx.” (Dewteronomju 32:4) Iktar minn sebaʼ sekli wara, Alla ispira lil Isaija biex iniżżel bil-​miktub dan il-​kliem: “Jien hu l-​Mulej, li nħobb [“il-​ġustizzja,” NW].” (Isaija 61:8) Imbagħad, fl-​ewwel seklu, Pawlu esklama: “Alla hu inġust? Jalla qatt ma jiġri dan!” (Rumani 9:14) U fl-​istess seklu, Pietru ddikjara: “Alla mhux parzjali, imma f’kull ġens min jibżaʼ minnu u jagħmel is-​sewwa hu aċċettat minnu.” (Atti 10:​34, 35) Iva, “il-​Mulej iħobb is-​sewwa,” jew il-​“ġustizzja” (NW).—Salm 37:28; Malakija 3:6.

L-​Inġustizzja Tinfirex

3. Kif bdiet l-​inġustizzja fuq l-​art?

³ Il-​ġustizzja ma tantx issibha llum. Aħna nsiru vittmi t’għemejjel inġusti fi kwalunkwe livell tas-​soċjetà—fuq il-​post tax-​xogħol, fl-​iskola, fil-​kuntatt li jkollna maʼ dawk fl-​awtorità, u b’modi oħrajn—saħansitra fil-​familja. M’għandniex xi ngħidu, dawn l-​inġustizzji m’humiex ġodda. Il-​familja umana bdiet iġġarrabhom minn meta l-​ewwel ġenituri tagħna rribellaw u saru bla liġi, billi ġew imqanqlin mill-​ħliqa spirtu ribelluż li sar magħruf bħala Satana x-​Xitan. Żgur li ma kienx ġust li Adam, Eva, u Satana użaw ħażin l-​għotja meraviljuża tagħhom tal-​libertà taʼ l-​għażla li kien tahom Ġeħova. L-​għemejjel ħżiena tagħhom irriżultaw fi tbatija tassew kbira u fil-​mewt tal-​familja umana kollha.—Ġenesi 3:​1-6; Rumani 5:12; Ebrej 2:14.

4. L-​inġustizzja kemm ilha tagħmel parti mill-​istorja umana?

⁴ Għal iktar minn 6,000 sena minn meta seħħet ir-​ribelljoni fl-​Għeden, l-​inġustizzja minn dejjem kienet parti mis-​soċjetà umana. Dan tistaʼ tistennieh ladarba Satana huwa l-​alla taʼ din id-​dinja. (2 Korintin 4:4) Hu giddieb u missier il-​gidba, wieħed li jimmalafama u jirreżisti lil Ġeħova. (Ġwanni 8:44) Hu minn dejjem wettaq inġustizzji tassew kbar. Per eżempju, sa ċertu punt minħabba l-​influwenza mill-​agħar taʼ Satana qabel id-​Dilluvju taʼ żmien Noè, Alla nnota li “l-​ħażen tal-​bnedmin kien kiber fuq l-​art; u f’qalbu ma kienx għajr li jfassal il-​ħażen il-​jum kollu.” (Ġenesi 6:5) Din is-​sitwazzjoni kienet għadha teżisti maʼ kullimkien fi żmien Ġesù. Hu qal: “Biżżejjed għal kull ġurnata l-​ħażen tagħha,” jiġifieri l-​problemi inkwetanti tagħha, bħall-​inġustizzja. (Mattew 6:34) Il-​Bibbja tgħid b’tant eżattezza: “S’issa l-​ħolqien kollu għadu jokrob u jħoss l-​uġigħ flimkien.”—Rumani 8:22.

5. Għala hawn iktar inġustizzji fi żmienna minn qatt qabel?

⁵ Għalhekk, l-​affarijiet ħżiena li jirriżultaw f’inġustizzji kbar ilhom iseħħu tul l-​istorja umana. Issa s-​sitwazzjoni hija agħar milli qatt kienet. Għala? Għaliex is-​sistema preżenti li tiċħad lil Alla ilha “fl-​aħħar jiem” tagħha għal ħafna snin, u qed tesperjenza “żminijiet kritiċi li diffiċli biex issib tarfhom” hekk kif qed toqrob lejn tmiemha. Il-​Bibbja bassret li matul dan il-​perijodu fl-​istorja, in-​nies kellhom ikunu “jħobbu lilhom infushom, iħobbu l-​flus, minfuħin bihom infushom, suppervi, midgħija . . . ingrati, żleali, mingħajr imħabba naturali, ma jkunux iridu jiftiehmu, kalunnjaturi, mingħajr rażna, feroċi, mingħajr imħabba għat-​tajjeb, tradituri, rashom iebsa, imkabbrin.” (2 Timotju 3:​1-5) Drawwiet ħżiena bħal dawn iwasslu għal kull tip taʼ inġustizzja.

6, 7. Liema inġustizzji nikktu lill-​familja umana fi żmienna?

⁶ F’dawn l-​aħħar mitt sena rajna inġustizzji fuq skala li qatt m’eżistiet qabel. Raġuni waħda hi li f’dawn is-​snin kien hawn iktar gwerer minn qatt qabel. Per eżempju, xi studjużi taʼ l-​istorja jistmaw li fit-​tieni gwerra dinjija biss, kien hemm total taʼ xi 50 miljun sa 60 miljun ruħ li ġew maqtulin. Il-​biċċa l-​kbira minnhom kienu pajżana—irġiel, nisa, u tfal innoċenti. Minn meta ntemmet dik il-​gwerra, miljuni oħrajn inqatlu fi ġlied ieħor, u għal darb’oħra l-​maġġuranza kienu nies pajżana. Satana jinkuraġġixxi l-​inġustizzji għaliex jinsab inkorlat, minħabba li jaf li dalwaqt Ġeħova se jirbaħlu għalkollox. Il-​profezija tal-​Bibbja tpoġġiha b’dan il-​mod: “Ix-​Xitan niżel għandkom u għandu rabja kbira, għax jaf li żmien qasir baqagħlu.”—Rivelazzjoni 12:12.

⁷ Globalment jintefqu madwar Lm330 biljun fil-​militar kull sena. Mijiet taʼ miljuni taʼ nies m’għandhomx il-​bżonnijiet tal-​ħajja, allura immaġina kemm jistgħu jagħmlu ġid dawk il-​flus li kieku jintefqu għal skopijiet paċifiċi. Xi biljun ruħ m’għandhomx biżżejjed ikel, waqt li oħrajn għandhom bl-​abbundanza. Skond sors tal-​Ġnus Magħquda, kull sena xi ħames miljun tifel u tifla jmutu minħabba l-​effetti tal-​ġuħ. X’inġustizzja! Ukoll, ikkunsidra l-​ħafna trabi innoċenti li jinqatlu permezz taʼ l-​abort. Il-​kalkoli jvarjaw minn 40 miljun sa 60 miljun madwar id-​dinja kull sena! X’inġustizzja tal-​biżaʼ!

8. B’liema mod uniku tistaʼ tinġieb ġustizzja vera għall-​umanità?

⁸ Il-​ħakkiema umani m’humiex qed isibu soluzzjonijiet għall-​problemi kbar li qed iħabbtu lill-​umanità llum; lanqas ma se titjieb is-​sitwazzjoni bl-​isforzi tal-​bniedem. Il-​Kelma t’Alla bassret li fi żmienna “n-​nies mill-​agħar u l-​impusturi jibqgħu sejrin mill-​ħażin għall-​agħar, iqarrqu u jitqarrqu.” (2 Timotju 3:13) L-​inġustizzja tant hi parti integrali mill-​ħajja taʼ kuljum li l-​bniedem ma jistax ineħħiha. L-​Alla tal-​ġustizzja biss jistaʼ jneħħiha. Hu biss jistaʼ jneħħi lil Satana, lid-​demonji, u lill-​bnedmin mill-​agħar.—Ġeremija 10:​23, 24.

Huwa Raġunevoli li Xi Wħud Jinkwetaw

9, 10. Asaf għala beda jaqtaʼ qalbu?

⁹ Fil-​passat, anki xi kittieba tal-​Bibbja kienu jinkwetaw dwar għala Alla ma kienx diġà ħa passi fl-​affarijiet tal-​bniedem u ma ġabx il-​ġustizzja vera u s-​sewwa. Ejja nieħdu, per eżempju, bniedem partikulari li għex fiż-​żminijiet Bibliċi. L-​ewwel vers (jew is-​sopraskrizzjoni fin-​NW) taʼ Salm 73 jagħti l-​isem t’Asaf, li jirreferi jew għal mużiċist Levita prominenti matul il-​ħakma tas-​Sultan David jew għall-​mużiċisti tad-​dar li tagħha Asaf kien kap tad-​dar paterna. Asaf u d-​dixxendenti tiegħu kitbu ħafna kompożizzjonijiet mużikali li ntużaw fil-​qima pubblika. Madankollu, f’ċertu perijodu taʼ ħajtu, il-​kittieb taʼ dan is-​salm beda jħossu mnikket spiritwalment. Hu ra l-​prosperità materjali taʼ l-​irġiel mill-​agħar, u nnota li spiss kienu jidhru kuntenti b’ħajjithom, mingħajr ma kienu qed jesperjenzaw konsegwenzi ħżiena.

¹⁰ Hemmhekk naqraw: “Ġietni l-​għira għall-​kburin, xħin rajt il-​ħżiena jimxu ’l quddiem. Għax dawn ma għandhom ebda tbatija, qawwijin u sħaħ f’ġisimhom. M’għandhomx taħbit bħall-​bnedmin tad-​dinja; m’humiex imsawwtin maʼ wlied Adam.” (Salm 73:​2-8) Imma maż-​żmien dan il-​kittieb tal-​Bibbja rrealizza li ħarsa negattiva bħal din kienet żbaljata. (Salm 73:​15, 16) Is-​salmista pprova jirranġa l-​ħsieb tiegħu, imma hu ma setax jifhem għalkollox għala l-​ħżiena dehru li kienu qed jaħarbu mill-​kastig waqt li dawk li kellhom attitudni xierqa spiss kienu jbatu.

11. X’fehem is-​salmista Asaf?

¹¹ Maż-​żmien, dan ir-​raġel leali tal-​qedem fehem x’kien hemm merfugħ għall-​ħżiena—li fl-​aħħar mill-​aħħar Ġeħova kien se jirranġa l-​kwistjoni. (Salm 73:​17-19) David kiteb: “Ittama fil-​Mulej u ħares triqtu, hu jerfgħek biex tikseb l-​art; mbagħad tara l-​ħżiena meqruda.”—Salm 37:​9, 11, 34.

12. (a) X’inhu l-​iskop taʼ Ġeħova dwar il-​ħażen u l-​inġustizzji? (b) Kif tħossok dwar is-​soluzzjoni tal-​problema taʼ l-​inġustizzja?

¹² Mingħajr ebda dubju, l-​iskop taʼ Ġeħova huwa li fiż-​żmien xieraq jelimina l-​ħażen mill-​art u l-​inġustizzji li dan iġib miegħu. Anki l-​Kristjani leali għandhom jiftakru dwar dan il-​fatt regolarment. Ġeħova se jneħħi lil dawk li jmorru kontra r-​rieda tiegħu, u hu se jippremja lil dawk li jgħixu fi qbil magħha. “Għajnejh fuq il-​bnedmin jitfaʼ, bi xfar għajnejh jiflihom. Jgħarbel il-​Mulej il-​ġust u l-​ħażin; hu jobgħod ’il min iħobb id-​dnewwa. Xita taʼ ġamar u kubrit jitfaʼ fuq il-​ħżiena; riħ jikwi . . . Għax ġust hu l-​Mulej, u jħobb il-​ġustizzja; wiċċu jdawwar lejn min hu sewwa.”—Salm 11:​4-7.

Dinja Ġdida taʼ Ġustizzja

13, 14. Is-​sewwa u l-​ġustizzja għala se jirrenjaw fid-​dinja l-​ġdida?

¹³ Meta Ġeħova jeqred lil din is-​sistema inġusta fil-​kontroll taʼ Satana, Hu se jġib dinja ġdida glorjuża. Din se tkun kontrollata mis-​Saltna tas-​sema t’Alla, li Ġesù għallem lis-​segwaċi tiegħu biex jitolbu għaliha. Minflok il-​ħażen u l-​inġustizzji se jkun hawn is-​sewwa u l-​ġustizzja, għaliex imbagħad se tiġi mwieġba għalkollox it-​talba: “Ħa tiġi saltnatek. Ħa jkun li trid int, kif fis-​sema, ukoll fuq l-​art.”—Mattew 6:10.

¹⁴ Il-​Bibbja tgħidilna liema tip taʼ ħakma nistgħu nistennew, ħakma li kulmin hu rett issa qed jixxennaq għaliha. Salm 145:16 imbagħad se jitwettaq għalkollox: “Int [Alla Ġeħova] tiftaħ idek, u xxabbaʼ ’l kulħadd bil-​ġid.” Iktar minn hekk, Isaija 32:1 jgħid: “Araw, sultan [Ġesù Kristu fis-​sema] għad isaltan bil-​ġustizzja, u prinċpijiet [ir-rappreżentanti taʼ Kristu fuq l-​art] jaħkmu bis-​sewwa.” Dwar is-​Sultan Ġesù Kristu, Isaija 9:6 (9:​7, NW) ibassar: “Kbira tkun setegħtu, u s-​sliem bla qjies fuq it-​tron taʼ David u s-​saltna tiegħu. Hu jwettaqha u jsaħħaħha bil-​ħaqq u s-​sewwa, minn issa u għal dejjem. [“L-​istess żelu taʼ Ġeħova taʼ l-​armati se jagħmel dan,” NW].” Tistaʼ tara lilek innifsek tgħix taħt ħakma bħal din?

15. Ġeħova x’se jagħmel għall-​umanità fid-​dinja l-​ġdida?

¹⁵ Fid-​dinja l-​ġdida t’Alla, mhux se jibqaʼ jkollna għalxiex nesprimu l-​kliem li nsibu f’Koħèlet 4:1: “Mbagħad dort biex nara l-​moħqrijiet kollha li jsiru taħt ix-​xemx. Rajt il-​maħqurin jibku bla ma għandhom min ifarraġhom; rajt il-​qawwa li biha jaħqruhom u li ma hemmx min ifarraġhom.” Huwa minnu li bil-​moħħ imperfett tagħna, huwa diffiċli nimmaġinaw sempliċement kemm se tkun meraviljuża dik id-​dinja ġdida tas-​sewwa. Il-​ħażen mhux se jkun iktar; minflok, kull jum se jkun mimli b’affarijiet tajbin. Iva, Ġeħova se jikkoreġi kulma hu ħażin, u se jagħmel dan b’mod li ma nistgħux nimmaġinawh. Kemm hu xieraq li Alla Ġeħova ispira lill-​appostlu Pietru biex jikteb: “Hemm smewwiet ġodda u art ġdida li aħna qed nistennew skond il-​wegħda tiegħu, u f’dawn tgħammar il-​ġustizzja”!—2 Pietru 3:13.

16. Is-​“smewwiet ġodda” kif ġew stabbiliti, u l-​“art ġdida” f’liema sens qed tiġi stabbilita llum?

¹⁶ Tabilħaqq, is-​“smewwiet ġodda,” il-​gvern tas-​sema t’Alla f’idejn Kristu, diġà ġew stabbiliti. Dawk li se jifformaw il-​qalba taʼ “l-​art ġdida,” soċjetà fuq l-​art taʼ wħud b’attitudni tajba, qed jinġabru matul dawn l-​aħħar jiem. Diġà hemm kważi sebaʼ miljuni, f’minn taʼ l-​inqas 235 pajjiż u f’xi 100,000 kongregazzjoni. Dawn il-​miljuni qed jitgħallmu l-​mogħdijiet sewwa u ġusti taʼ Ġeħova, u b’riżultat taʼ dan, madwar id-​dinja huma jgawdu l-​unità li hija ssodata bl-​imħabba Kristjana. L-​unità tagħhom hija l-​iktar waħda li tispikka u dejjiema li qatt eżistiet fl-​istorja tad-​dinja, unità li tisboq kwalunkwe ħaġa li jesperjenzaw is-​sudditi taʼ Satana. Imħabba u unità bħal dawn huma dehra bil-​quddiem taż-​żmien meraviljuż li se jkun hemm fid-​dinja l-​ġdida t’Alla, li se tkun immexxija mis-​sewwa u l-​ġustizzja.—Isaija 2:​2-4; Ġwanni 13:​34, 35; Kolossin 3:14.

L-​Attakk taʼ Satana Se Jfalli

17. L-​attakk finali taʼ Satana fuq il-​poplu taʼ Ġeħova għala se jfalli żgur?

¹⁷ Satana u s-​segwaċi tiegħu dalwaqt se jiħduha kontra l-​aduraturi taʼ Ġeħova biex jipprovaw jeliminawhom. (Eżekjel 38:​14-23) Dan l-​attakk se jkun parti minn dik li Ġesù sejħilha “tribulazzjoni kbira li qatt ma kien hawn bħalha mill-​bidu tad-​dinja s’issa, le, lanqas jerġaʼ jkun hawn.” (Mattew 24:21) Se jirnexxi l-​attakk taʼ Satana? Le. Il-​Kelma t’Alla tiżgurana: “Il-​Mulej iħobb is-​sewwa [“il-​ġustizzja,” NW], u ma jitlaqx it-​twajbin tiegħu; hu jħarishom għal dejjem, imma wlied il-​ħżiena jeqridhom. Il-​ġusti jirtu l-​art, u jgħammru fiha għal dejjem.”—Salm 37:​28, 29.

18. (a) Alla kif se jirreaġixxi għall-​attakk li Satana se jagħmel dalwaqt fuq il-​poplu Tiegħu? (b) Għala kien taʼ ġid għalik li tirrivedi din l-​informazzjoni bbażata fuq il-​Bibbja dwar ir-​rebħa tal-​ġustizzja?

¹⁸ L-​attakk minn Satana u l-​qtajjaʼ tiegħu fuq il-​qaddejja taʼ Ġeħova se jkun l-​aħħar insult. Ġeħova bassar permezz taʼ Żakkarija: ‘Min imiss lilkom imiss il-​mimmi taʼ għajnejja.’ (Żakkarija 2:12 [2:​8, NW]) Hu bħallikieku xi ħadd qed idaħħal sebgħu f’għajn Ġeħova. Hu se jirreaġixxi mill-​ewwel u se jelimina lil dawk li jwettqu dan l-​għemil. Il-​qaddejja taʼ Ġeħova huma l-​iktar poplu fuq l-​art li juri mħabba, iżomm l-​unità, paċifiku, u jobdi l-​liġi. Allura, dan l-​attakk kontrih se jkun assolutament mhux mistħoqq u inġust. Il-​Wieħed li tassew “iħobb il-​ġustizzja” (NW) mhux se jittollerah. Meta jaġixxi għan-​nom tal-​poplu tiegħu hu se jeqred għal dejjem l-​għedewwa tal-​poplu tiegħu, se tirbaħ il-​ġustizzja, u se jiġu salvati biss dawk li jqimu lill-​uniku Alla veru. Xi ġrajjiet taʼ l-​għaġeb u eċċitanti jinsabu eżatt quddiemna!—Proverbji 2:​21, 22.

Int Kif Twieġeb?

• Għala teżisti ħafna inġustizzja?

• Ġeħova kif se jsolvi l-​problema taʼ l-​inġustizzja fuq l-​art?

• X’laqtek f’dan l-​istudju dwar ir-​rebħa tal-​ġustizzja?

[Stampa f’paġna 23]

Kien hemm ħafna ħażen qabel id-​Dilluvju, u hawn ħafna ħażen f’dawn l-​“aħħar jiem”

[Stampa f’paġna 24]

Fid-​dinja l-​ġdida t’Alla, il-​ġustizzja u s-​sewwa se jieħdu post il-​ħażen