Ersaq Qrib Lejn Alla
Missier li M’Hawnx Bħalu
‘MISSIER.’ Ftit issib kliem li jqanqal emozzjonijiet iktar qawwijin fil-bniedem minn dan. Missier li tassew iħobb lil uliedu jgħinhom jiffjorixxu. Mhux taʼ b’xejn li l-Bibbja tirreferi għal Alla Ġeħova bħala ‘Missier.’ (Mattew 6:9) X’tip taʼ Missier hu Ġeħova? Sabiex inwieġbu, ejja neżaminaw il-kliem li Ġeħova qal lil Ġesù meta dan tgħammed. Wara kollox, il-mod kif missier ikellem lil uliedu juri ħafna x’tip taʼ ġenitur hu.
Madwar Ottubru tas-sena 29 E.K., Ġesù mar fix-Xmara Ġordan biex jitgħammed. Il-Bibbja tirrapporta x’ġara: “Wara li tgħammed, Ġesù minnufih telaʼ mill-ilma; u, ara, is-smewwiet infetħu, u ra l-ispirtu t’Alla nieżel bħal ħamiema u ġej fuqu. U ara! Instemaʼ wkoll leħen mis-smewwiet jgħid: ‘Dan hu Ibni, il-maħbub, li lilu jien approvajt.’”a (Mattew 3:16, 17) Dan il-kliem teneru, imlissen minn Ġeħova nnifsu, jgħidilna ħafna dwar x’tip taʼ Missier hu. Innota tliet affarijiet li Ġeħova qal lil Ibnu.
L-ewwelnett, bil-kliem “dan hu Ibni,” Ġeħova kien fil-fatt qed jgħid, ‘Jien kburi li jien Missierek.’ Missier attent jissodisfa l-bżonn kbir taʼ wliedu li jiġu mfaħħrin u murijin attenzjoni. It-tfal għandhom bżonn jiġu aċċertati li huma apprezzati bħala membri individwali tal-familja. Immaġina x’setaʼ fisser għal Ġesù—anki bħala adult—li jirċievi konsiderazzjoni bħal din mingħand Missieru!
It-tieninett, billi rrefera għal Ibnu bħala “l-maħbub,” Ġeħova wera bil-miftuħ l-imħabba tiegħu għal Ġesù. Fi kliem ieħor, il-Missier kien qed jgħid, ‘Inħobbok.’ Missier tajjeb jgħid lil uliedu li hu jħobbhom ħafna. Kliem bħal dan—flimkien m’affezzjoni xierqa—jgħin lit-tfal jiffjorixxu. Min jaf kif ħass qalbu titqanqal Ġesù meta semaʼ leħen Missieru jesprimi mħabbtu lejh!
It-tieletnett, bil-kliem “jien approvajt,” Ġeħova wera li hu kien japprova lil Ibnu. Kien bħallikieku Ġeħova qed jgħid, ‘Ibni, jien kuntent b’dak li għamilt int.’ Missier li jħobb lil uliedu jfittex opportunitajiet biex jurihom li hu kuntent bl-affarijiet tajbin li jgħidu jew jagħmlu. It-tfal jissaħħu u jagħmlu l-qalb meta l-ġenituri jesprimu l-approvazzjoni tagħhom. Żgur li Ġesù ħassu inkuraġġit meta semaʼ li kellu l-approvazzjoni taʼ Missieru!
Iva, Ġeħova hu Missier li m’hawnx bħalu. Ma tixxennaqx qalbek li jkollok missier bħal dan? Jekk iva, tistaʼ titfarraġ bl-għarfien li int jistaʼ jkollok relazzjoni maʼ Ġeħova. Jekk int titgħallem dwaru bil-fidi u tipprova sinċerament tagħmel ir-rieda tiegħu, hu se jaġixxi. Il-Bibbja tgħid: “Ersqu qrib lejn Alla, u hu jersaq qrib lejkom.” (Ġakbu 4:8) X’jistaʼ jagħmlek tħossok iktar fis-sigurtà milli jkollok rabta mill-qrib m’Alla Ġeħova, l-aqwa Missier li tistaʼ timmaġina?
[Nota taʼ taħt]
a Skond l-istess rakkont li nsibu fl-Evanġelju taʼ Luqa, Ġeħova uża l-pronom persunali “int,” u qal: “Int Ibni, il-maħbub; jien approvajtek.”—Luqa 3:22.