Il-​124 Gradwazzjoni taʼ Gilegħad

Il-​Missjunarji Huma Mqabblin maʼ Ġurati

KULL sitt xhur, l-​Iskola taʼ Gilegħad (Watchtower Bible School of Gilead) ikollha programm għall-​gradwazzjoni li għalih tiġi mistiedna l-​familja Betel kollha taʼ l-​Istati Uniti. Fit-​8 taʼ Marzu, 2008, mistidnin minn iktar minn 30 pajjiż ngħaqdu mal-​familja Betel għall-​gradwazzjoni tal-​124 klassi taʼ l-​Iskola taʼ Gilegħad. Is-​6,411-il persuna preżenti ferħu maʼ l-​istudenti f’din il-​ġurnata speċjali tagħhom.

Iċ-chairman tal-​programm, Stephen Lett tal-​Ġemgħa li Tiggverna, beda l-​programm bit-​taħdita “Morru mal-​Ġurati Figurattivi taʼ Ġeħova.” Rivelazzjoni 9:1-4 jqabbel lil grupp żgħir taʼ Kristjani midlukin li rkupraw mill-​istat taʼ inattività spiritwali li kienu fih fl-​1919 maʼ qatgħa ġurati li f’salt wieħed bdew jaħdmu. L-​istudenti ġew imfakkrin li bħala membri tan-​“nagħaġ oħrajn,” huma ngħaqdu maʼ din il-​qatgħa figurattiva taʼ ġurati.—Ġw. 10:16.

Lon Schilling, membru tal-​Kumitat tal-​Fergħa taʼ l-​Istati Uniti, segwa bit-​taħdita “Kunu Kumpliment Għal Xulxin.” Din kienet ibbażata fuq l-​eżempju Bibliku t’Akwila u Prixilla (jew, Priska), koppja miżżewġa Kristjana taʼ l-​ewwel seklu. (Rum. 16:3, 4) Il-​klassi taʼ Gilegħad kienet magħmula minn 28 koppja miżżewġa. Ġew imfakkrin li sabiex ikollhom suċċess bħala missjunarji, huma kien se jkollhom bżonn jibqgħu jsaħħu r-​rabta taż-​żwieġ tagħhom. Il-​Bibbja qatt ma tirreferi għal Akwila mingħajr ma ssemmi lil martu Prixilla. Għalhekk, l-​appostlu Pawlu u l-​kongregazzjoni kienu jqisuhom bħala tim. Bl-​istess mod, il-​koppji missjunarji taʼ llum għandhom jaħdmu flimkien, iqimu flimkien, u jiffaċċjaw flimkien l-​isfidi uniċi li jġib miegħu inkarigu f’pajjiż barrani, u b’hekk ikunu taʼ kumpliment għal xulxin.—Ġen. 2:18.

It-taħdita taʼ wara, intitolata “Wieġeb b’Mod Favorevoli għat-​Tjubija taʼ Ġeħova,” ngħatat minn Guy Pierce tal-​Ġemgħa li Tiggverna. Ħuna Pierce spjega li l-​fatt li tkun tajjeb ifisser iktar milli ma tagħmilx dak li hu ħażin. Persuna tajba tagħmel affarijiet tajbin għall-​ġid t’oħrajn. Alla Ġeħova huwa tajjeb fis-​sens assolut. (Żak. 9:16, 17) It-​tjubija u l-​imħabba t’Alla jistgħu jimmotivawna biex nagħmlu affarijiet tajbin għal oħrajn. Filwaqt li faħħar lill-​istudenti, Ħuna Pierce kkonkluda billi qalilhom: “Sejrin tajjeb. Aħna fiduċjużi li se tkomplu twieġbu b’mod favorevoli għat-​tjubija t’Alla billi tagħmlu l-​ġid fi kwalunkwe inkarigu li Alla Ġeħova jagħtikom fil-​futur.”

Imbagħad, Michael Burnett, ħu li qabel kien missjunarju u li reċentement ngħata l-​inkarigu bħala struttur f’Gilegħad, ippreżenta t-​taħdita intitolata “Ilbisha Bħala Strixxa fuq Ġbinek Bejn Għajnejk.” L-​Israelin, li bħallikieku kienu lebsin “strixxa” fuq ġbinhom bejn għajnejhom, kellhom jiftakru fil-​ħelsien mirakoluż mill-​Eġittu li Ġeħova kien wettaq għan-​nom tagħhom. (Eżo. 13:16) L-​istudenti ġew imwissijin biex jiftakru l-​istruzzjoni abbundanti li rċivew fl-​Iskola taʼ Gilegħad bħallikieku kienu qed jilbsuha bħala strixxa fuq ġbinhom bejn għajnejhom. Ħuna Burnett enfasizza l-​bżonn li jkunu umli u modesti u li japplikaw prinċipji Bibliċi meta jkollhom xi nuqqas taʼ ftehim x’jirranġaw maʼ missjunarji sħabhom u oħrajn.—Mt. 5:23, 24.

Mark Noumair, li ilu jaqdi bħala struttur taʼ Gilegħad għal ħafna snin, ta t-​taħdita “Liema Għanja Se Titkanta Dwarek?” Fi żmien il-​qedem, id-​drawwa kienet li r-​rebħiet tal-​gwerra jiġu ċelebrati b’għanja. Waħda minn dawn l-​għanjiet kixfet li t-​tribujiet taʼ Ruben, Dan, u Aser ma kinux lesti li jistinkaw, filwaqt li t-​tribù taʼ Żebulun ġie mfaħħar għall-​ispirtu taʼ ssagrifikar li wera. (Mħ. 5:16-18) Bħall-​kliem taʼ xi għanja, l-​azzjonijiet taʼ kull Kristjan eventwalment isiru magħrufin minn oħrajn. Iż-​żelu taʼ individwu għax-​xogħol t’Alla u l-​lealtà li jibqaʼ juri lejn id-​direzzjoni teokratika se jibnu reputazzjoni tajba maʼ Ġeħova u se jservu bħala eżempju tajjeb għal ħutu. Hekk kif oħrajn fil-​kongregazzjoni jisimgħu l-​għanja figurattiva li tinkiteb bl-​azzjonijiet tagħna, huma jiġu mqanqlin jimitaw dak l-​eżempju tajjeb.

Bħala parti mit-​taħriġ taʼ Gilegħad, l-​istudenti tal-​124 klassi flimkien qattgħu total taʼ madwar 3,000 siegħa fix-​xogħol taʼ l-​ippridkar. Bit-​tema “Segwi t-​Tmexxija taʼ l-​Ispirtu Qaddis,” l-​istudenti rrakkontaw lil Sam Roberson, tad-​Dipartiment taʼ l-​Iskejjel Teokratiċi, diversi esperjenzi mis-​servizz taʼ l-​għalqa, li xi wħud minnhom irreċtawhom. Wara dawn l-​esperjenzi inkuraġġanti, Patrick LaFranca, mill-​Kumitat tal-​Fergħa taʼ l-​Istati Uniti, intervista lil xi gradwati taʼ Gilegħad li issa qed jaqdu f’pajjiżi differenti. L-​istudenti apprezzaw il-​pariri prattiċi li rċivew mingħand dawn l-​aħwa.

Anthony Morris tal-​Ġemgħa li Tiggverna ta l-​aħħar taħdita intitolata “Ftakar, l-​Affarijiet li Jidhru Huma Temporanji.” L-​Iskrittura twissina biex niffokaw fuq il-​barkiet futuri mingħand Ġeħova minflok fuq it-​tribulazzjoni temporanja li għandna mnejn nesperjenzaw bħalissa. (2 Kor. 4:16-18) Il-​faqar estrem, l-​inġustizzja, l-​oppressjoni, il-​mard, u l-​mewt huma realtajiet li lkoll kemm aħna naraw illum. Il-​missjunarji għandhom mnejn jiffaċċjaw xi wħud minn dawn iċ-​ċirkustanzi traġiċi. Imma jekk niftakru li dawn l-​affarijiet huma temporanji se niġu megħjunin nibqgħu bilanċjati spiritwalment u jibqaʼ jkollna tama.

Il-programm ikkonkluda bil-​gradwati kollha fuq il-​platform jisimgħu lil Ħuna Lett jagħti l-​aħħar kummenti tiegħu. Hu inkuraġġiehom biex ma jaqtgħux qalbhom u qalilhom: “Jekk ikollna lil Ġeħova fuq in-​naħa tagħna nistgħu nissaportu kwalunkwe prova u nibqgħu nżommu l-​integrità.” Hu ħeġġeġ lill-​missjunarji l-​ġodda sabiex ikunu bħall-​ġurati, billi jirsistu fis-​servizz taʼ Ġeħova b’determinazzjoni u jibqgħu żelużi, leali, u ubbidjenti għal dejjem.

[Kaxxa f’paġna 30]

STATISTIKI TAL-​KLASSI

Numru taʼ pajjiżi rappreżentati: 7

Numru taʼ pajjiżi li ġew assenjati fihom: 16

Numru taʼ studenti: 56

Età medja: 33.8

Medja taʼ snin fil-​verità: 18.2

Medja taʼ snin fil-​ministeru full-time: 13.8

[Stampa f’paġna 31]

Il-​124 Klassi li Ggradwat mill-​Iskola taʼ Gilegħad

Fil-​lista t’hawn taħt, ir-​ringieli huma nnumerati minn quddiem għal wara, u l-​ismijiet f’kull ringiela huma mniżżlin mix-​xellug għal-​lemin.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Stampa f’paġna 32]

L-​Iskola taʼ Gilegħad qiegħda fil-​Watchtower Educational Center