Imita lil Ġesù​—Agħti Qima Aċċettabbli lil Alla

Alla bi mħabba jistieden lin-​nies “minn kull ġens u tribù u poplu u lsien” biex iqimuh. (Riv. 7:9, 10; 15:3, 4) Dawk li jaċċettaw din l-​istedina jistgħu ‘jaraw is-​sbuħija taʼ Ġeħova.’ (Salm 27:4; 90:17) Bħas-​salmista, huma jgħollu leħinhom biex ifaħħru lil Alla u jgħidu: “Ejjew inqimuh u mmilu quddiemu; ħa ninżlu għarkopptejna quddiem Ġeħova, Dak li għamilna.”—Salm 95:6.

Qima li Għandha Valur Kbir

Bħala l-​Iben uniġenitu t’Alla, Ġesù kellu ħafna opportunitajiet biex jitgħallem il-​mod taʼ ħsieb, il-​prinċipji, u l-​livelli taʼ Missieru. B’hekk, Ġesù setaʼ b’fiduċja jgħid lil oħrajn liema hu l-​aħjar mod kif inqimu lil Ġeħova. Hu qal: “Jien it-​triq, il-​verità, u l-​ħajja. Ħadd ma jiġi għand il-​Missier ħlief permezz tiegħi.”—Ġw. 1:14; 14:6.

Ġesù tana l-​eżempju perfett taʼ sottomissjoni b’umiltà lejn Missieru. Hu qal: “Ma nagħmel xejn minn rajja; imma dan ngħidu skond kif għallimni l-​Missier.” Imbagħad żied: “Dejjem nagħmel dak li jogħġob lilu.” (Ġw. 8:28, 29) Ġesù b’liema modi għoġob lil Missieru?

Mod wieħed kien li Ġesù kien devot kompletament lejn Missieru, u bażikament dak hu li jfisser li tqim lil Alla. Ġesù wera li kellu rabta persunali maʼ Missieru billi obdieh, għamel ir-​rieda Tiegħu, anki meta kellu jissagrifika lilu nnifsu bil-​kbir. (Flp. 2:7, 8) Aspett importanti tal-​qima taʼ Ġesù kien li kellu sehem regulari fix-​xogħol taʼ li jagħmel dixxipli, tant li ġie msejjaħ Għalliem kemm minn dawk li kienu jemmnu u kemm minn dawk li ma kinux. (Mt. 22:23, 24; Ġw. 3:2) Iktar minn hekk, Ġesù ta minnu nnifsu għan-​nom t’oħrajn. Minħabba l-​ispirtu taʼ sagrifiċċju persunali li wera, hu ftit kellu ħin għalih innifsu imma kien jieħu pjaċir jaqdi lil oħrajn. (Mt. 14:13, 14; 20:28) Minkejja li kellu ħafna x’jagħmel, Ġesù dejjem kien iħalli ħin biex jitkellem maʼ Missieru tas-​sema permezz tat-​talb. (Lq. 6:12) Kemm kienet imprezzabbli l-​qima taʼ Ġesù għal Alla!

Il-​Ġlieda Biex Nogħġbu Sew lil Alla

Ġeħova nnota l-​imġiba taʼ Ibnu u esprima l-​approvazzjoni Tiegħu. (Mt. 17:5) Madankollu, Satana x-​Xitan ukoll innota l-​ħajja leali taʼ Ġesù. B’hekk, Ġesù sar il-​mira speċjali taʼ Satana. Għala? Minħabba li l-​ebda bniedem ma kien għadu obda lil Alla kompletament, u b’hekk qiemu bis-​sħiħ. U x-​Xitan ried li jwaqqaf lil Ġesù milli jagħti lil Ġeħova l-​qima li tant tistħoqqlu.—Riv. 4:11.

Fi sforz biex iwaqqaʼ lil Ġesù, Satana ttantah b’offerta attraenti. Hu ħa lil Ġesù “fuq muntanja għolja ħafna, u wrieh is-​saltniet kollha tad-​dinja u l-​glorja tagħhom.” Imbagħad hu qal: “Dawn l-​affarijiet kollha nagħtihomlok jekk int tinxteħet fl-​art u tagħmilli att taʼ qima.” Ġesù kif irreaġixxa? Hu qal: “Mur ’l hemm, Satana! Għax hu miktub, ‘Qim lil Ġeħova Alla tiegħek, u lilu biss agħti servizz sagru.’” (Mt. 4:8-10) Iva, Ġesù rrikonoxxa li kien ikun att idolatruż jekk hu jmil quddiem Satana minkejja l-​benefiċċji li setaʼ deher li kien hemm. Hu ma kien lest li jagħti saħansitra att wieħed taʼ qima lil ħadd ħlief lil Ġeħova.

Fil-każ tagħna, Satana forsi ma joffrilniex is-​saltniet kollha tad-​dinja u l-​glorja tagħhom għall-​qima tagħna. Imma hu xorta għadu jipprova jfixkel il-​qima li Kristjani sinċieri jagħtu lil Alla. Ix-​Xitan iridna nqimu lil xi ħadd ieħor jew xi ħaġa oħra.—2 Kor. 4:4.

Kristu Ġesù nnifsu ta prova li hu kien leali saħansitra sal-​mewt. Billi żamm l-​integrità tiegħu lejn Alla, Ġesù gglorifika lil Ġeħova b’tali mod li ebda bniedem ieħor ma gglorifikah. U inkwantu għalina l-​Kristjani veri llum, aħna nistinkaw biex insegwu l-​mod taʼ ħajja leali taʼ Ġesù billi npoġġu l-​qima tal-​Ħallieq qabel kwalunkwe ħaġa oħra. Tabilħaqq, ir-​relazzjoni tajba tagħna m’Alla hija l-​iktar ħaġa prezzjuża li għandna.

Barkiet li Jiġu Meta Nagħtu Qima Aċċettabbli

Jekk ninkuraġġixxu “l-​qima li hi nadifa u bla tinġis” mill-​ħarsa t’Alla jkollna ħafna barkiet. (Ġak. 1:27) Per eżempju, aħna ngħixu fi żmien meta iktar u iktar nies “iħobbu lilhom infushom, iħobbu l-​flus, [huma] minfuħin bihom infushom,” u huma “mingħajr imħabba għat-​tajjeb.” (2 Tim. 3:1-5) Madankollu, fid-​dar t’Alla, aħna għandna l-​privileġġ li nissieħbu maʼ nies li huma nodfa moralment u li jistinkaw biex iżommu l-​livelli t’Alla biex iqimuh. M’huwiex dan sors taʼ serħan?

Minħabba li nibqgħu mingħajr tebgħa mid-​dinja, għandna saħansitra barka oħra, jiġifieri, kuxjenza nadifa. Irridu nżommu kuxjenza nadifa billi noqogħdu għall-​prinċipji ġusti t’Alla u billi nobdu dawk il-​liġijiet taʼ Ċesari li ma jmorrux kontra l-​liġijiet t’Alla.—Mk. 12:17; Atti 5:27-29.

Qima li tingħata b’ruħna kollha ġġib barkiet oħrajn. Meta niffokaw fuq li nagħmlu r-​rieda t’Alla minflok tagħna nfusna, ħajjitna jkollha iktar tifsir u sodisfazzjon. Minflok ma ngħidu: “Ħa nieklu u nixorbu, għax għada mmutu,” għandna t-​tama, taʼ min joqgħod fuqha, taʼ ħajja taʼ dejjem f’ġenna fuq l-​art.—1 Kor. 15:32.

Il-ktieb taʼ Rivelazzjoni juri li se jkun hemm żmien meta dawk li jibqgħu nodfa quddiem Ġeħova se ‘joħorġu mit-​tribulazzjoni l-​kbira.’ Ir-​rakkont jgħid li “Dak li qiegħed bil-​qiegħda fuq it-​tron jifrex it-​tinda tiegħu fuqhom.” (Riv. 7:13-15) Dak il-​wieħed li qiegħed bil-​qiegħda fuq it-​tron m’hu ħadd ħlief Alla Ġeħova, l-​iktar Persunaġġ glorjuż fl-​univers. Ipprova immaġina x’ferħ se jkun dak meta jilqgħek bħala mistieden fit-​tinda tiegħu, u jipproteġik ħalli ma tiġrilek l-​ebda ħsara! U sa ċertu punt, saħansitra issa nistgħu ngawdu l-​protezzjoni tiegħu.

Iktar minn hekk, dawk kollha li jagħtu qima aċċettabbli lil Alla huma deskritti bħala li huma gwidati lejn “għejun taʼ l-​ilmijiet tal-​ħajja.” Dawn l-​għejun rifreskanti jirrappreżentaw il-​provvedimenti kollha li jagħti Ġeħova biex niksbu l-​ħajja taʼ dejjem. Iva, permezz tal-​fidwa taʼ Kristu, “Alla jixxottalhom kull demgħa minn għajnejhom.” (Riv. 7:17) L-​umanità se tkun megħjuna biex tilħaq il-​perfezzjoni, u dan se jġib ferħ kbir lil dawk li għandhom il-​prospett li jgħixu għal dejjem fuq l-​art. Anki issa, l-​aduraturi henjin t’Alla jgħajtu bil-​ferħ, billi jesprimu l-​apprezzament tagħhom mill-​qalb lil Ġeħova u jqimuh flimkien maʼ dawk li qegħdin fis-​sema u li qed ikantaw: “Kbar u taʼ l-​għaġeb l-​għemejjel tiegħek, Alla Ġeħova, li Tistaʼ Kollox. Ġusti u veri triqatek, Sultan taʼ l-​eternità. Min tassew ma jibżax minnek, Ġeħova, u ma jigglorifikax lil ismek, għax int biss leali? Il-​ġnus kollha jiġu u jqimu quddiemek, għax id-​digrieti ġusti tiegħek saru evidenti.”—Riv. 15:3, 4.

[Stampa f’paġna 27]

Satana x’qed joffrilna għall-​qima tagħna?