Il-​Kelma taʼ Ġeħova Hi Ħajja

Punti Prinċipali mill-​Ittri lil Titu, lil Filemon, u lill-​Ebrej

XI FTIT taż-​żmien wara li jinħeles mill-​ewwel priġunerija tiegħu f’Ruma fis-​sena 61 E.K., l-​appostlu Pawlu jżur il-​gżira taʼ Kreta. Billi jinnota l-​kundizzjoni spiritwali tal-​kongregazzjonijiet t’hemmhekk, hu jħalli lil Titu warajh sabiex isaħħaħhom. Iktar tard, x’aktarx mill-​Maċedonja, Pawlu jikteb ittra lil Titu sabiex jiggwidah fid-​dmirijiet tiegħu u biex juri li hu nnifsu, bħala appostlu, ta l-​awtorità lil Titu biex jagħmel dan ix-​xogħol.

Iktar kmieni, ftit qabel ma nħeles mill-​ħabs fis-​sena 61 E.K., Pawlu kiteb ittra lil Filemon, ħu Kristjan li kien jgħix f’Kolossi. F’din l-​ittra hu jitlob favur persunali lil ħabib.

Madwar is-​sena 61 E.K., Pawlu kiteb ukoll ittra lill-​Kristjani Ebrej li kienu fil-​Lhudija, li turi s-​superjorità tal-​Kristjanità fuq is-​sistema Lhudija. It-​tliet ittri fihom pariri imprezzabbli għalina.—Ebr. 4:12.

IBQAʼ F’SAĦĦTEK SPIRITWALMENT

(Titu 1:1–3:15)

Wara li jipprovdi gwida dwar kif għandhom isiru ‘l-​ħatriet t’anzjani f’belt wara l-​oħra,’ Pawlu jagħti parir lil Titu biex ‘ikompli jwiddeb bl-​aħrax [lir-ribellużi], biex ikunu jistgħu jissaħħu fil-​fidi.’ Hu jwissi lil dawk kollha fil-​kongregazzjonijiet taʼ Kreta biex ‘iwarrbu dak kollu li hu kontra r-​rieda t’Alla u jgħixu b’moħħ f’loku.’—Titu 1:5, 10-13; 2:12.

Pawlu jagħti iktar pariri sabiex jgħin lill-​aħwa fi Kreta ħalli jibqgħu f’saħħithom spiritwalment. Hu jagħti istruzzjonijiet lil Titu biex ‘jaħrab il-​kwistjonijiet bla sens u t-​tilwim fuq il-​Liġi.’—Titu 3:9.

Mistoqsijiet Skritturali Mweġbin:

1:15—Kif jistaʼ “kollox” ikun “nadif għal min hu nadif,” imma mhux nadif “għal dawk li huma mniġġsin u bla fidi”? Sabiex inkunu nafu t-​tweġiba rridu nifhmu dak li Pawlu ried ifisser bil-​kelma “kollox.” Hu ma kienx qed jitkellem fuq affarijiet li huma kundannati direttament fil-​Kelma miktuba t’Alla, imma fuq kwistjonijiet li aduratur jistaʼ jiddeċiedi dwarhom skond il-​kuxjenza tiegħu. Għal individwu li l-​ħsieb tiegħu huwa fi qbil mal-​livelli t’Alla, kwistjonijiet bħal dawn huma nodfa. Għal xi ħadd li l-​ħsieb tiegħu huwa mgħawweġ u li l-​kuxjenza tiegħu hija mniġġsa huma l-​kontra.a

3:5—Kristjani midlukin kif jiġu ‘salvati permezz tal-​ħasil’ u ‘jiġġeddu bl-​ispirtu qaddis’? Huma jiġu ‘salvati permezz tal-​ħasil’ fis-​sens li Alla jaħsilhom, jew inaddafhom, bid-​demm taʼ Ġesù fuq il-​mertu tas-​sagrifiċċju tal-​fidwa. Huma ‘jiġġeddu bl-​ispirtu qaddis’ minħabba li jsiru “ħolqien ġdid” bħala wlied Alla mnisslin mill-​ispirtu.—2 Kor. 5:17.

Lezzjonijiet Għalina:

1:10-13; 2:15. L-​indokraturi Kristjani għandhom juru kuraġġ meta jiġu biex jikkoreġu dak li hu ħażin fil-​kongregazzjoni.

2:3-5. Bħal fl-​ewwel seklu, illum aħwa nisa Kristjani maturi jridu “juru l-​biżaʼ t’Alla fl-​imġiba tagħhom, ma jimmalafamawx, ma jkunux ilsiera taʼ ħafna nbid, imma jkunu għalliema taʼ dak li hu tajjeb.” B’dan il-​mod, huma jistgħu jgħallmu b’mod effettiv fil-​privat “lin-​nisa żgħażagħ” li hemm fil-​kongregazzjoni.

3:8, 14. Huwa “tajjeb u taʼ ġid” meta ‘nikkonċentraw fuq li nagħmlu għemejjel tajbin’ għax dan jgħinna nagħmlu l-​frott fis-​servizz t’Alla u jżommna separati mid-​dinja mill-​agħar.

ĦEĠĠEĠ “F’ĠIEĦ L-​IMĦABBA”

(Flm. 1-25)

Filemon jiġi mfaħħar talli huwa eżempju taʼ ‘fidi u mħabba.’ Minħabba li kien sors taʼ inkuraġġiment għal sħabu l-​Kristjani, Pawlu ‘feraħ u tfarraġ ħafna.’—Flm. 4, 5, 7.

Billi jagħti eżempju għall-​indokraturi kollha, Pawlu jittratta l-​kwistjoni sensittiva dwar Oneżimu billi jħeġġeġ “f’ġieħ l-​imħabba” u mhux jordna. Hu jgħid lil Filemon: “Qed niktiblek għax jien fiduċjuż li se tilqaʼ t-​talba tiegħi u naf li se tagħmel saħansitra iktar minn dak li qed ngħidlek.”—Flm. 8, 9, 21.

Mistoqsijiet Skritturali Mweġbin:

10, 11, 18—Oneżimu, li qabel “ma kienx utli,” kif sar “utli”? Oneżimu kien ilsir li ma kienx lest li jaħdem u ħarab mid-​dar taʼ Filemon f’Kolossi u telaq lejn Ruma. Wisq probabbli, Oneżimu wkoll seraq mingħand sidu sabiex ikun jistaʼ jħallas il-​vjaġġ li kien twil 1,400 kilometru. Tabilħaqq, hu ma kienx utli għal Filemon. Iżda, f’Ruma, Oneżimu ġie megħjun minn Pawlu u sar Kristjan. Issa li kien sar ħu spiritwali, dan il-​bniedem li qabel “ma kienx utli” bħala lsir sar “utli.”

15, 16—Pawlu għala ma talabx lil Filemon biex jeħles lil Oneżimu? Pawlu xtaq li jżomm biss maʼ l-​inkarigu li “jippriedka s-​saltna t’Alla u jgħallem fuq il-​Mulej Ġesù Kristu.” Għalhekk, hu għażel li ma jinvolvix ruħu fi kwistjonijiet soċjali, bħal dawk li kienu jikkonċernaw il-​jasar.—Atti 28:31.

Lezzjonijiet Għalina:

2. Filemon għamel id-​dar tiegħu disponibbli għal-​laqgħat Kristjani. Huwa privileġġ li jkollna laqgħa għas-​servizz taʼ l-​għalqa fid-​dar tagħna.—Rum. 16:5; Kol. 4:15.

4-7. Għandna nieħdu l-​inizjattiva biex infaħħru lil sħabna fit-​twemmin li huma eżemplari fil-​fidi u fl-​imħabba.

15, 16. M’għandniex inħallu ġrajjiet diżappuntanti f’ħajjitna jġegħluna nkunu ansjużi żżejjed. Ir-​riżultati jistgħu jkunu taʼ benefiċċju, bħalma ġara fil-​każ t’Oneżimu.

21. Pawlu stenna li Filemon jaħfirlu lil Oneżimu. Aħna bl-​istess mod mistennijin naħfru lil ħuna li forsi jkun offendiena.—Mt. 6:14.

‘IRSISTI LEJN IL-​MATURITÀ’

(Ebr. 1:1–13:25)

Sabiex juri li l-​fidi fis-​sagrifiċċju taʼ Ġesù hija superjuri għall-​għemejjel tal-​Liġi, Pawlu jiġbed l-​attenzjoni lejn kemm hu ferm aqwa l-​Fundatur tal-​Kristjanità, is-​saċerdozju tiegħu, is-​sagrifiċċju tiegħu, u l-​patt il-​ġdid. (Ebr. 3:1-3; 7:1-3, 22; 8:6; 9:11-14, 25, 26) Dan l-​għarfien żgur li għen lill-​Kristjani Ebrej biex jiffaċċjaw il-​persekuzzjoni li batew taħt idejn il-​Lhud. Pawlu jħeġġeġ lill-​Ebrej li kienu sħabu fit-​twemmin sabiex ‘jirsistu lejn il-​maturità.’—Ebr. 6:1.

Kemm hi importanti l-​fidi għal Kristjan? Pawlu jikteb li “mingħajr fidi impossibbli li togħġbu sew” lil Alla. Hu jinkuraġġixxi lill-​Ebrej: “Ħa niġru bis-​sabar it-​tiġrija li tqiegħdet quddiemna,” u nagħmlu dan bil-​fidi.—Ebr. 11:6; 12:1.

Mistoqsijiet Skritturali Mweġbin:

2:14, 15—Jindika l-​fatt li Satana “jistaʼ jikkaġuna l-​mewt” li hu jistaʼ jikkaġuna l-​mewt prematura taʼ min irid hu? Le, ma jindikax hekk. Madankollu, minn mindu beda fit-​triq il-​ħażina li qabad fl-​Għeden, il-​gideb tiegħu kkaġuna l-​mewt minħabba li Adam dineb u għadda d-​dnub u l-​mewt lill-​familja umana. (Rum. 5:12) Iktar minn hekk, l-​aġenti li Satana għandu fuq l-​art ippersegwitaw lill-​qaddejja t’Alla sal-​mewt, saħansitra bħalma għamlu lil Ġesù. Imma dan ma jfissirx li l-​qawwa taʼ Satana hi bla limiti biex joqtol lil kulmin irid hu. Kieku kien hekk, hu żgur li qered għalkollox lill-​aduraturi taʼ Ġeħova żmien twil ilu. Ġeħova jipproteġi lill-​poplu tiegħu bħala grupp u ma jħallix lil Satana jeqridhom kompletament. Anki jekk Alla jippermetti li xi wħud minna jmutu minħabba l-​attakki taʼ Satana, nistgħu nkunu fiduċjużi li Alla se jneħħi kwalunkwe ħsara li tkun saritilna.

4:9-11—Kif nistgħu ‘nidħlu fil-​mistrieħ’ t’Alla? Fl-​aħħar tas-​sitt ijiem tal-​ħolqien, Alla straħ mix-​xogħlijiet tiegħu taʼ ħolqien, u kien fiduċjuż li l-​iskop tiegħu għall-​art u għall-​umanità kien se jitwettaq. (Ġen. 1:28; 2:2, 3) Aħna “nidħlu f’dak il-​mistrieħ” billi nieqfu milli nagħmlu għemejjel li bihom niġġustifikaw lilna nfusna u billi naċċettaw il-​provvediment li għamel Alla għas-​salvazzjoni tagħna. Meta neżerċitaw fidi f’Ġeħova u b’ubbidjenza nsegwu lil Ibnu minflok ma niġru wara interessi egoistiċi, ingawdu barkiet rifreskanti u taʼ serħan kuljum.—Mt. 11:28-30.

9:16—Min hu l-​‘bniedem li għamel’ il-​patt il-​ġdid? Ġeħova huwa l-​Oriġinatur tal-​patt il-​ġdid, filwaqt li Ġesù hu l-​‘bniedem li għamlu.’ Ġesù hu l-​Medjatur taʼ dan il-​patt, u bil-​mewt tiegħu pprovda s-​sagrifiċċju li kien hemm bżonn biex dan il-​patt isir validu.—Lq. 22:20; Ebr. 9:15.

11:10, 13-16—Abraham liema “belt” kien qed jistenna? Din ma kinitx belt letterali imma waħda simbolika. Abraham kien qed jistenna lil “Ġerusalemm tas-​sema,” magħmula minn Kristu Ġesù u l-​144,000 ħakkiem bi sħab miegħu. Dawn il-​ħakkiema bi sħab fil-​glorja tagħhom tas-​sema huma msejħin ukoll “belt qaddisa, Ġerusalemm il-​Ġdida.” (Ebr. 12:22; Riv. 14:1; 21:2) Abraham kien qed iħares ’il quddiem għal ħajja taħt il-​ħakma tas-​Saltna t’Alla.

12:2—X’kien il-​‘ferħ li tqiegħed quddiem’ Ġesù li għalih “issaporta z-​zokk tat-​tortura”? Kien il-​ferħ li jara dak li setaʼ jitwettaq permezz tal-​ministeru tiegħu—inkluż it-​taqdis taʼ isem Ġeħova, l-​ivvindikar tas-​sovranità t’Alla, u l-​fidwa tal-​familja umana mill-​mewt. Ġesù ħares ’il quddiem ukoll għall-​premju taʼ li jaħkem bħala Sultan u jaqdi bħala Qassis il-​Kbir għall-​benefiċċju taʼ l-​umanità.

13:20—Il-​patt il-​ġdid għala jingħad li hu “taʼ dejjem”? Għal tliet raġunijiet: (1) Qatt ma se jiġi mibdul maʼ xi patt ieħor, (2) ir-​riżultati tiegħu huma permanenti, u (3) in-​“nagħaġ oħrajn” se jibqgħu jibbenefikaw mill-​arranġament tal-​patt il-​ġdid wara Armageddon.—Ġw. 10:16.

Lezzjonijiet Għalina:

5:14. Għandna nkunu studenti diliġenti tal-​Kelma t’Alla, il-​Bibbja, u napplikaw dak li nitgħallmu minnha. M’hemmx mod ieħor kif jistaʼ jkollna ‘s-​sensi tagħna mħarrġin biex nagħrfu nagħżlu kemm it-​tajjeb u kemm il-​ħażin.’—1 Kor. 2:10.

6:17-19. Jekk it-​tama tagħna tkun ibbażata fis-​sod fuq il-​wegħdi t’Alla u l-​ħalfa tiegħu se niġu megħjunin biex ma niżvijawx mit-​triq tal-​verità.

12:3, 4. Minflok ma ‘negħjew u nċedu f’ruħna’ minħabba provi żgħar jew oppożizzjoni li għandna mnejn niffaċċjaw, għandna nimxu ’l quddiem lejn il-​maturità u ntejbu l-​abbiltà tagħna biex nissaportu l-​provi. Għandna nkunu determinati li nirreżistu “sad-​demm,” jiġifieri, sal-​mewt.—Ebr. 10:36-39.

12:13-15. M’għandniex inħallu “għerq velenuż,” jew lil xi ħadd fil-​kongregazzjoni li jikkritika l-​mod kif isiru l-​affarijiet, iżommna milli ‘nibqgħu niddrittaw il-​mogħdijiet għal saqajna.’

12:26-28. “L-​affarijiet li ntgħamlu” minn xi ħadd ieħor u mhux minn Alla—is-​sistema dinjija preżenti kollha kemm hi, inkluż is-​“sema” mill-​agħar—se jitheżżu u ma jibqgħux jeżistu. Meta dan iseħħ, huma biss “l-​affarijiet li mhux qed jitheżżu,” jiġifieri, is-​Saltna u dawk li jappoġġawha, li se jibqgħu. Kemm huwa vitali li nipproklamaw biż-​żelu s-​Saltna u ngħixu fi qbil mal-​prinċipji tagħha!

13:7, 17. Jekk inżommu f’moħħna din it-​twissija biex inkunu ubbidjenti u sottomessi lejn l-​indokraturi fil-​kongregazzjonijiet se niġu megħjunin biex nuru spirtu taʼ kooperazzjoni.

[Nota taʼ taħt]