Alla Jirrikkmandalna Mħabbtu

“Il-​qalb tajba mhix mistħoqqa [se] ssaltan bil-​ġustizzja għall-​ħajja taʼ dejjem.”—RUM. 5:21.

1, 2. Liema żewġ għotjiet jistgħu jiġu kunsidrati, u liema hi l-​akbar minnhom?

PROFESSUR mill-​Università taʼ Melbourne, l-​Awstralja, kiteb li l-​liġijiet tal-​Imperu Ruman huma għotja li għandha valur dejjiemi għaċ-​ċivilizzazzjoni. Madankollu, il-​Bibbja tgħallem li Alla tana għotja bil-​wisq iktar taʼ valur u taʼ mħabba. Din l-​għotja hi mezz divin biex ikollok waqfa approvata u ġusta quddiem Alla u l-​prospett taʼ salvazzjoni u ħajja taʼ dejjem.

² F’ċertu sens, kien hemm aspetti legali dwar kif Alla għamel din l-​għotja disponibbli. F’Rumani kapitlu 5, l-​appostlu Pawlu ma ppreżentax dawn l-​aspetti bħala trattat legalistiku tedjanti. Minflok, beda b’din l-​assiguranza eċċitanti: “Ġejna dikjarati ġusti minħabba l-​fidi, [u allura] ħa ngawdu l-​paċi m’Alla permezz tal-​Mulej tagħna Ġesù Kristu.” Dawk li jirċievu l-​għotja t’Alla jiġu mqanqlin biex iħobbuh lura. Pawlu kien wieħed minn dawn. Hu kiteb: “L-​imħabba t’Alla tferrgħet fi qlubna permezz taʼ l-​ispirtu qaddis.”—Rum. 5:1, 5.

3. Liema mistoqsijiet iqumu loġikament?

³ Però, għala kienet neċessarja din l-​għotja taʼ mħabba? Alla kif setaʼ joffriha b’mod ġust u rett? U individwi xi jridu jagħmlu biex jikkwalifikaw għaliha? Ejja nsibu t-​tweġibiet sodisfaċenti u naraw kif jenfasizzaw l-​imħabba t’Alla.

L-​Imħabba t’Alla Kontra d-​Dnub

4, 5. (a) Ġeħova b’liema mod kbir esprima mħabbtu? (b) Għarfien taʼ liema sfond jippermettilna nifhmu Rumani 5:12?

⁴ F’att taʼ mħabba kbira, Ġeħova bagħat lill-​Iben uniġenitu tiegħu biex jgħin lill-​bnedmin. Pawlu esprimieha b’dan il-​mod: “Alla jirrikkmandalna mħabbtu għax, waqt li konna għadna midinbin, Kristu miet għalina.” (Rum. 5:8) Aħseb dwar fatt wieħed imsemmi hawnhekk: “Konna għadna midinbin.” Kulħadd għandu bżonn ikun jaf kif dan seħħ.

⁵ Pawlu ġabar il-​kwistjoni fil-​qosor, billi beda b’dan il-​punt: “Permezz taʼ bniedem wieħed id-​dnub daħal fid-​dinja, u permezz tad-​dnub il-​mewt, u b’hekk il-​mewt infirxet fuq il-​bnedmin kollha għax kollha dinbu.” (Rum. 5:12) Aħna qegħdin f’pożizzjoni biex nifhmu dan għax Alla ġiegħel li jitniżżel rekord bil-​miktub dwar kif bdiet il-​ħajja umana. Ġeħova ħalaq żewġ bnedmin, Adam u Eva. Il-​Ħallieq hu perfett, u anki dawk l-​ewwel żewġ bnedmin, l-​antenati tagħna, kienu perfetti. Alla tahom kmand restrittiv wieħed biss u qalilhom li jekk ma jobdux din il-​liġi kienu se jingħataw is-​sentenza tal-​mewt. (Ġen. 2:17) Madankollu, għażlu li jaġixxu b’mod mill-​agħar, billi kisru l-​kmand raġunevoli t’Alla, u b’hekk ċaħduh bħala l-​Leġislatur u s-​Sovran.—Dt. 32:4, 5.

6. (a) Id-​dixxendenti t’Adam għala mietu kemm qabel u kemm wara li Alla ta l-​Liġi Mosajka? (b) X’jistaʼ jiġi mxebbah maʼ mard li jintiret?

⁶ Kien biss wara li Adam sar midneb li kellu t-​tfal, u b’hekk għadda d-​dnub u l-​effetti kollha tiegħu lilhom ilkoll. M’għandniex xi ngħidu, huma ma kinux kisru l-​liġi divina bħalma kien għamel Adam, u allura ma ġewx akkużati bl-​istess dnub; lanqas ma kienet għadha ngħatat xi kodiċi tal-​liġi. (Ġen. 2:17) Xorta waħda, id-​dixxendenti t’Adam wirtu d-​dnub. B’hekk, id-​dnub u l-​mewt ħakmu saż-​żmien meta Alla ta lill-​Iżraelin kodiċi tal-​liġi, li biċ-​ċar uriet li kienu midinbin. (Aqra Rumani 5:13, 14.) L-​effett tad-​dnub li jintiret jistaʼ jiġi mxebbah maʼ ċertu mard li nistgħu nirtu mingħand il-​ġenituri tagħna. Avolja xi tfal f’familja jirtu xi marda mingħand il-​ġenituri tagħhom, forsi mhux it-​tfal kollha f’dik il-​familja jirtu din il-​marda. Imma dan mhuwiex il-​każ fejn jidħol id-​dnub. Ilkoll writna d-​dnub mingħand Adam, u minħabba f’hekk ilkoll se mmutu. Tistaʼ din is-​sitwazzjoni traġika qatt tingħeleb?

Dak li Alla Pprovda Permezz taʼ Ġesù Kristu

7, 8. Il-​ħajja taʼ żewġt irġiel perfetti, kif wasslet għal riżultati differenti?

⁷ Ġeħova bi mħabba għamel provvediment għall-​bnedmin biex jegħlbu d-​dnub li jintiret. Pawlu spjega li dan kien possibbli permezz taʼ bniedem ieħor, raġel perfett li ġie iktar tard—f’ċertu sens, Adam ieħor. (1 Kor. 15:45) Imma l-​ħajja taʼ kull wieħed miż-​żewġt irġiel perfetti wasslet għal riżultati differenti ferm. Kif?—Aqra Rumani 5:15, 16.

⁸ “L-​għotja m’hijiex bħalma kien in-​nuqqas,” kiteb Pawlu. Adam kien ħati taʼ dan in-​nuqqas, u b’mod ġust ngħata sentenza kerha—miet. Però, ma kienx l-​uniku wieħed li miet. Naqraw: “Bin-​nuqqas taʼ bniedem wieħed mietu ħafna.” Skont il-​livelli tal-​ġustizzja t’Alla, in-​nisel imperfett kollu t’Adam, inkluż aħna, kien ħaqqu l-​istess sentenza li ngħata Adam. Xorta waħda, nistgħu niksbu faraġ mill-​fatt li nafu li r-​raġel perfett, Ġesù, setaʼ jipproduċi riżultat oppost. X’inhu r-​riżultat? Naraw it-​tweġiba meta Pawlu semma “li [bnedmin taʼ kull xorta] jiġu dikjarati ġusti għall-​ħajja.”—Rum. 5:18.

9. Alla x’kien qed jagħmel meta ddikjara lill-​bnedmin ġusti, bħalma ssemma f’Rumani 5:16, 18?

⁹ X’inhu s-​sens tal-​kliem Grieg wara l-​espressjonijiet “dikjarazzjoni taʼ ġustizzja” u “dikjarati ġusti”? Traduttur tal-​Bibbja kiteb hekk dwar l-​idea: “Hi metafora legali li toħroġ punt li hu kważi legali. Titkellem dwar bidla fl-​istat taʼ persuna b’konnessjoni m’Alla, mhux dwar bidla ġewwinija fil-​persuna . . . Fil-​metafora, Alla hu l-​imħallef li wasal għal deċiżjoni favur l-​akkużat, li kien inġieb quddiem il-​qorti t’Alla, biex ngħidu hekk, fuq akkuża taʼ inġustizzja. Imma Alla jeħles lill-​akkużat.”

10. Ġesù x’għamel li pprovda l-​bażi għall-​bnedmin biex jiġu dikjarati ġusti?

¹⁰ “L-​Imħallef taʼ l-​art kollha” fuq liema bażi setaʼ jeħles lil persuna mhix ġusta? (Ġen. 18:25) Alla ħejja l-​pedament billi bagħat lill-​Iben uniġenitu tiegħu fuq l-​art. Ġesù għamel ir-​rieda taʼ Missieru b’mod perfett, minkejja t-​tentazzjonijiet, it-​twaqqigħ għaċ-​ċajt estrem, u l-​abbuż. Żamm l-​integrità tiegħu saħansitra sal-​punt li miet fuq zokk tat-​tortura. (Ebr. 2:10) Billi ssagrifika l-​ħajja umana perfetta tiegħu, Ġesù offra fidwa li setgħet teħles, jew tifdi, lin-​nisel t’Adam mid-​dnub u l-​mewt.—Mt. 20:28; Rum. 5:6-​8.

11. Il-​fidwa hi bbażata fuq liema ekwivalenza?

¹¹ F’vers ieħor, Pawlu sejħilha “fidwa ekwivalenti.” (1 Tim. 2:6) X’kienet l-​ekwivalenza? Adam ġab l-​imperfezzjoni u l-​mewt fuq biljuni, id-​dixxendenti kollha tiegħu. Huwa minnu li Ġesù, bħala bniedem perfett, setaʼ kien is-​sors taʼ biljuni taʼ dixxendenti perfetti.a Għalhekk, kien mifhum li taħlita tal-​ħajja taʼ Ġesù u dik tad-​dixxendenti perfetti potenzjali tiegħu fformat sagrifiċċju ekwivalenti għal dak t’Adam u d-​dixxendenti imperfetti tiegħu. Madankollu, il-​Bibbja ma tgħidx li kwalunkwe nisel potenzjali taʼ Ġesù fforma parti mill-​fidwa. Rumani 5:15-​19 joħroġ il-​punt li l-​mewt taʼ “bniedem wieħed” ipprovda l-​ħelsien. Iva, il-​ħajja perfetta taʼ Ġesù kienet ekwivalenti għal dik t’Adam. L-​iffokar hu, u hekk għandu jkun, fuq Ġesù Kristu waħdu. Għall-​bnedmin taʼ kull xorta sar possibbli li jirċievu l-​għotja b’xejn u l-​ħajja minħabba “att wieħed taʼ ġustifikazzjoni” taʼ Ġesù, il-​ħajja tiegħu t’ubbidjenza u integrità saħansitra sal-​mewt. (2 Kor. 5:14, 15; 1 Pt. 3:18) Dan ir-​riżultat kif seħħ?

Ħelsien Ibbażat fuq il-​Fidwa

12, 13. Dawk li huma dikjarati ġusti għala għandhom bżonn il-​ħniena u l-​imħabba t’Alla?

¹² Alla Ġeħova aċċetta s-​sagrifiċċju tal-​fidwa li offra Ibnu. (Ebr. 9:24; 10:10, 12) Xorta waħda, id-​dixxipli taʼ Ġesù fuq l-​art, inkluż l-​appostli leali tiegħu, baqgħu imperfetti. Għalkemm stinkaw biex jevitaw li jagħmlu l-​ħażen, mhux dejjem irnexxielhom. Għala? Għax kienu wirtu d-​dnub. (Rum. 7:18-​20) Imma Alla setaʼ jagħmel xi ħaġa dwar dan, u hekk għamel. Hu aċċetta l-​“fidwa ekwivalenti” u kien lest li japplikaha għan-​nom tal-​qaddejja umani tiegħu.

¹³ Alla ma kienx obbligat lejn l-​appostli u oħrajn biex japplika l-​fidwa għax kienu wettqu ċerti għemejjel tajbin. Minflok, Alla applika l-​fidwa għan-​nom tagħhom sforz il-​ħniena u l-​imħabba kbira tiegħu. Għażel li jeħles lill-​appostli u oħrajn mill-​ġudizzju kontrihom, billi jqishom bħala li kienu meħlusin mill-​ħtija li tintiret. Pawlu għamel dan ċar: “B’din il-​qalb tajba mhix mistħoqqa ġejtu salvati permezz tal-​fidi; u dan mhux bis-​saħħa tagħkom, imma hi l-​għotja t’Alla.”—Efes. 2:8.

14, 15. Liema premju tqiegħed quddiem dawk li Alla ddikjarahom ġusti, imma x’kellhom jagħmlu xorta waħda?

¹⁴ Aħseb dwar x’għotja hi din, li Dak li Jistaʼ Kollox jaħfer id-​dnub li individwu wiret kif ukoll in-​nuqqasijiet li kkommetta! Ma tistax tgħodd kemm ikkommettew dnubiet individwi qabel ma saru Kristjani; madankollu, fuq il-​bażi tal-​fidwa, Alla jistaʼ jaħfer dawn id-​dnubiet. Pawlu kiteb: “L-​għotja rriżultat minn ħafna nuqqasijiet f’dikjarazzjoni taʼ ġustizzja.” (Rum. 5:16) L-​appostli u oħrajn li rċivew din l-​għotja kollha mħabba (li jiġu dikjarati ġusti) kien se jkollhom ikomplu jqimu lill-​Alla l-​veru bil-​fidi. B’liema premju fil-​futur? “Dawk li jirċievu l-​abbundanza tal-​qalb tajba mhix mistħoqqa u taʼ l-​għotja b’xejn tal-​ġustizzja se jsaltnu fil-​ħajja permezz taʼ persuna waħda, Ġesù Kristu.” Tabilħaqq, l-​għotja tal-​ġustizzja taħdem bil-​kontra. Ir-​riżultat tal-​għotja hu l-​ħajja.—Rum. 5:17; aqra Luqa 22:28-​30.

¹⁵ Dawk li jirċievu din l-​għotja, li jiġu dikjarati ġusti, isiru l-​ulied spiritwali t’Alla. Bħala werrieta sħab maʼ Kristu għandhom il-​prospett li jiġu rxoxtati lejn is-​sema bħala wlied spirti veri biex “isaltnu” maʼ Ġesù Kristu.—Aqra Rumani 8:15-​17, 23.

L-​Imħabba t’Alla Murija lil Oħrajn

16. Dawk li għandhom it-​tama għall-​art, x’għotja jistgħu jirċievu saħansitra issa?

¹⁶ Mhux kull min jeżerċita l-​fidi u jaqdi lil Alla bħala Kristjan leali jistenna li ‘jsaltan’ maʼ Kristu fis-​sema. Ħafna għandhom tama bbażata fuq il-​Bibbja simili għal dik li kellhom il-​qaddejja t’Alla qabel il-​Kristjanità. Jittamaw li jgħixu għal dejjem fuq art magħmula ġenna. Jistgħu huma saħansitra issa jirċievu għotja kollha mħabba mingħand Alla, u b’hekk jitqiesu minnu bħala li huma ġusti b’ħajja fuq l-​art quddiemhom? Skont dak li kiteb Pawlu lir-​Rumani, it-​tweġiba rassiguranti hi iva!

17, 18. (a) Meta nqisu l-​fidi t’Abraham, Alla kif ikkunsidrah? (b) Ġeħova kif setaʼ jqis lil Abraham bħala li hu ġust?

¹⁷ Pawlu ddiskuta eżempju prim, Abraham, raġel taʼ fidi li għex qabel ma Ġeħova pprovda kodiċi tal-​liġi lil Iżrael u ħafna qabel ma Kristu fetaħ it-​triq għall-​ħajja fis-​sema. (Ebr. 10:19, 20) Naqraw: “Ma kienx permezz tal-​liġi li Abraham jew nislu ngħata l-​wegħda li se jkun werriet tad-​dinja, imma kien permezz tal-​ġustizzja minħabba l-​fidi.” (Rum. 4:13; Ġak. 2:23, 24) B’hekk, Alla qies lil-​leali Abraham bħala li kien ġust.—Aqra Rumani 4:20-​22.

¹⁸ Dan ma jistax ifisser li Abraham ma dinibx waqt li kien jaqdi lil Ġeħova tul is-​snin. Le, ma kienx ġust f’dak is-​sens. (Rum. 3:10, 23) Madankollu, fl-​għerf bla limitu tiegħu, Ġeħova kkunsidra l-​fidi eċċezzjonali t’Abraham u l-​għemejjel tiegħu li rriżultaw minn din il-​fidi. B’mod partikulari, Abraham eżerċita l-​fidi fin-​‘nisel’ imwiegħed li kellu jiġi mil-​linja tiegħu. Dan in-​Nisel kien il-​Messija, jew Kristu. (Ġen. 15:6; 22:15-​18) Għalhekk, fuq il-​bażi tal-​“fidwa mħallsa minn Kristu Ġesù,” l-​Imħallef divin jistaʼ jaħfer dnubiet li seħħew fil-​passat. B’hekk, Abraham u rġiel oħrajn taʼ fidi fi żminijiet qabel il-​Kristjanità se jingħataw irxoxt.—Aqra Rumani 3:24, 25; Salm 32:1, 2.

Gawdi Waqfa Ġusta Issa

19. Il-​ħarsa t’Alla lejn Abraham, għala għandha tqawwi qalb ħafna llum?

¹⁹ Il-​fatt li l-​Alla taʼ mħabba qies lil Abraham bħala li hu ġust għandu jqawwi qalb il-​Kristjani veri llum. Ġeħova ma ddikjarahx ġust fis-​sens li jiddikjara lil dawk li jidlek bl-​ispirtu biex ikunu “werrieta bi sħab maʼ Kristu.” Dawk li jifformaw dan il-​grupp, li hu numru limitat, huma “msejħin biex ikunu qaddisin” u huma aċċettati bħala “wlied Alla.” (Rum. 1:7; 8:14, 17, 33) B’kuntrast, Abraham sar “il-​ħabib taʼ Ġeħova”—u dan kien qabel ma ġie offrut is-​sagrifiċċju tal-​fidwa. (Ġak. 2:23; Is. 41:8) Mela, xi ngħidu għall-​Kristjani veri li jittamaw li jgħixu fil-​Ġenna tal-​art restawrata?

20. Alla x’jistenna minn dawk li llum iqishom bħala li huma ġusti, bħalma qies lil Abraham?

²⁰ Dawn ma rċivewx “l-​għotja b’xejn tal-​ġustizzja” bil-​ħajja fis-​sema quddiemhom “permezz tal-​ħelsien bil-​fidwa mħallsa minn Kristu Ġesù.” (Rum. 3:24; 5:15, 17) Minkejja dan, huma jeżerċitaw il-​fidi profonda f’Alla u fil-​provvedimenti tiegħu, u juru l-​fidi tagħhom b’għemejjel tajbin. Wieħed minn dawn l-​għemejjel hu ‘l-​ippridkar tas-​saltna t’Alla u t-​tagħlim fuq il-​Mulej Ġesù Kristu.’ (Atti 28:31) B’hekk, Ġeħova jistaʼ jqis lil dawn bħala li huma ġusti fis-​sens li qies lil Abraham ġust. L-​għotja li jirċievu dawn l-​uħud—il-​ħbiberija m’Alla—hi differenti mill-​“għotja b’xejn” li jirċievu l-​midlukin. Madankollu, ċertament li hi għotja li jaċċettaw bi gratitudni mill-​qalb.

21. Liema benefiċċji huma disponibbli grazzi għall-​imħabba u l-​ġustizzja taʼ Ġeħova?

²¹ Jekk it-​tama tiegħek hi li tgawdi l-​ħajja taʼ dejjem fuq l-​art, għandek tirrealizza li ma ngħatajtx din l-​opportunità minħabba xi att kapriċċuż minn xi ħakkiem uman. Minflok, din l-​opportunità tirrifletti l-​iskop għaqli tas-​Sovran Universali. Ġeħova ħa passi progressivi biex iwettaq l-​iskop tiegħu. Dawn il-​passi huma fi qbil mal-​ġustizzja vera. Iktar minn hekk, irriflettew l-​imħabba kbira t’Alla. Pawlu bir-​raġun setaʼ jgħid: “Alla jirrikkmandalna mħabbtu għax, waqt li konna għadna midinbin, Kristu miet għalina.”—Rum. 5:8.

[Nota taʼ taħt]

Tiftakar Int?

• In-​nisel t’Adam x’wirt irċieva, u b’liema riżultat?

• Kif ġiet provduta fidwa ekwivalenti, u f’liema sens kien hemm ekwivalenza?

• L-​għotja li tiġi dikjarat ġust xi prospett ġabitlek lilek?

[Stampa f’paġna 13]

Ir-​raġel perfett Adam dineb. Ir-​raġel perfett Ġesù offra “fidwa ekwivalenti”

[Stampa f’paġna 15]

X’aħbar tajba —permezz taʼ Ġesù nistgħu niġu dikjarati ġusti!