Il-​Verità Tistaʼ Tbiddillek Ħajtek

GĦANDEK mnejn smajt jew ġejt mgħallem waħda mill-​gidbiet dwar Alla li kixfet din is-​serje t’artikli. Xorta waħda, forsi żżomm lura milli tbiddel it-​twemmin tiegħek, speċjalment jekk ilek tħaddnu żmien twil.

Wieħed jistaʼ jifhem għala jkun hemm inċertezzi bħal dawn. Xi knejjes mhumiex tal-​idea li jqabblu t-​twemmin tagħhom maʼ dak li tgħid il-​Bibbja. Oħrajn jipprovaw jiddefendu t-​tagħlim falz billi jgħidu li l-​Bibbja hi komplikata, u li m’għandhiex tkun mifhuma minn kulħadd. Però, il-​biċċa l-​kbira mid-​dixxipli taʼ Ġesù kienu nies komuni, mingħajr edukazzjoni għolja, u madankollu faċilment fehmu dak li għallimhom.—Atti 4:13.

Forsi taħseb li tkun qed turi nuqqas taʼ fidi jekk tiddeċiedi li teżamina jekk hux minnu t-​twemmin tiegħek. Imma jagħmel sens li Alla mhux se jieħu pjaċir bik jekk tfittex fil-​Bibbja, il-​messaġġ tiegħu lill-​umanità, biex tifhem dak li jitlob minnek? Għall-​kuntrarju, il-​Kelma tiegħu tinkuraġġik biex teżamina l-​Iskrittura personalment, billi tgħid: ‘Agħti prova lilek innifsek dwar x’inhi r-​rieda tajba u aċċettabbli u perfetta t’Alla.’—Rumani 12:2.

Huwa importanti li ssir taf il-​verità dwar Alla, mhux biex sempliċement titgħallem xi ħaġa ġdida, imma għax tistaʼ ttejjiblek ħajtek. (Ġwanni 8:32) Deanne, li ssemmiet fl-​ewwel artiklu, issa bniet il-​fidi tagħha fuq il-​Kelma t’Alla. Hi tirrakkonta: “Qatt ma rrealizzajt li l-​Iskrittura hi daqstant ċara sakemm bdejt nistudja l-​Bibbja. Issa naf li Ġeħova mhuwiex Alla indifferenti, iżda hu Missieri tas-​sema kollu mħabba. Sibt skop veru fil-​ħajja.”

Forsi studjajt il-​Bibbja qabel mingħajr ma ħassejt li bbenefikajt. Jekk inhu hekk, taqtax qalbek. Li tipprova tifhem il-​Bibbja meta ġejt mgħallem gideb dwar Alla hu bħal li tipprova tgħaqqad jigsaw puzzle mingħajr ma jkollok l-​istampa t-​tajba bħala referenza. Għandek mnejn twaħħal ftit biċċiet flimkien imma mbagħad tiddejjaq u tieqaf meta dawn ma jaqblux mal-​istampa sħiħa li ngħatajt. Però, jekk tibda bl-​istampa t-​tajba, il-​biċċiet kollha se jiġu f’posthom.

Tixtieq titgħallem il-​verità dwar Alla? Nistidnuk tikkuntattja lix-​Xhieda taʼ Ġeħova fl-​inħawi tiegħek jew tikteb fl-​indirizz li japplika għalik f’paġna 4 taʼ din ir-​rivista għal studju tal-​Bibbja fid-​dar bla ħlas.

[Kumment f’paġna 9]

‘Agħti prova lilek innifsek dwar x’inhi r-​rieda tajba u aċċettabbli u perfetta t’Alla.’​—RUMANI 12:2