Kaxxa għall-​Mistoqsija

◼ Għalxiex irridu noqogħdu attenti meta nkunu fi sħubija maʼ xi ħadd tas-​sess oppost f’konnessjoni mal-​ministeru tagħna?

Għandna għalxiex nistennew li ħutna rġiel u nisa bi ħsiebhom iżommu maʼ l-​ogħla livell morali rigward il-​kondotta persunali tagħhom. Madankollu, qegħdin ngħixu f’dinja maħmuġa u permissiva li ftit għandha limitazzjonijiet morali. Għalkemm jistaʼ ma jkollna l-​ebda intenzjoni ħażina, irridu noqogħdu għassa l-​ħin kollu sabiex nevitaw li nġibu tmaqdir jew li niġu involuti f’xi ħaġa mhix xierqa. Dan jinkludi li noqogħdu attenti waqt li nkunu qegħdin nieħdu sehem fil-​ministeru.

Fis-servizz taʼ l-​għalqa taʼ spiss niltaqgħu maʼ nies tas-​sess oppost li juru dak li qisu hu interess sinċier fil-​verità. Jekk iż-​żjara għamilnieha waħedna u m’hemm ħadd iktar fid-​dar, is-​soltu jkun aħjar jekk tagħti xiehda fil-​bieb minflok ma tidħol ġewwa. Jekk hemm l-​interess, jistgħu jsiru arranġamenti biex nerġgħu mmorru meta nkunu akkumpanjati minn xi pubblikatur ieħor jew meta jkun hemm xi oħrajn tad-​dar preżenti wkoll. Jekk dan m’huwiex possibbli, ikun għaqli jekk tagħti ż-​żjara lil xi pubblikatur taʼ l-​istess sess bħal taʼ l-​inkwilin. Dan japplika wkoll għal meta nikkonduċu studji tal-​Bibbja maʼ xi ħadd tas-​sess oppost.​—Matt. 10:16.

Hemm bżonn li noqogħdu attenti meta nkunu se nagħżlu lil xi ħadd maʼ min naħdmu fil-​ministeru. Għalkemm pubblikaturi tas-​sess oppost jistgħu xi drabi jaħdmu flimkien, dan l-​aħjar li jsir bħala parti minn grupp. Normalment, anki waqt li nkunu fil-​ministeru, m’huwiex għaqli li nqattgħu xi ħin waħedna maʼ xi ħadd tas-​sess oppost li m’huwiex is-​sieħeb jew sieħba tagħna fiż-​żwieġ. B’hekk, il-​ħu inkarigat mill-​grupp tas-​servizz għandu juża l-​għaqal meta jkun qiegħed jagħżel lill-​pubblikaturi, inklużi ż-​żgħażagħ, biex jaħdmu flimkien.

Billi nużaw dejjem l-​għaqal, nevitaw li ‘nagħtu dak li jistaʼ jkun taʼ tfixkil’ kemm għalina u kemm għal ħaddieħor.​—2 Kor. 6:3.