Ħu L-​Aħjar Li Tistaʼ Mill-​Iskola

¹ Dan huwa ż-​żmien tas-​sena fejn ħafna żgħażagħ jistaqsu: “Diġà rrid nerġaʼ mmur l-​iskola?” Għalkemm jistaʼ jkun hemm xi sfidi u anzjetajiet assoċjati maʼ li jirritornaw lejn l-​iskola, hemm ukoll ħafna benefiċċji li jistgħu jiksbu wħud żgħażagħ li jħabirku sabiex jieħdu l-​aħjar li jistgħu mill-​edukazzjoni tagħhom.

² Edukazzjoni bażika tajba tistaʼ tgħin fil-​progress spiritwali taʼ dak li jkun. Dak li wieħed jagħmel matul żgħożitu għandu x’jaqsam ħafna maʼ dak li jistaʼ jwettaq bħala adult. Anki fil-​każ taʼ l-​iskola, “dak li bniedem jiżraʼ, dak huwa jaħsad.” (Gal. 6:7) Żgħażagħ li bil-​għaqal jistudjaw il-​lezzjonijiet tagħhom taʼ l-​iskola jistgħu jiksbu abbiltajiet li se jagħmluhom iktar taʼ użu għal Jehovah.

³ Huwa meħtieġ ħsieb minn qabel bil-​għaqal biex wieħed jagħżel il-​korsijiet taʼ l-​iskola li jgħoddu għalih. Il-​ġenituri għandhom jgħinu lil uliedhom jagħżlu ’l dawk li joffru l-​iktar taħriġ prattiku sabiex jilħqu miri spiritwali fil-​ħajja. Billi jiżviluppaw l-​abbiltajiet tagħhom, iż-​żgħażagħ se jkollhom il-​vantaġġ li jkunu kapaċi jmantnu lilhom infushom fix-​xogħol taʼ pijunier. L-​edukazzjoni bażika tagħhom għandha tgħinhom ifaħħru lil Jehovah, jaqdu fejn jaqdu.

⁴ Żgħażagħ, ipprovaw ħudu l-​aħjar li tistgħu mis-​snin li tqattgħu fl-​iskola. Waqt li tagħmlu hekk, iffokaw fuq li tgħixu ħajja sinjifikanti fis-​servizz sagru, minflok ma tiġru wara karriera dinjija. Ħabirku biex tużaw ħajjitkom f’li tagħmlu r-​rieda taʼ Jehovah. B’dan il-​mod, se jkollkom suċċess f’ħajjitkom, b’tifħir lil Jehovah.​—Salm 1:3.