Nintensifikaw ix-​Xiehda hekk kif Riesaq it-​Tmiem

¹ L-​istaġun tal-​ħsad huwa żmien mimli ferħ. Huwa wkoll żmien għal xogħol iebes. Hemm biss żmien limitat biex tinġabar iż-​żargħa. Il-​ħaddiema ma jażżardawx jitnikkru f’xogħolhom.

² Billi tkellem b’mod figurattiv, Ġesù qabbel “tmiem id-​dinja” maʼ żmien il-​ħsad. (Mt. 13:39) Qed ngħixu fil-​konklużjoni taʼ din is-​sistema t’affarijiet, fejn fadal żmien limitat biex tingħata xiehda “fid-​dinja kollha.” (Mt. 24:14) Hekk kif it-​tmiem riesaq dejjem eqreb, għandna bżonn nintensifikaw sehemna fil-​ministeru. Għala? Ġesù spjega: “Il-​ħsad huwa kbir, iżda l-​ħaddiema ftit.”​—Mt. 9:​37, 38; Rum. 12:11.

³ Naħdmu b’Urġenza: Meta Ġesù beda x-​xogħol grandjuż tiegħu taʼ l-​ippridkar, kellu biss tliet snin u nofs biex iwettaq dak li kien ġie inkarigat jagħmel. Hu ppriedka b’sens t’urġenza, billi qal: “Jeħtieġli nxandar l-​Evanġelju tas-​Saltna taʼ Alla . . . , għax għalhekk kont mibgħut.”​—Lq. 4:43.

⁴ Ġesù nissel sens simili t’urġenza fid-​dixxipli tiegħu. (Mk. 13:​32-37) Kien għalhekk li “kuljum, fit-​tempju u fi djarhom [“minn dar għal dar,” New World Translation], kienu jgħallmu u jxandru bla waqfien li Ġesù hu l-​Messija.” (Atti 5:42) Attivitajiet inqas importanti ma kellhomx il-​prijorità f’ħajjithom. Minkejja li kienu ftit, irnexxielhom jippridkaw l-​aħbar tajba “lill-​ħlejjaq kollha taħt is-​smewwiet.”​—Kol. 1:23.

⁵ Għandna iktar għalfejn nikkultivaw dak l-​istess sens t’urġenza issa, peress li ‘t-​tmiem taʼ kollox hu qrib.’ (1 Pt. 4:7) Jehovah ffissa jum u siegħa għat-​tmiem taʼ din is-​sistema t’affarijiet. (Mt. 24:36) Ix-​xogħol taʼ l-​ippridkar se jkun intemm fiż-​żmien li baqaʼ. Huwa minħabba f’hekk li nkomplu nżidu l-​isforzi tagħna biex nilħqu iżjed u iżjed nies bl-​aħbar tajba.

⁶ Billi nintensifikaw sehemna fix-​xogħol t’għoti taʼ xiehda hekk kif riesaq it-​tmiem, se jkollna s-​sodisfazzjon li ngħidu lil Jehovah, bħalma qallu Ġesù: ‘Temmejna x-​xogħol li tajtna nagħmlu.’​—Ġw. 17:4.