“Għandi Mmur Noqgħod Xi Mkien Ieħor?”
1 Ħafna qaddejja dedikati taʼ Jehovah marru jaqdu fejn hemm iktar bżonn bi tweġiba għall-kmand taʼ Ġesù biex ‘imorru jagħmlu dixxipli mill-ġnus kollha.’ (Mt. 28:19) Huma qed jimitaw lil Pawlu, li wieġeb għal din is-sejħa: “Ejja l-Maċedonja u għinna.” (Atti 16:9) Hemm bżonn l-għajnuna f’Għawdex. Jekk qed taħseb li tmur toqgħod Għawdex biex tkabbar il-ministeru tiegħek, kif taħseb li dan jistaʼ jsir b’mod prattiku?
2 Imxi Pass Pass: Hemm xi territorju li ma tantx jinħadem fil-kongregazzjoni tiegħek? Jekk iva, tistaʼ tuża l-isforzi tiegħek u tikkonċentra fuq dan it-territorju. Qabel ma tiddeċiedi li tmur toqgħod xi mkien, tkellem maʼ l-anzjani tiegħek biex tara jekk huma jħossux li int preparat li tmur toqgħod xi mkien ieħor. Tistaʼ tistaqsi lill-indokratur tas-circuit tiegħek x’jaħseb dwar dan. Wara li tqis in-nefqa, forsi tkun trid taħsibha sew jekk tmurx tgħin f’Għawdex. Jekk din hi x-xewqa tiegħek, int flimkien mal-ġemgħa taʼ l-anzjani tiegħek għandkom tiktbu lill-uffiċċju tas-Soċjetà f’Malta, billi ssemmu d-dettalji u l-privileġġi spiritwali li gawdejt minn mindu ilek fil-verità. Tkun ħaġa għaqlija li żżur Għawdex qabel ma tiddeċiedi jekk tmurx toqgħod hemmhekk għal dejjem jew le.
3 Oqgħod Attent dwar li Tmur Toqgħod Xi Mkien Ieħor: Numru li dejjem qed jiżdied minn ħutna qed imorru joqogħdu f’pajjiżi oħra għax qed ifittxu livell aħjar t’għajxien jew biex jevitaw il-moħqrija. Sadanittant, xi wħud waqgħu fin-nassa li jħejjulhom individwi bla prinċipji. Dawn iwegħdu li jgħinuhom jistabbilixxu ruħhom fil-pajjiż ġdid sempliċement biex jiħdulhom il-flus u mbagħad jabbandunawhom. F’xi każi, dawn l-individwi saħansitra jipprovaw iġagħlu lil dawn l-uħud, li jmorru joqogħdu f’pajjiżhom, jagħmlu xogħol immorali. Meta jirrifjutaw, dawn jispiċċaw waħedhom f’pajjiż ġdid bla ma jkunu jistgħu jagħmlu xejn. B’hekk, is-sitwazzjoni tagħhom tkun saret agħar minn dik li kellhom qabel f’pajjiżhom. Saħansitra jistgħu jispiċċaw jitolbu lil xi aħwa biex isibulhom post fejn joqogħdu jew jgħinuhom b’xi mod jew ieħor, u b’hekk ipoġġu piż fuq familji Kristjani oħra li qed jipprovaw jiġġieldu mal-problemi u d-diffikultajiet tagħhom stess. Xi membri taʼ xi familji li marru joqogħdu xi mkien ieħor mingħajr ma qagħdu jaħsbuha sew, spiċċaw li nfirdu minn xulxin, u familji oħrajn iddgħajfu spiritwalment.—1 Tim. 6:8-11.
4 Jekk tixtieq tmur toqgħod xi mkien ieħor għall-vantaġġ persunali tiegħek, żomm f’moħħok li tmur fejn tmur, żgur li se jkun hemm xi problemi x’tiffaċċja. Huwa iktar faċli li tegħleb il-problemi f’post fejn diġà taf il-lingwa u l-kultura, minflok ma tibda mill-ġdid f’postijiet li m’intix familjari magħhom.