Oqgħod Attent għax-​Xogħlijiet Meraviljużi t’Alla

¹ Għal tlett ijiem tant sbieħ aħna ltqajna għall-​Konvenzjoni Distrettwali “Nagħmlu Dak li Tgħid il-​Kelma t’Alla.” Neħħejna minn moħħna l-​ħsibijiet tal-​ħajja taʼ kuljum u kkonċentrajna fuq ix-​xogħlijiet meraviljużi taʼ Jehovah. L-​iskop tal-​programm kien biex ikabbar il-​fidi tagħna f’Alla u fil-​Kelma tiegħu, insaħħu r-​relazzjoni tagħna miegħu, u nżidu ż-​żelu tagħna għall-​ministeru. Kif qed nibbenefikaw mill-​affarijiet li ġejna mgħallmin?—Ġw. 13:17.

² Il-​Familji Jobdu l-​Kelma t’Alla: Is-​simposju “Obdi l-​Kelma t’Alla” għenna neżaminaw il-​kundizzjoni spiritwali tal-​familji tagħna. It-​tfal jieħdu pjaċir jitgħallmu. B’hekk, ġenituri devoti ġew inkuraġġiti biex l-​istudju tal-​Bibbja tal-​familja jagħmluh bħala l-​pedament biex jibnu familja b’saħħitha spiritwalment. Ħafna mill-​kapijiet tal-​familja qed jiddiskutu maʼ wliedhom iż-​żgħar il-​browxer il-​ġdid Int Tistaʼ Tkun il-​Ħabib t’Alla! Dan se jgħinhom jiżviluppaw relazzjoni hienja u fiż-​żgur maʼ Jehovah. Ġenituri, għallmu lil uliedkom kif għandhom joqogħdu attenti għal dak li jħoss Alla. Uru l-​imħabba tagħkom stess għalih u għall-​affarijiet li jagħmel. (Salm 103:2) Aħdmu flimkien biex tpoġġu u tilħqu miri spiritwali u biex tkunu involuti bis-​sħiħ f’li taqdu lil Jehovah.

³ Il-​Kelma t’Alla Ddawwal il-​Mogħdija Tagħna: Ħadna ħafna pjaċir li rċivejna l-​ktieb il-​ġdid Il-​Profezija taʼ Isaija—Dawl għall-​Bnedmin Kollha I. Fejn wasalt fil-​qari taʼ dan l-​ewwel volum? Il-​ktieb taʼ Isaija jbassar il-​ġudizzji mhux pjaċevoli fuq il-​ġnus li jiċħdu ’l Alla kif ukoll il-​barkiet sbieħ tas-​Saltna għan-​nies t’Alla. (Is. 34:2; 35:10) Ukoll, dan jibni l-​fidi u l-​fiduċja f’Jehovah u fil-​mod kif hu jagħmel l-​affarijiet.—Is. 12:2-5.

⁴ Waqt li tkun qed taqra Il-​Profezija taʼ Isaija I, int tistaʼ mill-​bidunett tara kif Isaija żamm l-​integrità tiegħu lejn Jehovah hekk kif kien imdawwar bil-​ħażen. Meta rċieva l-​istedina biex ikun il-​messaġġier t’Alla, Isaija wieġeb: “Hawn jien: ibgħat lili!” (Is. 6:8) Li timmedita fuq l-​ispirtu li wera taʼ li jkun lest li jaġixxi se jinkuraġġik biex tkompli tippriedka l-​aħbar tajba, billi jkollok sehem sħiħ f’li “l-​ġnus kollha jkollhom xhieda.”—Mt. 24:14.

⁵ Jekk noqogħdu attenti għax-​xogħlijiet taʼ Jehovah se nkunu qed infaħħru ferm il-​kobor tiegħu. Għalhekk, għożżu l-​privileġġ li tagħmlu dak li tgħid il-​Kelma t’Alla!