Nikkultivaw Intimità maʼ Jehovah
1. Waħda oħt xi rrealizzat dwar ir-rutina spiritwali tagħha?
1 “Ili neżisti fil-verità għal madwar dawn l-aħħar 20 sena billi sempliċement immur il-laqgħat u nieħu sehem fil-ministeru taʼ l-għalqa,” ammettiet waħda oħt Kristjana. Madankollu, hi tkompli: “Wasalt għall-konklużjoni li għalkemm dawn l-affarijiet huma importanti, bihom biss m’iniex se nkun b’saħħti biżżejjed meta s-sitwazzjoni tibda ssir diffiċli. . . . Issa nirrealizza li rrid naħsibha mod ieħor u nibda programm taʼ studju bis-sens sabiex verament insir naf lil Jehovah u nsir inħobbu u napprezza dak li tana Ibnu.”
2. Għala huwa importanti li nikkultivaw intimità maʼ Jehovah?
2 Persuna trid tagħmel sforz biex tibni relazzjoni persunali mill-qrib maʼ Jehovah. Teħtieġ iktar milli sempliċement ikollha rutina t’attività Kristjana. Jekk nonqsu li nikkomunikaw regolarment maʼ Jehovah, maż-żmien nistgħu nibdew inqisuh bħal xi ħadd li xi darba kien ħabib tal-qalb imma li issa tlifna l-kuntatt miegħu. (Apk. 2:4) Ejja neżaminaw kif l-istudju persunali tal-Bibbja u t-talb jistgħu jgħinuna nsiru midħla taʼ Jehovah, jew nikkultivaw intimità miegħu.—Salm 25:14.
3. Kif għandna nagħmlu l-istudju persunali tagħna sabiex nersqu qrib lejn Alla?
3 It-Talb u l-Meditazzjoni Huma Vitali: L-istudju persunali li jitmaʼ l-qalb jinvolvi iktar milli sempliċement nimmarkaw il-punti prinċipali fil-materjal li nistudjaw u nfittxu l-iskritturi ċitati. Dan jinkludi li aħna nirriflettu fuq x’qed jurina t-tagħrif dwar it-triqat, il-livelli, u l-personalità taʼ Jehovah. (Eżo. 33:13) Il-fatt li nifhmu affarijiet spiritwali jeffettwa l-emozzjonijiet tagħna u jqanqalna naħsbu dwar ħajjitna stess. (Salm 119:35, 111) L-istudju persunali għandu jsir bl-iskop li nersqu qrib lejn Jehovah. (Ġak. 4:8) Studju bis-serjetà jeħtieġ il-ħin kif ukoll l-ambjent addattat, u studju regulari jeħtieġ id-dixxiplina. (Dan. 6:11 [6:10, NW]) Anki jekk ħajtek hi mimlija daqs bajda, qiegħed int twarrab il-ħin kuljum biex timmedita fuq il-kwalitajiet meraviljużi taʼ Jehovah?—Salm 119:147, 148; 143:5.
4. It-talb qabel l-istudju persunali kif jgħinna nikkultivaw intimità maʼ Jehovah?
4 It-talb mill-qalb huwa parti vitali minn studju persunali bis-sens. Sabiex il-veritajiet Bibliċi jeffettwawlna qlubna u jqanqluna ‘nagħtu lil Alla l-qima li togħġbu bil-ġieħ u bil-biżaʼ,’ għandna bżonn lispirtu qaddis t’Alla. (Lhud 12:28) Għaldaqstant, kulmeta nqattgħu ftit ħin nistudjaw għandna nibdew billi nitolbu bil-ħniena lil Jehovah għall-ispirtu tiegħu. (Mt. 5:3) Meta nimmeditaw fuq l-Iskrittura u nużaw il-pubblikazzjonijiet li l-organizzazzjoni taʼ Jehovah ipprovdiet bħala għajnuna għall-istudju, inkunu qed niftħu qalbna quddiem Jehovah. (Salm 62:9 [62:8, NW]) L-istudju b’dan il-mod huwa att taʼ qima li bih nesprimu d-devozzjoni lejn Jehovah u nsaħħu r-rabta li għandna miegħu.—Ġuda 20, 21.
5. Għala huwa importanti li aħna nimmeditaw fuq il-Kelma t’Alla kuljum?
5 Bħal f’kull relazzjoni oħra, ir-relazzjoni tagħna maʼ Jehovah irridu nieħdu ħsiebha kontinwament sabiex din tkompli tikber matul ħajjitna. Għaldaqstant, jalla aħna nsibu l-ħin kuljum biex nersqu qrib lejn Alla, għax nafu li hu, min-naħa tiegħu, se jersaq qrib lejna.—Salm 1:2, 3; Efes. 5:15, 16.