L-Għaqda Kristjana Vera—Kif?
1 X’inhi dik il-ħaġa li tistaʼ tgħaqqad lil iktar minn sitt miljun ruħ minn 234 pajjiż u 380 grupp taʼ lingwi differenti? Hija biss il-qima lejn Alla Jehovah. (Mik. 2:12; 4:1-3) Ix-Xhieda taʼ Jehovah jafu minn esperjenza persunali li l-għaqda Kristjana vera hija realtà llum. Bħala “merħla waħda” taħt ir-“ragħaj wieħed” tagħna, aħna determinati li nirreżistu l-ispirtu tad-dinja li joħloq firda.—Ġw. 10:16; Efes. 2:2.
2 L-iskop li ma jfallix t’Alla huwa li l-bnedmin u l-anġli kollha jkunu magħqudin fil-qima vera. (Apk. 5:13) Minħabba li kien jaf l-importanza taʼ dan, Ġesù talab bil-ħrara għall-għaqda tas-segwaċi tiegħu. (Ġw. 17:20, 21) Kull wieħed u waħda minna kif nistgħu nikkontribwixxu għall-għaqda tal-kongregazzjoni Kristjana?
3 Kif Tinkiseb l-Għaqda: Mingħajr il-Kelma u l-ispirtu t’Alla, l-għaqda Kristjana kienet tkun impossibbli. L-ispirtu t’Alla se jkun jistaʼ jopera mingħajr tfixkil f’ħajjitna meta napplikaw dak li naqraw fil-Bibbja. Permezz taʼ dan se nkunu nistgħu ‘nżommu spirtu wieħed bir-rabta tas-sliem.’ (Efes 4:3) Se jqanqalna biex nistabru b’xulxin bl-imħabba. (Kol. 3:13, 14; 1 Pt. 4:8) Tippromwovi int l-għaqda billi timmedita kuljum fuq il-Kelma t’Alla?
4 L-inkarigu tagħna biex nippridkaw u biex nagħmlu dixxipli jgħaqqadna flimkien ukoll. Meta naħdmu m’oħrajn fil-ministeru, billi ‘nissieltu b’ruħ waħda għall-fidi taʼ l-Evanġelju,’ aħna nsiru ‘sħab fil-ħidma għat-tixrid tal-verità.’ (Flp. 1:27; 3 Ġw. 8) Hekk kif nagħmlu dan, ir-rabtiet li jgħaqqdu taʼ l-imħabba fil-kongregazzjoni se jissaħħu. Għax ma tgħidx lil xi ħadd li ilek ma taħdem miegħu biex jakkumpanjak fil-ministeru taʼ l-għalqa din il-ġimgħa?
5 Kemm aħna privileġġati li aħna parti mill-unika fratellanza internazzjonali vera fuq l-art illum! (1 Pt. 5:9) Ftit ilu, eluf esperjenzaw direttament din l-għaqda globali fil-Konvenzjonijiet Internazzjonali “Agħtu Glorja lil Alla.” Jalla kull wieħed u waħda minna nagħtu sehem f’din l-għaqda prezzjuża billi naqraw il-Kelma t’Alla kuljum, billi nirranġaw id-differenzi bl-imħabba, u billi nippridkaw l-aħbar tajba “b’qalb waħda.”—Rum. 15:6.