Għandna Nirrispettaw l-​Awtorità taʼ Jehovah

Maʼ xiex tassoċja l-​ismijiet tal-​qedem Koraħ, Datan, u Abiram? Mar-​ribelljoni! Kontra xiex? L-​awtorità divina. Id-​dettalji dwar il-​korsa traġika tagħhom huma dokumentati f’​Numri kapitlu 16, u tistaʼ ssib deskrizzjoni ġenerali taʼ dan ir-​rakkont fl-​artiklu “Issottometti Ruħek Lealment għall-​Awtorità Divina” fit-​Torri taʼ l-​Għassa taʼ l-​1 t’Awissu, 2002. Ikun taʼ benefiċċju jekk taqra dan il-​materjal, u mbagħad tagħti daqqa t’għajn lejn il-​preżentazzjoni li ġġagħlek taħseb li nsibu fil-​vidjo Respect Jehovah’s Authority (Irrispetta l-​Awtorità taʼ Jehovah). Se tkun tistaʼ tara l-​konflitt li żviluppa bejn l-​ulied leali taʼ Koraħ u missierhom ir-​ribelluż li ħadha kontra s-​Sovran taʼ l-​univers. (Num. 26:​9-​11) Din id-​drama ħajja bbażata fuq ir-​realtà għandha tqanqalna lkoll biex niżviluppaw il-​lealtà tagħna lejn Jehovah b’mod iktar assolut.

Hekk kif tara l-​vidjo, fittex għall-​evidenza li turi li Koraħ u dawk li rribellaw miegħu fallew it-​test tal-​lealtà tagħhom b’sitt modi kruċjali: (1) Kif urew diżrispett għall-​awtorità t’Alla? (2) Kif ħallew il-​kburija, l-​ambizzjoni, u l-​għira jeffettwawhom? (3) Kif iffokaw fuq l-​imperfezzjonijiet taʼ dawk maħturin minn Jehovah? (4) X’tip t’attitudni taʼ tgergir żviluppaw? (5) Għala ma baqgħux kuntenti bil-​privileġġi li kellhom fis-​servizz tagħhom? (6) Kif ħallew il-​lealtà lejn ħbiebhom u l-​familja tagħhom tiġi qabel il-​lealtà lejn Alla?

Ikkunsidra kif il-​lezzjonijiet mgħallmin f’din id-​drama Biblika jeffettwaw il-​ħarsa persunali tagħna lejn l-​awtorità divina llum: (1) Kif għandna nirreaġixxu għad-​deċiżjonijiet li jieħdu l-​anzjani fil-​kongregazzjoni, u għala? (2) Kif nistgħu nneħħu kull tip taʼ motiv ħażin li jistaʼ jikber ġewwa fina? (3) Kif għandna nirreaġixxu għall-​imperfezzjonijiet taʼ dawk li huma maħturin biex jieħdu t-​tmexxija? (4) X’nistgħu nagħmlu jekk jibda jiżviluppa spirtu taʼ tgergir f’qalbna? (5) Kif għandna nħossuna dwar kull privileġġ li ningħataw? (6) Min qatt m’għandu jieħu l-​prijorità qabel il-​lealtà tagħna lejn Alla, u dan meta jistaʼ jkun diffiċli għalina?

Wara li tiġi diskussa din l-​informazzjoni fil-​kongregazzjoni, għala ma terġax tara dan il-​vidjo? Jalla dan ikompli jsaħħaħlek ir-​raġunijiet għala għandna nirrispettaw l-​awtorità taʼ Jehovah!​—Salm 18:25; 37:28.