Edukazzjoni li Twassal għall-Ħajja
1 Kemm hu premjanti li tara għajnejn in-nies jixegħlu hekk kif jibdew jifhmu l-verità mill-Kelma t’Alla! Meta taqsam m’oħrajn l-għarfien dwar Alla u l-iskop tiegħu għall-umanità tħossok tassew sodisfatt. Din l-edukazzjoni tistaʼ twassal individwu għall-ħajja taʼ dejjem.—Ġw. 17:3.
2 Għala Superjuri: L-edukazzjoni llum hija offruta bi kważi kwalunkwe mezz possibbli u fuq kull suġġett immaġinabbli. (Koħ. 12:12) Imma dan l-għarfien ma jistax jitqabbel mal-valur taʼ “l-affarijiet grandjużi t’Alla.” (Atti 2:11) Irnexxielha l-edukazzjoni li toffri d-dinja tiġbed lill-bnedmin xi ftit eqreb lejn il-Ħallieq u tgħinhom isiru jafu l-iskop tiegħu? Għenithom lin-nies jifhmu x’jiġri meta mmutu jew għala hawn daqshekk tbatija? Tathom tama lin-nies? Għenet biex larranġament tal-familja jmur għall-aħjar? Le. Bl-edukazzjoni divina biss nistgħu aħna nsibu t-tweġibiet veri għall-iktar mistoqsijiet importanti tal-ħajja.
3 L-edukazzjoni divina tipprovdi xi ħaġa li hija nieqsa ħafna fid-dinja taʼ llum—l-iżvilupp morali. Il-Kelma t’Alla tneħħi għalkollox ir-razziżmu, it-tribwaliżmu, u n-nazzjonaliżmu mill-qlub taʼ dawk li jaċċettaw u japplikaw it-tagħlim tagħha. (Ebr. 4:12) Din qanqlet lin-nies biex jaqtgħu kull tip taʼ vjolenza u biex ‘jilbsu l-personalità l-ġdida.’ (Kol. 3:9-11; Mik. 4:1-3) Iktar minn hekk, l-edukazzjoni divina tat is-saħħa lil miljuni taʼ nies biex jegħlbu prattiċi u drawwiet li ma jogħġbux lil Alla minkejja li kienu stabbiliti fis-sod ġo qalbhom.—1 Kor. 6:9-11.
4 Għala Issa Hu Urġenti: L-Istruttur il-Kbir tagħna jżommna informati dwar it-tifsir taż-żmien li qed ngħixu fih. Il-ġudizzji profetiċi tiegħu fihom informazzjoni aġġornata li trid tiġi proklamata mad-dinja kollha. (Riv. 14:6, 7) Kristu qed isaltan fis-smewwiet, l-imperu dinji taʼ reliġjon falza dalwaqt se jinqered, u s-Saltna t’Alla tinsab lesta biex teqred il-gvernijiet kollha taʼ l-art. (Dan. 2:44; Riv. 11:15; 17:16) Għalhekk, huwa urġenti li n-nies jirrikonoxxu s-Sultan t’Alla li qed isaltan bħalissa, joħorġu minn Babilonja l-Kbira, u jsejħu isem Ġeħova bil-fidi. (Salm 2:11, 12, Karm Żammit; Rum. 10:13; Riv. 18:4) Jalla jkollna l-akbar sehem possibbli f’li nagħtu lill-oħrajn l-edukazzjoni li twassal għall-ħajja.