Preparat Int għal Diżastru Naturali?
1. Għala huwa għaqli li nkunu preparati għal xi diżastru?
1 Kull sena, miljuni taʼ nies madwar id-dinja, inkluż ħafna minn ħutna, jiġu effettwati minn terremoti, tsunami, monsuni, uragani, tornadi, u għargħar. Ladarba d-diżastri naturali jseħħu bla mistenni u jistgħu jeffettwaw lil kull wieħed u waħda minna, huwa tajjeb li nkunu preparati.—Prov. 21:5.
2. Għala huwa tajjeb li nagħtu l-indirizz u n-numru(i) tat-telefon tagħna lill-anzjani?
2 Minn Qabel: Xi drabi l-awtoritajiet ikunu jistgħu javżaw b’xi diżastri li jkunu ġejjin. Huwa importanti li nagħtu kas dawn it-twissijiet. (Prov. 22:3) F’sitwazzjonijiet bħal dawn l-anzjani se jipprovaw jikkuntattjaw lil kulħadd fil-kongregazzjoni ħalli jgħinuhom biex jagħmlu t-tħejjijiet meħtieġa. Wara xi diżastru, l-anzjani wkoll se jistinkaw biex jikkuntattjaw lil kulmin jissieħeb magħhom fil-kongregazzjoni sabiex jaraw jekk jinsabux tajbin u jekk għandhomx bżonn xi għajnuna. Jistaʼ jinħela ħin prezzjuż jekk l-anzjani ma jkollhomx informazzjoni eżatta biex jagħmlu kuntatt maʼ kulħadd. Għalhekk, huwa importanti li l-pubblikaturi jagħtu l-indirizz u n-numru(i) tat-telefon taʼ fejn joqogħdu lis-segretarju u lill-indokratur taʼ l-istudju tal-ktieb.
3. Kif nistgħu nikkooperaw maʼ l-anzjani jekk ngħixu f’post li spiss isiru d-diżastri?
3 Jekk il-kongregazzjoni tinsab f’post li spiss isiru d-diżastri, l-anzjani jistgħu jitolbu lill-pubblikaturi biex jagħtuhom l-isem u n-numru tat-telefon taʼ xi qarib jew ħabib li jgħix xi mkien ieħor u li jistaʼ jiġi kuntattjat f’każ t’emerġenza. Dan jistaʼ jippermetti lill-anzjani biex isibu lil dawk li jkunu ġew evakwati. L-anzjani forsi jkunu jixtiequ wkoll jagħmlu pjan t’emerġenza għall-kongregazzjoni li jinkludi xi affarijiet bħal lista sempliċi taʼ provvisti t’emerġenza li kull wieħed għandu jkollu, arranġamenti għall-evakwazzjoni, u kif se jiġu megħjunin dawk bi bżonnijiet speċjali. Huwa importanti li dak li jkun jikkoopera maʼ dawn l-arranġamenti kollhom imħabba.—Ebr. 13:17.
4. X’għandna nagħmlu jekk iseħħ xi diżastru fejn noqogħdu?
4 Wara Xi Diżastru: X’għandek tagħmel jekk iseħħ xi diżastru fejn toqgħod? Kun ċert li l-familja tiegħek tingħata l-bżonnijiet fiżiċi minnufih. Jekk tkun tistaʼ, fejn ikun hemm bżonn għin lil oħrajn li jkunu ġew effettwati. Ipprova kkuntattja lill-indokratur taʼ l-istudju tal-ktieb tiegħek jew xi anzjan ieħor kemm jistaʼ jkun malajr. Dan għandu jsir anki jekk tinsab fis-sigurtà u m’għandekx bżonn għajnuna. Jekk għandek bżonn l-għajnuna, ibqaʼ ċert li ħutek qed jagħmlu minn kollox biex jgħinuk. (1 Kor. 13:4, 7) Ftakar li Ġeħova jaf bis-sitwazzjoni tiegħek; strieħ fuqu biex isaħħek. (Salm 37:39; 62:9 [Salm 62:8, New World Translation]) Kun lest għal opportunitajiet biex tipprovdi appoġġ spiritwali u emozzjonali lil oħrajn. (2 Kor. 1:3, 4) Erġaʼ aqbad ir-rutina teokratika tiegħek kemm jistaʼ jkun malajr.—Mt. 6:33.
5. Aħna bħala Kristjani kif niġu effettwati mit-theddida taʼ xi diżastru?
5 Filwaqt li t-theddida taʼ xi diżastru toħloq ansjetà kbira lid-dinja, aħna nistgħu nħarsu lejn il-futur b’fiduċja. Dalwaqt id-diżastri kollha se jkunu xi ħaġa tal-passat. (Riv. 21:4) Sadanittant, nistgħu nieħdu passi raġunevoli biex nippreparaw għal żminijiet taʼ inkwiet u diffikultajiet hekk kif nibqgħu żelużi f’li niddikjaraw l-aħbar tajba lil oħrajn.