Infarrġu lil Dawk taʼ Qalb Miksura
1 Qatt qabel fl-istorja umana ma kien hemm bżonn il-faraġ daqs illum. Minħabba li nsegwu lis-Sultan tagħna, Kristu Ġesù, aħna wkoll naħdmu biex ‘indewwu l-qalb miksura.’—Is. 61:1.
2 Kif Għandna Nagħmlu Dan: Biex infarrġu lin-nies, fil-ministeru tagħna għandna nħejju preżentazzjoni bilanċjata u inkuraġġanti. Meta ma niffokawx id-diskussjoni tagħna fuq l-affarijiet ħżiena li jseħħu fid-dinja u fuq id-duttrini foloz, il-verità Skritturali u t-tama sabiħa tal-wegħdi taʼ faraġ t’Alla se jispikkaw fil-konversazzjoni tagħna. Dan ma jfissirx li m’għandniex nitkellmu dwar Armageddon. L-inkarigu tagħna hu li nipproklamaw kemm “is-sena tal-grazzja tal-Mulej, u jum il-vendetta taʼ Alla tagħna” kif ukoll li ‘ngħidu lill-ħażin biex jerġaʼ lura minn triqtu l-ħażina.’ Madankollu, it-twissija t’Armageddon u d-deskrizzjoni tal-qerda li se ġġib m’għandhomx jgħattu t-tema taʼ “l-aħbar tajba tas-saltna.”—Is. 61:2; Eżek. 3:18; Mt. 24:14.
3 Minn Bieb għal Bieb: Huwa komuni li nsibu nies skuraġġiti minħabba l-mard, il-mewt taʼ xi ħadd maħbub, l-inġustizzji, jew il-problemi ekonomiċi. Bħala wħud li nimitaw lil Kristu, aħna niġu ‘mqanqlin u nitħassruhom’ u nuru attitudni taʼ mogħdrija lejn dawk li niltaqgħu magħhom fil-ministeru. (Lq. 7:13; Rum. 12:15) Għalkemm nuruhom skrittura jew tnejn konnessi mal-problema, aħna għandna nkunu ‘ħfief biex nisimgħu,’ u b’hekk inħallu lill-individwu jesprimi s-sentimenti tiegħu. (Ġak. 1:19) Jekk l-ewwel nagħtuhom widen, imbagħad se nkunu mħejjijin aħjar biex infarrġuhom.
4 F’mument xieraq fil-konversazzjoni, nistgħu ngħidulhom: “Nixtieq naqsam miegħek xi kliem inkuraġġanti mill-Bibbja.” Għandna nużaw l-għaqal biex noqogħdu lura milli nikkoreġu kwalunkwe ħarsa żbaljata li għandu mnejn jesprimi l-individwu. Minflok, għandna niffokaw fuq li ninkuraġġuh u nfarrġuh billi nużaw l-Iskrittura biex inqawwulu qalbu. F’dan ir-rigward, int tistaʼ tara x’jgħid il-ktieb Reasoning From the Scriptures f’paġni 117-121 taħt it-titlu “Encouragement” (Inkuraġġiment). Jew inkella tistaʼ tagħti lill-inkwilin kopja tal-fuljett Faraġ għal dawk Dipressi u tirrivedi miegħu l-materjal inkuraġġanti li fih.
5 Fittex Opportunitajiet biex Tfarraġ lil Oħrajn: Taf int jekk xi ġâr, sieħeb tax-xogħol jew taʼ l-iskola, jew membru tal-familja għandux bżonn il-faraġ? Għala ma tagħmilx sforz biex iżżur lil individwi bħal dawn f’darhom bil-mira li taqsam magħhom faraġ mill-Iskrittura? Jekk tkun taf għalxiex għandhom bżonn il-faraġ, int se tkun tistaʼ tipprepara għal dik is-sitwazzjoni partikulari. Xi wħud użaw l-ittri jew it-telefon biex jagħmlu dan. Imħabba vera għal ġârna għandha tqanqalna nħossu għal xulxin u nipprovdu l-faraġ meħtieġ mill-Iskrittura.—Lq. 10:25-37.
6 Iva, aħna ngħatajna l-inkarigu li nfarrġu lil dawk imnikktin, li nferrħu l-qlub imtaqqlin, u li nagħtu tama taʼ futur sabiħ. Dan hu t-tip taʼ faraġ li għandhom bżonn in-nies madwar id-dinja. Jekk nitkellmu bil-ferħ dwar il-ħafna affarijiet tajbin li Alla wiegħed, aħna se nfarrġu u nagħtu tama lil dawk taʼ qalb onesta. Jalla dejjem inżommu f’moħħna l-bżonn li ‘ndewwu l-qalb miksura.’—Is. 61:1.