‘Imxi mill-​Qrib Wara l-​Passi Tiegħu’

1. Kif nistgħu nsiru ministri effettivi?

¹ Ġesù ma ġiex mgħallem fl-​iskejjel rabbiniċi, u madankollu kien l-​aqwa Ministru fl-​istorja tal-​bniedem. Kemm aħna grati li ġie preservat rakkont bil-​miktub tal-​ministeru taʼ Ġesù għall-​benefiċċju tagħna! Sabiex inkunu ministri effettivi rridu ‘nimxu mill-​qrib wara l-​passi tiegħu.’—1 Pt. 2:21.

2. X’se jgħinna nikkultivaw imħabba bħal taʼ Kristu lejn in-​nies?

² Uri Mħabba Lejn in-​Nies: Ġesù tqanqal mill-​imħabba li kellu lejn in-​nies. (Mk. 6:30-34) Ħafna fit-​territorju tagħna qed ‘iħossu l-​uġigħ’ u jeħtiġuha ħafna l-​verità. (Rum. 8:22) Jekk nirriflettu fuq is-​sitwazzjoni mwiegħra tagħhom u fuq l-​interess bi mħabba li għandu Ġeħova fihom niġu mqanqlin biex nippersistu fl-​ippridkar. (2 Pt. 3:9) Barra minn hekk, in-​nies ikunu iktar lesti li jwieġbu għall-​messaġġ tagħna jekk jindunaw li jimpurtana minnhom ġenwinament.

3. Ġesù f’liema okkażjonijiet ippriedka lil oħrajn?

³ Tkellem f’Kull Opportunità: Ġesù ħa vantaġġ minn kull opportunità biex jaqsam l-​aħbar tajba m’oħrajn. (Mt. 4:23; 9:9; Ġw. 4:7-10) Bl-​istess mod, aħna rridu nkunu preparati biex nitkellmu dwar il-​verità meta nkunu għaddejjin bir-​rutina taʼ kuljum tagħna. Xi wħud iżommu fuqhom Bibbja u xi letteratura sabiex jagħtu xiehda fuq ix-​xogħol, fl-​iskola, meta jivvjaġġaw u meta jmorru jixtru, u f’okkażjonijiet oħrajn.

4. Is-​Saltna kif nistgħu nagħmluha t-​tema taʼ l-​ippridkar tagħna?

⁴ Iffoka fuq is-​Saltna: L-​aħbar tajba tas-​Saltna kienet it-​tema taʼ l-​ippridkar taʼ Ġesù. (Lq. 4:43) Għalkemm fil-​preżentazzjoni tagħna forsi ma nsemmux is-​Saltna mill-​ewwel jew direttament, inżommu f’moħħna li rridu ngħinu lill-​inkwilin jara kemm għandna bżonnha. Anki meta nsemmu l-​kundizzjonijiet ħżiena tad-​dinja li jindikaw li qed ngħixu fl-​aħħar jiem, aħna primarjament ‘inxandru aħbar tajba t’affarijiet tajbin.’—Rum. 10:15.

5. Sabiex il-​ministeru tagħna jkun effettiv, liema rwol għandu jkollha l-​Bibbja?

⁵ Strieħ fuq il-​Kelma t’Alla: Matul il-​ministeru tiegħu, Ġesù straħ fuq l-​Iskrittura. M’għallem xejn minnu nnifsu. (Ġw. 7:16, 18) Hu temaʼ lilu nnifsu mill-​Kelma t’Alla u applikaha għalih innifsu meta ġie attakkat minn Satana. (Mt. 4:1-4) Sabiex ngħallmu lil oħrajn b’mod effettiv irridu naqraw il-​Bibbja kuljum u napplikawha personalment. (Rum. 2:21) Meta nwieġbu mistoqsijiet fil-​ministeru għandna nispjegaw kif il-​Bibbja tappoġġa dak li nkunu qed ngħidu, u kulmeta jkun possibbli naqraw direttament mill-​Bibbja. Lill-​inkwilin irriduh jara li m’aħniex nesprimu opinjonijiet persunali imma li dak li ngħidu qed nibbażawh fis-​sod fuq il-​ħsibijiet t’Alla.

6. X’għamel Ġesù biex jilħaq il-​qlub tas-​semmiegħa tiegħu?

⁶ Ilħaq il-​Qalb Meta Tgħallem: “Qatt ma kien hawn bniedem ieħor li tkellem bħalu.” (Ġw. 7:46) Hekk qalu l-​uffiċjali dwar Ġesù meta l-​qassisin ewlenin u l-​Fariżej staqsew għala l-​uffiċjali m’arrestawhx. Minflok ma kien sempliċement jgħid il-​fatti, Ġesù għallem b’tali mod li laħaq il-​qlub taʼ dawk li kien jgħallem. (Lq. 24:32) Hu uża tixbihat mill-​ħajja taʼ kuljum biex jagħti l-​ħajja lil kliemu. (Mt. 13:34) Ġesù m’għabbiex lis-​semmiegħa tiegħu b’informazzjoni żejda. (Ġw. 16:12) Hu ġibed l-​attenzjoni lejn Ġeħova u mhux lejh innifsu. Bħal Ġesù, nistgħu biss insiru għalliema tajbin jekk ‘noqogħdu attenti l-​ħin kollu għat-​tagħlim tagħna.’—1 Tim. 4:16.

7. Ġesù għala ppersista fil-​ministeru?

⁷ Ippersisti Minkejja l-​Apatija u l-​Oppożizzjoni: Għalkemm Ġesù wettaq għemejjel setgħanin, ħafna ma tawhx widen. (Lq. 10:13) Anki l-​membri tal-​familja taʼ Ġesù stess ħassew li kien “tilef moħħu.” (Mk. 3:21) Minkejja dan, Ġesù ppersista. Hu żamm attitudni pożittiva għaliex kien konvint għalkollox li kellu l-​verità li setgħet teħles lill-​bnedmin. (Ġw. 8:32) Bl-​għajnuna taʼ Ġeħova, aħna wkoll determinati li ma naqtgħux qalbna.—2 Kor. 4:1.

8, 9. Kif nistgħu nimitaw lil Ġesù meta nagħmlu sagrifiċċji minħabba l-​aħbar tajba?

⁸ Agħmel is-​Sagrifiċċji Meħtiġin biex Ikollok Sehem Sħiħ: Ġesù ssagrifika kumditajiet materjali għall-​ministeru. (Mt. 8:20) Hu ppriedka mingħajr ma għeja u xi drabi sa tard fil-​jum. (Mk. 6:35, 36) Ġesù kien jaf li kellu żmien limitat biex ilesti x-​xogħol. Ladarba “ż-​żmien li fadal tqassar,” aħna wkoll, biex nimitaw lil Ġesù, irridu nagħmlu sagrifiċċji persunali mill-​ħin, mill-​enerġija, u mir-​riżorsi tagħna.—1 Kor. 7:29-31.

⁹ Kristjani taʼ l-​ewwel seklu kienu ministri effettivi minħabba li tgħallmu minn Ġesù. (Atti 4:13) Aħna wkoll nistgħu nwettqu bis-​sħiħ il-​ministeru tagħna jekk nimitaw lill-​aqwa Ministru fl-​istorja tal-​bniedem.—2 Tim. 4:5.