Ittra mill-​Uffiċċju

Għeżież Pubblikaturi tas-​Saltna:

Fil-​Kwartieri Ġenerali ġie preżentat avviż matul il-​qima taʼ fil-​għodu nhar it-​Tnejn, 4 taʼ Frar, 2008 li ntlaqaʼ b’applaws mimli entużjażmu. Dan kien jgħid: “Fi tmiem il-​ġimgħa li għadu kif għadda, waslu indokraturi li jippresiedu minn diversi kongregazzjonijiet fl-​Istati Uniti kollha. Issa jinstabu f’Patterson biex jattendu l-​ewwel klassi taʼ l-​Iskola għall-​Anzjani tal-​Kongregazzjoni.”

L-istudenti qed igawdu assoċjazzjoni li tibni mal-​familja taʼ Betel. Huma qed jattendu wkoll għall-​qima taʼ kull fil-​għodu, kif ukoll se jkunu preżenti mal-​familja taʼ Betel għall-​istudju tat-​Torri taʼ l-​Għassa t-​Tnejn fil-​għaxija. L-​iktar mument li jispikka taʼ l-​iskola se jkun fl-​aħħar jum meta taħditiet speċjali se jingħataw minn membru tal-​Kumitat tal-​Fergħa taʼ l-​Istati Uniti u minn membru tal-​Ġemgħa li Tiggverna.

Waslu ħafna espressjonijiet t’apprezzament minn anzjani li attendew. Wieħed ħu kkummenta: “Kien tassew inkuraġġanti li noqgħod għal ġimgħa f’Betel!” Ieħor kiteb: “Issa għandi iktar kuraġġ biex inwettaq ir-​responsabbiltajiet tiegħi b’iktar żelu.” Il-​kurrikulu li qed jiġi kopert bħalissa fih aspetti varji tar-​responsabbiltajiet taʼ l-​indokraturi li jippresiedu u se jgħinhom jaqdu b’mod iktar effettiv il-​bżonnijiet tal-​kongregazzjoni. (Atti 20:28) Aħna nifirħu b’dan il-​provvediment taʼ mħabba. Jekk jogħġobkom, tibagħtux tistaqsu dwar liema provvediment se jkun hemm għall-​anzjani taʼ Malta biex jattendu l-​Iskola għall-​Anzjani tal-​Kongregazzjoni. Aħna se ninformawkom mill-​ewwel hekk kif ikollna l-​informazzjoni disponibbli u l-​arranġamenti jkunu finalizzati.

Ħutkom,

Uffiċċju taʼ Malta