“Żommu Ruħkom fl-Imħabba t’Alla”
1. Għal liema skop ġie pubblikat il-ktieb “Żommu Ruħkom fl-Imħabba t’Alla”?
1 Kemm qed inħarsu ’l quddiem bil-ħerqa biex nistudjaw il-ktieb il-ġdid “Żommu Ruħkom fl-Imħabba t’Alla” fl-Istudju tal-Bibbja tal-Kongregazzjoni li se jibda fil-ġimgħa tat-23 taʼ Frar! L-ittra li l-Ġemgħa li Tiggverna indirizzat lil kulmin iħobb lil Ġeħova kkonkludiet b’dan il-kliem: “Nittamaw sinċerament li din il-pubblikazzjoni se tgħinek tkompli tapplika l-verità f’ħajtek u b’hekk iżżomm ruħek ‘fl-imħabba t’Alla . . . bil-ħajja taʼ dejjem quddiem għajnejk.’—Ġuda 21.”
2. F’liema aspetti taʼ ħajjitna se jgħinna l-ktieb il-ġdid?
2 Dak li Għandna Nistennew: Kif japplikaw il-prinċipji Bibliċi f’aspetti bħas-sħubija, id-divertiment, ir-rispett lejn l-awtorità, id-drawwiet persunali, iż-żwieġ, id-diskors, u l-użanzi tal-lokal? Il-kuxjenza tagħna se tiġi msawra fi qbil mal-livelli għoljin tas-sewwa li nsibuhom fil-Kelma t’Alla. (Salm 19:7, 8) Hekk kif tikber il-fehma tagħna dwar il-mod kif jaħseb Ġeħova, se jkollna xewqa akbar biex nogħġbuh u dan se jqanqalna biex nobdu f’kull aspett taʼ ħajjitna.—Prov. 27:11; 1 Ġw. 5:3.
3. Għala għandna nagħmlu kulma nistgħu biex nipparteċipaw fil-lezzjoni taʼ kull ġimgħa?
3 Kun Determinat li Tipparteċipa: Hekk kif tipprepara, agħmilha l-mira tiegħek li tfaħħar lil Alla fost il-poplu miġbur tiegħu. (Ebr. 13:15) Il-kongregazzjoni kollha se tikkunsidra din il-pubblikazzjoni ġdida għall-istudju flimkien. Ladarba se jkollna inqas materjal x’nikkunsidraw kull ġimgħa, se nkunu nistgħu nippreparaw bir-reqqa u dan jagħmilna kunfidenti biex naqsmu dak li tgħallimna. Il-kummenti qosra tagħna preparati sew se jqanqlu lil oħrajn għall-imħabba u l-għemejjel tajbin u se jikkontribwixxu għal diskussjoni ħajja u informattiva tal-materjal. (Ebr. 10:24) Ukoll, il-ferħ tagħna se jkun sħiħ hekk kif individwalment nesprimu l-fidi tagħna.
4. Għala hu vitali li nibqgħu nosservaw il-kmandamenti taʼ Ġeħova?
4 Fl-aħħar lejl tiegħu fuq l-art bħala bniedem, Ġesù għamel konnessjoni bejn li tosserva l-kmandamenti taʼ Ġeħova u li tibqaʼ fl-imħabba t’Alla. (Ġw. 15:10) Bl-għajnuna tal-ktieb “Fl-Imħabba t’Alla,” aħna se nkunu iktar deċiżi biex napplikaw il-prinċipji tal-Bibbja fil-ħajja taʼ kuljum u biex ‘inżommu ruħna fl-imħabba t’Alla.’—Ġuda 21.