Faħħar lil Ġeħova Kuljum
1. Il-qaddejja t’Alla x’inhuma motivati jagħmlu, u għala?
1 Is-Sultan David esprima d-determinazzjoni tiegħu biex ifaħħar lil Ġeħova “l-jum kollu,” saħansitra għal żmien indefinit. (Salm 145:2, 7, 21) Aħna wkoll għandna raġuni tajba biex infaħħru lil Ġeħova kuljum.—Salm 37:10; 145:14, 18; 2 Pt. 3:13.
2. Il-familji kif jistgħu jfaħħru lil Ġeħova kuljum?
2 F’Darna: Għandna disponibbli materjal stampat li jibni għal diskussjonijiet spiritwali siewja meta nikkunsidraw it-test tal-jum, meta ngawdu l-Qima tal-Familja, u meta nippreparaw għal-laqgħat tal-kongregazzjoni. Ħafna familji jiħduha drawwa li jkunu flimkien għallinqas għal ikla waħda kuljum. Dan jippermetti li jkun hemm konversazzjonijiet rilassati u mingħajr għaġla kif ukoll jagħti opportunitajiet biex Ġeħova jiġi mfaħħar. Diskussjonijiet informali bħal dawn li jinbdew mill-ġenituri jistgħu jkunu għajnuna importanti biex irabbu lil uliedhom “fid-dixxiplina u l-gwida mentali taʼ Ġeħova.”—Efes. 6:4; Dt. 6:5-7.
3. Liema opportunitajiet għandna meta nkunu maʼ ħutna?
3 Maʼ Ħutna: Meta nkunu fis-servizz tal-għalqa jew fil-laqgħat tal-kongregazzjoni, għandna opportunitajiet eċċellenti biex infaħħru lil Ġeħova flimkien maʼ sħabna fit-twemmin. (Prov. 15:30; Flp. 4:8; Ebr. 13:15) Ladarba lkoll inħobbu lil Ġeħova, għandu jkun faċli li ninkludu espressjonijiet sinċieri t’apprezzament għat-tjubija taʼ Ġeħova meta nkunu qed inkellmu lil xulxin.—Salm 106:1.
4. F’liema ċirkustanzi tistaʼ tfaħħar lil Ġeħova?
4 Meta Nkellmu lil Uħud Mhux tal-Istess Twemmin: Għalkemm iċ-ċirkustanzi forsi ma jħalluniex nieħdu sehem fil-ministeru pubbliku kuljum, jekk inkellmu lil sħabna tax-xogħol jew tal-iskola, u lil oħrajn madwarna, anki għal ftit minuti, dwar Ġeħova u l-iskopijiet tiegħu nistgħu nnaqqxu tama f’nies taʼ qalb onesta. (Salm 27:14; 1 Pt. 3:15) Waqt li kienet qed tivvjaġġa bl-ajruplan, waħda oħt irnexxielha tagħti xhieda lil passiġġiera oħra li tant ħassitha mfarrġa u inkuraġġita minn dak li semgħet li tat l-indirizz u n-numru tat-telefon tagħha lill-oħt sabiex ikunu jistgħu jibqgħu f’kuntatt. Hekk kif id-dinja għaddejja minn inkwiet li dejjem qed jiżdied u kundizzjonijiet li dejjem qed jeħżienu, il-poplu taʼ Ġeħova jkompli jġib “aħbar tajba taʼ xi ħaġa aħjar” lil dawk li lesti jisimgħu. Dan jagħti tama lil oħrajn u jqanqalhom biex ifaħħru lil Ġeħova.—Is. 52:7; Rum. 15:11.
5. Għala hija x-xewqa tagħna li nfaħħru lil Ġeħova, u dan x’jistaʼ jwettaq?
5 Min jaf kemm jieħu pjaċir Ġeħova jismaʼ lill-qaddejja tiegħu jfaħħruh kuljum! Bħall-ħolqien viżibbli taʼ Ġeħova li naraw madwarna, aħna wkoll nistgħu nfaħħruh kuljum f’darna, fil-kongregazzjoni, u meta nkunu qed inkellmu lil oħrajn li s’issa għadhom ma ngħaqdux magħna f’li jfaħħru lil Ġeħova.—Salm 19:1-4.